Tombulu - LAI Version (NT) no drama

Tombulu - LAI Version (NT) drama

Am péléng sé mahkiit um paheruzan itii rumendaié a mahwalima si Yesus in isaru wia si Pilatus. Im witumo u sinaru ni Pilatus a séra mahtoké tumoro si Yesus, kuan néra, “Si Tou kenu é mahlululu sé tahsasana wanua nai. Pahséro'en-Na sé tou i mahwaér um pajak wia si Kaisar. Ni Sia kasii mahkua i ni Sia é si Kristus, si Kolano.”
A si Pilatus meligau wia ni Sia, “Ni Ko si Kolano né tou Yahudi?”
A si Yesus mingkotla, “Ni ko in esa si kimuamé niitu.”
Ang kuan ni Pilatus wia sé tonaas né walian karia né tou lakez witu, “Zozo' in esa én zéi'kan siapa ung kasumalaan niilekku wia si Tou kenu.”
Taan ni séra éng karimezna uman taré i menutu' karia i mahkua, “Pahenouen-Na sé tou wia un tana' Yudea karia an tutuzu'-Na, rengané witi tana' Galilea wo makaz wia'i.”

In timalingamé niitu, a si Pilatus meligau, “Si Tou kenu ndéén én tou Galilea?” Ing kinata'uanla ni Pilatus i si Yesus én tou Galilea, un tampa kinawasaan ni Herodes, a Sia pekiwalinama in isaru wia si Herodes, si in toro niitu kangkasii ém witi Yerusalem. I nimilekla si Yesus, si Herodes én totoz mahpaa-paaz. Pahpaan urémo sia i menali-nalinga tumoro si Yesus wo paaz i mahilekan karia-Na wo mahéré'la in toro milek kura Sia i mangun u makakompo'en. Lakez am peligauenna wia si Yesus taan zozo' in esa én zéi'kan siapa u méiwingkot-Nala. Karegas niitu sé tonaas né walian wo sé tou tulap un Torat mangé witi puuna karia i ma'ulit mahkua an totoké wia ni Sia. Lumousé niitu si Herodes wo sé surarona é mahséro' wo mahléléong wia ni Sia. Si Herodes éng kimaraila wia si Yesus ung karai tonton totoz wangun, a Sia iwurinama sumaup wia si Pilatus. Rengané in toro niitu si Herodes wo si Pilatus sé im puuna é makahkoro' woan é mahkaloano.


A réwokené ni Pilatus sé tonaas né walian, sé tonaas wo sé tou lakez. Ang kuana wia ni séra, “Méipahwali nioué wia ni aku si Tou kenu wo pahkuan niou si Tou kenu é mahlululu sé tou lakez. Ilekené, witu u sinaru niou ém pahpenérongku ang kasumalaan-Na taan maan in esa én zéi'kan siapa u niilekku a méipahtoké niou wia ni Sia. Si Herodes kangkasii én zéi'kan nimakaileké ang kasumalaan-Na. Niitumo ni Sia é méiwurimé sumaup ni Herodes wia ni kai. Uli-ulit ikuakuma wia ni kamu, zéi'kan siapa um winangun ni Tou kenu un toro kawalian wo Sia ukumen im wunu'en. Niitumo, ni Sia é saboken umana wo Sia ipilota.”
[Sekez i lumé'os un endo Paskah né tou Yahudi, si Pilatus é léwo'zéi' i milot si esaané wia sé witi bui.] Taan sé tou lakez nimaréwok witu é mahkérét, “Wunu'enola Sia wo ipiloté si Barabas wia ni kai!” Si Barabas ém binui pahpaan mahsaru sé pemerénta witi wanua tua'na wo pahpaan nimunu' tou.
Si Pilatus makasapé' i nimuwu'ma rimez wia ni séra pahpaan ni sia ém paaz milot si Yesus.
Taan ni séra é mahkérét, “Salipenola Sia! Salipenola Sia!”
Ang katelu si Pilatus kimua wia ni séra, “Apa a léwo'an winangun ni Tou kenu? Zéi'kan siapa zozo' in esa a sinala' kinailekangku wia ni Sia un toro kawalian wo Sia ukumen i maté. Niitumo ni Sia é saboken umana wo Sia ipilotku.”
Taan ni séra éng karimezna uman i mahkérét karia mahlusu wo menutu' ni Sia i salipen. Ing kamurian um pengéré-ngérét néra éng kinakiitané. A si Pilatus tumotozla ing kiitan um penutu'en néra. Méipilotna si tou binui pahpaan mahsaru sé pemerénta wo nimunu' sé tou méikiit um penutu'en néra, taan si Yesus é méiayona wia ni séra i mualian néra kiit um paaz néra.


