Matayu 1
1
Pitiiŋ to Yesu puughu tooni
[Lu 3:23-38]
1Ene pitiiŋ to Yesu Krisi puughu tooni. Yesu, i siŋ to kinik David, ve David i siŋ to Abaram. Gnp 22:18
2Yesu puughu tooni tau Abaram ve ilam imuul izi David, ezazi tauvene: Abaram naatu Isak, Isak naatu Yakop, ve Yakop natŋa, ene: Yuda tomania tooghŋa ve tazŋa. Gnp 21:3, 25:24+
3Yuda yesuru Tamar tipoop natuzŋa bogboog ru. Ee eeza Peres, ve ite eeza Sera. Peres naatu Ezron, ve Ezron naatu Ram. Gnp 38:27+; Rut 4:18+
4Ram naatu Aminadap, Aminadap naatu Nason, ve Nason naatu Salmon. 5Salmon yesuru Reap tipoop Boas, ve Boas yesuru azaawa Rut tipoop Obet. Obet naatu Yesi, 6ve Yesi naatu, ene kinik David. David ivai Uraia azaawa Batseba, ve yesuru tipoop Solomon. 2Sam 12:24
7Solomon naatu Reoboam, Reoboam naatu Abia, ve Abia naatu Asa. 8Asa naatu Yosapat, Yosapat naatu Yoram, ve Yoram natu Usia, 9Usia naatu Yotam, Yotam naatu Aas, ve Aas naatu Esekia. 10Esekia naatu Manase. Manase naatu Amon, ve Amon naatu Yosia. 11Yosia natŋa, ene: Yekonia ve tazŋa siriv. Saawe tana, yes Babilona tilam tireu nugh tintiina isov to yes Yuda, ve tiyau zi gha tigherev zi tila tivot nugh toozi tau igheen malau kat. 2King 24:14+
12Saawe tau yes Israela tilepleep izi Babilon, Yekonia yesuru azaawa tipoop Sealtiel, ve Sealtiel yesuru azaawa tipoop Zerubabel. 13Zerubabel naatu Abiut, Abiut naatu Eliakim, ve Eliakim naatu Azor. 14Azor naatu Sadok, Sadok naatu Akim, ve Akim naatu Eliut. 15Eliut naatu Eleasar, Eleasar naatu Matan, ve Matan naatu Yakop. 16Yakop naatu Yosep. Yosep azaawa Maria ta ipoop Yesu, i ta tiwaato tighe Krisi #1:16 ‘Krisi’, ene yes Grika aliŋazi. Ve ‘Mesia’, ene yes Israela aliŋazi. Pughuzi eemon: ‘Ŋeer tau tiliŋ ŋgoreeŋ izala paavo imin ilaal pani ighe i aat igham uraat tiina eta to Maaron.’ Tiwaat Yesu tighe Mesia (o Krisi) pasaa, Maaron tauu ighuru imin Uleeŋa to iit tamtamon, ve i igham mulin ghiit pa pataŋani to sosor toit. na.
17Tauvene Abaram naatu Isak, Isak naatu Yakop, ve paaghu toozi tiparseeŋ tauvene taghon taghon le David ivot imin saŋavul ve paaŋ (14). Ve indeeŋ saawe to David, le ila imuul saawe tau yes Babilona tiyau yes Yuda ve tigham zi tila Babilon, paaghu to David tiparseeŋ irau saŋavul ve paaŋ (14) muul. Ve saawe tau yes Yuda tipul Babilon ve timuul tila tauzi nugh toozi, le ila imuul saawe tau Krisi tiina ipoopa na, paaghu to David tiparseeŋ irau saŋavul ve paaŋ (14) muul.
Aŋela ivot to Yosep
[Lu 2:1-7]
18Sinaiŋ to Yesu Krisi tiina ipoopa, ene vene: Tiina Maria, tisiigho pa ŋeer ee, eeza Yosep. Eemon yesuru tilup zi soone, ve tighilaal tighe Maria aapo. Gabua tana ivot ila Avuvu Patabuyaaŋ tapiri. Lu 1:35.
19Yosep, i ŋeer duduuŋa ee, ve loolo pa igham Maria vaaru ivot ighazooŋ mako. Tauvene maata iŋgal ighe irav motin vaiŋ toozi imin ŋgozaaŋ. 20Ighamgham ŋgar soone, ve Maaron aŋela tooni ivot tooni ila vivuuŋ, ve isaav pani ighe: “Yosep, yo siŋ to David, uroi pa ghamuuŋ Maria imin azuwam sov. Pa tamtamon tau igheen ila i aapo na, ene ivot ila Avuvu Patabuyaaŋ tapiri. 21I pale ipoop tamoot. Ve yo aat uwaat eeza Yesu.
Pa i pale igham mulin tamtamon tooni pa pataŋani to sosor toozi.” #1:21 Yesu eeza, puughu tauvene: ‘Yoova igham mulin’. Lu 1:31, 2:21; Yo 1:29; Mbaŋ 4:12
22Gabua isov tana itaghon saveeŋ tau muuŋ Maaron isavia ila propet tooni ee aavo na. Saveeŋ tauvene:
23 “Aghita. Livaa mbiu ee pale aapo, ve ipoop naatu tamoot.
Pale tiwaat eeza Imanuel.” # 1:23 Saveeŋ Imanuel, puughu tauvene: ‘Maaron ileep tomani ghiit’. Is 7:14
24Tauvene Yosep igheen le nughizau, ra iburig ve itaghon saveeŋ tau aŋela to Maaron isavia pani na, ve igham Maria imin azaawa. 25Eemon igharauu mako le i ipoop naatu tamoot tawe. Ve Yosep iwaat marani tana eeza Yesu. Lu 2:7, 21
Currently Selected:
Matayu 1: tucNT
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2011, Wycliffe Bible Translators, Inc. All rights reserved.