If you would like a copy of this version please contact info@davaraudiobibles.org

Bodo Parja New Testament, CC-BY-SA-4.0, The Love Fellowship. Bodo Parja New Testament Audio Bible, CC-BY-SA-4.0, Davar Partners International, The Love Fellowship, 2023.

Bodo Parja New Testament

Bodo Parja Bible (ବ୍‌ଡ଼୍ ହ୍‌ର୍‌ଜା) by The Love Fellowship is licensed under Creative Commons Attribution-ShareAlike 4.0 License.

ସ୍‌ଡେବ୍‌ଳ୍ ଯୀଶୁ ପବିତର୍ ଆତ୍ମାର୍ ସ୍‍ଙ୍ଗ୍‍ ବର୍‍ତି ଅଇ ଶଇତାନାର୍ ଲ୍‌ଗେ ହ୍‍ଣି ପରିକ୍ୟା ଅଉତାର୍ ଗିନେ ଶୁନ୍‌ସାନ୍ ଜାଗାଇ ଗ୍‍ଲା। ଆରେକ୍‌, ଚାଳିଶ୍‍ଦିନ୍ ଆର୍ ଚାଳିଶ୍‌ ରାତି କାଇରି ନ୍‌କାଇତେ ରେଇ ସ୍‌ରାସ୍‌ରି ବେସି ବୁକ୍‍ ହାଇଲା। ଆରେକ୍‌ ଶଇତାନ୍ ତାର୍ ଲ୍‌ଗେ ଆସି କଇଲା, “ତୁଇ ଯଦି ଇଶ୍ଵରାର୍ ହଇସି, ତ୍‍ବେ ଇ ଟେଳାମ୍‍ନ୍ କେ ରୁଟି ଅମ୍‍କେ ଆଦେଶ୍ ଦେସ୍।” ମ୍‍ତର୍ ଯୀଶୁ କଇଲା, “ଲେକା ଅଇଆଚେ, ମାନାଇ ଅବ୍‍କା ରୁଟି କାଇକ୍‍ରି ବାଚି ନ୍‌କେର୍‌ତି, ମ୍‍ତର୍ ଇଶ୍ୱର୍‌ ଟଣ୍ତେହ୍‌ଣି ବାର୍‍ଲା ସ୍‍ବୁ ବାକ୍ୟ ଲ୍‌ଗେ ବାଚେଦ୍।”
ତାର୍ ହ୍‌ଚେ ଶଇତାନ୍ ଯୀଶୁକେ ଯିରୁଶାଲମ୍‌ ସ୍‌ହରେ ନ୍ଇକ୍‌ରି, ମନ୍ଦିର୍ ଚାତ୍ ଉହ୍‍ରେ ଟିଆ କ୍‌ରାଇ ତାକେ କଇଲା, “ତୁଇ ଯଦି ଇଶ୍ଵରାର୍ ହଇସି, ତ୍‍ବେ ଇତିହ୍‍ଣି ତ୍‌ଳେ ଡ୍‍ଗାଉ, କାଇତାକ୍ ଦ୍‌ର୍‌ମ୍ ଶାସ୍‌ତରେ ଲେକା ଅଇଲିଆଚେ, ସେ ନିଜାର୍ ଦୂତ୍‌ମ୍‌ନ୍‌କେ ତର୍ ବିଷୟେ ଆଦେଶ୍ ଦ୍‌ଇଦ୍, ଆରେକ୍‌ ତର୍ ହାଦ୍ ଜ୍‌ନ୍‌କ୍‌ରି ଟେଳାଇ ନ୍‍ହାଇ, ଦୂତ୍‌ମ୍‌ନ୍ ଆସି ତକେ ଆତେ ଟେକି ଦ୍‌ର୍‍ତି।”
ଯୀଶୁ ତାକେ କଇଲା, “ଆରେକ୍‌ ପବିତର୍‌ ଶାସ୍‌ତର୍ ତ୍‌ଇ ଲେକାଆଚେ, ‘ତୁମି ନିଜାର୍ ମାପ୍‌ରୁ ଇଶ୍ୱର୍‌ ପରିକ୍ୟା କ୍‍ରାନାଇ।’” ଆରେକ୍‌, ଗଟେତର୍ ଶଇତାନ୍ ଯୀଶୁକେ ଗଟେକ୍ ଉଚା ଡଙ୍ଗ୍‍ରେ ନ୍ଇକ୍‌ରି ଜ୍‍ଗତାର୍ ସ୍‍ବୁ ରାଇଜ୍‍କେ ଆର୍ ସେ ସ୍‍ବୁ ରାଇଜାର୍ ସୁନ୍ଦୁର୍‌କେ ଦ୍‌କାଇକ୍‌ରି କଇଲା, “ତୁଇ ଯଦି ଜ୍‍ବେ ମକେ ମୁଣ୍ତିଆ ମାରି ମର୍ ଆରାଦନା କ୍‍ର୍‍ସି, ତ୍‍ବେ ମୁଇ ଇରିସ୍‌ବୁ ତକେ ଦେଇନ୍ଦ୍।”
ସେତାକ୍ ଯୀଶୁ ତାକେ କଇଲା, “ଦୁର୍ ଅଉ, ଶଇତାନ୍, କାଇତାକ୍ ପବିତର୍‌ ଶାସ୍‌ତର୍ ଲ୍‌ଗେ ଲେକାଆଚେ, ‘ତୁମି ନିଜାର୍ ମାପ୍‌ରୁ ଇଶ୍ୱର୍‌‍କେ ମୁଣ୍ତିଆ ମାରାସ୍, ଆରେକ୍‌ ତାର୍ ସେ ଆରାଦନା କ୍‍ରାସ୍।’”
ସେଡେବ୍‍ଳ୍ ଶଇତାନ୍ ଯୀଶୁକେ ଚାଡିକ୍‌ରି ହ୍‍ଳାଇଲି, ଆରେକ୍‌ ଦ୍‌କା, ସ୍‌ର୍‌ଗାର୍ ଦୂତ୍‌ମ୍‌ନ୍ ଆସି ଯୀଶୁକେ ଜ୍‌ତୁନ୍ କ୍‌ରୁକେ ଲାଗ୍‍ଲାଇ।


