These Scriptures are a new translation into the Naskapi language spoken at Kawawachikamach, Quebec. We the Naskapi people have been eager to have our own translation of the Bible. For many decades we have had to make do with Scriptures that were translated for indigenous languages that are different from our own: most notably Bishop Horden's Moose Cree New Testament and prayer book, and Rev. W. G. Walton's prayer book. The Naskapi Development Corporation has been engaged with this work since the 1990s, facilitated by Wycliffe Bible Translators and the Canadian Bible Society. The Naskapi community grateful acknowledges the help of all who participated with us in producing these Scriptures. Our prayer is that these Words of God will be cherished by our people for generations to come.

ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ The Naskapi text is copyright © Naskapi Development Corporation Naskapi Development Corporation Kawawachikamach, Québec G0G 2Z0 Canada New Testament published by the Canadian Bible Society (CBS) © 2007 Canadian Bible Society 10 Carnforth Road, Toronto Ontario M4A 2S4 Canada

ᒋᓴᒪᓂᑐᐤ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ God's Word in Naskapi

ᒋ ᑕᐤ ᓇᐸᐤ ᓚᓴᕋᔅ ᐊ ᐃᓯᓂᐧᑲᓱᑦ, ᐊᒋ ᒥᔅᑎ ᐊᐧᑯᓯᑦ᙮ ᐊᓐᑕ ᐸᑕᓂ ᑲ ᐃᓯᓂᐧᑲᑕᔨᒡ ᐅᑕᓇᔪᐤ ᒋ ᐎᒍᐤ᙮ ᐎᐧᑲᓂᓴ ᒪᕆᒋ ᑭᔭ ᒪᕐᑕᔨᒋ ᒋ ᐎᒋᒥᑯᐤ᙮ ᐊᐅᑯᐤ ᒪᕆ ᑲ ᑯᑎᐱᓂᒺᑦ ᑲ ᐎᒋᒪᑯᐅᓂᔨᒡ ᐅᑎᐸᔨᒋᒐᐛ ᐅᓯᑎᔨᒡ ᑭᔭ ᐅᐱᔎᐅᓇ ᑲ ᐊᐱᒋᑕᑦ ᐊ ᑲᓯᐊᒺᑦ ᐅᓯᑎᔪᐛ᙮ ᐊᐅᑯᐤ ᐃᔎᐤ ᐎᐧᑲᓂᓴ ᓚᓴᕋᓴ ᑲ ᐊᐧᑯᓯᔨᒋ᙮ ᓚᓴᕋᔅ ᒪᒃ ᐎᐧᑲᓂᓴ ᒋ ᓂᑐᐛᔨᑎᒥᔪᐛ ᒐᒋ ᐎᑎᒧᐛᑭᓄᔨᒋ ᒋᓴᓴ ᐊ ᐊᐧᑯᓯᔨᒋ ᐊᓂᔭᔪᐛ ᐅᐎᒐᐛᑭᓇ ᑲ ᓴᒋᐊᑦ᙮
ᐃᔅᐱ ᒪᒃ ᒋᓴᔅ ᐱᔭᑕᐧᒃ ᐅᔭ ᒋ ᐃᑕᐤ, “ᐊᑎ ᐊᓂᔭ ᓇᔅᒡ ᐊ ᐊᐧᑯᓯᑦ ᓇᒪ ᒋᑭ ᐅᒋ ᐳᓂᐱᒪᑎᓯᐤ᙮ ᐃᔅᐱᔪᐤ ᐅ ᒐᒋ ᓄᑯᓂᔨᒡ ᒋᓴᒪᓂᑐᐤ ᐅᒋᔅᑕᔨᑕᑯᓱᐅᓐ, ᑭᔭ ᐊᑯᑕ ᒐ ᐅᒋ ᒋᔅᑕᔨᑕᑯᐊᑭᓄᔨᒋ ᒋᓴᒪᓂᑐᐤ ᐅᑯᓴ᙮”
