 This translation was published by The Bangladesh Bible Society in 2004 © BBS 2004.  

মান্দিরা·আখো মা·ন্না খ্রাগিবা থিয়ফিল, যীশুখো সালগিচা রা·দোআংনা স্খাং বিয়া জেখো দাক্কামিং আরো স্খিয়ামিং উয়া দিমদাকখোন আংআ আংনি স্খাংনি খি·তাপও চকজক। বিখো রা·দোআংনা স্খাং বিনি বাচ্ছিগিবা জা·রিকগিবারাংনা বিয়া গিসিক রংথালগিবাচা গি·য়েতামিং। বিনি দুক চাক্কানি জা·মানো ইয়া মান্দিরাংনা বিয়া মিকখাং ফা·আমিং আরো বিনি থাংএ দংআনি গিম্মিন বিবিরা·আনিখো বাং·এন ফিন্নিকামিং। বিয়া সাল সৎব্রিনা দিপ্পাৎ জা·রিকগিবারাংনা মিকখাং ফা·এ ইসলনি সংনকনি গিম্মিন আগানামিং। উনো যীশু জা·রিকগিবারাংমুং দংমিত্তিংও বিসংনা ইন্দাকে গি·য়েতামিং, “না·সং যিরূশালেমখো ওয়াত্তে দা·আ রি·য়াংআবো, ইন্দিবা আপফানি খু·রাচাক্কে হ·ন্না গিম্মিন জে খাৎথাখো না·সং আংচা খিন্নাজক উনি হা·সেল নিচাকসোবো। যোহন চিও রিপ্পলেতনুয়ামিং, ইন্দিবা সাল বাং·গিজানি গিসেপো আপফানি উয়া খু·রাচাক্কা গিত্তা গিসিক রংথালগিবাও না·সং রিপ্পলনুয়া।”

জা·মানো জা·রিকগিবারাং থম·দাকে যীশুচা সিং·জক, “গিত্তেল, ইয়া সালো না·আ ইস্রায়েলরাংনি জাক্কো হা·খিংখো ফি·ল্লেতনুয়ামা?”
যীশু বিসংনা আগানজক, “জে সালখো বা সময়খো আপফা আন·থাংনি বিলও দন্না উখো না·সংনা হা·আইনা হন·জা। ইন্দাকোবা গিসিক রংথালগিবা না·সংনি সাক্কাও রি·বানি জা·মানো না·সং বিলখো মা·ন্নুয়া, আরো যিরূশালেম, যিহূদিয়া গিম্মিকও আরো শমরিয়া হা·দকো আরো হা·গিলসাকনি বন·খামগিবা খি·থিকোনা দিপ্পাৎ না·সং আংনি সাক্ষি হং·নুয়া।”
ইয়া খাৎথাখো আগানানি জা·মানো জা·রিকগিবারাংনি মিকখাংওন যীশুখো রা·দোআংজক আরো বিয়া গাদিলা ফিলসানি মিৎথিনাও রি·য়াংজক। যীশুনি সাক্কাচানা দো·আংমিত্তিংও জা·রিকগিবারাং সিলগাচানা মিকজাপগিজা নিএ দংআমিং। উনোন বা·রা গিব্বক গানগিবা মান্দি সাকগ্মি জা·রিকগিবারাংনি সেফাংও চাদেংএ আগানজক, “গালীলনি মান্দিরাং, ইনো চাদেংএ সিলগাচানা মুয়ানা নিএ দংআ? না·সংওনি জেখো রা·দোআংজক উয়া যীশুখো জেদাক্কে না·সং সালগিচানা রি·য়াংআখো নিকজক উয়ানদাক্কেন বিয়া রি·বাফিলনুয়া।”