ହ୍‌ଚେ ଡୁବେନ୍ ଯୋହନ୍‌କେ ହେରୋଦ୍ ର୍‍ଜା ଦ୍‍ରି ଜେଲ୍ ଗ୍‍ରେ ବ୍‍ର୍‍ତି କ୍‍ଲା ବ୍‍ଲି ଶୁଣି, ଯୀଶୁ ଯିହୁଦା ଦେଶ୍ ହ୍‍ଣି ଗାଲିଲୀ ଜିଲାକେ ଗ୍‍ଲା। ଆରେକ୍‌ ସେ ନାଜରିତ ସ୍‌ହର୍‌କେ ଚାଡିକ୍‌ରି ସବୂଲୂନ୍ ଆର୍ ନପ୍ତାଲି ଦେଶାର୍ ଲକ୍ ବାସାକ୍‌ଲା ଜାଗାର୍ ସ୍‍ମ୍‍ଦୁର୍ କ୍‍ଣ୍ତିଲ୍‌ଗେ ରିଲା କପର୍‍ନାହୁମ୍ ସ୍‌ହରେ ଜାଇ ସେତି ବାସା କ୍‌ଲାଇ,
ଜ୍‌ନ୍‌କ୍‌ରି ଯିଶାଇୟ ବବିଶତ୍ କ୍‌ତା କ୍‌ଉତାଲକ୍ କଇଲା ଇକ୍‍ତା ସ୍‌ତ୍ ଅଇଦ୍,
“ସବୂଲୂନ୍ ଦେଶ୍ ଆର୍ ନପ୍ତାଲି ଦେଶାର୍ ଲକ୍‍ମ୍‍ନ୍, ସ୍‍ମ୍‍ଦୁର୍ ଲ୍‌ଗେ ଆର୍ ଯର୍ଦନ୍ ଗାଡାର୍ ସେହାଟିର୍ ଯିହୁଦି ଚାଡି ବିନ୍‍ଜାତିର୍ ଗାଲିଲୀ ଜିଲାର୍ ଲକ୍‍ମ୍‍ନ୍ ଶୁଣା।
ଇଶ୍ୱର୍‌ ସେମ୍‌ନ୍‌କେ ବ୍‍ଡ୍ ଉଜାଳାର୍ ଦିପ୍ ଦ୍‍କାଇଦ୍, ଜୁଇ ଲକ୍‍ମନ୍ କି ଇଶ୍ୱର୍‌‍କେ ନ୍‍ଜାଣି ଅନ୍ଦାରେ ଆତ୍‍ତି। ସେ ଦିପ୍ ସେମ୍‌ନ୍‌କେ ନ୍‌ସେର୍‌ତା ଜୀବନାର୍ ବାଟ୍ ଦ୍‍କାଇଦ୍ ଜୁଇ ଲକ୍‍ମ୍‍ନ୍ ଇଶ୍ୱର୍‌‍କେ ନ୍‍ଜାଣି ନ୍‌ସେର୍‌ତା ମ୍‌ର୍‌ନାର୍ ବାଟେ ଜାତିରିଲାଇ।”
ସ୍‌ଡେବ୍‌ଳ୍ ଯୀଶୁ ପର୍‍ଚାର୍ କ୍‍ରି କ୍‍ମ୍‍କେ ଲାଗ୍‌ଲା, “ପାପେହ୍‌ଣି ମ୍‌ନ୍ ବାଦ୍‍ଲାଉଆ, କାଇତାକ୍ ଇଶ୍ଵରାର୍ ରାଇଜ୍ ଲ୍‌ଗେ ଆଇଲି।”


