San Lucas 19
19
Nariꞌ tuviꞌ síí cuꞌna̱j Zaqueo ga̱ Jesús a
1Dan me se catúj Jesús chumanꞌ Jericó, ne̱ cachén soꞌ chumanꞌ yoꞌ, 2ne̱ yáán ꞌo̱ síí cuꞌna̱j Zaqueo chumanꞌ yoꞌ, ne̱ soꞌ me síí uun chij rihaan nij síí tihaꞌ yuꞌunj man yuvii̱ cheꞌé impuestó, ne̱ ruꞌve̱e̱ ndoꞌo soꞌ a. 3Dan me se guun ndoꞌo rá soꞌ queneꞌe̱n soꞌ me síí me Jesús, tza̱j ne̱ ne caꞌve̱e queneꞌe̱n soꞌ, cheꞌé se ma̱n ri̱i̱ ndoꞌo yuvii̱, ne̱ síí chre̱ꞌ nii vaa Zaqueo a. 4Cheꞌé dan yo̱o cunánj soꞌ quitáá ya̱a̱n soꞌ rihaan nij yuvii̱, ga̱a ne̱ cavii soꞌ raa̱ ꞌo̱ chruun higó, cheꞌé yan me rá soꞌ queneꞌe̱n soꞌ man Jesús a. ꞌO̱ se cache̱n Jesús tacóó chruun yoꞌ a. 5Dan me se ga̱a cuchiꞌ Jesús tacóó chruun ta̱j Zaqueo, ne̱ niꞌya̱j Jesús raa̱ chruun, ne̱ cataj soꞌ rihaan Zaqueo a:
―Nani̱j so̱ꞌ cuaj rihaan yoꞌóó, Zaqueo. ꞌO̱ se vaa cheꞌé ndoꞌo ca̱ránꞌ ꞌu̱nj veꞌ tucuá so̱ꞌ cuanꞌ á ―taj Jesús rihaan Zaqueo a.
6Ga̱a ne̱ yo̱o nanij Zaqueo rihaan yoꞌóó, ne̱ guun niha̱ꞌ uxrá rá soꞌ se vaa aranꞌ Jesús tucuá soꞌ a. 7Dan me se cuno nij yuvii̱ da̱j cataj Jesús, ga̱a ne̱ nij caꞌmii nij yuvii̱ niꞌya̱j nij soꞌ man Jesús, cataj nij soꞌ a:
―Nihánj me se aranꞌ soꞌ tucuá ꞌo̱ síí tumé ndoꞌo cacunꞌ ado̱nj ―taj nij yuvii̱ niꞌya̱j nij soꞌ man Jesús a.
8Tza̱j ne̱ canicunꞌ maꞌa̱n Zaqueo, cataj soꞌ rihaan Síí ꞌNi̱j Raꞌa man níꞌ a:
―Ni̱ꞌyaj so̱ꞌ á. Cuano̱ nihánj me se rque̱ ꞌu̱nj yane̱j siꞌyáj rihaan nij síí nique̱, ne̱ nij síí tihaꞌ yuꞌunj ꞌu̱nj man, tza̱j ne̱ na̱quiꞌyáj ꞌó cunu̱ꞌ caꞌa̱nj narque̱ ꞌu̱nj rihaan nij soꞌ se vaa caꞌnéj ꞌu̱nj man nij soꞌ, Señor ―taj soꞌ rihaan Jesús a.
9Ga̱a ne̱ cataj Jesús rihaan soꞌ a:
―Cuanꞌ me se a̱j cavii sa̱ꞌ nij tucua̱ síí nihánj cheꞌé se ꞌo̱ taꞌníí síí cuꞌna̱j Abraham ga̱a naá me soꞌ cuano̱ uún a. 10ꞌO̱ se caꞌnáꞌ ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ cheꞌé rej nano̱ꞌ ꞌu̱nj man nij síí caꞌanj niꞌya̱, ne̱ cavi̱i̱ sa̱ꞌ nij soꞌ qui̱ꞌyáj ado̱nj ―taj Jesús rihaan nij soꞌ a.
