Shuar -2009 - WBT NT Drama

Karin eṉketáchma paṉ yúatin námper, Paskua tutai, jeatémamiayi. Yúsnan pujurniu úuntri̱sha Israer shuara jintinniuri̱sha aentsun ashamainia ásar itiurak máwaintiajⁱ tusar ti enentáimsarmiayi.
Nuiṉkia Jútas Iskariúti enentái̱n íwianch wai̱ntiamiayi. Nú Jútaska Jesusa unuiniamuri̱i̱n páchitkiauyayi. Yúsnan pujurniu úuntri̱n tura Yusa Uunt Je̱e̱ úuntri̱n pujuarmia nuna werimiayi. Tura Jesusan tu surukminiaiti tusa niji̱a̱i̱ chichasarmiayi. Nisha nuna antukar warasar kuit amastatji Jútasan tiármiayi. Nisha “ayu” tinia aents nékachmanum suruktaj tu enentáimsamiayi.


Wats, karin eṉketáchma paṉ yúatin námper jeamiayi. Paskua tutainiam murikchin mátin ármiayi. Tura Jesus Pítruncha, Juáṉnasha akupeak “Paskua tutai námper iwiaratarum” tutai nisha chichainiak “¿Tui̱ iwiarat tusamea wakeram?” tiármiayi. Tutai Jesus chicharainiak “Péprunam wetarum. Jearum áishmaṉ yumin takaku wekáa wainkiattarme. Nú aishmaṉ nemartiarum. Tura je̱á̱ waya̱kui nú je̱a̱ nérenniuri̱ chichareakrum ‘Uunt chichartamuk unuiniamurja̱i̱ Paskua yurumátin ¿tui̱ aa? túramui’ titiarum. Tákurmin nu nérentin yakí̱ uunt kuártun ashí iwiaramun iniakturmastatrume. Nui̱ ii yurumátin iwiaratarum” tímiayi. Tutai nisha wéar Jesus tímiania tímiatrusaṉ wáinkiarmiayi. Tura Paskua namperan nui̱ iwiararmiayi.
Yurumátin jeamtai ni unuiniamuri̱ji̱a̱i̱ Jesus ekentsa yurumtainiam pujusármiayi. Pujusármatai Jesus chichaak “Wisha játsuk atumji̱a̱i̱ ju̱ Paskua najanatniun ti wakerimjiai, atakka ju̱ nuṉkanam atumji̱a̱i̱ najanashtin asan. Tura antsu Yus akupeana nui̱ jear atak najanattaji” tímiayi.
Nuyá̱ piniṉkian achik Yusan yumiṉkias ni unuiniamuri̱n chicharainiak “Ju̱ piniṉ achikrum sunaisatarum. Kame ju̱nasha tájarme. Ju̱ nuṉkanam Yus akupeamu jeatsa̱i̱ṉkia ju̱ araka neré̱ yumiri̱nkia atakka peṉké umarchattajai.”
Nuya̱sha yurumkan achik Yusan yumiṉkias puuk súsarmiayi. Tura chicharainiak “Ju̱ka winia aya̱shruiti. Winia aya̱shur átum péṉker pujustinnium surunkattana nuiti. Winia enentáimtursarum yuátarum” tímiayi.
Tura yuruma amikiarmatai piniṉkian achik “Ju̱ piniṉ winia numparun nakumea asa uwempratin yamaram chicham najanamun nakumeawai. Winia numpar atumnian puartamprattawai. Túrasha winia surutkattana nu Wiji̱a̱i̱ métek ekentsa yurumtainmaṉ pujawai. Kame Wi, Aents Ajasuitjiana ju̱, Yus iwiaramua nútiksanak jakattajai. Túrasha Winia surutkaana nu nekaati. Ti asutniáttawai” tímiayi. Nuna antukar “Wíashitiaj, yákit” tunaim ajarmiayi.

