मत्ती 5
5
पहाड़ी उपदेश
1ईशु भीड़ नु ङेखती कर पहाड़ा उपर चढ़ती कर ब़ेसती रेहला ते ओचे चैले ओचे गोढु आले। 2ईशु ने वानु उपदेश ङिला,
धन्न वचन
(लूका 6:20–23)
3“धन्न छी वे, जको मना चे दीन छी,
कांकि स्वर्ग़ा चा राज़ वांचा छै।
4धन्न छी वे, जको ङोख मनावी पले,
कांकि वानु शान्ति मिली।
5धन्न छी वे, जको नर्म छी,
कांकि वे धरती चे अधिकारी हुवे।
6धन्न छी वे, जको धार्मिकता चे भुक्के ते तरसेले आले छी,
कांकि वे रज़ाले जाये।
7धन्न छी वे जको दयावन्त छी,
कांकि वांचे उपर दया करली जई।
8धन्न छी वे, जाये मन शोद्ध छी,
कांकि वे नरीकारा नु ङेखे।
9धन्न छी वे, जको मेल कराणे आले छी,
कांकि वे नरीकारा चे पूत किहवावे।
10 #
1 पत 3:14
धन्न छी वे, जको धार्मिकता ची वजह कनु सताले जई,
कांकि स्वर्ग़ चा राज़ वांचा छै।
11 #
1 पत 4:14
“धन्न छिवा तम्ही, जब इन्साने माई वजह कनु तम्ची निन्दा करे, ते सतावे ते कूड़ मारती-मारती कर तम्चे विरोध मां सब प्रकार चीया बुरीया बाता किही। 12#प्रेरि 7:52ओ बेले आनन्द चे लारे मगन हुजा, कांकि तम्चे वास्ते स्वर्ग़ा मां बङा प्रतिफल छै। ऐवास्ते कि वाणे वां भविष्यवक्ता नु जको तम्चे कनु पेहले हुते यूंही सताले हुते।
लूण ते सोज़ले
(मरकुस 9:50; लूका 14:34,35)
13 #
मरकु 9:50; लूक 14:34,35 “तम्ही धरती चे लूण छिवा, पर अगर लूणा चा स्वाद बिगड़ती जाये, तां ऊं बल्ति किसी चीजे लारे नमकीन करले जई? बल्ति ऊं कुई कामा चे कोनी, सेर्फ ऐचे कि ब़ाहर भुकाले जई ते बन्दा चे पग़्ग़ा तले लुथोड़ले जाओ।
14 #
यूह 8:12; 9:5 “तम्ही जग़त चे सोज़ले छिवा, जको शहर पहाड़ा उपर बसला आला छै, ओ सारा कनु लुकला आला कोनी। 15#मरकु 4:21; लूक 8:16; 11:33ते लौक ङीवा ब़ालती कर ठांवा तले ना पर जाले मां मेहली, ताकि सारे घरा मां रेहणे आले लौका नु सोज़ले मिलो। 16#1 पत 2:12यूंही तम्चे सोज़ले बन्दा चे सामणे चमको, वे तम्चे भले कामा नु ङेखती कर तम्चे ब़ा नरीकारा ची महिमा करो जको स्वर्ग़ा मां छै।
व्यवस्था चे बारे मां सीख
17“पर, ईं ना समझा कि मैं व्यवस्था जा भविष्यवक्ता चीया किताबा नु अलोफ करने वास्ते ना, बल्कि पूरा करने चे वास्ते आला। 18#लूक 16:17कांकि मैं तम्हानु सच्च किहे कि जब तक आसमान ते धरती टलती ना जाओ, तब तक मूसा ची व्यवस्था महु हेक मात्रा जा ठींबी वी बिना पुरे हुले नी टली। 19ऐवास्ते जको कुई वी छोटी कनु छोटी आज्ञा नु तरोड़े, ते यूंही लौका नु सिखावे, ओह स्वर्ग़ चे राज़ मां सारा कनु छोटा करला जई, पर जको कुई आज्ञा चा पालन करी, ते वानु सिखावी, ओही स्वर्ग़ा चे राज़ मां महान हुवी। 20कांकि मैं तम्हानु सच्च किहे कि अगर तम्ची धार्मिकता, शास्त्रीया ते फरीसिया ची धार्मिकता कनु बढ़ती कर ना हो, तम्ही स्वर्ग़ चे राज़ मां कङी वी ना जा सग़ा।