ଯୀଶୁ ଗାଲିଲୀ ଜିଲାର୍ ସ୍‌ମ୍‍ଦୁର୍ କ୍‌ଣ୍ତି ବାଟ୍ ଦେଇ ଜାତାବ୍‍ଳ୍ ଶିମୋନ୍, ଯାକେ ପିତର୍ ବ୍‍ଲି କ୍‌ଉତିରିଲାଇ, ଆରେକ୍‌ ତାର୍ ସାନ୍‍ ବାଇସି ଆନ୍ଦ୍ରିୟ, ଇ ଦୁଇ ବାଇକେ ସ୍‌ମ୍‍ଦୁର୍ କ୍‍ଣ୍ତିଲ୍‌ଗେ ଭଉଁରି ଜାଲ୍ ହ୍‌କାଉତି ରିଲାର୍ ଦ୍‍କ୍‍ଲା, କାଇତାକ୍ ସେମ୍‍ନ୍ କେଉଟ୍ ଲକ୍ ରିଲାଇ। ଯୀଶୁ ସେମ୍‍ନ୍‍‍କେ କଇଲା, “ମର୍‍ହ୍‌ଚେ ଆଶା। ମୁଇ ତୁମୁକ୍‌ମ୍‌ନ୍ ଲକ୍‌ମ୍‍ନ୍‌କେ ମର୍‍ଲ୍‌ଗେ ଆଣି ଚେଲା କ୍‌ରୁକେ ଶିକାଇନ୍ଦ୍।” ସେମାଡେ ସେମ୍‍ନ୍ ତାକାର୍ ମାଚ୍ ଦ୍‍ର୍‍ତା ଜାଲ୍ ଚାଡ୍‌ଲାଇ ଆର୍ ଯୀଶୁର୍ ହ୍‌ଚେ ହ୍‌ଚେ ଗ୍‍ଲାଇ।
ଆରେକ୍‌ ଯୀଶୁ ସେତିହ୍‍ଣି କ୍‌ଣ୍ତେକ୍ ଦୁରିକେ ଯାଇ ଜେବଦୀର୍ ହିଲାମ୍‍ନ୍ ଯାକୁବ ଆର୍ ତାର୍ ସାନ୍‍ ବାଇସି ଯୋହନ୍‌କେ ତାକାର୍ ଉବାସି ସ୍‍ଙ୍ଗ୍‍ ଡଙ୍ଗାଇ ଜାଲ୍ ହ୍‍ଜାଳ୍‌ତି ରିଲାର୍ ଦ୍‍କି ସେମ୍‍ନ୍‍‍କେ କୁଦ୍‍ଲା। ସେମାଡେ ସେମ୍‍ନ୍ ଡଙ୍ଗା ଆର୍ ସେମ୍‍ନ୍‍କାର୍ ଉବାସି ଜେବଦୀକେ ଚାଡି ଯୀଶୁର୍ ହ୍‌ଚେ ଗ୍‍ଲାଇ।


