मर्कस् 7
7
1ओउः जीक्ओलम्कायः स्याक्ताक्आकान् ओहाङःसैको फरीसीलम्मा धर्मा स्यान्ओमयःमा यरुसालेम्सै येसुकःताङ् हुम्ती वाङ्आकाय्। 2वाङ्आक्तीको यात्नीस् येसुकुस् वाह्ओमयःइ क्रुत् जेस्माःत जेःओ च्यवःआकानी। 3जेःतोक् बेलाहाङः फरीसीलम्इमा सबै यहुदी जात्कोः मान्तालम्इमा क्रुत् आःताः जय्ती जेस्माःत दोह्मा जेःनीली ओउःमयःकोः आय्कानः तोकानःइ बयःओ छ्यात् जवती “जेस्माःत जेःसा क्रीसीःतो” त दाय्ह्ती तोआकानी। 4फेरी बजार्सै वानःओ चीस् आःताः हुर्ती जय्ताक्माःत ओउःमा जेःनीली मानालम्मा थाल्लम्मा पोम्लम्मा सबैकायः हुर्ती जय्ताक्सा जवनानी। 5ओउःत झ्यान्ते ओउः फरीसीलम्इमा धर्मा स्यान्ओमयःइमा येसुकुस् वाह्ओमयःइ क्रुत् आःताः जेस्माःत जेःओ च्यवःती “लौ नाङ्कुस् वाह्ओमयःइ दोह् हायःतीलेः ङीकोः आय्कानः तोकानःइ बयःओ छ्यात् जवमाःत क्रीसीःओ क्रुत्इ जेःनानी” त दाय्ह्ती येसुकायः व्हत्आथै। 6“लौ नीङ्लो लेखा माःती जाङ्ह्ओलम्कायः तय्ह्ती एसाया त तोओइ उय्ह्ले परमेस्वर्कोः कुरा चीःती लेखआकान् बा ‘लौ मान्तालम्इ नोःओकोः नोःओइ ङाकायः लुङ्ती तोनीतो दोङ् ल्हुङ्हाङःखे सायःसा जुगाङ् ग्याइली। 7ओउः मान्तालम्इ ङाकायः आह्रेलेः म्रोताक्सा बोङःनानी ओउःमयःइ लौ इपाय् परमेस्वर् झाक्ओ कुरालेः त दाय्ह्इतो ङाकोः कुरा खेःबाय्ल लयःमयःकोः ल्हुङ्सै जाङ्ह्ओ छ्यात्लम् ह स्यान्नानी बा त दाय्ह्ती परमेस्वर् जान्ती तोनौ’ त दाय्ह्ती एसायाइ उय्ह्ले लेखआकान्। 8नीङ्इमा परमेस्वर्कोः ऐन् फेती लयः झाक्ओ छ्यात्लम् जवओतेःआः नीङ्सी” त दाय्ह्ती येसुइ फरीसीलम्कायःमा धर्मा स्यान्ओमयःकायःमा तोआथास। 9“दोङ्सीलेः नीङ्पाय् आन जाङ्ह्सा चीःओलम्तेः खेःतेःनै बा। परमेस्वर्कोः पेओ कुराखे ध्याक्ती वाय्ती लयः झाक्ओ छ्यात्लम्खे गम्तेःनानी। 10परमेस्वर्इ मोसाकायः बयःओ यात्ज्योः हुकुम् इलेःआः बा ‘नीङ्कोः आमा आपाकायः एङःती ओउःमयःकोः काम् पेतो जाङ्ह्नु’ त दाय्ह्ती दाय्ह्ओमा मुलेःनाः अरुमा इलेःआः ‘सुसुइ आमा आपाकायः प्रनःती नोःनै ओउःलेः न्युम्ह्ती सीपै’ त दाय्ह्तीमा परमेस्वर्कोः हुकुम् मोसाखेइ छ्यानःउतो 11नीङ्खेइ थेथे स्यान्तेःनानी। सुसुइ ‘लौ आमा आपाय इ ङाइ नीङ्जीखेकायः बयःसा खेःओ थोक्लम्पाय् परमेस्वर्खेकायः “इ बयःनेःनाङ् बा” त दाय्ह्ती ङ्हासैलेः तोती गम्आलाङः’ त दाय्ह्ती तोनै 12ओउःकायःलेः ‘लौ ओउःत झ्यान्ते ओउः थोक्लम् आमा आपाकायः बयःलाम्’ त दाय्ह्ती नीङ्इ इतलेः परमेस्वर्कोः हुकुम् ल्हेत्ती वाय्ती लःलयःकोः छ्यात् जवतेःनानी। 13इलो खेःओ काम्लम् जाङ्ह्ती नीङ्इपाय् आनतेः जाङ्ह्तेःआकानी” त दाय्ह्ती येसुइ फरीसीलम्कायःमा धर्मा स्यान्ओमयःकायःमा तोआथास।
