Nyiha, Tanzania: ULufingwi uLupwa (New Testament+)

ULufingwi uLupwa

Pisinda, avhapiti vhaala vhonti avha Vhayuuda vhahimiilila, vhahamutwala uYeesu kwa mupiti waavho uMuluumi we izina lyakwe vhahatinji uPilaato. Vhahanda kumulonjeelela, vhahati, “Umuntu uno, twaamuvhwenyi akusambiilizya insambiilizyo zye zikuvhavhiiha avhantu kusambuha mu nsi yiitu. Akuvhahaana avhantu kufumwa umusonko kwa Kayisaali, havhili akuyanga akuti uweene wu Chilisiti, uMwene.”
UPilaato ahamuvhuziilizya uYeesu ahati, “Vhuli, iwe we Mwene uwa Vhayuuda?” UYeesu ahamwamula ahati, “Iwe we wayanga.” Pe uPilaato ahavhavhuuzya avhapiti avha vhapuuti, pooka ni ivhungaana ilya vhantu ahati, “Ntakuwulola umulandu naawumo kwa muntu uno.” Avhantu ivho, vhahahomeelezya vhahati, “Insambiilizyo zyakwe zikuvhavhiiha avhantu kuvha vhasambusu! Akumusiizye insambiilizyo zyakwe mu nsi ino yonti iya Vhayuuda, kufuma mu shigavho isha nsi isha Galilaaya kufishila uku.”
UPilaato lwe ayiivwa izyo, ahavhuziilizya inga uYeesu muntu wa ku Galilaaya. Lwe aamanya kuuti muntu wa ku Galilaaya, akufuma mu vhumwene uvhwa Heelodi, ahamutwala kwa Heelodi, mwe pe insiku izyo, uHeelodi áamile pa Yelusaleemu pepaala.

UHeelodi lwe amulola uYeesu, ahaseshela nkaani, mwe pe ahivwaga inongwa zyakwe, havhili insiku inyinji ahanzaga kumulola. Pe ishi, ahasuvhilaga kuuti kwe amulole uYeesu akulolesya ishilolesyo. Pe uHeelodi ahamuvhuziilizya uYeesu amazwi aminji, ileelo uweene atahamwamula poosye izwi inga lyoka. Avhapiti avha vhapuuti na vhasambiilizi avha ndajizyo vhahimiilila nu kumulonjeelela nkaani uYeesu.
Pe uHeelodi na vhasikaali vhaakwe vhahanda kumusuupizya uYeesu nu kumujevhula. Vhahamuzwalizya amenda aga nsavho nu kumuseha. Pe uHeelodi ahamugalusya uYeesu kwa Pilaato. Kufuma isiku ilyo, uHeelodi nu Pilaato vhahavha vhamanyani, she poosye kwisinda vháamile vhalugu.