“¿Iiji̱a̱i̱ yaki imiá naṉkamantu aint?” tunaim ajarmiayi. Tura Jesus chichaak “Ju̱ nuṉkanam akupin ainia nu, waantu enentáimtumasar akupénawai. Tura akupénakui ‘péṉker túrin áiniawai’ tuíniawai. Tura atumji̱a̱i̱ṉkia nuka atsutí. Antsu naṉkamantu ana nu, uchichia núnis ajastiniaiti tura akupeana nusha takarniua núnik ajastiniaiti. Enentáimsatarum. Ekentsa yurumtainiam pujus yurumna nu, yurumkan ajamana nuja̱i̱ ¿túa imiá nekas naṉkamantuit? ¿Yurumna nu nekas naṉkamantuchukait? Túrasha Wikia atumín yurumkan ájamua núnisnak pujajai.
Winia itiurchatrun wáinmiaj nui̱ atumsha Wiji̱a̱i̱ tuke pujumarme. Tuma asakrumin akupin ajastinian winia Apar surusu asamtai Wisha nútiksanak akupkatniun súajrume. Wi akupkátjana nui̱ atumsha Wiji̱a̱i̱ yurumáttarme tura Wiji̱a̱i̱ umartatrume, tájarme. Tura akupin pujutai̱nium pujusrum Israer shuar tuse írutkamu akupkáttarme tajai.” Tú timiayi.


Nuyá̱ Uunt Jesus chichaak “Nekaata, Semuṉká. Trikiu neré̱ tsatsamátniua áintsaṉ iwianchi uuntri̱ Satanás atumí enentái̱n páchim enentáimtikramprataj tusa seayi. Tuma ai̱ṉ Yus enentáimtustinian kajinmátki̱i̱ṉ tusan Wisha Yusan seamjai. Tura Yusai̱ waketkim ame yátsum ikiaká̱rarta” tímiayi. Tutai Semuṉ chichaak “Uuntá, sepunam eṉketmainiakuisha wisha nemarsatajme. Tura mantamainiakuisha métek jakatai” tímiayi. Takui̱ Jesus chicharuk “Pitrú, nekas tájame, yamaik atash shiniatsa̱i̱ṉ ame menaintiú natsantrurtatme” tímiayi.

Nuyá̱ Jesus chicharuk “Wisha yurumkaja̱i̱nchu, kuítji̱a̱i̱nchu, sapatja̱i̱nchu akupkámjarmena nui̱ ¿tátramsamkarum?” Nisha “Atsá peṉké tátramsachmaji” tiármiayi. Tutai Ni chicharuk “Antsu yamaikia yurumkan takakkuṉka takusti, kuítniasha núnisaṉ tura puya̱ncha takakchaka ni pushiri̱n suruk puya̱n sumakti. Nekaatarum. Yus Papinium yaunchu aarma ana nu wi túrunamuja̱i̱ uminkiattawai. Ju̱i̱ti aarma, ‘Yajauch shuarnum pachikiarmiayi.’ Warí, Yus Papinium ashí Winia aarma ana nu uminkiatniuiti.” Tutai ni unuiniamuri̱ chicharainiak “Uuntá, ju̱i̱ jimiará puyá̱ awai” tutai Nisha “Asati” tímiayi.


Nuyá̱ Jesus jiinkimiayi. Tura tuke túrin asa Uriwiu nainnium wémiayi. Ni unuiniamuri̱sha nemariarmiayi. Ai̱ jeá nin chicharuk “Itiurchat winiakui iniara̱i̱j tusarum Yus áujsatarum” tímiayi. Tuasua amik arantach, kaya naṉkimiam jeana núnik Jesus wémiayi. Tura Yusan áujsataj tusa tikishmarmiayi. Tikishmar ju̱na tímiayi “Apawá, piniṉnum yapá umartinia ántsaṉ Wi wáitsattajna nu wakerakmeka jurutkitia. Tura Wi wakerajna nucha antsu Ame wakeramna nu atí, tajai” tímiayi.
Nuyá̱ ikiaká̱rtaj tusa Yusa suntari̱ nayaimpinmaya̱ tarimiayi. Tura Jesus imiá wáitias pujak nú kakaram Yusan áujsamiayi. Tura ni se̱a̱rmari̱sha numpá ántsaṉ nuṉká kitiawarmiayi.
Yusan áujsua amik wajaki̱ ni unuiniamuri̱n werimiayi. Tura kúntuts enentáimmiari̱ji̱a̱i̱ ti pimpiki̱ kanúu tepenan tarimiayi. Nuiṉkia chicharainiak “¿Urukamtai kanúu teparum? Itiurchat winiakui iniara̱i̱j tusarum nantakrum Yus áujsatarum” tímiayi.


