San Lucas 24
24
Cunuu iꞌna̱ꞌ uún Jesús a
1Ne̱ taxre̱j güii cotungó, ga̱a ataa doj quisi̱j güii, me se caꞌanj nij chana̱ rej ta̱j yuꞌuj, ne̱ nica̱j nij chana̱ nij rasu̱u̱n gunꞌ da̱j se vaa a̱j quiꞌyaj chuvi̱i nij noꞌ a. 2Ga̱a ne̱ queneꞌen nij chana̱ se vaa na̱j yaníj yuvej aráán tuꞌva yuꞌuj na̱j Jesús a. 3Ne̱ ga̱a catúj nij chana̱ rá yuꞌuj, ne̱ ne nari̱ꞌ nij chana̱ cúú man Jesús Si̱j ꞌNi̱j Raꞌa man níꞌ a̱ maꞌ. 4Dan me se caráyaꞌa̱nj ndoꞌo nij chana̱, ne̱ ta̱j niꞌyo̱n canicunꞌ vi̱j snóꞌo xꞌnúú nij chana̱, ne̱ ro̱j snóꞌo yoꞌ me se yatzíj chuguu̱n uxrá nuû ro̱j soꞌ a. 5Dan me se cuchuꞌviꞌ uxrá nij chana̱, ne̱ caꞌanj ca̱yáán ru̱j nij chana̱, ne̱ cuchruj nij chana̱ rihaan nij noꞌ rihaan yoꞌóó a. Ga̱a ne̱ cataj ro̱j snóꞌo rihaan nij noꞌ a:
―Taj cheꞌé nano̱ꞌ soj man síí vaa iꞌna̱ꞌ rej na̱j nij síí caviꞌ maꞌ. 6ꞌO̱ se nuviꞌ soꞌ naj nihánj a̱ maꞌ. ꞌO̱ se cunuu iꞌna̱ꞌ uún soꞌ na̱nj á. Dan me se nanu̱j rá soj se vaa cataj soꞌ ga̱a va̱j nij soj estadó Galilea a. ꞌO̱ se cataj xnaꞌanj soꞌ rihaan soj se vaa 7xa̱ꞌ soꞌ Si̱j Caꞌnéé Yaꞌanj Ni̱caj Yuꞌunj man Yuvii̱, tza̱j ne̱ vaa cheꞌé ta̱cuachén nii man soꞌ rihaan síí tumé cacunꞌ a. Ne̱ cachro̱n nij soꞌ man soꞌ rihaan rcutze̱, ne̱ cache̱n vaꞌnu̱j güii, ga̱a ne̱ cunu̱u iꞌna̱ꞌ uún soꞌ, taj soꞌ a ―taj ro̱j snóꞌo yoꞌ rihaan nij chana̱ a.
8Dan me se nanuj rá nij chana̱ nana̱ caꞌmii Jesús a. 9Ga̱a ne̱ curiha̱nj nij chana̱ yuꞌuj yuvej, ne̱ canica̱j nij chana̱ yoꞌ chumanꞌ Jerusalén a. Ne̱ cataj xnaꞌanj nij chana̱ nu̱ꞌ se vaa queneꞌen nij noꞌ rihaan xa̱a̱n nij síí cuneꞌ Jesús man do̱ꞌ, rihaan ꞌó nij síí tucuꞌyón snana̱ Jesús uún do̱ꞌ a. 10Dan me se vaꞌnu̱j nij chana̱ me níí cuꞌna̱j Mariá Magdalena do̱ꞌ, níí cuꞌna̱j Juaná do̱ꞌ, níí cuꞌna̱j Mariá nii Jacobo do̱ꞌ, ne̱ vaꞌnu̱j nij noꞌ ga̱ ꞌó nij chana̱ roꞌ, cataj xnaꞌanj rihaan xa̱a̱n nij síí cuneꞌ Jesús cheꞌé nu̱ꞌ se vaa queneꞌen nij noꞌ a. 11Ne̱ ga̱a cuno nij síí cuneꞌ Jesús snana̱ nij chana̱, ga̱a ne̱ nana̱ snúú rmaꞌa̱n me nana̱ yoꞌ, rá nij síí cuneꞌ Jesús, ne̱ ne cuchuma̱n rá nij soꞌ snana̱ nij noꞌ maꞌ. 12Tza̱j ne̱ naxuma̱a̱n Pedró, ne̱ cunánj soꞌ caꞌanj soꞌ nda̱a yuꞌuj yoꞌ a. Dan me se canicunꞌ nitu̱u̱ soꞌ, niꞌya̱j soꞌ rque yuꞌuj, ne̱ ma̱an yatzéj mantá u̱u̱n queneꞌen soꞌ na̱nj ado̱nj. Ga̱a ne̱ cavii soꞌ quinanꞌ soꞌ, ne̱ caráyaꞌa̱nj soꞌ cheꞌé nu̱ꞌ se vaa guun a.
