These Scriptures are a new translation into the Naskapi language spoken at Kawawachikamach, Quebec. We the Naskapi people have been eager to have our own translation of the Bible. For many decades we have had to make do with Scriptures that were translated for indigenous languages that are different from our own: most notably Bishop Horden's Moose Cree New Testament and prayer book, and Rev. W. G. Walton's prayer book. The Naskapi Development Corporation has been engaged with this work since the 1990s, facilitated by Wycliffe Bible Translators and the Canadian Bible Society. The Naskapi community grateful acknowledges the help of all who participated with us in producing these Scriptures. Our prayer is that these Words of God will be cherished by our people for generations to come.

ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ The Naskapi text is copyright © Naskapi Development Corporation Naskapi Development Corporation Kawawachikamach, Québec G0G 2Z0 Canada New Testament published by the Canadian Bible Society (CBS) © 2007 Canadian Bible Society 10 Carnforth Road, Toronto Ontario M4A 2S4 Canada

ᒋᓴᒪᓂᑐᐤ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ God's Word in Naskapi

ᒋᓴᔅ ᒋ ᐎᑎᒧᐛᐤ ᐅᒋᔅᒋᓄᐊᒧᐛᑭᓇ ᐅᔭᔪᐤ ᒋᔅᑯᑎᒪᒐᐤ ᑎᐸᒋᒧᐅᓂᔪᐤ, ᐊ ᐃᑕᑦ, “ᒋ ᑕᐤ ᐊ ᐛᔪᑎᓯᑦ ᓇᐸᐤ ᐊᒋ ᑭᓄᐛᔨᒪᑦ ᐅᒋᒪᓴ᙮ ᐊᓐ ᒪᒃ ᐅᒋᒪᔅ ᒋ ᓂᓇᑭᑐᐛᔨᑎᒧᐛᐤ ᒥᓯᐛ ᑕᓐ ᑲ ᐃᓯ ᐊᔭᔨᒋ ᐊᓂᔭᔪᐛ ᓇᐸᐛ᙮ ᒋ ᐸᑎᒥᔪᐛ ᒪᒃ ᐊᓂᔭ ᐅᒋᒪᒻ ᓂᑎᒥᒄ ᐊᒋ ᐃᑕᐱᒋᑕᐛᑦ ᐅᓱᓇᔭᓂᒥᔪᐤ᙮ ᐊᑯ ᒂ ᐎᓴᒥᑯᑦ, ᒂ ᐃᑎᑯᑦ, ‘ᓂᐸᑕᓐ ᐊ ᐃᑕᒋᒥᑯᔨᓐ ᓂᑎᒥᒄ ᐊ ᐃᑕᐱᒋᑕᔨᓐ ᓂᓱᓇᔭᓂᒻ᙮ ᒧᓴ ᐎᑎᒧᐎ ᑕᓐ ᐊᓐ ᑲ ᐃᑕᐱᒋᑕᔨᓐ ? ᓴᔅ ᓇᒪ ᒋᑭ ᐅᒋ ᑭᓄᐛᔨᑕᓐ ᐊᓐ ᒋᑦ ᐊᑐᔅᒐᐅᓐ᙮’ ”
“ᐊᓐ ᒪᒃ ᐅᒋᒪᔅ ᒋ ᒪᒥᑐᓇᔨᑎᒻ, ‘ᑕᓐ ᒐ ᐃᑎᔭᓐ ᒪᒃ ᐊᑯ ᒐᒋ ᐅᒋ ᐱᒪᒋᐃᓱᔭᓐ, ᐊ ᐃᑕᔨᑕᐧᒃ, ᓴᔅ ᓂᑎᓯᓂᒄ ᓄᒋᒪᒻ ? ᓇᒪ ᓂ ᒥᔅᑯᓯᓐ ᐊ ᒧᓇᐃᒐᔭᓐ ᒐᒋ ᐃᑕᐱᑎᓯᔭᓐ ᑭᔭ ᓂ ᓴᒂᔨᒧᓐ ᒐᒋ ᓇᓂᑐᐛᔨᑎᒪᓐ ᓱᓇᔭᐤ᙮ ᓂ ᒋᔅᒐᔨᑕᓐ ᑕᓐ ᒐ ᐃᑎᔭᓐ ᒐᒋ ᐅᒋ ᐎᒐᐛᑭᓂᔭᓐ᙮ ᐊᑯ ᒪᒃ ᐊᑲ ᐊᔭᔭᓇ ᐊᑐᔅᒐᐅᓐ ᐎᔨᐛᐤ ᒐ ᐸᒋ ᓂᓇᑭᑐᐛᔨᒥᒡ᙮’ ”
“ᐊᑯ ᒂ ᐎᓴᒪᑦ ᑕᑐᐤ ᑲ ᐃᑎᓯᔨᒋ ᐊᓂᔭ ᑲ ᒥᓯᓇᐊᒧᐛᔨᒋ ᐅᒋᒪᒪ ᒐᒋ ᐸᒋ ᓂᑐᐛᐱᒥᑯᑦ᙮ ᐊᑯ ᐊᓂᔭ ᓂᔅᑎᒻ ᑲ ᑎᑯᓯᓂᔨᒋ ᑲ ᐃᓯ ᑯᒂᒋᒪᑦ, ‘ᑕᓐ ᐊᔅᐱᔅ ᒥᓯᓇᐊᒧᑦ ᓄᒋᒪᒻ ?’ ”