ᒋᓴᔅ ᒋ ᓴᒋᐊᐤ ᐊᓂᔭ ᒪᕐᑕᔨᒋ ᑭᔭ ᐊᓂᔭᔪᐛ ᐎᐧᑲᓂᓯᔪᐛ ᑭᔭ ᐊᓂᔭᔪᐛ ᓚᓴᕋᓴ᙮ ᐃᔅᐱ ᒪᒃ ᑲ ᐎᑎᒧᐛᑭᓄᐅᑦ ᐊ ᐊᐧᑯᓯᔨᒋ ᓚᓴᕋᓴ ᐃᔭᐱᒡ ᒥᓐ ᓂᓱ ᒋᓯᑲᐛ ᒋ ᑕᐤ ᐊᓐᑕ ᐊᓂᔭ ᐅᑕᓇᔪᐤ ᑲ ᑕᑦ᙮ ᐊᑯ ᒂ ᐃᑕᑦ ᐅᒋᔅᒋᓄᐊᒧᐛᑭᓇ, “ᐃᑐᑕᑕᐤ ᒥᓐ ᓇᑕ ᒍᑎᔭ ᐊᔅᒋᒡ᙮”
ᒋ ᐃᑎᑯᐤ ᒪᒃ ᐊᓂᔭᔪᐛ ᐅᒋᔅᒋᓄᐊᒧᐛᑭᓇ, “ᒋᔅᑯᑎᒪᒐᓱᐤ, ᓇᒪ ᐛᔅᑭᒡ ᑲ ᐎ ᓂᐸᐃᔅᒡ ᐊ ᐎ ᐸᐱᐳᒧᓯᓇᑕᐅᔅᒡ ᐊᓐᒡ ᒍᐤ ᐃᔪᒡ ᐃᔭᐱᒡ ᒪᒃ ᒥᓐ ᑲᐤ ᒋ ᐎ ᐃᑐᑕᓐ ᐊᓐᑕ᙮”
ᐊᑯ ᒋᓴᔅ ᒂ ᐎᑎᒧᐛᑦ ᐊ ᐃᑕᑦ, “ᓂᓱᓴᑉ ᑎᐸᐃᑭᓇ ᑎᑯᓐ ᐸᐃᒂᐤ ᐊ ᒋᓯᑲᒡ᙮ ᐊᐛᓐ ᐱᒧᑕᒐ ᐊ ᒋᓯᑲᔨᒡ ᓇᒪ ᒋᑭ ᐅᒋ ᐸᒋᓯᓄᐤ ᐛᔅ ᐛᐸᑎᒻ ᐊᓂᔭ ᐛᔅᑕᐅᓂᔪᐤ ᐅᑕ ᐊᔅᒋᒡ ᑲ ᑎᑯᓂᔨᒡ᙮ ᐱᒧᑕᒐ ᐊᐛᓐ ᐊ ᑎᐱᔅᑲᔨᒡ ᒋᑭ ᐸᒋᓯᓄᐤ ᐛᔅ ᓇᒪ ᑎᑯᓂᔪᐤ ᐛᔅᑕᐅᓂᔪᐤ ᐊᓐᑕ ᐊ ᑕᑦ᙮” ᐊᐅᒄ ᐅᔭ ᑲ ᐃᔅᒋᔄᑦ ᒋᓴᔅ ᐊᑯ ᒥᓐ ᒂ ᐊᑎ ᐃᔅᒋᔄᑦ, “ᓴᔅ ᓂᐸᐤ ᒋ ᐎᒐᐛᑭᓄᐤ ᓚᓴᕋᔅ᙮ ᓂᑭ ᐸᑯᓇᐤ᙮”
ᒋ ᐃᑎᑯᐤ ᒪᒃ ᐅᒋᔅᒋᓄᐊᒧᐛᑭᓇ, “ᐅᑎᐸᔨᒋᒐᐤ, ᓇᐸᒂ, ᒥᓐ ᐛᔅ ᐊᓐ ᒋᑭ ᒥᔪ ᐱᒪᑎᓯᐤ᙮”
ᒋᓴᔅ ᒪᒃ ᓴᔅ ᒋ ᒋᔅᒐᔨᑎᒻ ᓚᓴᕋᓴ ᐊᒋ ᐳᓂᐱᒪᑎᓯᔨᒋ ᒥᒄ ᒪᒃ ᐅᒋᔅᒋᓄᐊᒧᐛᑭᓇ ᓇᒪ ᐅᒋ ᒋᔅᒐᔨᑎᒥᔪᐛ ᐅᔭ ᐊᑯ ᒂ ᐃᑕᔨᒪᒡ ᒋᓴᓴ ᓂᐸᐤ ᐊ ᐃᑕᔨᒪᔨᒋ ᐊᓂᔭᔪᐛ ᓚᓴᕋᓴ᙮ ᐊᑯ ᒋᓴᔅ ᑯᐃᔅᒄ ᒂ ᐎᑎᒺᑦ ᐊ ᐃᑕᑦ, “ᓴᔅ ᓇᒪ ᐱᒪᑎᓯᐤ ᓚᓴᕋᔅ᙮ ᓂ ᒥᔽᔨᑕᓐ ᐊᑲ ᐅᒋ ᑕᔭᓐ ᒪᒂᒡ ᐊᑲ ᒥᔪᐱᔨᑦ ᓚᓴᕋᔅ ᑭᔭ ᒐ ᓇᐃᐱᔨᒡ ᒐᒋ ᑕᑈᔭᔨᒥᔭᒄ᙮ ᒪᒋᒄ ᔅᑐᑕᑕᐤ ᓂᑐᐛᐱᒪᑕᐤ᙮”