Caꞌmii Jesús ga̱ vi̱j síí tucuꞌyón snana̱ soꞌ ga̱a va̱j ro̱j soꞌ chrej nda̱a chumanꞌ cuꞌna̱j Emaús a
13Dan me se vi̱j nij síí tucuꞌyón snana̱ Jesús roꞌ, va̱j ro̱j soꞌ chrej veé ma̱an güii cotungó yoꞌ a. Ne̱ caꞌanj ro̱j soꞌ nda̱a ꞌo̱ chumanꞌ na̱j xa̱a̱n kilómetro ga̱ chumanꞌ Jerusalén, ne̱ Emaús cuꞌna̱j chumanꞌ yoꞌ a. 14Ne̱ nanó ro̱j soꞌ cuentó cheꞌé nu̱ꞌ se vaa guun a. 15Dan me se nanó ro̱j soꞌ cuentó, ne̱ nuchruj ra̱a̱ ro̱j soꞌ da̱j quiranꞌ Jesús, ga̱a ne̱ maꞌa̱n Jesús nichrunꞌ rihaan ro̱j soꞌ, ne̱ chéé Jesús ga̱ ro̱j soꞌ a. 16Tza̱j ne̱ ne caꞌve̱e cunu̱u ya̱a̱n ro̱j soꞌ man Jesús maꞌ. 17Ga̱a ne̱ cataj Jesús rihaan ro̱j soꞌ a:
―Me se cheꞌe̱ nanó ro̱j so̱j cuentó ga̱a chéé ro̱j so̱j ga̱ ―taj soꞌ, xnáꞌanj soꞌ man ro̱j soꞌ a.
Ne̱ dan me se canicunꞌ ro̱j soꞌ, ne̱ nanó ndoꞌo rá ro̱j soꞌ vaa rihaan ro̱j soꞌ a. 18Dan me se ꞌo̱ soꞌ me síí cuꞌna̱j Cleofas, ne̱ cataj soꞌ rihaan Jesús a:
―Cunuda̱nj nij síí aranꞌ chumanꞌ Jerusalén neꞌen da̱j vaa guun chumanꞌ Jerusalén nij güii cachén nihánj ado̱nj. Ne̱ me cheꞌé da̱j o̱ruún so̱ꞌ me síí ne neꞌen da̱j vaa guun ga̱ ―taj soꞌ, xnáꞌanj soꞌ man Jesús a.
19Ga̱a ne̱ cataj Jesús a:
―Da̱j guun chumanꞌ Jerusalén ga̱ ―taj Jesús, xnáꞌanj soꞌ man ro̱j soꞌ a.
Ga̱a ne̱ cataj ro̱j soꞌ rihaan Jesús a:
―Nu̱ꞌ se vaa quiranꞌ Jesús síí cavii chumanꞌ Nazaret a. Ne̱ soꞌ me síí guun síí nataꞌ snana̱ Yaꞌanj rihaan nij yuvii̱ a. Ne̱ síí uun nucua̱j ndoꞌo quiꞌyaj suun sa̱ꞌ noco̱o me soꞌ, ne̱ síí cavii ndoꞌo nana̱ sa̱ꞌ tuꞌva cheꞌé Yaꞌanj me soꞌ rihaan cunuda̱nj nij yuvii̱ a. 20Ne̱ dan me se caꞌneꞌ nij xrej ata̱ suun noco̱o caꞌneꞌ nij síí nica̱j suun caꞌneꞌ suun se vaa cavi̱ꞌ soꞌ, ga̱a ne̱ cachrón nii man soꞌ rihaan rcutze̱ a. 21Ne̱ dan me se guun rá núj se vaa soꞌ me síí ti̱nanii man níꞌ si̱j israelitá rihaan sayuun, tza̱j ne̱ cunuda̱nj quiranꞌ soꞌ, ne̱ nihánj me se síj vaꞌnu̱j güii caviꞌ soꞌ ado̱nj. 22Tza̱j ne̱ caráyaꞌa̱nj ndoꞌo núj, quiꞌyaj do̱j chana̱ tuviꞌ núj a. ꞌO̱ se taxre̱j cuanꞌ me se caꞌanj ni̱ꞌyaj nij chana̱ yuꞌuj cachinꞌ nii man soꞌ a. 23Tza̱j ne̱ dan me se ne nari̱ꞌ nij chana̱ man soꞌ a̱ maꞌ. Cheꞌé dan caꞌnaꞌ uún nij chana̱ rihaan núj, ne̱ cataj nij chana̱ se vaa nda̱a vi̱j se‑mo̱zó Yaꞌanj naquiꞌyaa rihaan nij noꞌ a. Ne̱ cataj ro̱j se‑mo̱zó Yaꞌanj se vaa vaa iꞌna̱ꞌ Jesús, taj nij chana̱ rihaan núj na̱nj ado̱nj. 24Dan me se cavii do̱j tuviꞌ núj caꞌanj ni̱ꞌyaj nij soꞌ yuꞌuj yoꞌ, tza̱j ne̱ queneꞌen nij soꞌ nu̱ꞌ nda̱a vaa cataj xnaꞌanj nij chana̱ rihaan núj a. Tza̱j ne̱ ne nari̱ꞌ nij soꞌ man maꞌa̱n Jesús a̱ maꞌ ―taj ro̱j soꞌ rihaan Jesús a.
