Marocohacha Laenai 8
8
Jena oaraancai cachaauru rai lenone faa Jesosone
(Mt 15.32-39)
1Nii baiha nacoaauneein netaojiaauruha arajiin cachaaurune jaun jetaote, jataain neniha acaauru lenonena jaun aina nerelanacauru cotijiaain jetao:
2“Inae nichata janohinte canu aina neeure caa cachaauru. Jana nihei caohachanainejeein lenonecuruhane jaanu. Nii jaunne jataain cairichaaojoaain acaauru coaraaun. 3Coroaatenajaelanaala acaauru nenajaun letoanajaanunete mijitenacaaun aterona nainecure, tabaauru coriae caje uuruhane jaun”, naa Jesosone jana jetaote:
4“Chaa caje eruhin najian caa jeeoni cacha coroaaterichaache, caa jana ichaoha chuni cacha, caje coretichaachene jaanune coaalanaala”, naauruha aina nerelanacaaurune jana jetaote: 5“Inatajaain najian faan siriquiche”, naain acaauru caje bajaa Jesosone jana jetaote:
“Caaunsinejeeinchate neeje faan”, naaure jetao aina nerelanacauru.
6Nii jaun jetaote, atane choae nelauriaauruha cachaaurune coina aitiin jetao, jerane biji que nii caaunsini faan mucuhin Cana Coaunera bajaain, cataaun nii faancuru tatuhin aina nerelanacauru rai tiha Jesosone jaun jetaote, jitariin nii cachaauru rai chaluure. 7Nii jana niha coroatajajeein ate netonaine jaun jetaote, acaentonai mucuhin Cana Coaunera bajaain nii ate nemaajeein chaluherate Jesoso. 8Nitohaneein nainaain lenonecuruhane baiha jetaote, caute que caainsineein omari memoaaure. 9Itolereneein jena oaraancai cachaauru jetaote, lenonecure. Nii baiha jetaote, acaauru rai necoeein, 10aina nerelanacauru aina bote cuhane fauhin jetao, Dalmanotau batane cue Jesoso.
Cojoelanaacojoai ichaa Jesosone coina aitocuruha fariseeocurune
(Mt 16.1-4; Lc 12.54-56)
11Nitohaneein jetaote, Jesoso rene turuhin aina ereeuruhane baiha jetao, nechu jataain coujuha, Cana Coaunera letononeein unaa nihane coaaratiha acaauru quene coina cojoelanaacojoai ichaane coina rai aitocure fariseeocuru. 12Nii jaun jetaote, jataain mijiaaineein nerai raain jetao:
“Chanuna acaauru rai cojoelanaacojoai ichacaaunne coina aitocure caa cachaauru. Coatiha nii acaauru que chatoanai cojoelanaacojoai coaaratenaa nainihaaun”, naane jaun jetao, 13ecu acaauru ratiriin jeelaiha bote cuhane fauhin nemuri jerau cue Jesoso.
Faan jorerera lebadora rijiicha fariseeocuru ichaone
(Mt 16.5-12)
14Nitohaneein jelai caje bote cuhane fauhin amuuruhane jaun jetaote, rai achano baiteein leinjiin faancha amaain cuure. 15Nii jana jetaote, acaauru nainalaaca jetao:
“Aonacuche. Faan jorerera lebadora rijiicha fariseeocuru aina Erodesi ichaone que caohachaain nainacuche”, nae jetao aina nerelanacauru rai Jesoso.
16Niritoha acaauru rai Jesosone jana jetaote, neniha acaauru rai faanne que nejesinajeein ita rai ereeuruha aina nerelanacaaurune aonajeein jetao:
17“Chanuna faan sirineeichene que ereereequiche. Jataain nachura nainanachara nejeein coitucueneeichete. Jataainte asoneeojoaain nainanachara nejeeiche. 18Niha niqui inacojoeein inara nota, inara uricho, naaonjoaain. Nete nii cha coaraain, cha aonaain coitucunaa naineneeiche. 19Saoqui oaraancai cachaauru rai saoquii faan chaluhanune bana, inata omariin caute raaichelu”, naa Jesosone jana jetaote:
“Lechoonca coroata omariin”, naauruha aina nerelanacaaurune jana jetao:
20“Chajana jena oaraancai cachaauru rai caaunsini faan chaluhanune bana, inata omariin caute raaichelu”, naa Jesosone jana jetaote:
“Caaunsi omariineein”, naauruha aina nerelanacaaurune jaun jetao:
21“Nii saijieein nachura jaiti nainaeneeichete”, nae jetao acaauru rai Jesoso.