Nanó Jesús cuentó cheꞌé síí racuíj saꞌanj rihaan se‑mo̱zó soꞌ a
11Dan me se cuno nij síí ma̱n chumanꞌ Jericó snana̱ Jesús, tza̱j ne̱ guun rá nij soꞌ se vaa cheꞌé se nichrunꞌ Jesús chumanꞌ Jerusalén, cheꞌé dan raꞌya̱nj gu̱un chij Yaꞌanj rihaan chumii̱ nihánj ado̱nj, rá nij soꞌ a. Ne̱ cheꞌé dan guun cheꞌe̱ Jesús nanó Jesús ꞌo̱ cuentó nihánj, cheꞌé rej caꞌve̱e xca̱j nij yuvii̱ cuentá a. 12Dan me se cataj soꞌ a:
―ꞌO̱ ruꞌvee taꞌníí síí ata̱ suun me se guun rá soꞌ caꞌa̱nj soꞌ ga̱nꞌ nda̱a chumanꞌ ra̱a̱ cheꞌé rej na̱ta̱ soꞌ suun rey gu̱un chij chiháán soꞌ, ga̱a ne̱ ca̱nica̱j soꞌ nama̱n soꞌ rá soꞌ a. 13Ga̱a ne̱ canacúún soꞌ man chi̱ꞌ nij se‑mo̱zó soꞌ caꞌna̱ꞌ rihaan soꞌ, ga̱a ne̱ rqué soꞌ ꞌo̱ saꞌanj miná rihaan ꞌo̱ ꞌo̱ nij soꞌ, ne̱ saꞌanj miná roꞌ, vaa yuꞌvee ndoꞌo nó saꞌanj yoꞌ a. Ga̱a ne̱ cataj xnaꞌanj soꞌ rihaan nij soꞌ se vaa quiꞌya̱j suun nij soꞌ ga̱ saꞌanj, ne̱ tanaca̱ nij soꞌ man saꞌanj, ne̱ nda̱a quisi̱j güii nama̱n uún soꞌ, ga̱a ne̱ nuchru̱j nij soꞌ cuentá, taj soꞌ a. Da̱nj caꞌmii soꞌ, ga̱a ne̱ cavii soꞌ caꞌanj soꞌ a.
14’Tza̱j ne̱ nij síí ma̱n chiháán ruꞌvee yoꞌ roꞌ, táá riꞌyunj nij soꞌ man soꞌ, ne̱ cheꞌé dan caꞌnéé nij soꞌ do̱j síí caꞌanj suun caꞌa̱nj chumanꞌ ra̱a̱ caꞌa̱nj cata̱j xnaꞌanj nij soꞌ se vaa naꞌvej nij síí ma̱n chiháán ruꞌvee yoꞌ gu̱un chij soꞌ rihaan nij soꞌ maꞌ.
15’Dan me se ya̱ quiꞌyaj canaán síí xnaꞌa̱nj ruꞌvee yoꞌ guun chij soꞌ chiháán soꞌ, ga̱a ne̱ ga̱a namán soꞌ, ne̱ cataj xnaꞌanj soꞌ se vaa nacu̱nj nii man chi̱ꞌ nij se‑mo̱zó soꞌ nij síí rqué soꞌ saꞌanj rihaan a. ꞌO̱ se guun rá soꞌ xca̱j soꞌ cuentá me daj saꞌanj quiꞌyaj canaán ꞌo̱ ꞌo̱ nij soꞌ a.