“ᐊᑯ ᒂ ᐃᑎᑯᑦ, ‘ᐸᐃᑯ ᒥᑕᓯᒥᑎᓄᐤ ᒥᔅᑎᒄ ᐱᒥᔭ᙮’ ᐊᑯ ᐊᓐ ᐅᒋᒪᔅ ᒂ ᐃᑕᑦ, ‘ᐅᑎᓇ ᐊᓂᔭ ᒋᒥᓯᓇᐃᑭᓇ, ᒋᐱᔾ, ᒥᔅᑯᑎᓯᓇᐊ, ᒥᒄ ᐱᑕᑕᒡ ᑕᑐᔪᐤ ᐃᑎᓯᓇᐊ᙮’ ”
“ᐊᑯ ᐊᓂᔭ ᑯᑎᑲ ᓇᐸᐛ ᒂ ᐃᑕᑦ, ‘ᑕᓐ ᐊ ᐃᔅᐱᔅ ᒥᓯᓇᐊᒧᑦ ᒋᔾ ᓄᒋᒪᒻ ?’ ᐊᑯ ᒂ ᐃᑎᑯᑦ, ‘ᐸᐃᒂᐤ ᒐᓯᐱᔪᐤ ᐎᒂᔭᐤ ᐊᔪᔅᑲᐛᓂᒡ᙮’ ᐊᑯ ᒂ ᐃᑕᑦ, ‘ᒪᐅᔭᔪᐛ ᒋᒥᓯᓇᐃᑭᓇ, ᒥᔅᑯᑎᓯᓇᐊ, ᒥᒄ ᔭᓇᐤ ᑕᑐᐤ ᒥᑕᓯᒥᑎᓄᐤ ᐃᑎᓯᓇᐊ᙮’ ”
“ᐃᔅᐱ ᐊᓐ ᐅᒋᒪᐤ ᐱᔭᑕᐧᒃ ᑕᓐ ᑲ ᐃᑎᔨᒋ ᐊᓂᔭ ᐅᒋᒪᓯᒪ ᒋ ᒪᒥᒋᐃᑯᐤ, ᐃᑈᐧᑲᐤ ᐊ ᐃᑕᔨᒪᑦ ᐊᑲ ᒪᒃ ᑯᐃᔅᒄ ᐅᒋ ᑎᔨᒋ᙮ ᐛᔅ ᐊᓐᒡ ᐊᑲ ᑯᐃᔅᑯᑕᑎᓯᒡ ᐅᑕ ᐊᔅᒋᒡ ᓇᔅᒡ ᑕᑈ ᑭᔅᒋᐅᐎᒡ ᐊ ᐎᐧᑯᒋᑎᒪᓱᒡ ᒐᒂᔪᐤ ᐃᔅᐱᔅ ᐎ ᐊᓐᒡ ᑲ ᑯᐃᔅᑯᑕᑎᓯᒡ᙮”
ᐊᑯ ᒋᓴᔅ ᒥᓐ ᒂ ᐊᑎ ᐃᑕᑦ, “ᒋ ᐎᑎᒪᑎᓇᐛᐤ, ᐊᐱᒋᑕᒄ ᑕᓐ ᐊ ᐃᓯ ᐊᔭᔭᒄ ᒐᒋ ᒥᔪᑐᑎᒪᒄ ᑭᔭ ᒐᒋ ᐎᒐᐛᑭᓂᔭᒄ᙮ ᐃᔅᐱ ᒪᒃ ᐳᓂᐱᒪᑎᓯᔭᒂ ᐊᑯ ᒐ ᐱᑎᑲᐃᑯᔭᒄ ᐊᓐᑕ ᑲᒋᒡ ᒐ ᐎᒋᔭᒄ᙮”
“ᐊᐛᓐ ᑲ ᑕᑈᐅᒐᔨᑕᑯᓯᑦ ᑯᐃᔅᒄ ᒐᒋ ᐃᓯ ᓂᓇᑭᑐᐛᔨᑕᐧᒃ ᐊ ᐊᐱᓴᓯᔨᒡ ᒐᒂᔪᐤ ᒋᑭ ᑕᑈᐅᒐᔨᑕᑯᓱᐤ ᒐᒋ ᒥᔪᓂᓇᑭᑐᐛᔨᑕᐧᒃ ᐊ ᒥᓴᔨᒡ ᒐᒂᔪᐤ᙮ ᐊᑯ ᒪᒃ ᐊᐛᓐ ᐊᑲ ᑯᐃᔅᒄ ᐃᑐᑕᒐ ᐊᓂᔭ ᐊ ᓂᓇᑭᑐᐛᔨᑕᐧᒃ ᓇᔅᒡ ᐊ ᐊᐱᓴᓯᔨᒡ ᒐᒂᔪᐤ, ᓇᒪ ᑯᐃᔅᒄ ᒋᑭ ᒋ ᐃᑐᑎᒻ ᐊ ᓂᓇᑭᑐᐛᔨᑕᐧᒃ ᒐᒂᔪᐤ ᐊ ᒥᓴᔨᒡ᙮ ᐊᑲ ᒪᒃ ᑕᑈᐅᒐᔨᒥᑯᔨᓇ ᑯᐃᔅᒄ ᒐᒋ ᐃᓯ ᓂᓇᑭᑐᐛᔨᑕᒥᓐ ᐅ ᐛᔪᑎᓯᐅᓐ ᐅᑕ ᐊᔅᒋᒡ ᑲ ᑎᒂᒡ, ᓇᒪ ᒋᑭ ᐅᒋ ᑕᑈᐅᒐᔨᒥᑯᐅᓐ ᒋᒋᐛ ᐛᔪᑎᓯᐅᓐ ᒐᒋ ᓂᓇᑭᑐᐛᔨᑕᒥᓐ᙮ ᑭᔭ ᐊᑲ ᑕᑈᐅᒐᔨᒥᑯᔨᓇ ᑯᐃᔅᒄ ᒐᒋ ᐃᑐᑎᒧᑦ ᑯᑎᒃ ᐊᐛᓐ ᑕᓐ ᐊ ᐃᓯ ᑎᐱᔨᐛᐅᓯᑦ, ᐊᐛᓐ ᒪᒃ ᒐ ᑕᑈᐅᒐᔨᒥᔅᒃ ᒐᒋ ᒥᔨᔅᒃ ᒐᒂᔪᐤ ᒋᔾ ᒐᒋ ᑎᐱᔨᐛᐅᓯᐅᑦ ?”
