Avar - 2008 Edition (Non-Drama - NT)

Avar - 2008 Edition (Drama - NT)

Аллагьасул калам рагӏизе гӏащикъал гӏадамазул кӏудияб руккел букӏана цо нухалъ гъункун гьесда сверухъе бакӏарун. Гӏиса гьебмехалъ Геннесарет абулеб хӏорил рагӏалда вахъун чӏун вукӏана. Хӏорил рагӏалда кӏиго раса бихьана Гӏисада. Русбуздаса къватӏире рахъун ччугӏихъабаз жидерго гьин чурулеб букӏана. Симонил расаялъуве лъугьун Гӏисаца гьесда гьарана раса дагьаб жанибегӏан бачейилан. Росонив гӏодов чӏун гӏадамазе вагӏза-насихӏат гьабизе лъугьана гьев. Вагӏза-хабар лъугӏидал, Симонида абуна:
– Добе хӏорил гъварилъудегӏан расаги бачун, рехе дурго гьин.
Симоница гьесие жаваб гьабуна:
– Я, Насихӏатчи! Нолъ сордо рогьинегӏан хӏалтӏаниги, цохӏониги ччугӏа кквечӏо нижеца. Амма дур рагӏи гӏадахъ босун дица гьин рехила.
Гьес малъухъе гьабидал, гьезие хӏаталдаса ун гӏемераб ччугӏа щвана. Гьин тӏутӏун унеб букӏана ччугӏил бакӏлъиялъ. Доб цояб росонир рукӏарал гьалмагъзабаздеги ишан гьабуна гьез кумекалъе рачӏайилан. Рачӏун дозги кумек гьабун, кӏиябго раса ччугӏил цӏезабуна. Давлаялъул гӏемерлъиялъ лъадалъе тӏерхьун ине дагьалъ хутӏана гьел русби. Гьебмехалъ Симон-Пётрица, Гӏисал накабазда цеве чӏун, суждаги гьабун, абуна:
– Я, Бетӏерчӏахъад! Дида аскӏоса нахъе а мун! Дун вуго мунагьазул цӏурав чи!
Абиларищ, гьевги гьесда цадахъ гьин рехаралги кутакалда хӏинкъун рукӏиндал, ккураб ччугӏил гӏемерлъи бихьун. Гьеб ишалъ гьединго кутакалда хӏинкъизаруна Симонил гьалмагъзабилъун рукӏарал Зебедайил васал Якъубги Иоаннги. Цинги Гӏисаца Симонида абуна:
– Хӏинкъуге! Гьанжеялдаса нахъе дуца, ччугӏа гуреб, гӏадамалин кквезе ругел.
Кӏиябго раса хӏорил рагӏалде цӏараб мехалъ, кинабго жоги гьениб тун, гьел Гӏисада цадахъ уна.

Гьале Гӏиса цо шагьаралда вугеб мехалъ, гьев вихьаравго, кӏалагъоркье ккана ва гьардезе лъугьана тӏолабго черх барасалъ бацарав цо чи:
– Я, Бетӏерчӏахъад! Дуе бокьани, дуда кӏолаха дун вацӏцӏалъизавизе!
Гӏебеде битӏун гьесда кверги хъван, Гӏисаца абуна:
– Дие бокьун буго мун вацӏцӏалъизе. Вацӏцӏалъе мун!
Гьебсагӏат барасалдаса сахлъана гьев чи. Живго сахлъизавиялъул хабар лъиданиги бицунгейилан лъазабуна Гӏисаца гьесда:
– Мусал къануналда рекъон, мунго вацӏцӏалъун вукӏин гӏадамазда лъазе, кашишасухъеги ун, гьесда дурго черх бихьизабе ва мунго вацӏцӏалъиялъухъ къурбанги хъвезабе.
Бугониги, Гӏисал хӏакъалъулъ хабар халкъалда гьоркьоб дагьабги цӏикӏкӏун тӏибитӏана. Гьесухъ гӏенеккизеги ва жалго сахлъизаризеги рачӏунаан халкъалъул руккалаби. Гьевин абуни, гӏадан-чи гьечӏеб бакӏалде ун, Аллагьасе гьари-дугӏаялда вукӏунаан.