16’Dan me se síí caꞌnaꞌ asino ya̱a̱n rihaan soꞌ roꞌ, cataj a: “Xa̱ꞌ saꞌanj miná rqué so̱ꞌ manj, tza̱j ne̱ quiꞌyaj canaán ꞌu̱nj ꞌó chi̱ꞌ saꞌanj miná uún, quiꞌyaj saꞌanj yoꞌ, señor”, taj soꞌ rihaan síí xnaꞌa̱nj ruꞌvee yoꞌ a. 17Ga̱a ne̱ cataj síí xnaꞌa̱nj ruꞌvee yoꞌ rihaan mozó yoꞌ a: “Cuna̱j uxrá quiꞌyáá so̱ꞌ á. Mozó sa̱ꞌ ina̱nj mé so̱ꞌ ado̱nj. Cheꞌé dan gu̱un chij so̱ꞌ rihaan chi̱ꞌ ya̱ chumanꞌ, qui̱ꞌyáj a”, taj síí xnaꞌa̱nj ruꞌvee rihaan mozó sa̱ꞌ yoꞌ a.
18’Dan me se caꞌnaꞌ uún ꞌó mozó, cataj soꞌ a: “Xa̱ꞌ saꞌanj miná rqué so̱ꞌ manj, tza̱j ne̱ quiꞌyaj canaán ꞌu̱nj ꞌó ꞌu̱nꞌ saꞌanj miná uún, quiꞌyaj saꞌanj yoꞌ, señor”, taj soꞌ rihaan síí xnaꞌa̱nj ruꞌvee yoꞌ a. 19Ne̱ cataj síí xnaꞌa̱nj rihaan soꞌ a: “Ga̱a ne̱ gu̱un chij so̱ꞌ rihaan ꞌu̱nꞌ ya̱ chumanꞌ na̱nj ado̱nj”, taj soꞌ rihaan ꞌó mozó yoꞌ a.
20’Dan me se caꞌnaꞌ ꞌó soꞌ uún, ne̱ cataj soꞌ a: “Nihánj me naca̱j so̱ꞌ se‑saꞌa̱nj so̱ꞌ, señor. ꞌO̱ se caraa sa̱ꞌ ꞌu̱nj man yoꞌ rque ꞌo̱ vitó, 21cheꞌé se cuchuꞌvíꞌ ꞌu̱nj niꞌya̱j ꞌu̱nj mán so̱ꞌ, cheꞌé se si̱j sca̱ꞌ ndoꞌo nimán mé so̱ꞌ, ne̱ naxca̱j so̱ꞌ rasu̱u̱n rej nuviꞌ rasu̱u̱n cutáꞌ so̱ꞌ, ne̱ ꞌó yuvii̱ unô caân, ne̱ ma̱ꞌán so̱ꞌ rii naa̱ na̱nj ado̱nj”, taj mozó yoꞌ rihaan síí xnaꞌa̱nj ruꞌvee yoꞌ a.
22’Ga̱a ne̱ cataj síí xnaꞌa̱nj ruꞌvee rihaan mozó yoꞌ a: “Mozó chiꞌi̱i̱ nimán mé so̱ꞌ chugua̱nj. Ya̱ tumé so̱ꞌ cacunꞌ cheꞌé nana̱ tuꞌva ma̱ꞌán so̱ꞌ na̱nj á. ꞌO̱ se queneꞌén so̱ꞌ se vaa si̱j sca̱ꞌ ndoꞌo nimán mej, ne̱ queneꞌén so̱ꞌ se vaa naxca̱j ꞌu̱nj rasu̱u̱n rej nuviꞌ rasu̱u̱n cutaj, ne̱ queneꞌén so̱ꞌ se vaa ꞌó yuvii̱ unô caân ne̱ ꞌu̱nj rii naa̱ na̱nj á. 23Cheꞌé dan me se me cheꞌé ne ta̱cuachén so̱ꞌ se‑saꞌa̱nj ꞌu̱nj rihaan nij síí nutaꞌ saꞌanj ga̱. Ga̱a ne̱ ga̱a caꞌnáꞌ ꞌu̱nj, ne̱ nacaj ꞌu̱nj se‑saꞌa̱nj ꞌu̱nj ga̱ saꞌanj nataꞌ raa̱ yoꞌ ga̱”, taj ruꞌvee yoꞌ rihaan mozó rmi̱i̱ yoꞌ a. 24Ga̱a ne̱ cataj soꞌ rihaan ꞌó nij síí nicu̱nꞌ ga̱ soꞌ a: “Caꞌne̱e̱ soj saꞌanj nica̱j mozó chiꞌi̱i̱ nihánj, ne̱ ta̱cuachén soj rihaan síí nica̱j chi̱ꞌ saꞌanj miná yoꞌ á”, taj síí xnaꞌa̱nj ruꞌvee yoꞌ rihaan ꞌó nij soꞌ a. 25Ga̱a ne̱ cataj nij síí nicu̱nꞌ ga̱ soꞌ a: “Tza̱j ne̱ a̱j nica̱j soꞌ ꞌo̱ chi̱ꞌ saꞌanj miná vaa gue̱e̱ ado̱nj”, cataj nij soꞌ rihaan ruꞌvee yoꞌ a. 26Ga̱a ne̱ cataj ruꞌvee yoꞌ a: “Taj se ꞌyaj maꞌ. Dan me se cata̱j xnaꞌanj ꞌu̱nj rihaan soj se vaa síí rásuun sa̱ꞌ rasu̱u̱n nica̱j soꞌ me se doj a̱ rque̱ nii rasu̱u̱n man soꞌ, tza̱j ne̱ síí ne rásuun sa̱ꞌ rasu̱u̱n nica̱j soꞌ me se xꞌne̱e̱ do̱j rasu̱u̱n nica̱j soꞌ raꞌa soꞌ na̱nj ado̱nj”, taj ruꞌvee yoꞌ rihaan nij soꞌ a. 27Ga̱a ne̱ cataj uún soꞌ a: “Tza̱j ne̱ xa̱ꞌ nij síí ta̱j riꞌyunj manj síí ne caꞌve̱j rá gu̱un chij ꞌu̱nj rihaan, tza̱j ne̱ ni̱caj soj man nij soꞌ caꞌna̱ꞌ soj rihanj, ga̱a ne̱ ticavi̱ꞌ soj man nij soꞌ rihanj nihánj á”, taj uún soꞌ a ―taj Jesús a.
28Ga̱a quisíj nanó Jesús cuentó nihánj, ga̱a ne̱ cavii soꞌ caꞌanj soꞌ chumanꞌ Jerusalén, ne̱ táá ya̱a̱n soꞌ rihaan nij síí tucuꞌyón snana̱ soꞌ a.
Catúj Jesús chumanꞌ Jerusalén a
29Dan me se nichrunꞌ Jesús ro̱j chumanꞌ cuꞌna̱j Betfagé ga̱ Betania a. Na̱j ro̱j chumanꞌ yoꞌ tacóó tacaan cuꞌna̱j Tacaan ma̱n Chruun Olivó a. Ga̱a ne̱ caꞌnéé Jesús man vi̱j nij síí tucuꞌyón snana̱ soꞌ caꞌa̱nj ro̱j soꞌ rque chumanꞌ na̱j rej rihaan nij soꞌ, 30ne̱ cataj soꞌ rihaan ro̱j soꞌ a:
―Cavi̱i̱ ro̱j so̱j caꞌa̱nj ro̱j so̱j, ne̱ catu̱u̱ ro̱j so̱j chumanꞌ na̱j rihaan níꞌ, ne̱ asa̱ꞌ catúj ro̱j so̱j, ne̱ nari̱ꞌ ro̱j so̱j man ꞌo̱ burró leꞌe̱j yaꞌa̱nj numi̱i a. Dan me se nache̱ ro̱j so̱j man xoꞌ, ne̱ ni̱caj ro̱j so̱j caꞌna̱ꞌ ro̱j so̱j rihanj nihánj á. 31Ne̱ sese xna̱ꞌanj nii man ro̱j so̱j me cheꞌé nache ro̱j so̱j burró, ne̱ cata̱j ro̱j so̱j a: “Síí ꞌNi̱j Raꞌa man níꞌ achiin xcuu nihánj rihaan chugua̱nj”, cata̱j ro̱j so̱j á ―taj Jesús rihaan ro̱j síí tucuꞌyón snana̱ soꞌ a.