“ᓇᒪ ᐊᐛᓐ ᒋᑭ ᒋ ᐊᑐᔅᑯᐛᐤ ᓂᓱ ᐅᒋᒪᐛ ᐊᑲ ᓇᐊᔨᒥᑐᔨᒋ, ᐛᔅ ᐸᐃᒄ ᐊᓂᔭ ᒋᑭ ᐛᐧᑲᑕᐤ, ᐊᑯ ᐊᓂᔭ ᑯᑎᑲ ᒋᑭ ᓴᒋᐊᐤ᙮ ᐊᓂᔭ ᐸᐃᒄ ᓱᒃ ᒋᑭ ᐊᑐᔅᑯᐛᐤ, ᐊᑯ ᐊᓂᔭ ᑯᑎᑲ ᓇᒪ ᒋᑭ ᐅᒋ ᓇᐊᔨᒪᐤ ᒐᒋ ᐊᑐᔅᑯᐛᑦ᙮ ᓇᒪ ᒋᑭ ᒋ ᐊᑐᔅᑯᐛᐛᐤ ᒋᓴᒪᓂᑐᐤ ᒧᔅ ᐊ ᒪᒥᑐᓇᔨᑎᒪᒄ ᒐᒋ ᐛᔪᑎᓯᔭᒄ᙮”


ᐃᔅᐱ ᒪᒃ ᐸᕆᓯᔨᒡ ᐱᔭᑕᒡ ᐅᔭᔪᐤ ᒋ ᒪᔭᔨᒪᐅᒡ ᒋᓴᓴ, ᐛᔅ ᒋ ᓴᒋᑕᐅᒡ ᓱᓇᔭᔪᐤ᙮ ᒋᓴᔅ ᒪᒃ ᒋ ᐃᑕᐤ, “ᒋᑦ ᐃᓯᓇᑯᐃᑎᓱᓇᐛᐤ ᒧᔭᒻ ᐊ ᑯᐃᔅᑯᑕᑎᓯᔭᒄ ᐊᓐᑕ ᐅᑎᔅᑯᐤ ᐃᔪᒡ ᐊ ᑕᒡ, ᒥᒄ ᒪᒃ ᒋᓴᒪᓂᑐᐤ ᒋᔅᒐᔨᑎᒻ ᑕᓐ ᒋᒋᐛ ᐊ ᐃᑕᔨᑕᑯᓯᔭᒄ᙮ ᐛᔅ ᐊᓂᔭᔪᐛ ᒐᒂᔪᐛ ᒋᒋᐛ ᑲ ᐃᑕᔨᑎᒥᐃᑯᒡ ᐊᐛᓐᒋ ᒋᓴᒪᓂᑐᐤ ᐛᐧᑲᑎᒻ ᐊᓂᔭᔪᐛ᙮”
“ᐊᔅᒄ ᐊᑲ ᐅᒋ ᑎᑯᓯᐧᒃ ᒠᓐ ᐅᓯᑲᐃᑕᒐᐤ ᒥᒄ ᐊᓂᔭ ᒧᓱᔅ ᑲ ᒥᓯᓇᐊᐧᒃ ᒋᓴᒪᓂᑐᐛ ᐅᐎᓱᐛᐅᓂᔪᐤ ᑭᔭ ᐊᓂᔭ ᑕᓐ ᑲ ᐃᓯ ᐎᑎᒧᐛᒂ ᐊᓂᔭᐧᑲ ᐅᒋᔅᒋᐛᐃᒐᓱᒡ ᐊᐅᑯᓐ ᐊᓂᔭᔪᐛ ᒥᒄ ᑲ ᐊᐱᑕᒡ ᐊ ᒋᔅᑯᑎᒪᒐᒡ᙮ ᐊᑯ ᒪᒃ ᑲ ᐃᔅᐱᔅ ᑕᑦ ᒠᓐ ᐊᑯ ᒥᔽᒋᒧᐅᓐ ᑲ ᐛᐎᑕᑭᓄᐅᒡ ᒋᓴᒪᓂᑐᐤ ᐅᒋᓴᐅᒋᒪᐅᓐ ᐊ ᐊᔨᒧᑕᑭᓄᐎᒡ᙮ ᓱᒃ ᒪᒃ ᒥᒐᑦ ᐊᐛᓐ ᐊᔨᐧᑭᒻ ᐎᔾ ᐱᒐᐤ ᒋᓴᒪᓂᑐᐛ ᐅᒋᓴᐅᒋᒪᐅᓂᔨᒡ᙮ ᐊᑲᐎᔾ ᐃᑕᔨᑎᒧᒄ ᐊ ᐊᑲ ᓴᔅ ᓂᑐᐛᔨᑕᒂᒡ ᒐᒋ ᓂᓇᐃᑕᑭᓄᐎᒡ ᒋᓴᒪᓂᑐᐤ ᐅᐎᓱᐛᐅᓐ᙮ ᐊᑎ ᐊᓂᔭ ᓇᔅᒡ ᐊᑲ ᐃᑕᔨᑕᑯᓂᔨᒡ ᑲ ᐃᑕᔨᑕᑭᓄᐎᒡ ᐃᔭᐱᒡ ᐃᑕᔨᑎᒥᐃᑯᐤ ᒋᓴᒪᓂᑐᐤ ᒐᒋ ᓂᓇᐃᑕᑭᓄᔨᒋ ᒐ ᐃᔅᐱᔅ ᑎᑯᓂᔨᒡ ᐅᔭ ᐊᔅᒋᔪᐤ ᑭᔭ ᒋᒋᒋᓯᑯᔪᐤ᙮”
“ᒧᔭᒻ ᓇᐸᐤ ᐛᐱᓇᑦ ᐎᐛ ᑯᑎᑲ ᒪᒃ ᐃᔎᐛ ᐎᒋᒪᑦ, ᐱᓯᒂᑎᓯᐤ ᐅᔭ ᐊ ᐃᑎᑦ᙮ ᐊᑯ ᐊᓐ ᓇᐸᐤ ᒐ ᐎᒋᒪᒂ ᐊᓂᔭᔪᐛ ᐃᔎᐛ ᐊᒋ ᐛᐱᓂᑯᔨᒋ ᐅᓇᐸᒥᔪᐛ, ᐱᓯᒂᑎᓯᐤ ᑭᔭ ᐎᔾ᙮”


ᒋᓴᔅ ᒋ ᐎᑎᒻ ᒋᔅᑯᑎᒪᒐᐤ ᑎᐸᒋᒧᐅᓂᔪᐤ ᐊ ᐃᔅᒋᔄᑦ, “ᐸᐃᒂᐤ ᒋ ᑕᐤ ᐊ ᐛᔪᑎᓯᑦ ᓇᐸᐤ ᓇᔅᒡ ᐊ ᓱᓇᔭᐎᔨᒋ ᐅᑦ ᐊᐱᒋᑕᐅᓇ, ᓇᔅᒡ ᐊᒋ ᐛᔪᑎᓯᔪᐱᒪᑎᓯᑦ᙮ ᒋ ᑕᐤ ᒥᓐ ᑯᑎᒃ ᓇᐸᐤ ᓚᓴᕋᔅ ᐊᒋ ᐃᓯᓂᐧᑲᓱᑦ ᓇᔅᒡ ᐊ ᒋᔅᑎᒪᑎᓯᑦ ᐱᓯᒄ ᐊ ᐸᐱᑯᓯᔪᐛᑦ᙮ ᐅᒥᒋᐅᓂᔪᐤ ᐊᒋ ᐊᔭᑦ ᒥᓯᐛ ᐊ ᐃᔅᐱᑎᑦ᙮ ᐎᐎᑎᒥᒡ ᒪᒃ ᐊᓐᑕ ᐎᒋᔨᒡ ᐊᓂᔭ ᑲ ᐛᔪᑎᓯᔨᒋ ᓇᐸᐛ ᐊᑯᑕ ᑲ ᐱᒥᓯᐧᒃ, ᐊ ᐱᑯᓴᔨᑕᐧᒃ ᒐᒋ ᐅᒋ ᐊᓯᒪᑭᓄᐅᑦ ᑕᓐ ᐊᓂᔭᔪᐛ ᑲ ᐃᓯ ᐃᔅᑯᔅᑐᐛᓄᐎᒡ᙮ ᑭᔭ ᐛᐛᒡ ᐊᑎᒺ ᒋ ᑎᑯᓯᓂᔪᐛ ᐊ ᐸᒋ ᓇᓄᒂᑎᒥᔨᒋ ᐊᓂᔭᔪᐤ ᐅᒥᒋ᙮”