हत्या ना करजा
21“तम्ही सुणती चुकले कि पेहले समय चे लौका नु केहले गेलते कि ‘हत्या ना करजा,’ ते ‘जको कुई हत्या करी, ऊं कचेहरी मां ङण्ड चे लायक हुवी।’ 22पर मैं तम्हानु किहे कि जको कुई आपणे भावां उपर गुस्सा करे, ऊं कचेहरी मां ङण्ड चे लायक हुवी, ते जको कुई आपणे भावां नु निक्कमा किही, ऊं महासभा मां ङण्ड चे लायक हुवी। ते जको कुई आपणे भावां नु किहे अरे मूर्ख, नरीकार ओनु नर्क चे जाखते मां नाखती ङिही।
23“ऐवास्ते जिसे बेले तु आपणी भेंट वेदी उपर नरीकारा चे वास्ते चढ़ावी, ओठे तनु याद आवे कि, आपणे भावां चे तरफु माये मना मां जको बैर छै। 24ते आपणी भेंट उठी वेदी चे सामणे छोड़ती ङे, ते जती कर आपणे भावां लारे मेल-मिलाप करती गे, ते बल्ति आती कर आपणी भेंट नु चढ़ा आती।
25“जब तक तु आपणे मुद्दई चे लारे मार्ग़ा मां ही छी, ओचे लारे झटपट मेल-मिलाप करती गे कङी इसड़े ना हो कि मुद्दई तनु न्यांयी नु सोंपे, ते न्यांयी तनु सिपाहीया चे हाथ सोंपती ङिये, ते तु कैदखाने मां नाखती ङिला जई। 26मैं तम्हानु सच्च किहे पला कि जब तक तु कोड़ी-कोड़ी भरती ना ङी, तब तक तु उठु छोट्ट नी सग़े।
व्यभिचार चे बारे मां शिक्षा
27“तम्ही सुणती चुकले छिवा कि केहले गेलते, ‘व्यभिचार ना करजा।’ 28पर मैं तम्हानु ईं किहे पला, कि जको कुई पराई असतरी नु बुरी नजरी लारे ङेखे, ओह आपणे मना मां ही विचे लारे व्यभिचार करती चुकला। 29#मत्ती 18:9; मरकु 9:47अगर दुधी सज़्ज़ी आंख दुधे कनु पाप करवावे, तां विनु काढ़ती कर भुकाती नाख, कांकि दुधे वास्ते ईं भले छै कि दुधे अंगा महु हेक नाश हुती जाओ ते दुधे सारे शरीर नर्का मां ना नाखले जाओ। 30#मत्ती 18:8; मरकु 9:43अगर दुधा सज़्ज़ा हाथ दुधे कनु पाप करवावे, तां ओनु बाढती कर भुकाती नाख, कांकि दुधे वास्ते ईं भले छै कि दुधे अंगा महु हेक नाश हुती जाओ ते दुधे सारे शरीर नर्का मां ना नाखले जाओ।
तलाक
(मत्ती 19:9; मरकुस 10:11,12; लूका 16:18)
31 #
