Yala - 1979 BSNIG (NT) Non Drama

La eyī rwirwi yī Ɔ̄chī I̍kɔ̍ɔbahɛ, anyā ɛla̍ā wā ge̍ pīya ga u̍nwɔ̍wu̍ yī Iji̍sɔ̄ɔsi. Ɔchi̍ oni̍pī kwɛ̍kwɛ̍ ɔla̍ā nīi e̍ ya̍ ma̍ nīi e̍ bī yɛ gāa a̍nɛ. E̍ gāa ma̍, e̍ ma̍ nīi lɛchɔ̄ nīi gū oko̍o yī wɔ̄gɔ̄ ɔla̍ā ma̍ mi̍ya ba̍ abɔ̍ɔ ga ɛkū. E̍ wā ge̍ chɛ̄ ga wɔ̄gɔ̄ bɛ̍ɛ̄nɛ̄ ma̍, e̍ i̍ ma̍ okū yī Ādā Iji̍sɔ̄ɔsi abɔ̍ɔ gɛ ni̍. E̍ de hɛ̍ būū gblāa abɔ̍ɔ ji bɛ̍ɛ̄nɛ̄. Ɔpɔ̄ɔpɛ̄, angrɔ̄ɔ āchɛ ɛpa ɛha̍ ku̍ ta̍ bū gbɛgbɛlɛ ge̍ rɛ abɔ̍ɔ ba̍la aa̍. Ɛjā otūlibi̍īyē yī wā hu̍ bāa ɔnya̍ri̍nya̍ri̍ ma̍. Anyā ɛla̍ā de kpo̍ tūuhwi. E̍ hīwe̍e̍ yɛ̄grāa nīi āchɛ ɛpa ɛla̍ā yɛ ē kɛlā tāa aa̍ ma̍. Āchɛ ɛpa ɛla̍ā da wā hīka, “Oji̍ nīi ala̍ ē gāla̍ ɔ̄chɛ ɔhɔ̄leyī gāa ɛbɛ yī okū ma̍/? O̍ i̍ hɔ̄ amu ni̍; o̍ hye̍ēyī la okū mɛ̍! Ala̍ ā bla tū lɛlā nīi o̍ koko̍o de ala̍ abɔ̍ɔ la Iga̍līli ma̍ gɛ! O̍ ka ɛ̍lɛ ge̍ē wa̍ābɔ̄ la Ɔyi̍ yī Ɔngrɔ̄ɔ ē de āchɛ ɔyɛ̍ɛ̄lā ɔdwɔ̄bi̍. Ɛ̍lɛ ge̍ē de ɔ̍lɔ ē gwōba̍ la ɔchi̍ ɔhrɛ̍ɛpa. Ɔ̄chī ɔmɛta̍, ɔ̍lɔ chī ge̍ē hye̍ēyī la okū ke̍e̍.”
Anyā ɛla̍ā de bla ɔpɔ̄ɔpɛ̄. E̍ pīya bū abɔ̍ɔ la u̍nwɔ̍wu̍ ɔla̍ā ɔpɔ̄ɔpɛ̄ gāa ge̍ koko̍o yī lɛlā ɔla̍ā wa̍a̍ de a̍chi̍kpo̍ yī nū āchɛ igwo̍lo̍he ba̍la āchɛ ehēhī wa̍a̍. Riyī yī anyā ɛla̍ā hɔ̄ ma̍ a̍nɛ: Imeri̍ Oyo̍olima̍gīdala, ba̍la Ijoha̍na ba̍la Imeri̍ nīi - ɛ̍nɛ̍ yī Ije̍mēehi ma̍. Aa̍ ba̍la anyā ɛha̍ nīi yɛ ba̍la aa̍ ma̍ gāa ge̍ koko̍o yī lɛlā nūma̍ wa̍a̍ de alɛrɔ̄ yī Iji̍sɔ̄ɔsi a̍nɛ. Alɛrɔ̄ yī Iji̍sɔ̄ɔsi nāa lɛlā ɔla̍ā nīi e̍ ka ma̍ bāa a̍kpla yī lɛlā ma̍; e̍ i̍ chɛ̄ku wa̍ ni̍. Ipi̍ta nīichō bɛ̍ɛ̄nɛ̄, rɛ̄ɛnya wa̍a̍ ge̍ ta̍ abɔ̍ɔ la u̍nwɔ̍wu̍. O̍ pu̍ kpɛ̍ɛ̍ myɛ̍ma̍ gāa ma̍, ɔjā otūlibi̍īyē yī okū ɔlɔjā ke̍e̍ gblāa abɔ̍ɔ a̍nɛ. O̍ ku̍chē pīya yī wɔlɛ̍; lɛlā ɔla̍ā de ya̍ ɔ̄ lɛbɛ̍bi̍ ji bɛ̍ɛ̄nɛ̄.