ᑥᒥᔅ, ᐸᐃᒄ ᐊᓐ ᑲ ᓂᓯᒡ ᐎᐧᑲᓂᓴ ᑲ ᐃᓯᓂᐧᑲᑕᑭᓄᐅᑦ, ᒋ ᐃᑕᐤ ᐊᓂᔭᔪᐤ ᐎᒋ ᒋᔅᒋᓄᐊᒧᐛᑭᓇ, “ᒥᓯᐛ ᐊᑯᔅ ᐊ ᑎᓯᔭᐧᒄ ᐎᒐᐛᑕᐤ ᒋᓴᔅ ᑭᔭ ᒋᔭᓄᐤ ᒐᒋ ᓂᐸᐃᑯᐅᔭᐧᒄ ᓂᐸᐊᑭᓄᒐ᙮”

ᐃᔅᐱ ᒪᒃ ᒋᓴᔅ ᑕᑯᓯᓐᑦ ᐊᓐᑕ ᒋ ᐎᑎᒧᐛᑭᓄᐤ ᓴᔅ ᓇᐤ ᒋᓯᑲᐛ ᐊᒋ ᐃᔅᐱᔅ ᐊᐃᐧᑯᐛᑭᓄᔨᒋ ᓚᓴᕋᓴ᙮ ᐊᓐ ᒪᒃ ᐅᑕᓇᐤ ᐸᑕᓂ ᑲ ᐃᓯᓂᐧᑲᑕᒡ ᒥᒋᒪ ᒋᕈᓯᓕᒥᒡ ᒋ ᑎᑯᓐ, ᓴᓯᑲᓐ ᓂᓱ ᐊᔅᐱᓴᒡ ᒋ ᐃᔅᐱᓯᓇᑯᓐ ᐊᓐᑕ ᒋᕈᓯᓕᒥᒡ ᐅᒡ᙮ ᒥᒐᑦ ᒪᒃ ᒍᐤ ᐃᔪᒡ ᒋ ᐸᒋ ᓂᑐᐛᐱᒪᐅᒡ ᒪᕐᑕᔨᒋ ᑭᔭ ᒪᕆᔨᒋ ᐊ ᐸᒋ ᒥᔽᔨᒧᐛᐊᒡ ᐊᓂᔭ ᐎᐧᑲᓂᓯᔪᐛ ᐊᒋ ᐳᓂᐱᒪᑎᓯᔨᒋ᙮
ᐃᔅᐱ ᒪᒃ ᒪᕐᑕ ᐱᔭᑕᐧᒃ ᒋᓴᓴ ᐊ ᑎᑯᓯᓂᔨᒋ ᒋ ᐎᐎᔪᐤ ᒐᒋ ᓂᒋᔅᑯᐛᑦ, ᐊᑯ ᐎᔾ ᒪᕆ ᐊᑯᑕ ᐊᓐᑕ ᐊ ᑕᒡ ᑲ ᑕᑦ᙮ ᐊᑯ ᒪᕐᑕ ᒂ ᐃᑕᑦ ᐊᓂᔭᔪᐛ ᒋᓴᓴ, “ᐅᑎᐸᔨᒋᒐᐤ, ᓴᔅ ᐅᑕ ᒋ ᑕᔨᓇᒂ ᓇᒪ ᒋᐸ ᐅᒋ ᐳᓂᐱᒪᑎᓯᐱᓐ ᓂᐧᑲᓂᔅ᙮ ᒥᒄ ᒪᒃ ᓂ ᒋᔅᒐᔨᑕᓐ ᒋᓴᒪᓂᑐᐤ ᒐ ᐃᑐᑎᒪᔅᒃ ᒥᒄ ᑕᓐ ᒐ ᐃᓯ ᓂᑐᑎᒧᐛᐅᑕ᙮” ᒋᓴᔅ ᒪᒃ ᒋ ᐃᑕᐤ ᐊᓂᔭᔪᐛ ᒪᕐᑕᔨᒋ, “ᒥᓐ ᒋᑭ ᐱᒪᑎᓯᐤ ᒋᐧᑲᓂᔅ᙮”
“ᓂ ᒋᔅᒐᔨᑕᓐ ᑕᑈ ᒥᓐ ᒐ ᐅᓂᔅᑲᑦ ᒪᔅᑕᔾ ᒋᓯᑲᔨᒐ,” ᒋ ᐃᑕᐤ ᒪᕐᑕ᙮
ᒋᓴᔅ ᒂ ᐃᑕᑦ, “ᐊᐅᒄ ᓂᔾ ᑲ ᐅᓂᔅᑲᓇᑦ ᐊᐛᔪᐛ ᐊᒋ ᓂᐱᔨᒋ ᑭᔭ ᑲ ᒥᔨᐛᑦ ᐱᒪᑎᓯᐅᓂᔪᐤ᙮ ᐊᐛᓐ ᒐ ᐸᒋ ᑕᑈᔭᔨᒧᒂ ᒋᑭ ᐱᒪᑎᓯᐤ ᐊᑎ ᐊᒋ ᓂᐱᑦ᙮ ᐊᓐ ᐊᐛᓐ ᑲ ᐱᒪᑎᓯᑦ ᐊ ᐸᒋ ᑕᑈᔭᔨᒥᑦ ᓇᒪ ᓂᑕ ᒋᑭ ᐳᓂᐱᒪᑎᓯᐤ᙮ ᒋ ᑕᑈᑕᓐ ᐊ ᐅ ᑲ ᐃᑎᑕᓐ ?”
“ᓂᐦᐃ, ᐅᑎᐸᔨᒋᒐᐤ,” ᒋ ᐃᑕᐤ ᒪᕐᑕ᙮ “ᓂ ᑕᑈᑕᓐ ᒋᔾ ᐊ ᐊᐎᔨᓐ ᐊᓂᔭ ᒋᓴᒪᓂᑐᐤ ᑲ ᐸᒋ ᐃᑎᓴᐛᑦ, ᑭᔭ ᒋᔾ ᐊ ᐊᐎᔨᓐ ᒋᓴᒪᓂᑐᐤ ᐅᑯᓴ, ᐊᓂᔭ ᑲ ᐃᔅᒋᔄᑦ ᒐᔅᑎᓇᔅ ᒐ ᑎᑯᓯᓂᔨᒋ ᐅᑕ ᐊᔅᒋᒡ᙮”

