Text: © The Bible Society of Nigeria, 2008 Audio: ℗ 2008 Hosanna

Rubassa - 2008 Edition (NT)

Rubassa Bible © Bible Society of Nigeria, 2008

N-ndumwa ma ata mu namba taa nu umozhigo, n-ndumwa ma ata mu namɛ na Agwatana, n-ndumwa ma ata mɛ shɛ Agwatana. N-ndumwa ma ata kaa mu namba na Agwatana taa nu umozhigo. A njɛ iyi elele kpaaŋ tedure nu bwa, i zasa iyi elele nɛ aa njɛ uzawa ubwa o. Tedure nu bwa kaa uraiŋ namɛ, ibɛ uraiŋ ata ụ shɛ uhioko-uhwaŋna wa atwa. Uhioko-uhwaŋna ata wa ta na amɛ tishi, tishi kaa tụ lasụ sụ ụŋ o.
Bụtụ bu ko namba Agwatana tumwanɛ utumwa, na ɛɛ hiɛŋ izeci ibwɛ ga Jon. Ubwa zhajɛ iwɛ maa la uhioko-uhwaŋna ata tiseyida, iwɛ maa atwa kpaaŋ tɛtana-rishe tedure iwɛ tiseyida tu bwa. Shɛ ubwa ni ikɛnyi ibwɛ i shɛ uhioko-uhwaŋna ata o, ama bi zhajɛ iwɛ maa la uhioko-uhwaŋna ata tiseyida kiri.
Uhioko-uhwaŋna u tɛkana namba na wo hiokono atwa elele na e ci nu unyizo ga uhwaŋna. Ubwa namɛ nu unyizo, aa njɛ kaa unyizo tedure nu bwa, ama unyizo kaa mepi shi bu waa. Ubwa zhajɛ no ofwo atwa ubwa, ama atwa ata ubwa kaa le shi bu o. Ama gana na tu ufwugwo wa atwa na le bu, a na kaa tɛtanɛ bụ rishe namɛ, aba bee peni ụhwada maa a shɛ miaụŋ ma Agwatana. Miaụŋ ma Agwatana mu na aa shɛ mi beni shi na masha ma butugwumwa o, okwo nu ukwulana usunda-tu'waba kwo kaa nu ukwulana butubwenyi o, ama Agwatana ubwa meci aŋ.
N-ndumwa ma ata mɛ jɛshɛrɛjɛ maa shɛ butugwumwa, moo zokwu na ashashɛ tu. Tụ kwụbɛ ụjɛrụma ubwa na tu baa shɛ Yɛu mokondo nɛ banɛ no olugwo Bishi bwa. Tulubo-ti-biye keeni iwɛ-tɛkana shini na amɛ ubwa.
Ga Jon zhajɛ la bee le bu tiseyida, na aka na baa uganɛ, bɛɛ hiɛŋ, Bụtụ ganana Ngaa jɛmɛ la iwɛ ubwa, Ngɛɛ hiɛŋ, Bụtụ na be ci ba ne ekwunyi mi, ubwa n hwuri, iwɛnɛ tu baa namwawaŋ nazhɛ ee m meci.
Hwɛɛ tu ti leshiji uwebiye nɛ banɛ no tulubo-ti-biye tu bwa tu na ti shini na tumama 'wanu na ti nya. Agwatana duricinje Undwa ubwa no Moses, ama bu duricinje tuba tulubo-ti-biye keeni iwɛ-tɛkana ne Jisus Krast. I zasa bụtụ na kwụbwa Agwatana kwukwuŋ, semi Yɛu ibwɛ mokondo nɛ namɛ kpɛmi kpɛmi ne Bishi bwa, ubwa ti mbiseni gana na Agwatana shɛ.