14ओउःमयःखेकायः ओउःत तोआथास अरु अरु मान्तालम्कायः गोत्ती वानःती “लौ इ कुरा जुदालेः चीःती सायःनाङ्स। 15दोह्खेलो थोक्लम् मान्ताइ जेःआक्तीको ओउःकोः तुक्हाङः पोक्नाः ओउः थोक्इपाय् मान्ताकायः क्रीसीःताक्सा जुगाङ् खाय्ल। मान्ताकोः ल्हुङ्तुक्सै वाङ्ओ कुराखेपाय् ओउःइलेः मान्ताकायः क्रीसीःताक्सा खाय्नौ बा। 16इ कुरा पेतो सायःनु दा” त दाय्ह्ती येसुइ तोआथास। 17ओहाङःसैको एत तोआक्तीको येसुइ ओउः हुम्ती मुओलम्कायः फेती कीम्हाङः पोक्आ। कीम्हाङः पोक्आक्तीको ओउःकुस् वाह्ओमयः येसुकःताङ् वाङ्ती “लौ नाङ्इ मेस् नोःओ तुक्कोः कुराकोः माने दोह्खेलो तोताङी दै” त दाय्ह्ती व्हत्थातो 18“लौ नीङ्इमा चीःतेःनीली यादो। दोह् दोह् जेःगालो मान्ताइ जेःनीतो ओउःलेः मान्ताकोः दोङ् ल्हुङ्हाङः पोक्माःत तुक्पुन्हाङःलेः पोक्आक्तीको ग्ल्युङ्ह्ती ओहाङःसै ओत्ती वाय्ओआः। 19ओउःत झ्यान्ते ओउः जेःगालम्खेइ मान्ताकायः क्रीसीःताक्सा खाय्उलु दोह् दोह् रेव्ओ कुराखे मान्ताकोः ल्हुङ्सै वाङ्नाः ओउःइलेः क्रीसीःताक्सा खाय्नौ” त दाय्ह्ती “लौ सबै जेःगालम् जेःसा पेनाः” त स्यान्ती तोआथास। 20-23“मान्ताकोः भीत्रकोः ल्हुङ्पाय् आन रेव्तोलेः। भीत्रहाङः ल्हास्या काम् जाङ्ह्सा झाक्ओ ल्हुङ् मुलेःनाः। कुःसा बोङःओ ल्हुङ्मा अरुकायः सात्सा ल्हुङ् अरुकोः बुधीकायः आलःसा ल्हुङ् अरुकोः चीस् लओ ल्हुङ् लयःकोः नेह्रो ओर्ताक्सा ल्हुङ् माःती तोओ ल्हुङ्मा सबैलेः मान्ताहाङः मुनाः। ओउः रेव्ओ खाल्कोः ल्हुङ् मान्ताकायः क्रीसीःताक्नाःथास बा” त दाय्ह्ती येसुइ लयःकुस् वाह्ओमयःकायः स्यान्ती तोआथास।
24ओउःतलेः तोआथास ओहाङःसैको येसु चीङ्ती ओउः देस्सै आल्ती तायर् सीदोन् त तोओ नीस् सहर्कोः देस्ताङ् वाङ्आकाय्। ओहाङः वाङ्आक्तीको येसु कीम्हाङः पोक्ती “लौ ‘इहाङःलेः मुनाः’ त अरुकायः चीःताक्माःत मुपाङः” त येसु दाय्ह्ती दाय्ह्तो ओउः कीम्हाङः अरुइ चीःमाःत मुसा दोःल। 