ᐃᔅᐱ ᒪᕐᑕ ᑲ ᐃᔅᒋᔄᑦ ᐅᔭ ᒋ ᓂᑐᐛᐱᒪᐤ ᐎᐧᑲᓂᓴ ᒪᕆᔨᒋ ᐊᑯ ᒂ ᐃᑕᑦ ᐸᐧᑲᒡ ᐊ ᐃᔨᒥᑦ, “ᒋᔅᑯᑎᒪᒐᓱᐤ ᑕᐤ ᐅᑕ᙮ ᒋ ᐎᓴᒧᒄ᙮” ᐃᔅᐱ ᐱᔭᑕᐧᒃ ᒪᕆ ᐅᔭ ᒋ ᐱᓯᑯᓯᐱᑕᐤ ᐊᑯ ᒂ ᐎᐎᑦ ᒐᒋ ᓂᒋᔅᑯᐛᑦ ᒋᓴᓴ᙮ ᒥᒄ ᒪᒃ ᐊᔅᒄ ᓇᒪ ᐅᒋ ᑎᑯᓯᓄᐤ ᒋᓴᔅ ᐊᓐᑕ ᐊᓂᔭ ᐅᑕᓇᔪᐤ, ᐊᓐᑕ ᑲ ᓂᒋᐃᑯᑦ ᒪᕐᑕᔨᒋ ᐊᔅᒄ ᐊᑯᑕ ᑲ ᐸᒋ ᑕᑦ ᒋᓴᔅ᙮ ᐊᓐᒡ ᒪᒃ ᒍᐤ ᐃᔪᒡ ᑲ ᐎᑎᐱᒪᒡ ᒪᕆᔨᒋ ᐊ ᐎ ᒥᔽᔨᒧᐛᐊᒡ ᒋ ᓇᓴᐛᐅᒡ ᐃᔅᐱ ᐎᔭᐱᒪᒡ ᓇᔅᒡ ᐊ ᔭᓯᒋᐱᔪᐅᔨᒋ ᐊ ᐊᑎ ᐎᐎᔨᒋ ᐛᔅ ᒋ ᐃᑕᔨᑎᒧᒡ ᐊᓐᑕ ᐊᓂᔭ ᑲ ᐱᒥᓯᒪᑭᓄᔨᒋ ᐎᐧᑲᓂᓯᔪᐛ ᐊᑯᑕ ᐊ ᐃᑐᑕᔨᒋ ᒐᒋ ᒪᔨᒋ᙮
ᐃᔅᐱ ᒪᒃ ᒪᕆ ᑕᑯᓯᐧᒃ ᐊᓐᑕ ᒋᓴᓴ ᑲ ᑕᔨᒋ ᐎᔭᐱᒪᑦ ᒪᒃ ᒋ ᐅᒋᒋᐧᑯᓂᐱᔪᐤ ᐊᓐᑕ ᐅᓯᑎᔨᒡ, ᐊ ᐃᑕᑦ, “ᐅᑎᐸᔨᒋᒐᐤ, ᓴᔅ ᒋ ᑕᔨᓇᒂ ᓇᒪ ᒋᐸ ᐅᒋ ᐳᓂᐱᒪᑎᓯᐱᓐ ᓂᐧᑲᓂᔅ᙮”
ᐃᔅᐱ ᒋᓴᔅ ᐎᔭᐱᒪᑦ ᒪᕆᔨᒋ ᐊ ᒪᔨᒋ ᑭᔭ ᐊᓂᔭᔪᐛ ᒍᐤ ᐃᔪᐛ ᑲ ᐸᒋ ᐎᒐᐅᑯᔨᒋ ᐊ ᒪᔨᒋ ᓇᔅᒡ ᒋ ᒋᔅᑎᒪᓯᑐᐛᐤ ᐊᔪᐤ ᒪᒃ ᓇᔅᒡ ᒋ ᒥᓯᒥᑕᐊᐤ᙮ ᐊᑯ ᒂ ᐃᔅᒋᔄᑦ, “ᑕᓐᑕ ᑲ ᓇᐃᐧᑯᐛᑭᓄᐅᑦ ?” “ᐊᔅᑎᒻ ᐅᑎᐸᔨᒋᒐᐤ ᐸᒋ ᐛᐸᑕ,” ᒋ ᐃᑎᑯᐤ᙮
ᒋ ᒪᐤ ᒋᓴᔅ᙮ ᐊᑯ ᐊᓐᒡ ᒍᐤ ᐃᔪᒡ ᒂ ᐃᔅᒋᔄᒡ, “ᑕᑈ ᒋ ᓴᒋᐊᑯᐱᓐ ᐊᓂᔭᔪᐛ ᓚᓴᕋᓴ᙮”
ᒋ ᑕᐅᒡ ᒪᒃ ᐸᔅᒐ ᐊ ᐃᔅᒋᔄᒡ, “ᒋ ᐃᑐᑐᐛᐤ ᐊᓂᔭ ᐊᑲ ᐛᐸᑎᒥᔨᒋ ᓇᐸᐛ ᒐᒋ ᐛᐸᑎᒥᔨᒋ᙮ ᑕᓐᑕ ᐛᒋ ᐊᑲ ᐅᒋ ᐃᑐᑐᐛᑦ ᓚᓴᕋᓴ ᒐ ᐊᑲ ᒋ ᓂᐱᔨᒋ ?”