“ᐊᓐ ᑲ ᒋᔅᑎᒪᑎᓯᑦ ᓇᐸᐤ ᒐᒃ ᒋ ᓂᐳᐤ, ᒋ ᐸᒋ ᐅᑎᓂᑯᐤ ᐊᓐᒋᓇ, ᐊᓐᑕ ᒪᒃ ᐅᐱᒪ ᐊᑉᕋᐊᒪ ᐊ ᑕᔨᒋ ᐊᑯᑕ ᑲ ᐱᔅᑎᓂᑯᑦ᙮ ᒐᒃ ᑭᔭ ᐊᓐ ᑲ ᐛᔪᑎᓯᑦ ᓇᐸᐤ ᒂ ᓂᐱᑦ, ᒋ ᓇᐃᐧᑯᐛᑭᓄᐤ ᒪᒃ᙮ ᒥᒋ ᐃᔅᑯᑕᒡ ᒪᒃ ᐊ ᑕᑦ ᓇᔅᒡ ᐊ ᐎᓯᑲᐧᑭᓱᑦ, ᒋ ᑎᔅᑎᓴᐳᐤ, ᒂ ᐛᐱᒪᑦ ᐊᑉᕋᐊᒪ ᐊ ᐊᔭᐅᓇᑯᓯᔨᒋ ᓚᓴᕋᓴ ᐊ ᐎᒋᑲᐳᔅᑐᐛᔨᒋ᙮ ᒋ ᐃᓯ ᑕᑈᐤ ᒪᒃ, ‘ᐊᑉᕋᐊᒻ, ᓄᑕ, ᐸᒋ ᒋᔅᑎᒪᒐᔨᒥ᙮ ᐸᒋ ᐃᑎᓴᐅᐤ ᒪ ᓚᓴᕋᔅ ᒐᒋ ᑕᐧᑲᑭᒥᓇᐧᒃ ᐊᑕᒋᑭᒥᔨᒡ ᓂᐱᔪᐤ ᒐᒋ ᐸᒋ ᑕᒋᓇᐧᒃ ᓂᑕᔨᔪᐤ, ᒐᒋ ᐅᒋ ᑕᒋᐱᔨᒡ᙮ ᐛᔅ ᓂ ᓂᓇᐧᑲᑕᔨᒧᓐ ᐅᑕ ᐊ ᐎᐃᑕᒡ ᐃᔅᑯᑕᒡ᙮’ ”
“ᐊᑯ ᐊᑉᕋᐊᒻ ᒂ ᐃᑕᑦ, ‘ᒋ ᒋᔅᒋᓯᓐ ᐊ, ᓂᑯᓴ, ᒪᒂᒡ ᑲ ᐱᒪᑎᓯᔨᓐ ᐊᓐᑕ ᐊᔅᒋᒡ ᒥᔪ ᒐᒂᓐ ᔅᒋ ᐊᔭᓐ, ᓚᓴᕋᔅ ᒪᒃ ᓇᒪ ᐅᒋ ᒥᔪ ᐊᔭᐤ ᒐᒂᔪᐤ᙮ ᐊᑯ ᒪᒃ ᐊᓄᒡ ᒥᔽᔨᒧᐤ ᐎᔾ ᐅᑕ, ᒋᔾ ᒪᒃ ᒋ ᓂᓇᐧᑲᑕᔨᒧᓐ᙮ ᑭᔭ ᑎᑯᓐ ᐅᑕ ᑎᔅᑐᐎᒡ ᐊ ᑕᔭᐧᒄ ᐊ ᐊᑎᑲᒪᓯᓇᓄᐅᒡ ᐊᑲ ᓇᔅᒡ ᒋ ᐃᓯᓇᒂᒡ ᒐᒋ ᐊᓱᐅᑕᑦ ᐊᐛᓐ ᓇᑕ ᐃᔅ ᐊ ᑕᔨᓐ ᑭᔭ ᓇᑕ ᐅᒋ ᒐᒋ ᐸᒋ ᐊᓱᐅᑕᑦ ᐊᐛᓐ᙮’ ”