Pisinda, uPilaato ahavhavhungaaniha avhapiti avha vhapuuti, na vhasongo avha Vhayuuda, pooka na vhantu avhanji. Ahavhavhuuzya ahati, “Mumuleesite umuntu uno, mukuti akusambiilizya avhantu kuuti vhavhe vhasambusu. Ishi ku zye mukumulonjeelela, namuvhuziilizya pilongolela lyinyu, ileelo ntaalola umulandu naawumo ku kwakwe. Woope uHeelodi atavhwenyi umulandu naawumo ku kwakwe, ye nongwa amugalusya kuli iswe. Ishi mumanye ahinza kuuti, umuntu uno, litaliipo naalimo lye avhomvile, lye likwanzilwa kuuti vhamugoje. Pe ishi, kuuti ahomwe ni ndiisa, ileelo kuuti imuleshele.” Gáamile maata isiku ilya shikulukuulu isha Pasaaka, uPilaato kuvhasatulila avhantu umukungwa wooka.
Ileelo avhantu vhaala vhonti vhahazuma ahalanga pooka vhahati, “Mugoje umuntu uyo! Tukwanza utusatulile uBalaaba!” UBalaaba ákunziilwe mu jeela, mwe pe ávhomvile uvhusambusu uvhupiti mu nkaaya, nu kugoga.
UPilaato ahanzaga kumusatulila uYeesu, pe ahayanga havhili na vhantu vhaala. Ileelo avheene vhahonjezya kuzuma ahalanga, vhahati, “Muhomeele pa shihovhenkanyo! Muhomeele!”
UPilaato ahayanga navho havhili ulwa vhutatu ahati, “Ahomeelwe ku nongwa vhuli? Umuntu uno, ananzile ishooni? Ine ntakulilola naalimo ku kwakwe lye likwanzilwa kumugoga! Ishi ahomwe ni ndiisa pe kuuti imusatule.” Ileelo avhantu vhaala vhahonjezya kuzuma ahalanga nkaani, vhahanzaga kuuti uYeesu ahomeelwe pa shihovhenkanyo. Pisinda, ahalanga haavho hahavhavhiiha kuuti vhitishilwe.
Pe uPilaato ahaamula kuvhomba inza vwe vhahanzaga. Ahamusatulila uBalaaba we vhahamwanzaga, poosye she ákunziilwe kuzya kuvhomba uvhusambusu uvhupiti nu kugoga. Pe ahaavhapa uYeesu avhasikaali kuuti vhavhombe inza vwe avhantu vhakwanza.


Avhasikaali lwe vhakumutwala uYeesu kumugoga, vhahahomaana nu muntu wumo we izina lyakwe vhahatinji uSiimoni, umuhaaya uwa mu nkaaya iya Kileene. Umuntu uyo áfumile ku magunda. Vhahamulema, vhahamuvhegazya ishihovhenkanyo isha Yeesu, inga avhuusye. Pe ahavhuusya nu kumulandata uYeesu mwisinda.
Impuga impiti iya vhantu yihavha yikumulandata uYeesu. Muli ivho, kwáli avhantanda vhe vhahakuutaga nu kuswimiililwa kuzya Yeesu. UYeesu ahavhashevhela, ahavhavhuuzya ahati, “Mwe vhantanda vha mu Yelusaleemu! Muleshe kunkuutila ine! Mukuutaje kuzya vhulanzi vhwinyu na vhaana vhiinyu! Mumanye ahinza kuuti insiku zye zikwinza, avhantu vhaliiti, ‘Kwashi avhantanda vhe vhagumba, vhe vhatapaafile nu kwonsya!’ Pe,
‘Avhantu vhaligavhuuzya amagamba kuuti, “Tugwili!”
Havhili vhalituvhuuzya utugamba utunsi kuuti,
“Tugubishili!”’
Nkuyanga vhwevhulo, mwe pe inga vhakuvhomba havhiivhi isho, kwi ikwi ilyolo ilyinza, pe ziliivha vhuli kwi ikwi ilyumu?”
Ahavhaliilizyo iho, avhasikaali vhahavhatwalaga avhatalamalandu vhavhili pooka nu Yeesu kuvhagoga. Lwe vhaafiha pe vhahatinji pi Ipangaawe ilya Itwe, vhahamuhomeela uYeesu pa shihovhenkanyo. Vhoope avhatalamalandu vhaala vhavhili vhahahomeelwa pa vihovhenkanyo vwavho, wumo ku luvhazu ulwa kundiilo ulwa Yeesu, uwamwavho ku luvhazu ulwa kumongo. UYeesu ahati, “We Taata! Uvhaswile, mwe pe vhatazimanyile zye vhakuvhomba.” Avhasikaali vhaala vhahagavhana amenda aga Yeesu, kwi idala ilya kugahomela ulutambu. Avhantu vhahimiilila paala kwenya.
Avhapiti avha Vhayuuda, vhahanda kumujevhula uYeesu, vhahati, “Aavhaposile avhanji, ishi, inga uweene wu Chilisiti we uMulungu amusavhuuye, ayiposhe wuuyo!” Avhasikaali vhoope, vhahamujevhula. Vhahamupalamilaga nu kuumupa idivaayi inkali, vhahamuvhuzyaga vhahatinji, “Inga iwe we we Mwene uwa Vhayuuda, uyiposhe weneewe!”
Pamwanya pa Yeesu páamile uvhusimbe vhwe vhukuti, “UNO WU MWENE UWA VHAYUUDA.”
Wooka mu vhatalamalandu vhaala vhavhili, ahamusaamula uYeesu ahati, “Iwe te we Chilisiti? Yiposhe weneewe, utuposhe niiswe!” Ileelo uwamwavho ula uwa vhuvhili ahamupilila ahati, “We! Utakumwogopa uMulungu? Nze swenti tupeliilwe isunde liniilyo. Iswe tukwanzilwa kuposheela isunde ili, mwe pe tulonziilwe ku malandu ge tutazile. Ileelo uno, atatazile umulandu naawumo.” Pe ahati, “We Yeesu! Nkulaavha lwe ukwinjila mu vhumwene vhwaho, uhankumbuhaje!” UYeesu ahamwamula ahati, “Nalyoli nkukuvhuuzya kuuti, ileelo ili, kuuti uvhe pooka niine ku Paladiiso.”