25Ga̱a ne̱ maꞌa̱n Jesús cataj rihaan ro̱j soꞌ a:
―Dan me se síí ne acaj cuentá me ro̱j so̱j, ne̱ síí ne niha̱ꞌ rá cuchuma̱n rá nu̱ꞌ snana̱ nij síí nataꞌ snana̱ Yaꞌanj ga̱a naá me ro̱j so̱j na̱nj á. 26ꞌO̱ se ne neꞌen ro̱j so̱j se vaa xa̱ꞌ Síí Caꞌnéé Yaꞌanj Ti̱nanii man Yuvii̱ rihaan Sayuun, tza̱j ne̱ vaa cheꞌé ndoꞌo quira̱nꞌ soꞌ sayuun ne̱ catu̱u̱ soꞌ rej niꞌndaj ya̱ sa̱ꞌ veꞌé vaa rej gu̱un chij soꞌ a ―taj Jesús rihaan ro̱j soꞌ a.
27Ga̱a ne̱ dan me se guun cheꞌe̱ soꞌ caꞌmii soꞌ cheꞌé snana̱ síí cuꞌna̱j Moisés do̱ꞌ, cheꞌé snana̱ cunuda̱nj nij síí nataꞌ snana̱ Yaꞌanj do̱ꞌ, ga̱a ne̱ cataj xnaꞌanj soꞌ rihaan ro̱j soꞌ da̱j taj nu̱ꞌ Danj Yaꞌanj cheꞌé maꞌa̱n soꞌ a.
28Dan me se nichrunꞌ nij soꞌ tuꞌva chumanꞌ rej caꞌa̱nj ro̱j soꞌ, ga̱a ne̱ Jesús me se nda̱a rá se ꞌyaj síí caꞌa̱nj chumanꞌ na̱j ga̱nꞌ doj roꞌ, quiꞌyaj soꞌ a. 29Ga̱a ne̱ rquee̱ ro̱j soꞌ man Jesús a:
―Quina̱j chríí so̱ꞌ ga̱ rój, cheꞌé se a̱j caꞌanj güii, ne̱ vaj so̱ꞌ chrej, ne̱ gu̱un rmi̱ꞌ na̱nj á ―taj ro̱j soꞌ rihaan Jesús a.
Ga̱a ne̱ quináj soꞌ ga̱ ro̱j soꞌ, ne̱ catúj soꞌ chumanꞌ cara̱nꞌ soꞌ ga̱ ro̱j soꞌ a.
30Dan me se yáán nij soꞌ cha̱ xtiꞌno̱ nij soꞌ, ne̱ nica̱j Jesús rachrúún, ne̱ cataj soꞌ guun niꞌya̱j níꞌ rihaan Yaꞌanj cheꞌé rachrúún, ga̱a ne̱ cuxraꞌ taꞌa̱j soꞌ rachrúún, rqué soꞌ cha̱ ro̱j soꞌ a. 31Dan me se cachríj rá ro̱j soꞌ, ne̱ cunuu ya̱a̱n ro̱j soꞌ man Jesús, ne̱ veé dan nu̱ꞌ caꞌanj niꞌya̱ Jesús rihaan ro̱j soꞌ a. 32Ga̱a ne̱ cataj ro̱j soꞌ rihaan tuviꞌ ro̱j soꞌ a:
―ꞌO̱ se ga̱a caꞌmii soꞌ ga̱ níꞌ ga̱a va̱j níꞌ chrej do̱ꞌ, ga̱a cataj xnaꞌanj soꞌ cheꞌé Danj Yaꞌanj do̱ꞌ, ga̱a ne̱ guun niha̱ꞌ uxrá rá nimán níꞌ, ne̱ nda̱a tiquisii maꞌa̱n nimán níꞌ, quiꞌyaj soꞌ a ―taj ro̱j soꞌ rihaan tuviꞌ ro̱j soꞌ a.