Ga Jon le tiseyida na aka na te Eju na namɛ nu Jɛrusalɛm tumwanɛ onongbo keeni Alivai utumwa, te e unseni bu, ɛɛ hiɛŋ, Gaaba kwuŋ abɛ shɛɛ?
Ga Jon teri shi ashamanjɛ o, ama bi leni nu unu ubwa kpataa, bɛɛ hiɛŋ, Shɛ Gamba n shɛ ga Krast ata o.
Ee unseni bu, ɛɛ hiɛŋ, Asha gaaba kwuŋ abɛ shɛ yɛɛ? Gabụ suu bɛ shɛ ge Elaija?
Bɛɛ jishijɛ aŋ, bɛɛ hiɛŋ, Shɛ Gamba o.
Asha bigesere suu abɛ shɛ?
Bɛɛ hiɛŋ, Awo.
Ee heŋteni bu, ɛɛ hiɛn, Asha gaaba kwuŋ abɛ shɛ yɛɛ, imbe kwuŋ abɛ jɛmɛ iwɛ uhiuhiu buu? Iwɛ maa ta pana atwa na utu tumwanɛ utumwa ajɛshɛgwa.
Ga Jon jishijɛ aŋ tedure nu n-ndumwa ma ata ga Ayizaya bigesere 'nywotwo la, bɛɛ hiɛŋ,
Gamba n shɛ rụhwụ ra bụtụ ata ba ugaga nụ ụshɛka, ri hiɛŋ,
Hangana ma Agwangwama uhwaŋna u tukpororo!
Atumwa ata a na Afarisi ga tumwanɛ heŋteni Jon, ɛɛ hiɛŋ, Asha iwembe po aba nda atwa ubaptizim, ta abɛ shɛ shɛ kaa ga Krast, kwo kaa ge Elaija, kwo kaa bigeseree?
Ga Jon jishijɛ aŋ, bɛɛ hiɛŋ, Ma nda atwa ubaptizim ne meni, ama Bụtụ bu ko shikeni ba na ashashɛ hiŋ na ehi te mepi shi. Ubwa shɛ bụtụ na be ci ne ekwunyi mi, N lanɛ shɛ maa Mo tufwurungo okwo ihwehwe ya abida ubwa o. Ijɛ hwɛɛ njɛ ni Bɛtani hileniye Urefu Jodan, no ofwo ata ga Jon ba nda atwa ubaptizim.

Ti iyi heri, ga Jon kwụbɛ Jisus ti bee ci pu bwa, bɛɛ hiɛŋ, Hioko ma, Yɛu-ụgwụdụ ya Agwatana nɛ yo sugo iwɛwɛ ya atwa unyizo! Bụtụ ganana Ngaa jɛmɛ la iwɛ ubwa, Ngɛɛ hiɛŋ, be ci ba ne ekwunyi mi, bu n hwuri, iwɛnɛ tu baa namwawaŋ nazhɛ ee m meci. M mepi shi bu o, ama N zhajɛ Ama nda atwa ubaptizim ne meni, iwɛ maa atwa Isrɛl mepi bu.
Ga Jon le tiseyida, bɛɛ hiɛŋ, N kwụbɛ ta Mpiala mu banɛ na azuba gana ikwucime maa patanɛ bụ. N nge mepi shi bu o, ama bụtụ ata n tumwanɛ maa ma nda atwa ubaptizim ne nemi, ubwa m mbishi, bɛɛ hiɛŋ, Bụtụ ata abu kwụbɛ ta Mpiala mu zwe maa patanɛ bụ, asha ubwa zhɛ ba nda atwa ubaptizim na Mpiala mi Tijilo. N kwụbwa ya ni ikɛnyi mi, Ngoo lowo kaa tiseyida maa ubwa shɛ Yɛu ya Agwatana.