I̍chi̍chɛ ɔla̍ā pi̍i̍, āchɛ ɛpa yī wā yɛ gāa wɔlɛ̍ɛchɛ nīi re̍ka Ime̍yusi ma̍. O̍ gbajɛ la ina̍aba arāapa bū la Ijɛru̍sālɛm. E̍ yɛ ē kwɔ̄kā ku̍ lɛlā ɔla̍ā wa̍a̍ nīi ya̍ ma̍. E̍ yɛ ē kwɔ̄kā i̍ngi̍ngi̍ngɔ̍ɔ yɛ gāa ma̍, Iji̍sɔ̄ɔsi ɔlɔjā bīyɛchɛ hɛ̍ wā bɛ̍ɛ̄nɛ̄. O̍ wā ge̍ yɛ abɔ̍ɔ ba̍la aa̍. Ɔmɔ̍ɔ̄ma̍ ma̍, e̍ ma̍ ɔ̄; e̍ i̍ chī jo̍ōkū yī nū ni̍. Iji̍sɔ̄ɔsi che wa̍ ikpo̍ bɛ̍ɛ̄nɛ̄ hīka, “Lɛlā iyi̍ nīi ala̍ u̍tu yɛ aa̍ ē ka ē de iyī ala̍ i̍ngi̍ngi̍ngɔ̍ɔ nīi ala̍ yɛ ē yɛ ɛyɛ ma̍/?”
E̍ ku̍ jīyarɛ bɛ̍ɛ̄nɛ̄, ya̍ eyī bāa ɔkpa̍chi̍-kpa̍chi̍ ma̍. Ɔha̍ yī wā nīi re̍ka Ikli̍yōpasi ma̍ hīya anu̍ ɔkɔ hīka, “Awɔ - ɔ̄chɔga amu la Ijɛru̍sālɛm nɛ nīi a i̍ jo̍ōkū yī lɛlā nīi yɛ ē ya̍ abɔ̍ɔ lipu̍ yī ɔ̄chī ɛpɛpa nūma̍ ni̍ ma̍?”
Iji̍sɔ̄ɔsi chikpo̍ bɛ̍ɛ̄nɛ̄ ka ɔ̍lɔ - iyī nɛ?
E̍ ka de ɔ̍ bɛ̍ɛ̄nɛ̄ hīka, “Lɛlā nīi ya̍ lɛhu̍ yī Iji̍sɔ̄ɔsi yī Ina̍jārɛ̄ɛti ma̍ nɛ. Ɔ̄chɛ ɔkɛrɔ̄ yī Ɔwɔ nɛ. Āchɛ̄ɛchɛ wa̍a̍ ba̍la Ɔwɔ ɔlɔjā jo̍ōkū hīka ɔ̍lɔ lwɔhɔ̍hu̍ brii lɛlā ɔnɔ̄kɔ̄kū ɔyɔ̍ɔ̄ya̍ ba̍la lɛlā ɔkɔ̄ka de āchɛ. Alɛhu̍ aligbe ba̍la alɛhu̍ yī āchɛ yī alɔ wa̍a̍ chī ku̍ ɔ̄, ya̍ nīi e̍ hɛ̍ ɔ̄ ɔpīyaku̍. E̍ de ɔ̍ gwōba̍ la ɔchi̍ ɔhrɛ̍ɛpa. Anu̍ nīi alɔ wa̍a̍ chī de ɔtū che hīka o̍ ge̍ē de ɔcha yī I̍sɛ̄rɛli ē hīya lɛfiyɛ a̍nɛ. O̍ i̍ gba̍a - ɔla̍ā ke̍e̍ ni̍. I̍chɛ tū ɔ̄chī ɔmɛta̍ nīi lɛlā ɔla̍ā ya̍ ma̍. Anyā ɛha̍ lipu̍ yī alɔ kɛlā ɔha̍ nīi lɛ alɔ lɛbɛ̍bi̍ ma̍ de alɔ. E̍ bōbū la ɔ̄chɔ̄chī ga abɔ̍ɔ ga u̍nwɔ̍wu̍ yī nū. E̍ i̍ ma̍ okū yī nū abɔ̍ɔ gɛ ni̍. E̍ cha wā ge̍ ka hīka aɛ̍lɛ myɛ̍ma̍ ɔlɛbɛ̍bi̍, ayɛ̍ɛ̄chɛ̄rɔ̄ yī Ɔwɔ nīi aɛ̍lɛ ma̍ ma̍, ɛ̍lɛ ka de aa̍ hīka ɔ̍lɔ hɔ̄leyī. Āchɛ ɛha̍ yī alɔ wā ge̍ pīya gāa ge̍ ma̍ i̍ngɔ̍ɔ ke̍e̍ lɔkɔ nīi anyā ɛla̍ā ka ma̍; e̍ i̍ chī ma̍ anu̍ ɔlɔjā ni̍ kpɔ̍ɔ̍.”
Iji̍sɔ̄ɔsi da wa̍ hīka, “Ala̍ hi̍īchī kpa̍a! Ala̍ dwɔbɔ̄ la ɔchɛ̄ ku lɛlā wa̍a̍ nīi āchɛ ɔkɛrɔ̄ yī Ɔwɔ ka ma̍ kpa̍a! Nɛ̄ni̍, Ikra̍yisi i̍ ge̍ mi̍chi̍ i̍ngɔ̍ɔ o̍bū pīya ga rīgā ɔnɔ̄kɔ̄kū yī nū ni̍ kɛ̄ɛ?” Bū la ɛbɛ ɔla̍ā, Iji̍sɔ̄ɔsi de lɛlā ɛla̍ā wa̍a̍ nīi tū la Īpū yī Ɔwɔ ma̍ yi̍ya de wa̍. O̍ wu̍tu bū la Īpū yī Imo̍sīisi ba̍la lɛlā nīi āchɛ ɔkɛrɔ̄ yī Ɔwɔ ta̍ tū ma̍ wa̍a̍ ge̍ chāajɛ.
E̍ wā ge̍ tu̍ bla̍a wɔlɛ̍ɛchɛ nīi e̍ yɛ gāa ma̍, Iji̍sɔ̄ɔsi mɔ̍ɔ̄ma̍chi̍ ya̍ bɔ̄ɔjā nīi anu̍ yɛ gāa iyɔ̄bū we̍ ma̍. E̍ ku̍ ɔ̄ chi̍yɛ, ka de ɔ̍ ka ɔ̍lɔ ge̍ wā ge̍ de chā tāa aa̍, ma̍a yɛnɔ ɔ̍lɔ pīya mɛ̍. Ɛbɛ ɔ̍lɔ yɛ abɔ̍ɔ ge̍ē de ē dobū mɛ̍. Iji̍sɔ̄ɔsi nyā gāa ge̍ē chā tāa aa̍ bɛ̍ɛ̄nɛ̄. O̍ pīya hyāhɔ̄ la ɛbɛ ore̍ ojōre̍ bɛ̍ɛ̄nɛ̄. O̍ de abɔ̄ nāa ibrɛ̍ɛdi, da Ɔwɔ o̍be yī ojōre̍ ɔla̍ā. O̍ de ɔ̍ hɛ̍ ma̍, o̍ de nāa de wa̍ bɛ̍ɛ̄nɛ̄. Ɔpɔ̄ɔpɛ̄, eyī hɛ̍ wā hwōō nīi e̍ de ɔ̍ je̍. Ɔpɔ̄ɔpɛ̄, Iji̍sɔ̄ɔsi bi̍nyi nīi e̍ i̍ ma̍ ɔ̄ gɛ ni̍. Aa̍ āchɛ ɛpɛpa ɛla̍ā da ɔ̍nyīnū bɛ̍ɛ̄nɛ̄ hīka, “Je̍ka aa̍ a ma̍ i̍gba̍a yɛ̄grāa nīi o̍ kɛlā tāa alɔ yɛ ē ka ochi̍chi̍ yī lɛlā nīi tū la Īpū yī Ɔwɔ ē de alɔ la ɔpɔ̄pū ma̍! Lēchi̍, ūkpɔ̄tū wa̍a̍ lɛ alɔ bāa u̍dɔdɔ ma̍.”
