Basketo - 2014 BSE (NT) Drama

Basketo - 2014 BSE (NT) Non Drama

ዪኒ̇ፖ̈ ዓኒ ሴ̈ጣኖ ኢያ ፋታ̇ናምፔ̇ኒ ጌ̈ሻ̇ ኣያ̇ና ዬሱ̈ሳ ቲ̈ናር ባራሃ ኤ̈ጚዴ። ኢ ኢና ኦይዲ̇ ታጳ̇ ቃምኬ ጋላስኬ ጾ̈ሚኖፖ̇ ዓኒ ጋፊ ኢያ ዎድ። ሴ̈ጣኖ ኢ̈ክ ዬ̈ሪ “ዪዚ ኔ ጾ̈ሳ̇̇ ናእኮ፥ ዓን ሹቻ̇ን ሶ̈ላ̇ ማ̈ቃ̇ምፔ̈ኒ ኪ̈ታ̇ቤ” ጌይዴ። ዬሱ̈ሳሬ “ጌ̈ሻ̇ ማጻ̈ፋ ጋልዳ ‘ኣሲ ሼምፓባር ዶኢዛ̈ዲ ፊ̈ሻባር ሙታ̇ ጊዳካ̇ይዶ̈ር ጾ̈ሳ̇̇ ሶ̈ሊዝ ቃ̈ላ ዎይባራ ዶኢ̈ሬ’ ጋ̈ሪ ጻ̈ፊንቲ̇ኔ” ጌይዴ።
ኢናፖ ሴ̈ጣኖ ዬሱ̈ሳ ጌ̈ሻ̇ ካታሚን ዬሩሳ̈ላም ጋርታ̇ ኤ̈ጛሪ ጾ̈ሳ̇̇ ኬ̈ ኩስቲ̇ን ጋልዳ ኤቂሳሪ፥ “ ‘ኔ̈ና ና̈ጋምፔ̈ኒ ጾ̈ሲ̇ ኪ̈ታንቻ̇ን ኔኮታ̇ቦ ኪ̈ቲ̇̈ሬ፤ ኔ ሹች ጋልዳ̇ ቢንታ̇ር ኔ ቶሂን ሜቃካ̇ይፌ̈ኒ ፌ ኩሺን ጋልዳ ኣፋ ኔ̈ና ኤ̈̇̈ሬ’ ጋ̈ር ጌ̈ሻ̇ ማጻ̈ፋ ጋልዳ ጻ̈ፊኔ፥ ዪዚ ኔ ጾ̈ሳ̇̇ ናእኮ፥ ዓንዳ̇ፖ̇ ቶ̈ራ ዶ̈ጛር ሶ̈ባቤ” ጌይዴ። ዬሱ̈ሳር ኢ̈ኮ “ ‘ኔ ጾ̈ሳ̇̇ ኔ ጎዳ ፋታ̇ናፔ̇’ ጋ̈ር ጻፊንቲ̇ኔ” ጌይዴ።
ዓታ̇ር ማ̈ቃ̇ሪ ሴ̈ጣኖ ዬሱ̈ሳ ሾክ ጌይኖ ኢንዳ̇ ጋልዳ̇ ኬሳ̇ሪ ኣላሚን ጋልዳ̇ ዎ ካ̈ቲንታ̇ንኬ ኢንታ̇ ቦንቺ̇ን ዎይ ኢያ ቤይሳሪ፥ ኢ̈ኮ “ኔ ታ̈ብ ዪርክ ጋ̈ር ሞ̈ኪንቴጌይን፥ ዪኖ̇ ዎይ ቴ ኔ̈ብ ኢማ̇ንዳ̇” ጌይዴ።
ዬሱ̈ሳር ኢ̈ኮ “ኣን ዓ ሴ̈ጣና! ኔ ቴ ቲ̈ናፖ̇ ጌዳ ጎታ̇ብ! ‘ኔ ጾ̈ሳ̇̇ ኔ ጎዳብ ሞኪንታ̇ቤ፥ ኢ̈ብ ሙታ̇ ጎሽታ̇ቤ’ ጌዪ ጻ̈ፊንቲ̇ኔ” ጌይዴ።
ኢናፖ̇ ዓኒ ሴ̈ጣኖ ዬሱ̈ሳ ኣሻ̇ር ሉኪ̇ዴ፤ ኪ̈ታንቻ̇ንር ዬዪ ኢ̈ብ ዎ̈ሲንቲ̇ዴ።