ᒋᓴᔅ ᒪᒃ ᒥᓐ ᒋ ᒧᓯᑕᐤ ᓇᔅᒡ ᐊ ᒥᓯᒥᑕᐊᑦ᙮ ᐊᑯ ᒂ ᐃᑐᑕᑦ ᐊᓐᑕ ᐊᓂᔭ ᑲ ᐛᑎᒂᐱᔅᑲᐃᑭᓄᐎᒡ ᐊᓐᑕ ᑲ ᐱᒥᓯᒪᑭᓄᔨᒋ ᓚᓴᕋᓴ, ᒋ ᒋᐱᑲᐳᐊᑭᓄᐃᑯᐱᓇᓂ ᐊ ᒥᓯᑎᔨᒋ ᐊᓯᓂᔾ ᐊᓐᑕ ᐊ ᐅᒋ ᐱᒐᓄᐎᒡ᙮ ᒋ ᐃᔅᒋᔄᐤ ᒋᓴᔅ, “ᐃᒐᑎᑎᐱᓇᐧᒄ ᐊᓐ ᐊᓯᓂᔾ᙮” ᐊᑯ ᒂ ᐃᔅᒋᔄᑦ ᒪᕐᑕ ᐊᓂᔭ ᓚᓴᕋᔅ ᐎᐧᑲᓂᓴ, “ᐅᑎᐸᔨᒋᒐᐤ, ᓴᔅ ᒋᑭ ᒥᔭᑯᓐ, ᐛᔅ ᓴᔅ ᓇᐤ ᒋᓯᑲᐛ ᑲ ᐃᔅᐱᔅ ᓂᐱᑦ᙮”
ᐊᑯ ᒋᓴᔅ ᒂ ᐃᑕᑦ ᐊᓂᔭ ᒪᕐᑕᔨᒋ, “ᓇᒪᐎᔾ ᐊ ᓴᔅ ᒋ ᐅᒋ ᐎᑎᒪᑎᓐ, ᑕᑈᑎᒥᓇ ᒐ ᐛᐸᑎᒧᑦ ᒋᓴᒪᓂᑐᐤ ᐅᒋᔅᑕᔨᑕᑯᓱᐅᓐ ?”
ᐊᑯ ᒂ ᐃᒐᑕᐊᒡ ᐊᓂᔭ ᐊᓯᓂᔭ᙮ ᒋᓴᔅ ᒪᒃ ᐊ ᑎᔅᑎᓴᐱᑦ ᒋ ᐃᔅᒋᔄᐤ, “ᓄᑕ, ᒋ ᓂᓇᔅᑯᒥᑎᓐ ᐊ ᐸᒋ ᓂᑐᑐᔨᓐ᙮ ᓂ ᒋᔅᒐᔨᑕᓐ ᒧᔅ ᐊ ᐸᒋ ᓂᑐᑐᔨᓐ, ᒥᒄ ᒪᒃ ᓂᑦ ᐃᔅᒋᔄᓐ ᐅ ᒐᒋ ᑕᑈᑕᒡ ᐅᒡ ᐃᔪᒡ ᒋᔾ ᐊᒋ ᐸᒋ ᐃᑎᓴᐎᔨᓐ᙮”
ᐃᔅᐱ ᒪᒃ ᐅᔭ ᑲ ᐃᔅᒋᔄᑦ ᒋᓴᔅ ᒋ ᒋᔄᐛᐤ ᐊ ᐃᔅᒋᔄᑦ, “ᓚᓴᕋᔅ, ᐸᒋ ᐎᐎᔾ !” ᒋ ᐸᒋ ᐎᐎᔪᐤ ᐊᓐ ᓇᐸᐤ ᑲ ᓂᐱᑦ, ᐅᑎᒋᔭ ᑭᔭ ᐅᓯᑕ ᐊ ᐎᔎᔭᐸᐧᑲᑕᔨᒋ ᐱᒍᐎᔭᓂᓯᔪᐤ ᑭᔭ ᐊ ᒪᑯᐱᑕᔨᒡ ᐅᑕᔅᑎᒥᐧᒄ᙮ ᐊᑯ ᒋᓴᔅ ᒂ ᐃᑕᑦ, “ᐊᐱᐧᑯᓇᐧᒄ, ᒐ ᐱᔅᑎᓇᒄ᙮”


