Lucas 4
4
Jesure Neñañe
(Mt 4.1-11; Mr 1.12-13)
1Maija'quë joyo i̱ni pa'ina, Jordán tsiayapi co'iquëna, Maija'quë joyopi sapi, cue̱ne huesësi yejana. 2Ja̱rote cuarenta mu'seña a̱o ti a̱ima'ë pa'ina, jeteyo'je a̱o ëaye nëi maca 3huatipi i̱te neñasi'i, caquë capi:
“Maija'quë mamaquë sëte iye quë̱na përe cua̱ñejë'ë, pan pë de'oja̱co.”
4Caquëna, Jesupi i̱te capi:
“Toyase'e caji, Coa a̱ose'e a̱i pa'iye peoji, pa̱i. Peoquëna, ai jerepa si'aye Maija'quë ca cocare de'oye sehuocaiye pa'iye pa'iji.”
5Ja̱ jeteyo'je huatipi sapi, ai cu̱tihuëna. Sani iye yeja pa'iyere te'epi esa i̱ñopi si'aye, pa̱ire cui'ne i̱ote pa'iyeje̱. 6I̱ñoni huatipi i̱te capi:
“Yë'ëpi më'ëre si'a iye tutu, cui'ne iye jai yejaña de'o co'amaña i̱sisi'i. Yë'ëna i̱sise'e a'ë, si'aye iye. Ja̱je pa'ina, yë'ë yëyeje̱ i̱siye pa'iji, yë'ë i̱siye yëquëna. 7Më'ëpi do're ja'runi yë'ëni se̱quë pa'ito më'ë tse̱ pasipi.”
8Jesupi i̱te sehuopi:
“Yë'ë quë̱no maca pa'ima'ë pa'ijë̱'ë, Satanás. Saijë̱'ë. Toyase'e caji: Se̱jë'ë, më Ëjaë Diusuni cui'ne i̱se'ere necaijë̱'ë.”
9Ja̱ jeteyo'je huatipi Jerusalén daripëna sani Maija'quë huë'e jetena mëani capi:
“Maija'quë mamaquërepa pani ti̱to sa to̱mejë'ë, iye macapi yejana. 10Toyase'e caji:
Maija'quëpi i̱ hui̱ñaohua'ire cua̱ñeina, më'ëre ñacaija̱'cohua'ire.
11Më'ëpi to̱mequëna, i̱ohua'i jë̱ñapi tse̱aja'cohua'i a'ë,
Quë̱na pë̱ana më nëcañoa a'si nema'quëni cajë.”
12Caquëna, Jesupi i̱te sehuopi:
“Yequeje̱ toyase'e caji: Më'ë Ëjaë Diusure neñama'ë pa'ijë̱'ë.”
13Caquëna, huati Jesure si'aye neñani yo'o jujani, tsoe maca je̱oni saji'i.
Jesupi Galileana Yo'o Huëoye
(Mt 4.12-17; Mr 1.14-15)
14Je̱o saquëna, Jesupi Galileana co'ipi, Maija'quë joyo tutu ti̱mësiquëpi. Ja̱je pa'ina, pa̱i i̱ pa'iyere quëajëna, ja̱ yejaña pa'icohua'i asahuë. 15Pa̱i dari ñape tsi'si huë̱'ña pa'iyena ye'yaquë pa'ina, si'ahua'i i̱te de'oquëre papi cajë sihuahuë.
Jesús Nazaretre Pa'iye
(Mt 13.53-58; Mr 6.1-6)
16Ja̱ maca Jesús Nazaretna saji'i, i̱ ai de'osi daripëna. Huajë mu'se ti̱'aëna, pa̱i tsi'si huë'ena cacani ja'rupi. Ja̱je i̱ si'anë yo'oye sëte. Ja'rusipi Maija'quë coca pëpë ñasi'i caquë huëni nëcapi. 17Nëcaquëna, Isaías Maija'quëre quëacaiquë toyaquë pa'ise'ere i̱siëña. I̱ti maca aquëpi i̱siquëna, hui'yoquë ti̱'api, ñeje toyase'e pa'i hue̱'ñare:
18Mai Ëjaë joyopi yë'ëni pa'iji.
Ja̱je pa'ina, yë'ëna de'o cocare i̱sipi, caraja̱icohua'ina quëa ja̱'ñere.
Cui'ne ai oicohua'ire yëhuo huasoja̱'quë a'ë.
Tse̱a cua̱ñosicohua'i pa'icohua'ire quëa huasoja̱'quë a'ë.
Cui'ne ñama'cohua'ini ñacohua'ire neja'quë a'ë.
Co'aye yo'ojëna, ai yo'ojë pa'icohua'ini de'o pa'iye i̱sija̱'quë a'ë.
19Mai Ëjaë oi necai tëcahuëre pa̱ipi asaja̱'cohua'i a'ë caquë yë'ëre jëjo daopi.
20Ja̱je Jesús ña tëjini tëoni pa̱i tsi'si huë'e co̱caiquëna, i̱sini ja'rupi. Ja̱ maca si'ahua'i ai ñahuë, i̱se'ere, pa̱i tsi'si huë'ere tsi'sicohua'i. 21Ñajëna, i̱ohua'ire je̱'nërepa ca huëopi:
“Yure iye mu'se ti̱'api, iye toyase'e caye mësaru asa maca.”
22Si'ahua'i Jesús de'oquë api cajë i̱ case'ere merepa de'oye caëna, cajë ai cuasajë sa̱'ñe cahuë:
“¿Iquë coa José mamaquë api, pa'ima'quë?”