Kwandila ahavhaliilizyo aha vhushenzelo kufishila saala 9, ishiisi shihagwa insi yonti, izuvha litahalamaga. Umwenda we wápituliinye iNyumba iMfinjile, wuhazeepuha pahati kufuma pamwanya kufiha pansi.
UYeesu ahavhilishila kwi izwi ipiti ahati, “We Taata! Nkuyivhiiha mu nyoovhe zyaho.” Lwe ayanga izyo, ahafwa.
Umupiti uwa vhasikaali lwe aalola zye zyavhombeha, ahamutiima uMulungu ahati, “Nalyoli umuntu uno aamile mugolosu!”
Avhantu vhonti vhe vhávhungiine paala, lwe vhazilola zye zyavhombeha, vhahavhwela ku nkaaya zyavho, uku vhakuyihoma-homa ku vifuvha vwavho ku vhuswimiilizu. Havhili, vhonti vhe vhámanyiine nu Yeesu, pooka na vhantanda vhe vhahamulandataga kufuma mu shigavho isha nsi isha Galilaaya, vhímiliiye ukutali, vhahenyaaga zye zikuvhombeha.


Kwáli umuntu wumo kufuma mu nkaaya iya Alimataayi mu nsi iya Vhayuuda, izina lyakwe vhahatinji uYoosefu. UYoosefu áamile wooka mu vhapiti avha Vhayuuda. Ileelo atítinkiine na vhamwavho kumugoga uYeesu, mwe pe áamile mugolosu pilongolela ilya Mulungu. Havhili, ahasuvhilaga kwinza ukwa vhumwene uvhwa Mulungu.
Umuntu uyo ahasogola kwa Pilaato, ahamulaavha kuuti anyatule ishaala isha Yeesu, inga ashisyile. Lwe uPilaato ayiitiha, pe uweene ahasogola kwisya ishaala pa shihovhenkanyo. Pe ahashigwinshila nu mwenda umwinza umuzelu, ahashisyila mu mbiipa ye yábaniilwe mwi iyalaawe. Imbiipa iyo, vhatásyiliiye umuntu uwunji naawumo. Isiku ilyo, lyáli lisiku ilya kusengaanya iSabaato, mwe pe yápalamiiye kutaliha.
Avhantanda vhe vhínzile pooka nu Yeesu kufuma ku Galilaaya, vhahavha pooka nu Yoosefu ku mbiipa. Vhahayilola imbiipa, havhili vhahalola vwe vhashikaasya ishaala. Pisinda, vhahavhwela kuhaaya, vhahasengaanya amafuta ge gakununshila nu mulembo uwa kudinda kununka. Isiku ilya Sabaato vhahatuuzya, inza vwe indajizyo izya Moose zikulajizya.

Klausytis uLuuka 23