Betesaaidau leinjiin maosa rautaa Jesosone
22Nitohaneein cuhin Betesaaida turuuruhane jana jetaote, Jesoso rene leinjiin maosa amaain rautaane coina conujeeunre cachaauru. 23Nii jaun jetaote, biji que nii maosa mucuuriin jelai cachaauru udaa amaain jetao, lune que jerane nii maosa nota rujuarujuariin nichoae biji teein: “Inae chaelai coaana naineei”, naa Jesosone jana 24nenotaain jetaote:
“Nuna tocohaneeinte murimurihonanae carai cachaauru”, naa nii maosane jaun jetaote, 25nacoaauneein jerane nota ichoae biji tiha Jesosone jana, nacoauneein nota jirichaane jana jetao, inae conoha notane jaun, caohachaain cha coarae nii maosa. 26Nitohaneein rautaain jetaote, rai nenajaun letoaain jetao:
“Coa taa neseu cauha”, nae rai Jesoso.
Mesihasi niha Jesosone que aitoha Fedorone
(Mt 16.13-20; Lc 9.18-21)
27Nii baiha jetaote, Filipoo batane que nenaa Sesareea nenacaauru neseeuru cue jetao, aina nerelanacauru aina jiniiquiin Jesoso. Nitohaneein bero cuhane aina nerelanacauru aina cuujeeurunajau jetaote:
“Tonacuruha canu que cachaauru. Cha nichaaunje”, naa Jesosone jaun jetaote:
28“Tabaauru cachaaurute Joaan Baotisita niha ii beeure. Jana leochaaurute, inoaenlu nenaa Cana Coaunera ere bera profeta inoaensi Erihasi niha ii beeure. Leochaaurute, inoaenlu nenacaauru profetacuru tabaauru niha ii beeure”, naauruha raine jaun jetaote:
29“Cha nichaaun jana inara rai”, naa acaauru rai Jesosone jaun jetaote:
“Iite nii canacaanuhacha cohajei Mesihasineein”, nae jetao rai Fedoro.
30Nejetaote, chuni rai acaneein nihane beeuruhane caohate jetao Jesoso.
Orichaaine biha Jesosone
(Mt 16.21-28; Lc 9.22-27)
31Nii caje nunuheteein jetaote: “Canu Cana Coaunera Calaohi cachaneein nejanoanaa nichaaunne cairichaaeriin caque jaolecohin niha cuurureein Jorioocuru bichauhenaauru aina saseredotecuru curuaanaacuru, chaaen Cana Coaunera aitoonjoan que cacha relaaureraauru, naaonjoainuri. Acaaurute catinaa cuurureein, nena nichata janone cuhane ichanareeunni”, naain jetao, 32esinae rauhijiriin cachaauru rai bee Jesoso. Niritiin esinae rauhijiriin suujuelanaala aitohane jaun jetaote jelai amaain niritiin irihane caohate Fedoro. 33Nejetaote niritoha Fedorone jaun, jaotoroaain nii aina nerelanacauru coaraain jetao cotaicha rijitiin: “Coa carerojoecaa moconajaaera. Cacaje amuu. Coatiha Cana Coauneraacha coacuhi coitucuheei ii. Joaaereein cachaauruhacha coacuite coaauqui”, 34naane baiha jetaote, nii aina nerelanacauru aina ecu nenacaauru cachaauru cotijiaain jetao:
“Aonacuche. Chunocoha canu cachaneein nenaa jerihane suujua letono ichana jerihane jianeein, coroso que canu teein canu cairichaaururichaaine rijijieein necairichanaa abaantaain caitoonjoan tonoraain, jerichaaunne rijijieein neeine. 35Chunocoha canuhacha icharatei ichaelanaala neein nichao ichoteratena jerera, coatiha nichoterinaain. Nete laen canu coreniha, canuhacha beratei bihane coreniha, naaojoain coreniha nichao itajera, ichoteratenojoiniha cureein. 36Chaaquena rai nelatere, itolere caa chauratane que nenaacha que coacuhin rai nichao itajiha cachane. 37Nitohanihane jaun inaaonjoaain coretihane niha natiin nii nichao ichoteratena nainihei cacha. 38Nitohanihane jaun, chunocoha canu nichaaunne beein quiicha beratenojoi biha caa necha aansaineein osaaonacaauru cachaauru raine que nocoejihanena, canu- cacha calaohi nichaaunne inae que tihane bana canu Inaca necaohacha que necohachaain rai letonocuru anjeraauru aina nacoaauneein turuha uhanune banane canuhetonai que necoejereeunni”, nae jetao acaauru rai Jesoso.
Currently Selected:
Marocohacha Laenai 8: URA
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2005, 2024, Wycliffe Bible Translators, Inc.