If you have would like a copy of this version please contact info@davarpartners.org

Kulvi New Testament, CC-BY-SA-4.0, The Love Fellowship (Text) Kulvi New Testament Audio Bible, CC-BY-SA-4.0, Davar Partners International, 2022 (Audio)

Kulvi New Testament

This work is licensed under Creative Commons Attribution-ShareAlike 4.0 License.

तिन्हां ध्याड़ै न यूहन्ना बपतिस्मा देणु आल़ा एज़िया यहूदिया प्रदेशा रै सुनसान ज़ैगा न ऐ प्रचार केरदा लागा कि, “पापा न मन बदला; किबैकि स्वर्गा रा राज्य नेड़ आऊ सा।” ऐ सौऐ सा ज़ौसरी चर्चा यशायाह भविष्यवाणी केरनु आल़ै केरी ती कि
“जंगला न एक हाक्क पाणु आल़ै री आवाज़ ऐन्दी लागी सा,
‘कि आपणै आपा बै प्रभु री तैंईंयैं त्यार केरा,
होर तेइरी सड़का सिधी केरा।’ ”
ऐ यूहन्ना ऊँटा रै ऊना रै बणाऐदै झिकड़ै लाइया, होर आपणै चेकै न च़ंबड़ै री गाच़ी बोना ती, सौ टिटल़ै होर बौणै रा मखीर खा ती। तैबै यरूश्लेम शैहरा, सारै यहूदिया ज़िलै, होर यरदन नौई रै औरलै-पौरलै सारै देशै रै लोका तेई हागै बपतिस्मा लेंदै आऐ। होर आपणै-आपणै पापा बै मनिया यरदन नौई न यूहन्ना न बपतिस्मा लेऊ।
ज़ैबै तेइयै बोहू फरीसी होर सदूकी बै बपतिस्मा लेणै आपु हागै ऐन्दै हेरे ता, तिन्हां सैंघै बोलू, “तुसै ज़हरीलै कीड़ै रै शोहरु सांही सी! तुसाबै कौसियै नी दसु कि एक रोज़ परमेश्वरा तुसा रै पापा री तैंईंयैं तुसाबै सज़ा देणी। ऐण्ढा मता सोच़दै कि तुसा बची जाँणा? सबूत देआ कि तुसै सच़ीऐ पापा न पश्चाताप केरू सा। होर आपणै-आपणै मना न ऐ मता सोच़ा, ‘कि आसरा बापू अब्राहम सा।’ किबैकि हांऊँ तुसा न सच़ बोला सा परमेश्वर इन्हां पात्थरा न अब्राहमा री तैंईंयैं औलाद पैदा केरी सका सा। परमेश्वर तुसाबै सज़ा देणै री तैंईंयैं त्यार बेशु सा, ज़ैण्ढै एक मांहणु फ़ौल़ नी देणै आल़ै बूटै रै ज़लाड़ै बै काटा सा, तैण्ढाऐ परमेश्वरै ते लोका भी आँगी केरिया औगी न पाणै ज़ो शोभलै कोम नी केरदै।
“हांऊँ ता तुसाबै पाणी लाइया बपतिस्मा देआ सा, पर ज़ो मूँ न बाद ऐणु आल़ा सा, सौ मूँ न शक्तिशाली सा; हांऊँ तेइरै बूट च़कणै रै लायक भी नी ऑथि, तेई तुसाबै पवित्र आत्मा होर औगियै लाइया बपतिस्मा देणा। तेइरा शूप तेइरै हौथा न सा होर तेई आपणा खौल़ शोभली तैरहा साफ केरना होर गेहूँ ता तेई आपणै कोठड़ी न डाहणै, पर भूज़ ऐण्ढी औगी न पाणा ज़ो कैधी भी नी हिशणी।”

तेई बौगतै यीशु गलील ज़िलै न यरदन नौई रै कनारै यूहन्ना हागै तेईन बपतिस्मा लैंदा आऊ। पर यूहन्ना ऐण्ढै बोलिया तेइबै रोकदा लागा कि, “मुँभै तेरै हौथै बपतिस्मा लेणै री ज़रूरत सा, होर तू मूँ हागै आऊ सा?”
यीशुऐ तेइबै ऐ ज़वाब धिना कि, “ऐबै तू ऐण्ढाऐ होंणै दै, किबैकि आसरा ऐसा रीतियै धार्मिकता बै पूरा केरना ठीक सा।” तैबै तेइयै तेइरी गैल मनी।
होर यीशु बपतिस्मा लेइया तुरन्त पाणी न बाहरै आऊ होर हेरा, तेइरी तैंईंयैं स्वर्ग खुलू होर तेइयै परमेश्वर कबूतरा रै रूपा न पवित्र आत्मा आपु पैंधै उतरदा हेरू। स्वर्गा न एक आवाज़ हुई, “तू मेरा प्यारा बेटा सा हांऊँ तौ न खुश सा।”

Klausytis मत्ती 3