ዋ̈ኒ̇ሲ ቃቺንቲ̇ኖን ዬሱ̈ሲ ሲስካ̇ሪ ጋሊላ ጋዳ̇ ሉኪ̇ዴ። ና̈ዝሬ̈ት ካታሚን ኣሻ̇ሪ ቂፊርና̈ሆ̈ማ ካታማ ጋርታ̇ ሉካ̇ር ዶኢዴ። ቂፊርና̈ሆ̈ም ጋ̈ዚንዳ ዛ̈ብሎ̈ናኬ ኒፍታ̈ሌም ጋዳ̇ ጋሊላ ባሃ̈ሪን ላፍ ዎ ካታማ።
ዪና̇ር ማ̈ቂ̇ኖንዳ̇፥ ጾ̈ሲ̇ ናባ ኢሳ̈ሳባራ፥
“ባሃ̈ሪንኮ ኤ̈ጛዝ ጎይሚንዲኬ ዮ̈ርዳ̈ኖስ ዋምፖ̇ ፊ̈ን፥
ዎ ዛ̈ቢሎ̈ና ጋዲንዶ፥ ኒፍታ̈ሌም ጋዲንዶ፥
ኣይሁድ ዜር ማ̈ቃካ̇ዮ ኣሳን ዶኣዝ ቤሲ̇ን ጋሊላ፥
ም ጋርታ̇ ዎ ዎርዣን
ጴች ፎኢን ቤቂ̇ዴ፤
ዓይቃ ጻና ዶኢኖ ኣሳን ጋልዳ፥
ፎኢን ኬስኪ̇ዴ” ጌዪ ሶ̈ሊኖ ቃ̈ሊን ፎቲንታ̇ምፔ̈ኔ።
ዪና̇ ኢዝ ኬሊ̇ምፖ̇ ኤ̈̇ሪ ኢ፥ “ጾ̈ሳ̇̇ ካ̈ቲቲን ኡኪ̇ኖኮታ̇ቦ ማ̈ሪቲ ጌሊብቴ̇” ጌዪ ታማ̈ርሲ ኤ̈̇ዴ።


ዬሱ̈ሲ ጋሊላ ባሃሪን ላፍባር ኣ̈̇ርዶሪ ናምኢ ኣሳን ኢሻ̈ዲክ ጌ̈ዳዳክ፥ ጴ̈ጥሮ̈ሳኬ ኢ ኢና̇ኣ ኢንዲራ̈ሳ ኢንቲ̇ ሞላ̇ ኤ̈̇ዝ ኣስ ማ̈ቂ̇ኖኮታ̇ቦ ፌ ማጋላባን ባሃ̈ሪን ጋርታ̇ ሚሻምባ̇ር ቤቂ̇ዴ። ዬሱ̈ሳር ኢንታ̇ኮ “ዪንቲ̇ ዓይ ቴ ዎሂን ዬ̇ብቴ̇፥ ዪንቲ̇ ሞላ ኤ̈̇ዚንዲፌ̈ኒ ቴ ዪንታ̇ ታ̈ብ ኣስ ሺ̈ሺ̇ዝ ኣስ ማሃንዳ̇” ጌይዴ። ኢንታ̇ር ኤሊ̇ር ፌ ማጋላቢን ኣሻ̇ሪ ኢ ዎሂን ዬ̇ዴ።
ኢናፖ̇ ዬሱ̈ሲ ጌዳ ኣ̈̇ሪ ሜላ ናምኢ ኣሳን ኢሻ̈ዳክ ጌ̈ዳዳክ ቤቂ̇ዴ። ኢንታ̇ር ዛብዶ̈ሳ ናኣን ዓይቆ̈ባኬ ዋ̈ኒ̇ሳኬ። ኢንታ̇ር ፌ ባ̈ባ ዛብዶ̈ሳባራ ጎጛ ጋርታ̇ ፌ ማጋላባን ኮሺንቺ̇̈ርዶ̈ን ኢንታ̇ ጼይጊዴ። ኢንታ̇ር ኤሊ̇ር ጎጚንዲኬ ፌ ባ̈ባዳክ ኣሻ̇ሪ ኢ ዎሂን ዬ̇ዴ።


ዬሱ̈ሲ ኣይሁዳን ዎ̈ሳ ኬ̈ን ጋርታ̇ ታማ̈ርሲሙታ̇ኬ ጾ̈ሳ̇̇ ካ̈ቲቲን ጎይ ኡፋይሳ̇ ቃ̈ላ ሳባ̇ኪሙታ̇ዶ̈ሪ ዎርዣ ጊዳ̇ ዱማ ዱማ ዓርጋባር ኤ̈ንቲ̇ኖን ፋሙታ̇ ጋሊላ ጋዲን ዎይ ዬ̇ ቢሪንቲ̇ዴ። ዬሱ̈ሳ ኦ̈ሲን ሶ̈ራ ጋዳ̇ ዎይ ቤስ̇ ሲስኪ̇ንታ̇ዴ። ዱማ ዱማ ዓርጋባራ ማኖ፥ ኢ̈ታ ኣያ̇ናባራ ኤ̈̇ንቲ̇ኖን፥ ቡኪ̇ ቶጚዝ ዓርጋባራ ኤ̈ንቲ̇ኖንኬ ኩሺ ቶ̈ሂ ዎባን ዎይ ኢ̈ክ ኤኪ̇ ዬይን ኢ ኢንታ̇ ፋዴ። ጋሊላ ጋዳ̇ፕኬ ታጳ̇ ካታማ ጋ̈ዝ ቤሲ̇ን ጋርታ̇ፖ̇፣ ዬሩሳ̈ላማፖ̇፣ ዪሁዳፕኬ ዮ̈ርዳ̈ኖስ ዋ̈ን ፊ̈ንፖ̇ ዬይኖ ዎይሊን ኣሳን ዬሱ̈ሳ ዎሂን ዬ̇ዴ።

Klausytis ማ̈ቶ̈ሳ 4