উনোন জা·রিকগিবারাং জৈতুন হা·ব্রিওনি যিরূশালেমচানা রি·বাফিলজক। যিরূশালেম সংজিলমাওনি ইয়া হা·ব্রি কিলোমিটারসা চে·ল্লাও দংআমিং। সংজিলমাওনা সক্কাংএ বিসং আন·থাংথাংনি দংগিবা গাদাং সাক্কানি নকদ্রিংওনা রি·য়াংজক। ইয়া জা·রিকগিবারাং হং·জক পিতর, যোহন, যাকোব আরো আন্দ্রিয়, ফিলিপ আরো থোমা, বর্‌থলময় আরো মথি, আলফেয়নি দেফান্থি যাকোব আরো হা·সংনা খা·ফাকগিবা শিমোন আরো যাকোবনি দেফান্থি যিহূদা। বিসং দিমদাকান বিবিরা·গিবা মিচিকরাংমুং আরো যীশুনি মা·গিবা মরিয়ম আরো যীশুনি জংগিবারাংমুং সালাজ্রিং গিসিক আপসান হং·এ বি·নুয়ামিং।
উয়া সময়ও পিতর সালসাও খ্রীষ্টখো বিবিরা·গিবা সাক রিৎচাসা খলগ্রিকমাং মান্দিরাংনি গিসেপো চাদেংএ আগানজক, “জংআদারাং, গিসিক রংথালগিবা স্খাংও রাজা দায়ূদনি খু·সুকচা যিহূদানি গিম্মিন জেখো আগানসোআমিং রংথালগিবা শাস্ত্রনি উয়া খাৎথা চু·সকনা নাংআমিং। জেরাং যীশুখো রি·ম্মামিং, বিসংনা ইয়া যিহূদান রামা ফিন্নিকে রা·আংআমিং। বিয়া আনচিংওনিন সাকসা হং·আমিং আরো আনচিংমুং কাম দাকনা বিখো বাচ্ছিয়ে রা·আমিং।”
নামগিজা কামরাংচা যিহূদা জে থাংখাখো মা·ন্নামিং উচা বিয়া হা·বা দামসাখো ব্রিজক, আরো উয়ো গা·আকে বিনি বিক্‌মা ব্রেতজক আরো বিবিকরাং হং·খাতথকজক। যিরূশালেমনি দিমদাকান উয়া খাৎথাখো খিন্নামিং। ইনি গিম্মিন বিসংনি খু·সুকচা ইয়া হা·বাখো বিসং আকেল্‌দামা বা হান·চিনি হা·বা ইন্নে মিংআ।
জা·মানো পিতর আগানজক, “রংথালগিবা শাস্ত্রনি গীতরাং মিংগিবা খি·তাপও চক্কা দংআ,
বিনি নক বাংবাং দংখানা;
উয়ো সাকসাবা দংজাখানা। আরোবা চক্কা দংআ,
বিনি দাল·গিবা কামখো সাকগিপ্পিন রা·আংখানা।
“ইনি গিম্মিন যীশুনি সিয়াওনি থাংচাফিল্লানিখো সাক্ষি হ·ন্না গিত্তা সাকগিপ্পিনখো আনচিংও আগানস্খাওদে ওয়াত্তেতারাংনি দলও রা·না নাংনুয়া। যোহননি রিপ্পলেতাওনি হা·বাচেংএ যীশুখো আনচিংওনিখো রা·দোআংজানা দিপ্পাৎ গিত্তেল যীশু আনচিংমুং রি·য়া-দো·আ দিপ্পাৎ জে মান্দিরাং আনচিংমুং দংআমিং, উয়া মান্দি বিসংওনি সাকসা হং·খানা।”
উনোন জা·রিকগিবারাং যোষেফ, জেখো বর্‌শাববা আরো যুষ্ট মিংআমিং, বিখো আরো মত্তথিয়খো, ইয়া সাকগ্মিনি বিমুংখো আগানজক। জা·মানো বিসং ইন্দাকে আগানে বি·জক, “গিত্তেল, না·আ দিমদাকনি খা·থংখোন হা·আইয়া। যিহূদা বিনি মান·গ্মি শাস্তিখো মা·ন্না ইন্নে ওয়াত্তেতানি কামখো ওয়াতজক। দা·আও ইয়া সাকগ্মিওনি জেখো না·আ বাচ্ছিজক বিখো না·আ চিংনা ফিন্নিকবো।” বিসং চিঠি খা·ল্লানি জা·মানো মত্তথিয়নি বিমুং গাদোজক। ইনি গিম্মিন মত্তথিয় উয়া সাকচিসা ওয়াত্তেতারাংমুং দংফাজক।

Klausytis ওয়াত্তেতারাংনা 1