Ti iyi heri sasana nyajita, ga Jon shikeni ne eseshi-iyi ubwa eyebi. Baa ngbaracɛ Jisus ti bɛɛ zhɛ, bɛɛ hiɛŋ, Hioko ma Yɛu-ụgwụdụ ya Agwatana.
Eseshi-iyi ata ubwa hwụjɛ iwɛ ɛtɛ baa jɛmɛ, ibɛ po aa 'wa Jisus. Ti ge Jisus mbiyanɛ ekwunyi, baa kwụbɛ aŋ ta a 'wa bụ, bee heŋteni aŋ, bɛɛ hiɛŋ, Imbe bwa ahia jalakakaa? Ɛɛ jishijɛ bụ, ɛɛ hiɛŋ, Rabɛi, (nɛ ecilo ibɛ i shɛ, Bimbisegeni), ce abɛ jɛjɛɛ?
Ge Jisus jishijɛ aŋ, bɛɛ hiɛŋ, Zhajɛ ma, hiɛ kwụbɛ. Ee zhe ga, aa kwụbɛ ofwo ata baa jɛjɛ, aa jɛjɛ du nu bwa jita ata. Aka ata shɛ aka bo ogogo eneshi nu uwaŋna ụrụmɛ.
Ga Andru yɛu-bino Saimon Pita, shɛ bụtụ bu ko na atwa ata eyebi a na hwụjɛ iwɛ ɛtɛ ga Jon jɛmɛ, a na kaa 'wa Jisus. Ubwa to yɛu-bino bwa ugbe hiiŋ, bɛɛ hiɛŋ bụ, Tu towo Mɛsaya (nɛ ecilo ibɛ i shɛ Krast) ugbe. Bɛɛ zɛrijɛ Saimon pi Jisus.
Ge Jisus ngbaracɛ Saimon, bɛɛ hiɛŋ bụ, Gabụ ɛɛ hiɛŋ, ga Saimon, yɛu Jon. Ɛ zhɛ ɛ bi hiɛŋ ya ge Kifas (nɛ ecilo ibɛ i shɛ Pita).

Ti iyi heri, ge Jisus ba jala maa zha Galili, baa kwụbɛ Filip, bɛɛ hiɛŋ bụ, N 'wa.
Ge Filip banɛ ni Bɛtɛseida, ụshɛpwụ uko uko na Andru keeni Pita. Ge Filip kwụbɛ Nataniɛl, bɛɛ hiɛŋ bụ, Tu kwụbwa bụtụ ata go Moses 'nyeci la iwɛ ubwa nu utakada Undwa, bu gata egesere du 'nyeci iwɛ ubwa, ubwa shɛ ge Jisus, bụtụ bu Nazarɛt yɛu Josɛf.
Ga Nataniɛl heŋteni Filip, bɛɛ hiɛŋ, iyi ibiye ye elele eri ya banɛ nu Nazarɛt hŋ?
Ge Filip hiɛŋ bụ, Zhajɛ kwụbɛ.
Ge Jisus kwụbɛ Nataniɛl ti bee ci pu bwa, bɛɛ hiɛŋ, Hioko ma bụtụ bi Isrɛl gom na, bu zasa i'inswɛ na amɛ ubwa o.
Ga Nataniɛl heŋteni Jisus, bɛɛ hiɛŋ, Ce bwa ebi m mepii?
Ge Jisus jishijɛ bụ, bɛɛ hiɛŋ, M bụ kwụbɛ te bi shikeni nu ucilo uwowo, nazhɛ ge Filip ubu suyanɛ.
Ga Nataniɛl jishijɛ bụ, bɛɛ hiɛŋ, E-Bimbisegeni, gabụ bɛ shɛ Yɛu ya Agwatana! Gabụ kaa bɛ shɛ du Agwuma Isrɛl!
Ge Jisus jishijɛ bụ, bɛɛ hiɛŋ, Iwɛnɛ Ngɛɛ bi hiɛŋ, M bụ kwụbɛ te ebi shikeni nu ucilo uwowo hŋ upo abu tɛtanɛ-rishe? Bi tɛ zhɛ ba kwụba inɛɛ nɛ uhwuri inɛ ɛtɛ. Nazhɛ ge Jisus hiɛŋ bụ, Iwɛ-tɛkana Omo hi mbiso, hi tɛ zhɛ hia kwụba ta azuba bagwụ, atumwa Agwatana a na namɛ na azuba o mungo, ee zweeneni nu uhiuhiu Yɛu Bụtụ.

Klausytis JON 1