متّی 2
2
پُواَدھ کنُوں آوݨ آلے سیاݨے
1یِسُوع صوبہ یہُودیہ دی وستی بَیتلحم اِچ اُوں ویلے ڄایا جݙّاں ہیرودیس اُتھاں بادشاہ ہا اَتے کُجھ سیاݨے جیرھے سِتارئیں دا علم ڄاݨدے ہَن پُواَدھ اِچوں شہر یروشلم اِچ آئے 2اَتے اُنہیں پُچھیا، ”او ٻال کِتھاں ہے جیرھا بنیاِسرائیل دا بادشاہ بݨن کیتے ڄائے؟ کیوں جو اَساں پُواَدھ اِچ اُوندا تارا ݙِٹھے اَتے اُوندے اَڳوں جُھک کرائیں اُونکُوں سِجدہ کرَݨ آئے ہَیں۔“
3ایہ سُݨ کرائیں ہیرودیس بادشاہ اَتے شہر یروشلم دے سارے لوک پریشان تھی ڳئے، 4اَتے اُوں اِسرائیلی قوم دے سارے وَݙّے مذہبی پیشوائیں اَتے شرع دے عالمیں کُوں کٹھا کر کرائیں پُچھیا، ”مسِیح کِتھاں ڄَؤسی؟“
5اُنہیں اُونکُوں جواب ݙِتا، ”صوبہ یہُودیہ دی وستی بَیتلحم اِچ کیوں جو نبی دی راہِیں اِیویں لِکھیا لاتھے،
6’اَے صوبہ یہُودیہ دے علاقے دی وستی بَیتلحم! تُوں یہُودیہ دے حاکمیں اِچوں اپݨے آپ کُوں چھوٹی نہ سمجھ کیوں جو تیݙے اِچوں ہِک حاکم ڄَؤسی جیرھا میݙی اِسرائیلی قوم دی ݙیکھ بھال کریسی۔‘“
7اِیندے بعد ہیرودیس اُنہیں سیاݨئیں کُوں کلھئیں سَݙ کرائیں تفصیل نال پُچھیا جو او تارا کݙاں ݙِکھالی ݙِتا ہا۔ 8وَل اُوں سیاݨئیں کُوں وستی بَیتلحم دو ایہ آکھ کرائیں بھیڄ ݙِتا، ”وَنڄو اَتے اُوں ٻال کُوں چَنڳی طرحاں ڳولو اَتے جݙّاں او مِل پووے تاں مَیکُوں وی آن ݙساؤ تاں جو مَیں وی وَنڄ کرائیں اُونکُوں سِجدہ کراں۔“
9بادشاہ دی ڳالھ سُݨ کرائیں او وستی بَیتلحم دو لڳے ڳئے اَتے ݙیکھو جیرھا تارا اُنہیں پُواَدھ اِچ ݙِٹھا ہا او وَلا ݙکھالی ݙِتا اَتے اُنہیں دے اَڳوں اَڳوں ٹُردا ڳیا اَتے اُوں گھر اُتے رُک ڳیا جِتھاں او ٻال ہا۔ 10تارے کُوں اُوں گھر اُتے رُکدا ݙیکھ کرائیں او ٻَہُوں خُش تھئے۔ 11اَتے اُوں گھر اِچ ڳئے اَتے ٻال کُوں اُوندی ماء مریم نال ݙِٹھا وَل اُنہیں جُھک کرائیں ٻال کُوں سِجدہ کیتا اَتے خزانے آلے ݙَٻئیں اِچوں سونا، مُر#2:11 مُر ایہ ہِک خُشبو دار ٻُوٹی جیرھی دوا کیتے استعمال تھِیندی ہَئی اَتے مُردے کُوں دفݨاوَݨ کیتے مَلیندے ہَن۔ اَتے لوبان دے تحفے کڈھیے اَتے اُونکُوں پیش کیتے۔ 12اَتے خاب اِچ ہیرودیس دو وَل نہ وَنڄن دی ہدایت مِلݨ تے او ٻے رَستے کنُوں اپݨے مُلک دو لڳے ڳئے۔
مِصر دو وَنڄن