I si Yesus méipahwali nérama, witi lalan ni séra mahilekan karia ni Simon tou Kirene, si witi wanua walina a méyé, mahuuntep witi wanua tua'na. Ni sia é méipekiento' nérala am pasaanan nérala u salip karia i mahkiita si Yesus.
Lakez sé tou mahkiita si Yesus, im wia ni séra lakez sé wéwéné mahamé' ni Sia karia i mahkérét. Si Yesus luméngéma wia ni séra ang kuan-Na, “É kamu wéwéné tou Yerusalem! Ni Aku én tia'mo ipahamé' niou, taan iamé' nioula un tou niou in esa karia né koki' niou. Pahpaan méyé un orasna sé tou ing kumua, ‘Totoz mahpaa-paaz sé wéwéné pesel wo sé zéi'kampé' nimakaoki' wo sé zéi'kampé' pinahsusu-susuala.’ In toro niitumo sé tou é mahkua wana ang kentur, ‘Marewamomé wo ikaempisé wia ni kai!’ Wo wana ang kimeleng, ‘Tawunanomé kai!’ Ni Aku éng kimuama un téntu pahpaan sa im wia ni Aku si zéi'kan nimahwangu-wangunla a singkéla' ni séra é nimangun an téntu, tantumo im wia ni kamu sé mahwangun a singkéla', ni séra é mangun a lumouspé'mé niitu. Ni Aku én tanu ung kai mata'pé' un zéi'kan mala'ung péléng in tutungana, taan ni kamu én tanu ang kai pera u mala'ung péléng in tutungana.”
Wéwéhan kasii sé zua tou walina, sé tou léwo' méipahwali i maukumen wunu'en karia-Na. I ni séra méikaayola witi tampa makangaran Tengkora', si Yesus méisalip néra witu karia né zua tou léwo' itii, si esa ém witu ung kakan-Na wo si esa ém witu ung kawihi-Na. [A si Yesus kumua, “Ama', ampungan ndootuumé séra pahpaan zéi'kan kata'uan néra am pahmualin néra.”] A séra sumawut u lot i mahwéwéténg ung karai-Na.
Lakez sé tou rimendai witu nimilek péléng u mahmuali. Taan sé tonaas né tou Yahudi é mahséro' wia ni Sia, kuan néra, “Sé tou walina én tinulung-Na, iwayamola ni Siamokan si tumulungla un tou-Na in esa, sa Sia uli-ulit Mesias si pinéléng ni Opo Empung.”
Sé suraro kangkasii é mahké'ké' ni Sia wo niméhé un anggor esem wia ni Sia wo mahkua, “Sa Ko uli-ulit kolano né tou Yahudi, tulungela un tou-Mu in esa!” Witu un atas un ulu-Na kasii ém pinantikan:
“Si kenumo si Kolano né tou Yahudi”.
Si esa im wia sé tou léwo' sinalip witu mahséro' ni Sia, kuana, “Zéi'kankuaa ni Ko éng Kristus? Tulungela un tou-Mu karia nai!”
Taan si walina é siméro'la, “Zéi'kan ikaindé'mu wé si Opo Empung, pahpaan ni ko é nimakailek un ukuman masuat karia-Na? Ni kita ém wangun in ukumen pahpaan ung kenumo um wawaér wana am pemuali-mualinta, taan si Tou kenu én zéi'kan siapa u sinala' zozo' in esa.” A sia kumua kasii, “Yesus, genangen ndootuumé ni aku i ni Ko méyé ing Kolano.”
A si Yesus mingkotla wia ni sia, “Uli-ulit ikua-Kuma wia ni ko, in endo kenu ni ko é mahwali-wali karia-Ku witi Firdaus.”


In toro niitu im woo jam mapulu' wo zua i lolambot, péléng un tana' itii é nimarimbengbenga makaz witu un jam katelu im wengindo, pahpaan si endo én zéi'kan mahsena'. U roko' méiapé' witi tampa Totoz Lenas witi Walé ni Opo Empung é nimapahzuama.
A si Yesus kumérét totoz rimez, “Ama', ung katou-touang-Ku én iayo-Kuma wia ni Ko.” Makakuama niitu a Sia kalekepala.
I si tonaas né sana atus suraro nimilek a nimamuali, a sia mahlooz wo mahsigi' si Opo Empung, kuana, “Totoz ulit, si Tou kenu én zéi'kan siapa sinala'!”
Sé tou lakez sé nimilek u nimamuali itii é nimawuri karia mahpéhos um wezwez pahpaan in totoz mene'sel. Péléng sé totoz mata'u si Yesus, méikauntep witu sé wéwéné nimahkiité ni Sia im witi Galilea, rimendai witi zou'ma wo nimilek péléng niitu.


Wéwéhan si makangaran Yusuf, si esaané im wia sé Mahkama Agama. Ni sia én tou mahwangun a lé'os wo an ulit. Ni sia én tou Arimatea, um wanua né tou Yahudi wo ni sia é ma'ento' ung Kakolanoan ni Opo Empung. Ni sia én zéi'kan esa genang karia un tinotoz wo um pahwangunen né kakariana witi Mahkama Agama itii. Ni sia é masimaru wia si Pilatus i mahaléi un awak ni Yesus. Itumpanamé un awak ni Yesus, saputennala karia u roko' lenan, an izeta'nala witu u lelewengan ung kiniaro witi kentur watu. U lelewengan itii én zéi'kampé' pinahlewe-lewengala. Un endo itii én endo mahsiwo-siwo wo u Sabat é lelezo.
Sé wéwéné sé nimahwalimé karia ni Yesus witi Galilea a méyé, ni séra é nimahkiité wo nimilek u lelewengan itii wo kura un awak ni Yesus i méizeta'. Mawurima séra a mamimek um pengingisu' wia sé nimatémo wo u lana mahwou tariis in iisu' witu un awak ni Yesus. In endo Sabat, ni séra éng kimana' i mahpaayang pahpaan kumiit an tinotoz witu un ukum Torat.

Klausytis Lukas 23