33Ga̱a ne̱ ma̱an orá dan naxuma̱a̱n ro̱j soꞌ, ne̱ canica̱j ro̱j soꞌ caꞌanj uún ro̱j soꞌ chumanꞌ Jerusalén a. Ga̱a ne̱ cuchiꞌ ro̱j soꞌ yoꞌ, ga̱a ne̱ a̱j cunuu chre̱ꞌ xa̱a̱n nij síí tucuꞌyón snana̱ Jesús ga̱ ꞌó tuviꞌ nij soꞌ a. 34Ne̱ nij soꞌ roꞌ, cataj rihaan ro̱j soꞌ se vaa ya̱ a̱j cunuu iꞌna̱ꞌ uún Jesús Si̱j ꞌNi̱j Raꞌa man níꞌ, ne̱ curuviꞌ soꞌ rihaan síí cuꞌna̱j Simón, taj nij soꞌ rihaan ro̱j soꞌ a.
35Ga̱a ne̱ ro̱j soꞌ roꞌ, cataj xnaꞌanj da̱j guun ga̱a queneꞌen ro̱j soꞌ man Jesús ga̱a vaj ro̱j soꞌ chrej, ne̱ cataj xnaꞌanj ro̱j soꞌ se vaa nda̱a cuxraꞌ taꞌa̱j soꞌ rachrúún ga̱a cunuu ya̱a̱n ro̱j soꞌ man Jesús, taj ro̱j soꞌ a.
Curuviꞌ Jesús rihaan nij síí tucuꞌyón snana̱ soꞌ a
36Dan me se ga̱a nanó nij soꞌ cuentó cheꞌé nu̱ꞌ rasu̱u̱n dan, ne̱ nu̱ꞌ curuviꞌ Jesús tanu̱u̱ scaꞌnúj nij soꞌ, ne̱ cataj soꞌ a:
―Dínj ga̱a̱ nimán soj á ―taj soꞌ rihaan nij soꞌ a.
37Ga̱a ne̱ cuchuꞌviꞌ ndoꞌo nij soꞌ, ne̱ taꞌnaj me síí nicu̱nꞌ rihaan nij soꞌ, rá nij soꞌ a. 38Ga̱a ne̱ cataj Jesús rihaan nij soꞌ a:
―Me cheꞌé nanó ndoꞌo rá soj, ne̱ me cheꞌé uun vi̱j rá soj ga̱. 39Ni̱ꞌyaj soj raꞌaj ni̱ꞌyaj soj tacój ni̱ꞌyaj soj, ne̱ xca̱j soj cuentá se vaa ma̱ꞌanj me á. Xa̱ꞌ taꞌnaj, tza̱j ne̱ taj nee̱ man soꞌ do̱ꞌ, taj cúú man soꞌ do̱ꞌ maꞌ ―taj Jesús rihaan nij soꞌ a.
40Ga̱a caꞌmii soꞌ da̱nj, ne̱ tihaa̱n soꞌ raꞌa soꞌ do̱ꞌ, tacóó soꞌ do̱ꞌ, rihaan nij soꞌ a. 41Dan me se ne caꞌve̱e cuchuma̱n rá nimán nij soꞌ se vaa maꞌa̱n Jesús me a. ꞌO̱ se guun niha̱ꞌ uxrá rá nij soꞌ, ne̱ caꞌanj uxrá rá nij soꞌ a. Cheꞌé dan cataj Jesús rihaan nij soꞌ a:
―Vaa do̱j se chá rihaan soj naꞌ ―taj soꞌ, xnáꞌanj soꞌ man nij soꞌ a.