ହ୍‌ଚେ ଯୀଶୁ ଗାଲିଲୀ ଜିଲାର୍ ସ୍‌ବୁ ଗାମ୍ ମ୍‌ନ୍‌କେ ବୁଲି, ଯିହୁଦିମ୍‌ନ୍‌କାର୍ ପାର୍‌ତେନା ଗ୍‍ର୍‌ମ୍‌ନ୍‌କେ ଶିକ୍ୟା ଦେଇ ଇଶ୍ୱର୍‌ ରାଇଜ୍‍ର୍ ସୁବ୍‌କ୍‌ବର୍ ପର୍‍ଚାର୍ କ୍‍ଲା, ଆର୍ ଲକ୍‍ମ୍‍ନ୍‍କାର୍ ସ୍‍ବୁ ପର୍‍କାର୍ ରଗ୍ ଆର୍ କ୍‌ଷ୍ଟକେ ବ୍‍ଲ୍‌କ୍‍ରୁକେ ଲାଗ୍‌ଲା, ଆରେକ୍‌ ତାର୍ ବିଷୟ୍ ସିରିୟା ଦେଶ୍ ହ୍‌ତେକ୍ ଲକ୍‍ମନ୍ ଶୁଣ୍‍ଲାଇ, ଆରେକ୍‌ ବୁତ୍ ଲାଗ୍‌ଲା ଲକ୍, ମୃଗୀରୋଗୀ ଆର୍ ନିର୍‍କୁଳୀ ରଗି, ଆର୍ ସ୍‍ବୁ ବିନ୍‌ବିନ୍ ପର୍‍କାର୍ ରଗ୍ ଅଇରିଲା ଆର୍ କ୍‌ଷ୍ଟ ହାଉତା ସ୍‍ବୁ ଲକ୍‌କେ ତାର୍ ଲ୍‌ଗେ ଆନ୍‍ଲାଇ। ଆରେକ୍‌ ସେ ସେମ୍‍ନ୍‍‍କେ ବ୍‌ଲ୍‌କ୍‍ଲା। ଆରେକ୍‌, ଗାଲିଲୀ ଜିଲାର୍, ଦ୍‌ଶ୍‌ଗଟ୍ ସ୍‍ହର୍‍ ଦେକାପ୍‍ଲି, ଯିରୁଶାଲମ୍‌ ସ୍‍ହର୍‍, ଯିହୁଦା ଜିଲା ଆର୍ ଯର୍ଦନ୍ ଗାଡ୍ ସେହାଟିର୍ ବେସିଲକ୍, ଯୀଶୁର୍ ହ୍‌ଚେ ହ୍‌ଚେ ଗ୍‍ଲାଇ।

Klausytis ମାଥିଉ 4