“ᐊᑯ ᐊᓐ ᑲ ᐛᔪᑎᓯᑦ ᓇᐸᐤ ᒋ ᐃᑕᐤ, ‘ᒋ ᓂᑐᑎᒪᑎᓐ ᒪᒃ, ᓄᑕ, ᐊᑉᕋᐊᒻ, ᒐᒋ ᐃᑎᓴᐅᑦ ᓚᓴᕋᔅ ᐊᓐᑕ ᓄᑕᐎᔭ ᐎᒋᔨᒡ, ᐱᑕᑕᒡ ᑕᑎᓯᐅᒡ ᓂᐧᑲᓂᓯᒡ ᐊᓐᑕ ᒋᐸ ᐃᔭᒂᒥᒪᐤ ᒐ ᐊᑲ ᒋ ᐃᓯᓇᑯᓂᔨᒡ ᐊᔅᒄ ᒐᒋ ᑕᔨᒋ ᐅᑕ ᐅᔭᔪᐤ ᐊ ᐃᔅᐱᔅ ᓂᓇᐧᑲᑕᔨᒧᓇᓄᐎᒡ᙮’ ”
“ᐊᑯ ᐊᓐ ᑲ ᐛᔪᑎᓯᑦ ᓇᐸᐤ ᒂ ᐃᑎᑯᑦ ᐊᑉᕋᐊᒪ, ‘ᒋᐧᑲᓂᓯᒡ ᒋᑭ ᒋ ᐃᔨᒥᑕᐅᒡ ᒧᓱᓴ ᑭᔭ ᐊᓂᔭ ᐅᒋᔅᒋᐛᐃᒐᓱᐛ ᑕᓐ ᑲ ᐃᓯ ᒥᓯᓇᐊᒥᔨᒋ ᒥᓯᓇᐃᑭᓂᒡ ᐊ ᐃᓯ ᐃᔭᒂᒥᒪᒡ ᐊᐛᔪᐛ᙮ ᐊᔪᐅᒄ ᐅᔭ ᒋᐸ ᓂᓇᐃᑎᒧᒡ ᐊᓐᒡ ᒋᐧᑲᓂᓯᒡ᙮’ ”
“ᐊᓐ ᒪᒃ ᑲ ᐛᔪᑎᓯᑦ ᓇᐸᐤ ᒋ ᐃᓯ ᐎᑎᒧᐛᐤ ᐊ ᐃᑕᑦ, ‘ᓇᒪ ᒋᑭ ᐅᒋ ᑕᑈᑎᒧᒡ ᐸᑐᔅ ᐊᐛᔪᐛ ᑲᐤ ᒋ ᐅᓂᔅᑲᔨᒐ ᓂᐳᐅᓂᒡ ᐅᒡ, ᒐᒋ ᓂᑐᐛᐱᒥᑯᒡ ᐊᓐᑕ ᒐᒋ ᐅᒋ ᒂᔅᑲᑎᓯᒡ᙮’ ”
ᐊᑯ ᒪᒃ ᐊᑉᕋᐊᒻ ᒂ ᐃᑕᑦ, “ᒐ ᐊᑲ ᐅᒋ ᐃᑐᑎᒧᐛᒂ ᒧᓱᓴ ᒪᒃ ᐊᓂᔭ ᐅᒋᔅᒋᐛᐃᒐᓱᐛ ᑕᓐ ᑲ ᐃᓯ ᒥᓯᓇᐊᒥᔨᒋ ᓇᒪ ᒋᑭ ᐅᒋ ᑯᒂᑕᔨᑎᒥᐃᑯᐅᒡ ᒐᒋ ᓂᑐᑐᐛᒡ ᐊᐛᔪᐛ ᐸᒋ ᓂᑐᐛᐱᒥᑯᑥᐛ ᐊᑎ ᐊᒋ ᐅᓂᔅᑲᔨᒋ ᓂᐳᐅᓂᒡ ᐅᒡ᙮”

Klausytis ᓗᒃ 16