23Jesupi capi, ja̱ohua'ire:
“Jujuquë sëte co'ye jujujë̱'ë, caja̱'cohua'i a'ë. Casicohua'ipi yequeje̱ caja̱'cohua'i a'ë. Capernaum yejana yo'ose'eje̱ yure i̱ño më'ë yejare pana yo'ojë̱'ë, yëquë asase'eje̱.”
24Ja̱ maca ai se̱ña maca ca saoquë cui'ne capi:
“Nuñerepa cayë. I̱ ai de'o sito pa'icohua'i caye Maija'quëre quëacaiquëre te'ije̱ de'oyerepa sihua cua̱ñosiquë peopi. 25Maija'quëre quëacaiquë Elías pa'i mu'señare Israel pa̱i hua'jeohua'i jai pa̱i paë'ë. Ja̱ mu'seña tres o̱metëca jerepa ocoma'ëna, si'a yeja pa'icohua'i a̱o ëa ju̱'ijë ai yo'ohuë. 26Ja̱je ai yo'ojëta'are Maija'quëpi Elíasre Israel pa̱i hua'jeohua'ire jëjo saoye pa̱pi. Paquë Sareptare hua'jeo pa'ico quë'rona jëjo saopi, Sidón yejana. 27Cui'ne Maija'quëre quëacaiquë Eliseo pa'i mu'señaje jai pa̱i Israel pa̱i ja̱'ju dahuë ju̱'icohua'i paë'ë. Pa'ijëta'are te'ireje̱ jujucaiye pa̱pi. Paquë Siria yeja aquë Naamánni jujucaji'i.”
28Ja̱je caquëna, asani tsi'sisicohua'ipi ai pë̱ti huëohuë. 29Ja̱ maca huëni nëcani Jesure tse̱ani pa̱i daripë peo hue̱'ña hue'sena etoni sahuë, cu̱ti sa̱'nihuëre pana. Ja̱ropi jëjo to̱ñu'u cajë. I̱ti cu̱tihuëre pa̱i pa'i daripë paji'i. 30Ja̱je jëjo to̱ñu'u cajë sasicohua'ita'are Jesús i̱ohua'i jopoja̱'a etani saji'i.
Co'a Huati Joyo Hue'equë
(Mr 1.21-28)
31Ja̱ maca Jesús saji'i, Capernaumna Galilea yeja daripëna. Ja̱rona sani huajë mu'seña pa̱ire ye'ya huëopi. 32I̱ohua'ire ye'yayere asajë ai ñahuë. ¿Merepa ja̱je cua̱ñequë quëayeje̱ pa'yerepa quëaquë'ni? cuasajë.
33Ja̱ro tsi'si hue̱'ñare paji'i, te'i ë̱më huati joyo hue'equë. Ja̱ëpi cuipi.
34“Yëquëre yo'oma'ë. ¿Me nesi'quë yëquëre yo'oquë'ni, Jesús Nazaret aquë? ¿Nejosi'quë daiquë? Më'ëre yë'ë ñañë. Më'ë cato Maija'quë mamaquë, de'oquëre pa'ë.”
35Ja̱ maca Jesús co'a joyore capi:
“Cama'ë. Ja̱ëte je̱oni saijë̱'ë.”
Ja̱je ca maca co'a joyopi pa̱i ña hue̱'ñana co'aye neñe peoyerepa yejana ne ta̱oni eta saji'i. 36Si'aohua'i ña quëquëni sa̱'ñe i̱ohua'ija̱'a cahuë:
“¿I̱que yë'o a'ni, ja̱ jerepa pa'ye iye? Cua̱ñequëna, huatiohua'ije̱ i̱te sehuojë etayë.”
37Ja̱je yo'oquëna, pa̱ipi Jesús yo'oye ayere ja̱ yeja si'a hue̱'ña quëaroja̱teña.
Jesupi Simón Pedro Huaore Jujuye
(Mt 8.14-15; Mr 1.29-31)
38Ja̱ maca Jesús tsi'si huë'epi etani Simón huë'ena cacapi. Ja̱rote paco'ë, Simón huao su̱ña dahuë ai ju̱'icopi. Ja̱je pa'iona, Jesure jujucaijë̱'ë, cajë se̱i'ë. 39Ja̱ maca Jesús su̱ña dahuë ju̱'iconi ñaquë su̱ña dahuëre pi'ra saouna, su̱ña dahuë peocopi huëni a̱ore neni a̱o.
Jesús Jai Pa̱ire Jujucaiye
(Mt 8.16-17; Mr 1.32-34)
40Ë̲së cara mesi maca jai pa̱ire ju̱'icohua'ire dahuë, coa si'a ju̱'i dahuë quë'iohua'ire Jesuna. Dajëna, ju̱'icohua'ire i̱ jë̱tëpi pa̱i ñapere patoquëna, co'yahuë, si'aohua'i. 41Ju̱'icohua'ire pa'isicohua'ipi huatiohua'i etajë Maija'quë mamaquëre papi cuijëna. Jesupi ja̱ cayere ë̱sepi, tsoe i̱ohua'ipi Maija'quë jëjo daoquë Cristo api asa do'ire.
Jesús Yëhuoye, Galilea Quë'rore
(Mr 1.35-39)
42Jesús nea hue̱'ñarepa pa̱i peo hue̱'ñana saquëna, saima'quëni cajë co'ejë ti̱'ahuë. 43Ti̱'asi maca Jesupi capi, ja̱ohua'ire:
“Quëaye pa'iji, de'o coca Maija'quë pa'i te̱'te ayere yequë pa̱i daripë̱aje. Ja̱re caquë jëjo daosiquë a'ë.”
44Ja̱je Jesús cu'i quëaroja̱ji'i, Galilea tsi'si huë̱'ñana.
Currently Selected:
Lucas 4: sey
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2012, Wycliffe Bible Translators, Inc. All rights reserved.