ᒥᒐᑦ ᒪᒃ ᒍᐤ ᐃᔪᒡ ᑲ ᐸᒋ ᒧᐱᔅᑐᐛᒡ ᒪᕆᔨᒋ ᒋ ᐛᐸᑎᒧᒡ ᑕᓐ ᑲ ᐃᑎᔨᒋ ᒋᓴᓴ ᑭᔭ ᒋ ᑕᑈᔭᔨᒪᐅᒡ᙮ ᐃᔭᐱᒡ ᒪᒃ ᐱᔅᒐ ᒋ ᓂᑐᐛᐱᒪᐅᒡ ᐊᓂᔭᔪᐛ ᐸᕆᓯᐊ ᐊ ᐎᑎᒧᐛᒡ ᑕᓐ ᑲ ᐃᑎᔨᒋ ᒋᓴᓴ᙮
ᐊᑯ ᐊᓐᒡ ᐸᕆᓯᔨᒡ ᑭᔭ ᑲ ᓂᑲᓂᐱᒡ ᐊᔭᒥᐊᐅᒋᒪᐅᒡ ᒋ ᒪᒧᓇᐅᒡ ᑲ ᐅᒋᒪᐎᔨᒋ ᑲ ᓂᑲᓂᔅᑯᐛᔨᒋ ᐃᔪᐛ ᐊ ᐃᑕᒡ, “ᑕᓐ ᒐ ᐃᑎᔭᐧᒄ ? ᓇᔅᒡ ᒥᒐᑦ ᒪᒥᔅᑲᒡ ᒐᒂᔪᐛ ᐊ ᐃᓯ ᐃᑐᑕᐧᒃ ᐅ ᓇᐸᐤ᙮ ᐱᔅᑎᓂᒂ ᒐᒋ ᐃᑎᑦ ᐅᔭ ᑕᓐ ᐊ ᐃᑎᑦ ᒥᓯᐛ ᐊᐛᔪᐛ ᒐᒃ ᒋᑭ ᑕᑈᔭᔨᒥᑯᐤ ᑭᔭ ᐊᓐᒡ ᕈᒻ ᑎᐸᔨᒋᒐᓱᐅᒡ ᒋᑭ ᓂᓱᐅᓇᒋᑕᐅᒡ ᐊᓐᑕ ᐊᓂᔭ ᒪᐅᒡ ᑲ ᐸᔭᐧᑭᓂᔨᒡ ᒋᒋᓴᐊᔭᒥᐊᐅᒋᐛᐱᓇᓂᔪᐤ ᑭᔭ ᒥᓯᐛ ᒋᔭᓄᐤ ᒍᐤ ᑲ ᐃᑎᔅᑲᓇᓯᔭᐧᒄ ᒋᑭ ᓂᓱᐅᓇᒋᐃᑯᓄᐅᒡ᙮”
ᐸᐃᒄ ᒪᒃ ᐊᓐ ᐊᔭᒥᐊᐅᒋᒪᐤ ᑲᔭᐸᔅ ᑲ ᐃᓯᓂᐧᑲᓱᑦ ᒪᒂᒡ ᑲ ᒋᓴᐊᔭᒥᐊᐅᒋᒪᐅᑦ ᐊᓂᔭ ᑲ ᐱᐳᓂᔨᒡ ᒋ ᐃᑕᐤ, “ᑕᑈ ᓇᒪ ᒋ ᒋᔅᒐᔨᑕᓇᐛᐤ ᒐᒂᓐ᙮ ᓇᒪᐎᔾ ᐊ ᔅᒋ ᓂᔅᑐᑕᓇᐛᐤ ᐅᔅᑕ ᒐ ᒥᔪᐱᔭᒄ ᐸᐃᒄ ᓇᐸᐤ ᒐᒋ ᓂᐱᔅᑎᒧᐛᑦ ᐃᔪᐛ ᐃᔅᐱᔅ ᐎᔾ ᒥᓯᐛ ᒋᔭᓄᐤ ᒍᐤ ᑲ ᐃᑎᔅᑲᓇᓯᔭᐧᒄ ᒐᒋ ᓂᓱᐅᓇᒋᐃᑯᔭᐧᒄ᙮”
ᐎᔾ ᒪᒂᒡ ᑲᔭᐸᔅ ᐊᒋ ᒋᓴᐊᔭᒥᐊᐅᒋᒪᐅᑦ ᐊᓂᔭ ᑲ ᐱᐳᓂᔨᒡ ᐊᐅᒄ ᐅᔭ ᐛᒋ ᒥᔨᑯᑦ ᒋᓴᒪᓂᑐᐛ ᐅᔭ ᒐᒋ ᐃᔅᒋᔄᑦ ᐊ ᒋᔅᒋᐛᐃᒐᑦ, ᒋ ᐃᑕᐤ ᒋᓴᓴ ᒐ ᓂᐱᔅᑎᒧᐛᔨᒋ ᒍᐤ ᑲ ᐃᑎᔅᑲᓇᓯᔨᒋ ᐃᔪᐛ᙮ ᒥᒄ ᒪᒃ ᓇᒪ ᒥᒄ ᒍᐤ ᐃᔪᐛ ᒐ ᓂᐱᔅᑎᒧᐛᔨᒋ, ᒥᓯᐛ ᑭᔭ ᐊᓂᔭᔪᐛ ᒋᓴᒪᓂᑐᐛ ᐅᑦ ᐃᔨᒥᔪᐛ ᑕᑎᐸᓐ ᑲ ᑕᔨᒋ ᒐ ᒪᒧᓇᔨᒋ, ᐸᐃᑯᑕᓇᐤ ᒐᒋ ᐃᓯᓇᑯᓯᔨᒋ᙮