42Ga̱a ne̱ rqué nij soꞌ ꞌo̱ xcoꞌ nee̱ xcuaj riꞌya man soꞌ, 43ga̱a ne̱ taꞌaa soꞌ, ne̱ chá soꞌ niꞌya̱j nij soꞌ a. 44Ga̱a ne̱ cataj soꞌ rihaan nij soꞌ a:
―Nihánj me nana̱ caꞌmii ꞌu̱nj rihaan nij soj ga̱a va̱j ꞌu̱nj ga̱ soj, se vaa cataj ꞌu̱nj vaa cheꞌé quisi̱j ya̱ nu̱ꞌ nana̱ aꞌmii cheꞌé ꞌu̱nj nana̱ no̱ rihaan yanj no̱ stucua̱nj Moisés do̱ꞌ, yanj no̱ snana̱ nij síí nataꞌ snana̱ Yaꞌanj ga̱a naá do̱ꞌ, yanj no̱ nij chraꞌ salmó do̱ꞌ a ―taj soꞌ rihaan nij soꞌ a.
45Ga̱a ne̱ guun nucua̱j nij soꞌ xcaj nij soꞌ cuentá cheꞌé nu̱ꞌ Danj Yaꞌanj, quiꞌyaj soꞌ, 46ne̱ cataj soꞌ rihaan nij soꞌ a:
―Veé da̱nj taj Danj Yaꞌanj se vaa xa̱ꞌ ꞌu̱nj Si̱j Caꞌnéé Yaꞌanj Ti̱nanii man Yuvii̱ rihaan Sayuun, tza̱j ne̱ vaa cheꞌé quira̱nꞌ ma̱ꞌanj sayuun, ne̱ cavi̱ꞌ ꞌu̱nj, ne̱ cache̱n vaꞌnu̱j güii, ga̱a ne̱ cunu̱u iꞌna̱ꞌ uún ꞌu̱nj a. 47Ga̱a ne̱ vaa cheꞌé caꞌmi̱i̱ natáj nii se vaa cheꞌé se‑chuvi̱i Síí Caꞌnéé Yaꞌanj Ti̱nanii man Yuvii̱ rihaan Sayuun roꞌ, no̱ xcúún yuvii̱ ca̱nica̱j nimán yuvii̱ ne̱ ta̱náj yuvii̱ chrej chiꞌi̱i̱, ne̱ tinavi̱j Yaꞌanj cacunꞌ tumé nij soꞌ a. Asino ya̱a̱n vaa cheꞌé caꞌmi̱i̱ natáj nii chumanꞌ Jerusalén, ga̱a ne̱ caꞌmi̱i̱ natáj nii rihaan ta̱ranꞌ nij xꞌneꞌ yuvii̱ ino̱ vaa stucua̱nj ado̱nj. 48Ne̱ nij soj roꞌ, me nij síí queneꞌen nu̱ꞌ rasu̱u̱n quiꞌyáj ne̱ nata̱ꞌ soj cheꞌé yoꞌ, 49ne̱ nihánj me se rque̱ ꞌu̱nj Nimán Yaꞌanj rihaan soj nda̱a vaa cataꞌ tuꞌva maꞌa̱n Yaꞌanj ga̱a naá a. Dan me se ꞌo̱ ca̱yáán soj chumanꞌ Jerusalén nihánj nda̱a se nari̱ꞌ nucuaj nimán soj quiꞌya̱j Yaꞌanj á ―taj Jesús rihaan nij soꞌ a.
Cavii Jesús xta̱ꞌ a
50Ga̱a ne̱ nica̱j Jesús man nij soꞌ, caꞌanj soꞌ nda̱a tuꞌva chumanꞌ Betania a. Ga̱a ne̱ naxca̱j soꞌ raꞌa soꞌ, ne̱ cachíín niꞌya̱j soꞌ rihaan Yaꞌanj se vaa veꞌé ra̱cuíj Yaꞌanj man nij soꞌ, ne̱ cavi̱i̱ sa̱ꞌ nij soꞌ a. 51Ne̱ nu̱ꞌ cachíín niꞌya̱j soꞌ da̱nj cheꞌé nij soꞌ, ne̱ nu̱ꞌ cavii soꞌ xta̱ꞌ caꞌanj soꞌ a. 52Dan me se caráj gue̱e̱ nij soꞌ rihaan soꞌ, ga̱a ne̱ canica̱j nij soꞌ caꞌanj uún nij soꞌ nda̱a chumanꞌ Jerusalén, ne̱ guun niha̱ꞌ uxrá rá nimán nij soꞌ, 53ne̱ ꞌo̱ mán nij soꞌ rej ya̱nj nuvií noco̱o, ne̱ nataꞌ nij soꞌ rihaan nij yuvii̱ se vaa sa̱ꞌ uxrá quiꞌyaj Yaꞌanj a.
Currently Selected:
San Lucas 24: trc
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© Wycliffe Bible Translators, Inc. 2024 segunda versión electrónica