25-26यात्चाक् एलेनी भासा नोःओ सीरीया फोनीस्या देस्कोः मोमःचोः येसुकःताङ् काःहाल्लाङ् वाङ्आ। येसुकःताङ् वाङ्ती “लौ ङाकोः लान्इ ङायःओ चोःद्याङ्कायः लान् ल्हेस्ती वाय्बत्ची दै” त दाय्ह्ती तेती तोथातो 27“लौ कीम्कोः हौलम्खेकायः ङ्हा कोस्ताक्सा खेःतो। हौलम्कोः जेःगालम्पाय् हौलम्खे आःताः कोस्तो जेःताक्माःत कुयःखेकायः ताती बयःसा स्याव्ल” त दाय्ह्ती त्याङ्ती येसुइ ओउः मोमःचोःकोः ल्हुङ्तुक् योती तोआकान्। 28“आसाम् प्रभुय स्याव्सापाय् स्याव्ओआः कुयःइपाय् हौलम्इ रेस्ओ य्हुन्ह्लेः जेःसा खाय्नौ” त दाय्ह्ती ओउः मोमःचोः त्याङ्आ। 29“लौ उया नाङ् इतलेः ङ्हाम्ती पेतो त्याङ्तेःआ त खेःओ लौ आल्अ नाङ्कोः चोःद्याङ्कायः ङायःओ लान्पाय् द्याह् ल्हेस्ती वाय्ओआः” त दाय्ह्ती येसुइ ओउः आमाकायः ल्होक्आकान्। 30ल्होक्आक्तीको ओउः आमा पाय्ह्ती कीम्हाङः दाह्ती वाङ्तोक्हाङः लयःकोः चोःद्याङ् सेलः स्याव्आक्तीको एनःती मुओ च्यवःआकान्।
31एत हायःआक्तीको येसु तायर् त तोओ देस्सै फेती सीदोन् देस्मा दस् सहर्त तोओ देस्मा च्योल्ती गालील त तोओ ताङ्ह्ओ दुम्हान्ताङ् पाय्ह्ती वाङ्आकाय्। 32ओहाङः पाय्ह्ती वाङ्तोक्हाङः यात्चाक् जुगाङ् नो लोक्ओमा नोःसा ग्रेम्ह्मालो मान्ताकायः येसुकःताङ् वानःती “लौ इकायः क्रुत् झाम्ती स्याक्ताक्उ दै” त दाय्ह्ती काःहाल्ती तोआथै। 33ओउःत तोआक्तीको ओउः जीक्ओ मान्ताकुस् आल्ती हुम्ओ मान्तालम्कःसै बल लोक्तो ज्याल्ती येसुइ लयःकोः ब्रय्ह् ओउः नो लोक्ओ मान्ताकोः नोहाङः काआकान्। 34ओहाङःसैको द्युरःती ओउः मान्ताकोः ले दीन्ह्आ “लौ इकोः नो ओङ्ह्पाः” त दाय्ह्ती येसु त्याव्ती योती ल्हय्ङ्ह् सास्ती नोःआ। 35नोःआक्तीको ओउः मान्तापाय् नोःमा सायःजेःआ लेमा ग्रेम्ह्जेःआ। 36एत स्याक्ताक्आक्तीको “लौ ङाइ जाङ्ह्ओ कुरा सुकायःमा छ्यान्ह्तेःचानी” त दाय्ह्ती येसुइ योती मुओ मान्तालम्कायः तोथासतो ओउःमयः सबैकायः ल्हाक्ती छ्यान्ह्आकानी। गुच्युक् येसुइ “छ्यान्ह्लाम्” त तोथासतो ओउःमयःइ न्हाङ्तोलेः छ्यान्ह्आकानी। 37छ्यान्ह्आक्तीको सबै ग्याङ्ह्ती “लौ येसुइपाय् नो लोक्ओकायः सायःताक्तीमा नोःसा खाय्मालोकायः नोःताक्तीमा आन पेतो काम् जाङ्ह्नौ बा” त दाय्ह्ती नोःकाय्आकाय्।
Currently Selected:
मर्कस् 7: CDM93
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 1993 Wycliffe Bible Translators Inc., All Rights Reserved.