ᐊᓂᔭ ᒪᒃ ᑲ ᒋᓯᑲᔨᒡ ᐊᑯᑕ ᑲ ᐅᒋ ᒋᒋᐱᔨᑕᒡ ᐊ ᓇᓂᑐ ᒋᔅᒐᔨᑕᒡ ᑕᓐ ᒐ ᐃᑎᒡ ᒐᒋ ᓂᐸᐊᒡ ᒋᓴᓴ᙮
ᐊᔪᐅᒄ ᒪᒃ ᐅᔭ ᐛᒋ ᐊᑲ ᐅᒋ ᑕᑦ ᒋᓴᔅ ᐊᓐᑕ ᐊ ᒥᒐᑎᓇᓄᐎᒡ ᐊᓐᑕ ᒍᑎᔭ ᐊᔅᒋᒡ, ᒋ ᔅᑐᑕᐤ ᐊᑯ ᐊᓐᑕ ᐸᐧᑯᑎᔅᑭᒥᑲᒡ ᒥᒋᒪ ᑲ ᑎᑯᓂᔨᒡ ᐅᑕᓇᔪᐤ ᐃᑉᕋᐃᒻ ᑲ ᐃᓯᓂᐧᑲᑕᔨᒡ ᐊᑯᑕ ᐊᓐᑕ ᑲ ᑕᑦ ᑭᔭ ᐅᒋᔅᒋᓄᐊᒧᐛᑭᓐ ᐊᑯᑕ ᑲ ᑕᔨᒋ᙮
ᒋ ᐸᓱᓇᑯᓐ ᒪᒃ ᐊᓐ ᒍᐤ ᐎᒪᔅᑲᒐᐅ-ᒥᑯᓴᐅᓐ᙮ ᒥᒐᑦ ᐊᐛᓐᒋ ᒋ ᐸᒋ ᐃᑐᑕᐅᒡ ᒋᕈᓯᓕᒥᒡ ᓂᓇᐧᑯᐤ ᐅᑕᓇᒡ ᐊ ᐅᑐᑕᒡ ᐊ ᐸᒋ ᑎᑯᓯᒡ ᒐᒋ ᐃᑐᑕᒡ ᑕᓐ ᑲ ᐃᓯ ᐎᔅᑕᔨᒡ ᐊᔭᒥᐊᐅ ᐎᓱᐛᐅᓂᒡ ᒋᐸ ᐃᑐᐅᒡ ᒐᒋ ᐸᔭᒋᓯᒡ᙮ ᒥᒐᑦ ᒪᒃ ᐅᒡ ᐃᔪᒡ ᒋ ᓇᓂᑐᐛᐱᒪᐅᒡ ᒋᓴᓴ ᐊᓐᑕ ᒋᓴᐊᔭᒥᐊᐅᒋᐛᐱᒡ ᐊ ᒪᒧᐎᒡ ᐊ ᐃᓯ ᑯᒂᒋᒥᑐᒡ, “ᑕᓐ ᐊ ᐃᑕᔨᑎᒥᓐ ᒋᔾ ? ᒋᑭ ᐸᒋ ᓇᒋ ᒥᑯᓴᐛ ᐊ ᒋᑦ ᐃᑕᔨᒪᐤ ?” ᐊᓐᒡ ᒪᒃ ᑲ ᓂᑲᓂᐱᒡ ᐊᔭᒥᐊᐅᒋᒪᐅᒡ ᑭᔭ ᐊᓐᒡ ᐸᕆᓯᔨᒡ ᒋ ᐃᑎᓱᐛᐅᒡ ᔭᐃᑕᔾ ᐊᐛᔪᐛ ᒐ ᐎᑎᒥᔨᒋ ᒋᔅᒐᔨᒪᔨᒐ ᑕᓐᑕ ᐊ ᑕᔨᒋ ᒋᓴᓴ ᒐᒋ ᒪᑯᓇᑭᓄᔨᒋ᙮

Klausytis ᒠᓐ 11