32Dan me se caꞌanj ro̱j soꞌ, ne̱ catúj ro̱j soꞌ chumanꞌ yoꞌ, ne̱ nariꞌ ro̱j soꞌ man burró leꞌe̱j, nda̱a vaa cataj xnaꞌanj Jesús rihaan ro̱j soꞌ a. 33Ne̱ ga̱a nache ro̱j soꞌ man burró, ne̱ xnáꞌanj nij síí da̱a̱n burró man ro̱j soꞌ a:
―Me cheꞌé nache ro̱j so̱j burró ga̱ ―taj nij soꞌ, xnáꞌanj nij soꞌ man ro̱j soꞌ a.
34Ga̱a ne̱ cataj ro̱j soꞌ rihaan nij síí da̱a̱n burró a:
―Síí ꞌNi̱j Raꞌa man níꞌ achiin xcuu nihánj rihaan chugua̱nj ―taj ro̱j soꞌ a.
35Ga̱a ne̱ nica̱j ro̱j soꞌ xcuu caꞌnaꞌ ro̱j soꞌ rihaan Jesús, ne̱ cutaꞌ ro̱j soꞌ roto̱ nu̱u̱ ro̱j soꞌ xráá burró, ne̱ tacavii ro̱j soꞌ man Jesús xráá burró yoꞌ, 36ne̱ ga̱a va̱j Jesús, ne̱ cuchruj ndoꞌo nij yuvii̱ yatzíj saga̱nꞌ nij soꞌ rá chrej, ne̱ achén Jesús ga̱ burró yoꞌ rihaan yatzíj a. 37Dan me se nichrunꞌ Jesús chumanꞌ Jerusalén, ne̱ va̱j soꞌ tacóó Tacaan ma̱n Chruun Olivó rej va̱j ni̱j chrej, ne̱ guun cheꞌe̱ cunuda̱nj nij síí ri̱i̱ tucuꞌyón snana̱ soꞌ guun niha̱ꞌ rá nimán nij soꞌ, ne̱ aguáj nij soꞌ, veꞌé uxrá caꞌmii nij soꞌ cheꞌé Yaꞌanj cheꞌé nu̱ꞌ nij suun sa̱ꞌ noco̱o quiꞌyaj Jesús queneꞌen nij soꞌ a. 38Dan me se cataj nij soꞌ a:
―Cuna̱j uxrá vaa caꞌnaꞌ síí caꞌnéé Síí ꞌNi̱j Raꞌa man níꞌ na̱nj á. Síí nica̱j suun rey uun chij rihaan níꞌ me soꞌ ado̱nj. Naꞌmi̱i̱ sa̱ꞌ Yaꞌanj si̱j nicu̱nꞌ xta̱ꞌ ga̱ níꞌ á. Cata̱j nii se vaa niꞌndaj ya̱ sa̱ꞌ veꞌé ꞌyaj síí nicu̱nꞌ xta̱ꞌ á ―taj nij yuvii̱, caguáj nij soꞌ a.
39Dan me se taꞌa̱j nij síí chéé ga̱ Jesús me síí fariseo, ne̱ taꞌa̱j nij soꞌ cataj rihaan Jesús a:
―Cata̱j xnaꞌanj so̱ꞌ rihaan nij síí tucuꞌyón snana̱ so̱ꞌ se vaa caꞌne̱ꞌ rá nij soꞌ ga̱ nana̱ vaa da̱nj á ―taj nij soꞌ rihaan Jesús a.
40Ga̱a ne̱ cataj soꞌ rihaan nij soꞌ a:
―Cata̱j xnaꞌanj ꞌu̱nj rihaan soj cuano̱ se vaa sese dínj ga̱a̱ tuꞌva nij síí aguáj nana̱ vaa da̱nj, ne̱ maꞌa̱n nij yahij na̱j rihaan yoꞌóó nihánj cagua̱j nana̱ vaa da̱nj asuun na̱nj ado̱nj ―taj Jesús rihaan nij síí fariseo yoꞌ a.