मत्ती 19:7; मरकु 10:4 “ईं वी केहले गेले, ‘जको कुई वी आपणी घराआली नु तलाक ङेणे चाहवे तां त्यागपत्र लिखती ङियो।’ 32#मत्ती 19:9; मरकु 10:11,12; लूक 16:18; 1 कुरि 7:10,11पर मैं तम्हानु ईं किहे पला कि जको आपणी घराआली नु व्यभिचार चे सिवाय कुई नेरी वजह कनु तलाक ङिये, तां ओ विकनु व्यभिचार करवावे, ते जको कुई वे त्याग़ली आली लारे बीहा करे, ओ वी व्यभिचार करे।
कसम नी खाणी
33“तम्ही ईं वी सुणती चुकले पेहले चे लौका नु केहले गेले, ‘तम्ही कूड़ी कसम ना खाजा, पर प्रभु वास्ते आपणी कसम नु पुरी करजा।’ 34#याकू 5:12; मत्ती 23:22पर मैं तम्हानु ईं किहे पला कि कङी कसम ना खाजा, ना तां स्वर्ग़ा ची, कांकि ओ नरीकारा चा सिंहासन छै, 35ना तां धरती ची, कांकि वा ओचे पग़्ग़ा ची चौकी छै, ना यरुशलेम शहरा ची, कांकि ओ महाराजे चा शहर छै, 36ना ही आपणे ठोङा ची कसम खाजा, कांकि तु हेक वी माला नु चिट्टे ते काले ना कर सग़ी। 37पर तम्ची बातचीत ‘हां’ ची ‘हां’ जा ‘ना’ ची ‘ना’ हो, कांकि जको कोच्छ ऐकनु ज्यादा हुवे, ऊं शैताना चे तरफु हुवे।
बदला नी गेहणा
(लूका 6:29,30)
38“तम्ही सुणती चुकले कि केहले गेलते हुते, ‘आंख चे बदले आंख ते ङांता चे बदले ङांत।’ 39पर मैं तम्हानु ईं किहे कि बुराई करने आले बन्दे लारे बुराई ना करा, पर जको दुधे सज़्ज़े गल्वेह उपर थप्पड़ मारे, ओचे सनु ङुजा वी फेरती ङे। 40अगर कुई वी दुधे लारे जबरदस्ती करती कर चोला खोसणे चाहवे, ओनु चादर वी ङे जती। 41अगर कुई बन्दे तनु जबरदस्ती आपणा समान चवाती कर हेक मील गेहली जाये, तां ओचे लारे ङोन मील चाह्ला जा। 42जको कुई वी दुधे कनु मांगे, ओनु ङे, ते जको दुधे कनु उधार गेहणा चाहवे, ओकनु मुँह ना मोड़।
दुश्मना लारे प्रेम करा
(लूका 6:27,28,32–36)
43“तम्ही सुणती चुकले कि केहले गेलते, ‘तम्ही आपणे पड़ोसीया लारे प्रेम राखजा ते आपणे बैरीया लारे बैर।’ 44पर मैं तम्हानु ईं किहे कि आपणे दुश्मना लारे प्रेम राखा ते आपणे सतावणे आला वास्ते प्राथना करा, 45जाये कनु तम्ही आपणे स्वर्ग़ीय ब़ा ची ऊलाद्ध ठहराली जावा कांकि ओ भले ते बुरे ङुंहु उपर सूरज उग़ावे, ते धर्मी ते अधर्मी ङुंहु चे उपर मिंही बरसावे। 46कांकि अगर तम्ही आपणे प्रेम राखणे आला लारे ही प्रेम राखा, तां तम्चे वास्ते का फल हुवी? का चुंगी गेहणे आले वी इसड़े ही ना करी? 47अगर तम्ही सेर्फ आपणे भावां नु ही नमस्कार करा, तां किसे बङे काम करा? का जको नरीकारा नु ना जाणी वे इसड़े ना करी? 48ऐवास्ते चाही छै कि तम्ही सेद्ध बणा, जिंवे तम्चा स्वर्ग़ीय ब़ा सेद्ध छै।
Currently Selected:
मत्ती 5: ODR
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
CC BY-NC-ND 4.0