Цо къоялъ Гӏисаца вагӏза-насихӏат гьабулеб мехалъ, гьесухъ гӏинтӏамун чӏаразда гьоркьор рукӏана Галилеялъул щибаб росулъа, Ягьудиялдаса, гьединго Иерусалималдаса рачӏарал фарисеял ва диниял гӏалимзаби. Унтарал сахлъизаризе кӏолеб Бетӏергьанасул къудраталъ къвал бан вукӏана гьев. Гьале цо чагӏаз туртида лъун восун вачӏана палижалъ ккурав чи. Гӏисада цеве лъезе гьев чи рокъове жаниве восизе хӏаракат бахъулеб букӏана гьез. Амма гӏадамазул гӏемерлъиялъ нуцӏихъан восун бажаричӏого, тӏохги бичун, гьенисан туртида лъовухъего рукъ бакьулъе Гӏисада цеве тӏаса гъоркье виччана гьез гьев. Гьев восун рачӏарал гӏадамазул божи бихьун, Гӏисаца абуна:
– Мунагьаздаса вацӏцӏалъана, гьудулав чи, мун.
Дол диниял гӏалимзабиги фарисеялги жалго жиделъго гаргадизе лъугьана:
– Гьединал гӏасиял-пасикъал рагӏаби абизе ккани, гьавго щив чи! Гӏицӏго Аллагьасда гурони, лъида кӏолеб инсанасул мунагь чуризе?
Гӏисал хӏалада лъана гьезул пикраби. Гьес гьикъана:
– Щай нужеца нужерго рекӏелъе гьединал пикраби риччалел? Кинаб бигьаяб: «Мун мунагьаздаса вацӏцӏалъана», – ян абизейищ, яги: «Тӏаде вахъун, вилълъанхъе», – ян абизейищ? Амма нужеда лъан букӏа: Гӏадамил Лъимадул ихтияр буго гьаб ракьалда гӏадамазул мунагьал тӏасалъугьун тезе.
Цинги Гӏисаца унтарасда абуна:
– Дица дуда абулеб буго: тӏаде вахъа, дурго малиги босун, рокъове а.
Ралагьун гӏадамалгун, гьебсагӏат тӏаде вахъана гьев, живго тӏад лъун вукӏараб турутги босун, рокъове ана, Аллагьасе реццги гьабулаго. Гӏажаиблъун-хӏикмалъун лъугьун, киназго Аллагьасе рецц гьабуна. Хӏинкъиялъ къвал бан ругел гьез абулеб букӏана:
– Тамашаяб иш бихьана жакъа нилъеда! – ян.

Гьениса къватӏиве вахъун унаго, нухлул хӏакъ бакӏарулеб бакӏалда гӏодов чӏун вихьана Гӏисада Левий абулев гьеб ишалъе тӏамурав чи.
– Дида цадахъ вилълъа, – ян абуна гьесда Гӏисаца.
Букӏаралъуб букӏарабги тун тӏаде вахъун, гьесда цадахъ ана Левий.
Жиндирго бакӏалда Левийица кӏудияб гьоболлъи гьабуна Гӏисае. Гьенир рукӏана гӏемерал магъало бакӏарулел чагӏиги ва гьебго тайпаялъул цогидал гӏадамалги. Фарисеялги гьезул мазгьабалъул диниял гӏалимзабиги Гӏисал муридаздехун гъулгъудизе лъугьана:
– Щай нуж гьал магъало бакӏарулел чагӏаздаги цогидаб мунагь-хӏакъалъул агьлуялдаги цадахъ гӏодор чӏун квана-гьекъолел?
Гьезие жаваб гьабун Гӏисаца абуна:
– Сахазе гурев тохтир хӏажалъулев, унтаразейин. Муъминзаби ахӏизе гуро дунги вачӏун вугев, мунапикъзаби тавбуялде ахӏизейин.

Гьез Гӏисада абуна:
– Яхӏял муридал гӏемерисеб мехалъ кӏал ккун рукӏуна, какал ралел рукӏуна, фарисеязулазги гьабула гьединго. Гьал дуралин абуни квана-гьекъолел руго.
Гӏисаца гьезда абуна:
– Бахӏарав аскӏов вугебгӏан мехалъ гьес берталъе ахӏарал гьудулзабазда квана-гьекъечӏого кӏал ккун рукӏайилан абизе бегьилищ нужеца? Рачӏина бахӏарав гьезухъа вахъун арал къоялги, гьеле гьебмехалъ кквела гьез кӏалги.
Цинги гьес гьезие гьадинаб мисал бачана:
– Цӏияб ратӏлидасаги бахъун басрияб ратӏлида рукъи баларо лъицаниги. Цӏияб ретӏелги хвела, басриялдаги цӏияб рукъи рекъеларо. Лъицаниги тӏоларо басрияб рахълъеналъубе цӏияб чагъирги. Цӏияб чагъиралъ гьеб багьизабила. Гьебмехалъ чагъирги гӏодобе чвахун ина, рахълъенги хвела. Цӏияб чагъир тӏезе ккола цӏияб рахълъеналъубе. Басрияб чагъиралда тӏаде гьебсагӏатго цӏияб чагъир гьекъезе лъиениги бокьуларо. Басриябго лъикӏаб бугилан абула гьес.

Klausytis Лукаца бицараб Рохалил хабар 5