Jesus tuke chicháa pujái̱ untsurí shuar táarmiayi. Tura nuní̱ emka Jesusa unuiniamuri̱ Jútas náartin winimiayi. Tura Jesusan mukunattsa tarunmiayi. Támatai Jesus chicharuk “Jútasá, ¿Aents Ajasu tutai mukunamek surutkattam?” tímiayi. Jesusja̱i̱ pujuarmia nu túmamun wáinkiar “¿Uunt puya̱ja̱i̱ íjiuartatjik?” tiármiayi. Tura chikichik Yúsnan pujurniu uuntri̱ takarniúri̱ kuishi̱n untsuuri̱n tsupirkamiayi. Tura Jesus chicharainiak “Iniaisatarum.” Nuna tinia ni kuishi̱n antiṉ tsuármiayi. Nuyá̱ Yúsnan pujurniu úuntri̱n, nuyá̱ Yus je̱a̱ úuntri̱ncha tura pepru úuntri̱ncha Nin achiktai tusa tariarmia nuna chicharuk “¿Wisha kasakaitiaj. Urukamtai puya̱ja̱i̱sha numiji̱a̱i̱sha tarutniuram? Nuik Yusa Uunt Je̱e̱n tuke tsawant atumji̱a̱i̱ pujumaj nui̱ achirkachmarme. Túrasha átum kiritniumia̱ kakarmaja̱i̱ nupetkatin yamái tsawantin tsaṉkatkamuitrume” tímiayi Jesus.


Nuiṉkia Jesusan achikiar emetawar Yúsnan pujurniu uuntri̱ je̱e̱n júkiarmiayi. Tura Pítrusha íkiaṉ nemarki̱ wémiayi. Tura a̱a̱ch jinia ikiapárarmiayi. Túrawar anamuk pujuarmiayi. Pítrusha niji̱a̱i̱ pujusmiayi. Tura nuwa̱, Yúsnan pujurniu takarniúri̱ amia nu, Pítiur jinia anamuk pujan wainiak “Ju̱ áishmaṉsha Niji̱a̱i̱ pujumiayi” tímiayi. Tutai Pítiur chichaak “Nuwá̱, Nin nékatsjai” tímiayi. Tura árusaṉ chíkich nin wainiak “Amesha Niin páchitkiaitme” tímiayi. Tutai Pítiur chichaak “Atsá. Wikia aiṉkia páchitkiatsjai” tímiayi.
Chikichik ura naṉkaamasmatai chíkich apach chichaak “Nekas ju̱ aishmaṉsha Niji̱a̱i̱ pujumiayi. Warí, nisha Kariréanmaya̱ṉchakait” tímiayi. Tutai Pítiur chichaak “Ame támena núnaka nékatsjai” tímiayi. Nú chichamaik Pítiur chicháa pujai̱ṉᵏⁱ atash shiniukmiayi. Tura nuiṉkia Uunt Jesus Pítrun apajá̱s íismiayi. Tura “atash shiniatsa̱i̱ṉ ame menaintiú natsantrurtatme” Uunt Jesus timia nuna enentáimpramiayi. Nuyá̱ Pítiur jiinkí̱ tí utmiayi.


Áishmaṉ Jesusan wáiniarmia nu ti wishikiainiak awattiarmiayi. Ji̱n epetkar yapiniam awattiar chicharainiak “Nekamata, ya awatama” tiármiayi. Tura katsekainiak ti untsurí chikichnasha náṉkamas tiármiayi.


Tsawa̱rmatai Israer shuara úuntri̱sha, Yúsnan pujurniu úuntri̱sha tura Israer shuara jintinniuri̱sha iruntrar ni iruntai̱ri̱i̱n ejeniarmiayi. Nui̱ chicharainiak “Paant titiá. ¿Yus anaikiamu Kristu tutaiya núkaitiam?” Tutai Jesus chichaak “Wi ‘ee’ tákuisha, ‘nekasaiti’ tíchattarme. Tura Wi aníamsha ái̱rkashtatrume túrasha akuptúkchattarme. Tura wárik Wisha Aents Ajasuitjiana nu ashí naṉkamantu ajasan Yusa untsuurí̱ni̱ pujustatjai” tímiayi. Tutai nisha tiármiayi “¿Nuiṉkia amesha Yusa Uchirí̱ṉkaitiam?” Tutai Jesus chicharainiak “Ee, Witjiai, átum Winia túrutrumna núnisketjai.” Tutai nisha chichainiak “Warí, ¿iisha chíkich ujatkat tusar atsumajik? Imia niṉki chichaamu antukchajik” tiármiayi.

Klausytis Ruk. 22