Ирод пачъыхьэ итетыгъо мафэхэм иудей къалэу Бет-Лэхьэм Исус къызыщэхъум, тхьэгурымагъохэр тыгъэ къокӀыпӀэмкӀэ къикӀыхи, къалэу Ерусалим къэкӀуагъэх.
– Тыдэ щыӀа джуртхэм япачъыхьэу къэхъугъэр? – кӀэупчӀагъэх. – Сыда пӀомэ, ащ ижъуагъо тыгъэ къокӀыпӀэмкӀэ тэ щытлъэгъугъэти, ар дгъэлъэпӀэнэу тыкъэкӀуагъ.
Ирод пачъыхьэм ар зызэхехым, къэгумэкӀыгъ, Ерусалим зэкӀэ дэс цӀыфхэри ащ дэгумэкӀыгъэх.
Арыти, Ирод цӀыфхэм зэкӀэ ядин пэщэшхохэри, я Тэурат егъэджэкӀо пэщэ пстэури ыугъоихи, яупчӀыгъ:
– Тыда Христос къызщыхъун фаер?
– Иудей хэкум щыщ Бет-Лэхьэм ары, – къыраӀуагъ ахэмэ, – сыда пӀомэ, пегъымбарым моущтэу къытхыгъ:
«О, Иудей хэкум щыщ Бет-Лэхьэм. Иудэ лъэпкъым ипащэхэм анахьи зыкӀи уанахь цӀыкӀоп; сыда пӀомэ, зы пащэ о къыпхэкӀыщт. А пащэм мэлахъом мэлхэр зэрэзэрищэхэрэм фэдэу, слъэпкъ Израиль зэрищэщт».
Аущтэу къызыраӀом, Ирод тхьэгурымагъохэм шъэфэу къяджи, жъуагъор къызкъокӀыгъэ охътэ дэдэр зэригъэшӀагъ. Ахэр Бет-Лэхьэм ыгъакӀохэзэ, ариӀуагъ:
– ШъукӀуи, сабыим икъэбар дэгъоу къызэжъугъашӀ. Ар къызыжъугъоткӀэ, макъэ къысэжъугъэӀу, сэри ар згъэлъэпӀэнэу сыкӀощт.
Тхьэгурымагъохэр пачъыхьэм къариӀуагъэм едэӀухи, ежьагъэх. Тыгъэ къокӀыпӀэмкӀэ щалъэгъугъэ жъуагъор ахэмэ апэ итэу кӀохэзэ, сабыир зыдэщыӀэ чӀыпӀэм зынэсхэм, ащ къышъхьэщыуцуагъ. Жъуагъор залъэгъум, лъэш дэдэу гушӀуагъэх. Унэм зехьэхэм, сабыири ащ янэу Мерэми алъэгъугъэх. Залъэгъухэм, сабыим ыпашъхьэ лъэгонджэмышъхьэкӀэ зыщырадзыхи, агъэлъэпӀагъ. Япхъуантэхэр зэтырахыхи, тынхэу дышъи, ладэни, смирни сабыим ратыгъэх. Ирод дэжь амыгъэзэжьынэу пкӀыхьапӀэкӀэ Тхьэм къагуригъэӀуагъэти, нэмыкӀ гъогукӀэ яхэгъэгу кӀожьыгъэх.

Тхьэгурымагъохэр зекӀыжьхэм, Зиусхьаным имэлэӀич пкӀыхьапӀэкӀэ Юсыф къыфэкӀуагъ.
– Къэтэджи, – къыӀуагъ мэлэӀичым – сабыимрэ ащ янэрэ зыдащэхи, Мысырым кӀэтхъу. Макъи къыосэгъэӀуфэ, ащ щыӀ, сыда пӀомэ, Ирод сабыир ыукӀынэу лъыхъущт.
Аущтэу Юсыф тэджи, сабыимрэ ащ янэрэ чэщым зыдырищажьэхи, Мысырым кӀуагъэ. Ирод олӀэфэкӀэ ар ащ щыпсэугъ. Аущтэу зыкӀэхъугъэр Зиусхьаным мы гущыӀэхэу пегъымбарым къыригъэӀуагъэхэр къэшъыпкъэжьынхэр ары: «Мысырым къикӀыжьынэу с Къо сыкъеджагъ».

Тхьэгурымагъохэм къызэрагъэпцӀагъэр Ирод зелъэгъум, лъэшэу къэгубжыгъ. Тхьэгурымагъохэм къыраӀогъэ уахътэм тетэу, Бет-Лэхьэми ащ зэкӀэ иӀэгъо-благъоми къащыхъугъэкӀэ сабыйхэр илъэситӀу зыныбжьым нэс аукӀынхэу идзэлӀхэр ыгъэкӀуагъ. Джащыгъум мы гущыӀэхэу пегъымбар Иеремие къыӀуагъэхэр къэшъыпкъэжьыгъэх:
«Куо-хьау макъэ къуаджэу Рамэ къыщыӀугъ, гъымэкъэшхорэ тхьаусхэ мэкъэшхорэ ахэтэу. Рахил зигъэсамбырыжьынэу фэмыеу, исабыйхэр егъэежьы, сыда пӀомэ, ахэр щыӀэжьыхэпышъ ары».

Ирод зэлӀэ ужым, Зиусхьаным имэлэӀич пкӀыхьапӀэкӀэ Юсыф Мысырым къыщыфакӀуи, къыӀуагъ:
– Къэтэджи, сабыимрэ ащ янэрэ зыдэщэжьыхи, Израиль хэгъэгум кӀожь, сыда пӀомэ, сабыим ыпсэ хэзыхынхэу ыуж итыгъэхэр лӀагъэх.
Аущтэу Юсыф тэджи, сабыимрэ ащ янэрэ зыдищэжьхи, Израиль хэгъэгум кӀожьыгъэ. Ау Ирод ычӀыпӀэкӀэ ащ ыкъо Архелай Иудей хэкум ипачъыхьэ хъугъэу Юсыф къэбар зызэхехым, ащ кӀонкӀэ щынагъэ. ПкӀыхьапӀэкӀэ Тхьэм къызгурегъэӀо ужым, Галилей хэкум кӀуи, НазареткӀэ заджэхэрэ къалэм дэтӀысхьагъ. Аущтэу зыкӀэхъугъэр мы гущыӀэхэу пегъымбархэм Исус ехьылӀагъэу къаӀуагъэхэр къэшъыпкъэжьынхэр ары: «Назарет щыщкӀэ еджэщтых».

Klausytis Маттэ 2