E̍ nīichō pīya bū abɔ̍ɔ ɔpɔ̄ɔpɛ̄ ku̍chē ga Ijɛru̍sālɛm. E̍ ma̍ a̍chi̍kpo̍ yī nū āchɛ igwo̍lo̍he ɛla̍ā nīi e̍ grēeyī gblāa abɔ̍ɔ. Āchɛ ɛha̍ gblāa abɔ̍ɔ ba̍la aa̍. E̍ yɛ ē ka de wa̍ hīka Ādā Iji̍sɔ̄ɔsi ɔ̍lɔ hye̍ēyī la okū ichɛ̄ɛhi mɛ̍, ɔ̍lɔ de iyī ɔ̍lɔ chabɔ̄ hu̍ Isa̍yi̍mɔ̄ɔn mɛ̍.
Aa̍ āchɛ ɛpa nūma̍ wa̍ ge̍ de oko̍o nāa lɛlā nīi ya̍ la ɔpɔ̄pū ma̍ wa̍a̍ de wa̍. E̍ koko̍o wa̍a̍ lɔkɔ nīi e̍ jo̍ōkū yī nū yɛ̄grāa nīi o̍ hɛ̍ ibrɛ̍ɛdi de wa̍ ma̍.


E̍ gblāa abɔ̍ɔ ē koko̍o lɛlā nūma̍ ē de wa̍ ma̍, Ādā ɔlɔjā bū kpu̍u̍ ge̍ rɛ abɔ̍ɔ lipu̍ yī wā ɔpɔ̄ɔpɛ̄. O̍ de wa̍ hīka, “Ibi̍īyē ge̍ gbo ala̍ dɔ̍dɔ̍!”
Aa̍ wa̍a̍ de kpo̍ tūuhwi, hɛ̍ bāa obwo̍bwo̍ ma̍. E̍ je̍ka ɔ̍lɔ - okū nīi aɛ̍lɛ ma̍ a̍nɛ. Iji̍sɔ̄ɔsi de wa̍ bɛ̍ɛ̄nɛ̄ hīka, “Oji̍ - ohu̍ nīi ala̍ ē tūuhwi ma̍/? Oji̍ - ohu̍ nīi ahu̍lɛ̄lā ɔtɔ̍ɔ̄ta̍ ɔla̍ā yɛ aa̍ ē hɔ̄ la ūkpɔ̄tū yī ala̍ ma̍? Ala̍ ā ma̍ u ma̍ la abɔ̄ ba̍la ikpo̍ gɛ, hɛ̄ɛbɛ nīi ala̍ ge̍ je̍ u hīka ami ɔlɔjā nɛ. Ala̍ ā de abɔ̄ ma u gɛ nīi ala̍ ge̍ ma̍. Wu̍chē oji̍ nɛ, okū i̍ ē tū ɛbɛ̍ yī ibi̍īyē kɛ̄ɛ ukpoku̍ lɔkɔ nīi ala̍ ma̍ nīi n tū hɔ̄ ma̍ ma̍ ni̍.”
O̍ ka i̍ngɔ̍ɔ ma̍, o̍ de abɔ̄ ba̍la ikpo̍ yī nū chabɔ̄ hu̍ wā. E̍ i̍ chɛ̄ mɛ̍ ni̍ kpɔ̍. O̍ de ya̍ wā oto̍tu̍ ji bɛ̍ɛ̄nɛ̄. Ɔwɔ̄wīyā de mu wa̍ iyē hōhī. Wu̍chē yī ɔla̍ā, o̍ che wa̍ ikpo̍ ka ɛ̍lɛ lɛ ojōre̍ ɔha̍ hɔ̄ amu? E̍ de ɛbɛ̍yēenyi ɔha̍ nīi e̍ de hōhe lā abɔ̍ɔ ma̍ nāa de ɔ̍. O̍ de nāa re̍ abɔ̍ɔ la īkprī yī wā wa̍a̍.
