छ्य़ेगी ङोहस्‍यी
दि छ्य़ेला “मत्तीगी प्रुहक्‍योकी या़हबु लेहङगु” म़ेदी माक्‍यो येहबा। “या़हबु लेहङगु” की तेहन्‍दा येशू मास्‍यीका मिहगी तिहक्‍पाकी तेहन्‍दाला राहङगी कुसो नाङज्‍येला जाम्‍बुलीङला फेप नाङसीन ओ़ह सोङबे मिहरोला यिह-छ्य़े डुप्‍केन थाम्‍ज्‍यीगी तिहक्‍पालेगी कोहङदा ज्‍योर्च्‍ये येह ओहले स्‍यिहङगामकी क्‍याहल्‍सी नाहङला स्‍य़ूह ङ्युहङज्‍ये येह। ताम थे़मु लाहमले “या़हबु लेहङगु” माक्‍योदी च्‍यि यिहम्‍बा म़ेदी यूहन्‍ना ३:१६ ला या़हबु पेहती प्री़हदे येहबा, “किन्‍ज्‍योगी जाम्‍बुलीङला दि ल़ेहमु चेवा जे नाङसीन, माज्‍येराङ माना मिहरोगी राहङगी च्‍यिमे च्‍यी़राङ स़ेबुला ओहराङगी तेहन्‍दाला दि जाम्‍बुलीङला ताङ चाहङ नाङसीन। किन्‍ज्‍योगी स़ेबुला यिह-छ्य़े डुप्‍के मिहया़ सुज्‍यीॱआङ तोङदी डोज्‍ये म़ेह यिहॱनाङ खोगी था़ म़ेहबाकी मिहली ज़ाङबु ज्‍योर्च्‍ये येह।”
बाइबलकी खेम्‍बा ताहक्‍पुया़ नाहङला माहङ-छ्येवा साम्‍लु च्‍यि येहबा मासीमाना या़हबु लेहङगुकी छ्य़े ज़्‍यि नाहङला तोहङस्‍यो मर्कूसकी छ्य़े प्रुहक्‍यो यिहम्‍बा माएँ साम्‍लु येहबा (मर्कूसकी ङोहस्‍यीला ज़ी़-नाङदोङ।) यिहॱनाङ मिह माहङबुराङदी साम्‍लु दि ल़ेहमुॱआङ येहबा, येशूकी स्‍याहप्‍च्‍यी च्‍यिङ्यी़ नाहङला मेहन्‍दा च्‍यी़ मत्ती मिहन थो़क्‍यो ठाल तुहएँ मिहगी (मत्ती १०:३, मर्कूस ३:१८) मर्कूसगी म़ेदी तोहङले येशूकी मिहलीकी तेहन्‍दाला आरमेइक माएँ क़ेलुला प्रुहक्‍यो येहकें। मर्कूसगी प्रुहक्‍योकी या़हबु लेहङगु थिउ-निउ पेहती प्री़ह फान्‍ज्‍यो, मत्तीगी मिह-लोह (ईस्‍वी सम्‍बत्) ५५-५६ ला फार राहङगीराङ प्रुहक्‍योकी या़हबु लेहङगुला तेहन-ताहक्‍पा पेहती पेहसीन, ओहले दि ङ्याम्‍बुराङ मर्कूसकी या़हबु लेहङगुलाॱआङ ङ्याम्‍बुराङ थिसीन।
मत्तीकी या़हबु लेहङगुकी ज्‍युक्‍स्‍योलला तेहन-ताहक्‍पा प्रुहएँगी ल़ेहदी मत्ती खोराङगीराङ ओहले खोगी रो़हया़ लाहमलेगी पेहती ग्रीक क़ेलुला प्रुहक्‍यो येहकें।
मत्तीगी प्रुहक्‍योकी १०५० आङ-टा़हङया़ नाहङला, ५०० आङ-टा़हङया़ मर्कूसकी या़हबु लेहङगुकी छ्य़ेला ज्‍योर्को येहबा। लेहमेन २५० आङ-टा़हङया़ लूकाकी या़हबु लेहङगुकी छ्य़ेला ज्‍योर्को येहबा।
बाइबलकी माहङबुराङ खेम्‍बा ताहक्‍पुया़की साम्‍लुला मत्तीकी या़हबु लेहङगुकी ज्‍युक्‍स्‍योलला तेहन-ताहक्‍पा मिह-लोह (ईस्‍वी सम्‍बत्) ७०-८० ला एन्‍टिओखिया माएँ क्‍याहसाला पेहक्‍यो यिहम्‍बा म़ेदीॱआङ माक्‍यो येहबा। मत्तीकी या़हबु लेहङगु तेहन-ताहक्‍पाला यहूदी क्‍यिहपाया़गी तेहन्‍दाला प्रुहक्‍यो येहकें। छ्य़े-ठिम निङबाला चो़वो येशूगी तेहन्‍दाला सुङ नाङग्‍योकी स्‍याहलया़ मिहरोगी मिहलीला काह-ठि जेत्‍ते तेहन्‍दा डुप्‍पा माएँकी ने़जोया़ या़हबु लेहङगुकी छ्य़ेला मत्तीगी लेहमा माहङबुराङ सुङ नाङदी येहबा।
दि छ्य़ेला येहकेन्‍गी ने़जोया़
येशू मास्‍यीकाकी चावाया़ दाङ मिहरोगी ठुङगार १:१–२:२३
बप्‍तिस्‍मा तेर्केन यूहन्‍नाकी ल़ेह-लाहम ३:१-१२
येशूकी बप्‍तिस्‍मा दाङ छेता ३:१३–४:११
येशूगी गालीलला जे नाङग्‍योकी छ्या़ले ४:१२–१८:३५
गालील यिहन्‍ज्‍यु यरूशलेम थु १९:१–२०:३४
यरूशलेमला येशूकी तिङस्‍यो साता २१:१–२७:६६
येशू टोङग्‍योलेगी सोम्‍बो ज़्‍याङदी फेप नाङग्‍यो २८:१-२०

Klausytis मत्ती छ्य़ेगी ङोहस्‍यी