41Ne̱ ga̱a nichrunꞌ Jesús chumanꞌ Jerusalén yoꞌ, ne̱ taꞌvee Jesús cheꞌé chumanꞌ yoꞌ, 42ne̱ cataj soꞌ a:
―Güii cuanꞌ me se me ina̱nj raj queneꞌe̱n soj si̱j ma̱n chumanꞌ Jerusalén da̱j quiꞌya̱j soj ne̱ caꞌve̱e dínj ca̱yáán soj, tza̱j ne̱ cuano̱ nihánj me se se̱ caꞌvee xca̱j soj cuentá maꞌ. 43Dan me se quisi̱j ya̱ güii, ne̱ caꞌna̱ꞌ nij síí ta̱j riꞌyunj man soj, ne̱ cune̱ꞌ nij soꞌ chingá nu̱ꞌ anica̱j chiháán soj, ne̱ tucuachri̱in nij soꞌ man soj, ne̱ se̱ caꞌvee cu̱riha̱nj soj, quiꞌya̱j nij soꞌ maꞌ. 44Ne̱ tu̱cuanee nij soꞌ nu̱ꞌ chiháán soj, ne̱ cavi̱ꞌ soj, ne̱ a̱ ꞌó yuvej se̱ quitáá xráá tuviꞌ yuvej, quiꞌya̱j nij soꞌ maꞌ. Da̱nj quira̱nꞌ soj, cheꞌé se ga̱a guun rá Yaꞌanj ra̱cuíj Yaꞌanj man soj, ne̱ ne xca̱j soj cuentá maꞌ ―taj Jesús niꞌya̱j soꞌ man nij síí ma̱n chumanꞌ Jerusalén yoꞌ a.
Quirii Jesús man nij yuvii̱ tuꞌvéj rasu̱u̱n rej ya̱nj nuvií noco̱o a
45Ga̱a ne̱ catúj Jesús rej ya̱nj nuvií noco̱o, ga̱a ne̱ guun cheꞌe̱ soꞌ quirii soꞌ man nu̱ꞌ nij yuvii̱ tuꞌvéj rasu̱u̱n rej yoꞌ a. 46Ne̱ cataj soꞌ rihaan nij soꞌ a:
―Danj Yaꞌanj taj se vaa tucuá Yaꞌanj me rej achíín niꞌya̱j yuvii̱ rihaan Yaꞌanj ado̱nj. Tza̱j ne̱ guun tucua̱ síí itu̱u̱ man tucuá Yaꞌanj nihánj, quiꞌyaj soj na̱nj á ―taj Jesús rihaan nij yuvii̱ quirii soꞌ a.
47Ne̱ dan me se da̱j a̱ güii nicunꞌ Jesús rej ya̱nj nuvií noco̱o, tucuꞌyón Jesús snana̱ soꞌ rihaan yuvii̱ a. Tza̱j ne̱ nij xrej ata̱ suun noco̱o do̱ꞌ, nij síí naquiꞌyaj cu̱u stucua̱nj Moisés do̱ꞌ, nij síí uun chij rihaan nij yuvii̱ israelitá do̱ꞌ, nanoꞌ uxrá nij soꞌ da̱j quiꞌya̱j nij soꞌ ga̱a ne̱ caꞌve̱e cavi̱ꞌ Jesús a. 48Tza̱j ne̱ ne nari̱ꞌ nij soꞌ da̱j quiꞌya̱j nij soꞌ cavi̱ꞌ Jesús maꞌ. ꞌO̱ se guun niha̱ꞌ uxrá rá nij yuvii̱ cuno nij soꞌ snana̱ Jesús a.
Currently Selected:
San Lucas 19: trc
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© Wycliffe Bible Translators, Inc. 2024 segunda versión electrónica