O̍ koko̍o de wa̍ bɛ̍ɛ̄nɛ̄ hīka, “Lɛlā nūma̍ wa̍a̍, n ka de ala̍ i̍krɔ̍ɔ ɔla̍ā nīi n e̍e hɔ̄ amu ba̍la ala̍ ma̍: N ka de ala̍ hīka ɔjāha̍-ɔjāha̍ wa̍a̍ nīi e̍ ta̍ tū la īpū yī Ɔwɔ ku̍ um ma̍ ge̍ē de ē pīya ichɛ̄ɛhi. Lɛlā ɛla̍ā nīi tū la īpū yī Lihɔ yī Imo̍sīisi ba̍la īpū yī āchɛ ɔkɛrɔ̄ yī Ɔwɔ ba̍la Īpū yī Ejē Ɔkɔ̄kā wa̍a̍ ma̍ nɛ.”
O̍ wa̍ ge̍ lwāa aa̍ ūkpɔ̄tū tɔ̍ɔ̄ta̍ bɛ̍ɛ̄nɛ̄, hɛ̄ɛbɛ nīi e̍ ge̍ē po̍ ochi̍chi̍ yī lɛlā yī Īpū yī Ɔwɔ. O̍ koko̍o de wa̍ bɛ̍ɛ̄nɛ̄ hīka, “Ala̍ ma̍ gɛ ko̍ō! Ɔjā nīi e̍ ta̍ tū la Īpū yī Ɔwɔ ma̍ hɔ̄ ma̍ a̍nɛ: Ɔhɔ̍ɔnyɛta̍ Nīi Ɔwɔ Hōhu Ma̍ ɔ̍lɔ ge̍ē mi̍chi̍. Ɔ̍lɔ ge̍ē hye̍ēyī la okū la ɔ̄chī ɔmɛta̍. Bū la riyī yī ɔ̍lɔ nīi ɛ̍lɛ ge̍ē ka ɛrɔ̄ yī ɔpīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ ba̍la lɛlā ɔdwɔ̄bi̍ ode kɔ̄kɔ̄ de ɛchamɛcha wa̍a̍ a̍nɛ. Ɔ̍lɔ chī ge̍ē wu̍tu ē bū la Ijɛru̍sālɛm. Ala̍ - itɛ̍ɛhi̍yɛ̍ yī lɛlā nūma̍ wa̍a̍ a̍nɛ. Ami ɔlɔjā chī ge̍ē de ɔjā nīi A̍dā yī u choko̍o ma̍ ē tɛ̄rɔ̄ hu ala̍. Ala̍ ā ji hɔ̄ amu la Ijɛru̍sālɛm kpɛɛ nīi Wɔhu̍ nīi ē bū la ichō ma̍ ge̍ wa̍ dikpo̍ba̍ ala̍ o̍bū.”


Iji̍sɔ̄ɔsi wā ge̍ kpo̍ wā chɔbū ngmɛ̍ɛchɛ hī ipwɔ̍ɔ̄lɛ̍ yī Ijɛru̍sālɛm. E̍ yɛ i̍ngɔ̍ɔ wa̍a̍ ge̍ chɛ̄ la Ibɛ̍tāni. Iji̍sɔ̄ɔsi hu abɔ̄ hwa̍a̍, de ɔpiyɛ kla̍ āā. O̍ yɛ ē ya̍ wā piyɛɛ ma̍, o̍ ku̍ pīya ke̍e̍ hī wā; Ɔwɔ de ɔ̍ nāa pīya yī ichō ke̍e̍. E̍ ya̍ otūlichō de ɔ̍ kwɛ̍ɛjī ma̍, e̍ ku̍chē cha wā la Ijɛru̍sālɛm. E̍ lɛ ɔwɔ̄wīyā gba̍a̍. Myɛ̄grāa-myɛ̄grāa, e̍ ē gblāa abɔ̍ɔ la u̍nu̍ yī Ɔwɔ ē kā Ɔwɔ ɔkɔ̄kā, to̍gbo̍ ē de ɔ̍.

Klausytis Ilu̍uku 24