13سیاݨئیں دے وَنڄن دے بعد خُداوند دے فرِشتے یُوسف کُوں خاب اِچ ݙِکھالی ݙے کرائیں آکھیا، ”اُٹھی ٻال اَتے اُوندی ماء کُوں نال گھِن کرائیں مِصر دے مُلک دو لڳا وَنڄ اَتے جݙّاں تَئیِں مَیں نہ ݙساواں اُتھائیں رہ وَنڄائے کیوں جو ہیرودیس اِیں ٻال دی ڳول اِچ ہے جو اِینکُوں مار گھتے۔“ 14ایہ سُݨ کرائیں او اُٹھی پِیا اَتے راتی رات اُوں ٻال اَتے اُوندی ماء کُوں نال گھِن کرائیں مِصر دے مُلک دو لڳا ڳیا۔ 15اَتے ہیرودیس دے مَرݨ تَئیِں اُتھائیں رہ ڳیا اِیں کیتے جو جیرھا کُجھ خُداوند اپݨے نبی دی راہِیں آکھیا ہا او پورا تِھیوے،
”مَیں اپݨے پُتر کُوں مِصر دے مُلک کنُوں سَݙیا۔“
ٻالیں دا قتل
16اِیندے بعد جݙّاں ہیرودیس ݙِٹھا جو سیاݨئیں میݙے نال چالاکی کیتی ہے اُونکُوں ٻَہُوں کاوڑ لڳی اَتے اُوں سپاہئیں کُوں حُکم ݙے کرائیں وستی بَیتلحم بھیڄیا اَتے اُوندی ساری سرحدیں اِچ اُنہیں سارے ٻالیں کُوں قتل کروا ݙِتا جیرھے سیاݨئیں دی تحقیق دے حساب نال ݙُو سال یا اِیں کنُوں نِکے ہَن۔ 17اِیویں او ڳالھ پوری تھئی جیرھی یرمیاہ نبی دی راہِیں آکھی ڳئی ہَئی،
18”وستی رامہ اِچ رووَݨ اَتے وَݙّے ماتم دیاں اَوازاں اَندیاں پَئیِن اَتے راخِل اپݨے ٻالیں کُوں روندی پَئی ہے اَتے ترسلّا نَئیِں کریندی کیوں جو ٻال مار ݙِتے ڳئین۔“
مِصر کنُوں وَل آوݨ
19جݙّاں ہیرودیس مَر ڳیا تاں خُداوند دے فرِشتے مِصر دے مُلک اِچ یُوسف کُوں خاب اِچ ݙِکھالی ݙے کرائیں آکھیا، 20”اُٹھی! اِیں ٻال اَتے اِیندی ماء کُوں نال گھِن کرائیں اِسرائیل دے مُلک دو وَل وَنڄ کیوں جو جیرھے اِیں ٻال کُوں جان کنُوں مارݨ چاہندے ہَن او مَر ڳئین۔“ 21ایہ سُݨ کرائیں او اُٹھی پِیا اَتے ٻال اَتے اُوندی ماء کُوں گھِن کرائیں بنی اِسرائیل دے مُلک اِچ وَل آیا۔ 22پَر جݙّاں اُوں سُݨیا جو اَرخلاؤس اپݨے پیِوُ ہیرودیس دی جاہ تے صوبہ یہُودیہ دا بادشاہ بݨ ڳئے تاں او اُتھاں وَنڄن کنُوں ݙَر ڳیا، وَل خاب اِچ اُونکُوں حُکم مِلیا اَتے او صوبہ گلِیل دے علاقے دو لڳا ڳیا۔ 23اَتے او ہِک شہر اِچ وَنڄ ریہا جیرھا ناصرت اَکھویندا ہَئی، اِیویں یِسُوع بارے نبیئیں دی ایہ ڳالھ پوری تھئی،
”او ناصری اَکھویسی۔“
Currently Selected:
متّی 2: سرائیکی
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
متّی دی راہِیں اِنجِیل
سرائیکی بولی اِچ
Gospel of Matthew in Common Saraiki (Test edition for limited distribution)
Copyright © 2023 The Pakistan Bible Society
All rights reserved Gospel of Matthew, in Common Saraiki (Test edition for limited distribution) Copyright © 2023 by The Pakistan Bible Society
Typesetting: CAP Department, Pakistan Bible Society
PUBLISHER: THE PAKISTAN BIBLE SOCIETY