San Mateo 13
13
Je̱'e̱ niipu̶ ijxpe̱jt
(Mc 4.1-9; Lc 8.4-8)
1Je̱'e̱ Mu̶'it xu̶u̶ je̱'e̱ Jesús jim choñ ma je̱'e̱ tu̶jku̶ñ, chi ñu̶kxy ma je̱'e̱ mejyu̶ñ y ñaxwech mejypya'a. 2Je̱' ko mayjya'ay janch nayñi'imugu̶u̶yu̶ ma je̱'e̱ Jesús najty yajpaadyu̶ñ, paady je̱'e̱ Jesús barcu̶jooty tyu̶gu̶u̶y y chi jiiby ñaxwech, y je̱'e̱ mayjya'ay mejypya'a najty je̱'e̱ ajku̶xy. 3Mu̶'it je̱'e̱ mayjya'ay yaj'u̶xpu̶jktu̶gu̶u̶y mu̶u̶d je̱'e̱ ijxpe̱jt ayuuk ka'anaagnáx.
Ñu̶maayu̶ ajku̶xy: “Du'un ja'ay tu'ug choñ niipu̶. 4Y ko je̱'e̱ tu̶u̶md wu̶jy, chi je̱'e̱ pyajk oy nije̱'e̱játy kya'ay mu̶jtu'ugujk, y chi je̱'e̱ joon myiiñ ajku̶xy y piiwu̶'ktaay je̱'e̱ tu̶u̶md ajku̶xy mu̶dyiibu̶ najty tu'ugujk tu̶ kya'ayu̶ñ. 5Nije̱' je̱'e̱ tu̶u̶md oy kya'ay tzaa'agujk ma je̱'e̱ naax najty we̱e̱nu̶ju̶ñ. Je̱'e̱ tu̶u̶md pe̱kyu̶ je̱'e̱ myujxy, je̱' ko je̱'e̱ naax najty ka'p myápxyu̶ch, 6peru̶ ko je̱'e̱ xu̶u̶ pyu̶dzu̶u̶my, chi je̱'e̱ tu̶u̶md no'ky, je̱' ko ka'p najty je̱'e̱ tyiktztu̶gu̶'u̶yñu̶ naaxjooty, chi tyu̶u̶ch. 7Nije̱' je̱'e̱ tu̶u̶md oy kya'ay eptyjyooty wu̶dzatzjooty, y ko je̱'e̱ epty wu̶dzatz yoondaaktaay, chi y'epty'e̱e̱my'o'ktaay. 8Peru̶ nije̱' je̱'e̱ tu̶u̶md oy kya'ay ma je̱'e̱ oyñaaxu̶ñ winja'atzkujk, y tyu̶u̶m'ajty may'eemby, nije̱'e̱játy tu'ugpu̶ tu̶u̶md mu̶go'px je̱'e̱ y'ijty, y ja'adu'ukpu̶ tu̶u̶md tu̶gu̶'px je̱'e̱ y'ijty, y nan je̱'e̱ ja'adu'ukpu̶ tu̶u̶md ipxmajk je̱'e̱ y'ijty. 9Pu̶njaty adaa ayuuk winju̶wu̶'u̶waamb, wan winju̶wu̶'u̶y.”
Tii je̱'e̱ ijxpe̱jt du'un ñigapxypy
(Mc 4.10-12; Lc 8.9-10)
10Chi je̱'e̱ discípulotu̶jk nimu̶jwa'kku̶xy je̱'e̱ Jesús y yajtu̶u̶gu̶xy tii je̱'e̱ ja'ay ko du'un yaj'u̶xpu̶jkku̶xy mu̶u̶d je̱'e̱ ijxpe̱jt ayuuk. 11Chi je̱'e̱ Jesús y'adzoowu̶ ajku̶xy: “Miich ajku̶xy Dios du'un xyajnejwu̶u̶ygyu̶xp je̱'e̱ yu'uchpyu̶ y'ane̱'e̱mu̶ñ kyu'utujku̶ñ; peru̶ yu̶'u̶ ka'p yu̶'u̶ mu̶baad nejwu̶u̶ygyu̶xy. 12Pu̶n tijaty mu̶u̶du̶ñ, jak'yajmo'owu̶p je̱'e̱ ni'igyu̶, y may je̱'e̱ mu̶u̶dádu̶ch; peru̶ je̱'e̱ mu̶dyiibu̶ ni tii ka'amu̶u̶du̶ñ, jaktimyajpú̶gu̶p je̱'e̱ ni'igyu̶ mu̶dyiibu̶ naty jya'amu̶u̶du̶ñ. 13Paadyu̶ch je̱'e̱ nyaj'u̶xpu̶jkku̶xy mu̶u̶d je̱'e̱ ijxpe̱jt ayuuk, je̱' ko windu̶kxp je̱'e̱ ajku̶xy, peru̶ ka'p y'ijxku̶xy; amdo'ijtp je̱'e̱ ajku̶xy, peru̶ ka'p myu̶doogu̶xy y ka'p winju̶wu̶u̶ygyu̶xy. 14Y je̱' je̱'e̱ du'un kyuydyuungu̶xypy neby je̱'e̱ Dios y'ayuuknajtzkapxu̶u̶ybyu̶ Isaías myu̶naañu̶ñ.
‘Oy du'uñdyu̶ jya'a''amdo'ijtku̶xu̶ch, ka'p winju̶wu̶u̶ygyu̶xu̶ch,
Oy du'uñdyu̶ jya'awindú̶kxku̶xu̶ch, ka'p y'ijxku̶xu̶ch.
15Je̱' ko adaa ja'ay ajku̶xy janch juuñ jyoot wyinma'añ yu̶'u̶ ajku̶xy
y aduky tyadzak yu̶'u̶ ajku̶xy
y nan wimbi'idz yu̶'u̶ ajku̶xy,
ka'pu̶ y'ijxku̶xu̶ch, y ka'pu̶ myu̶doogu̶xu̶ch,
y ka'pu̶ tii winju̶wu̶u̶ygyu̶xu̶ch;
nan ka'pu̶ jyootwimbijtku̶xu̶ch maa u̶u̶chu̶ñ,
y ka'pu̶ u̶u̶ch nyajtzo'ogu̶ch ajku̶xy.’
16“Peru̶ Jootkujk miich ajku̶xy, je̱' ko je̱'e̱ mwiin mmu̶dajtku̶xy mu̶dyiibu̶ mu̶u̶d m'ijxku̶xyu̶ñ y mdadzak mu̶dyiibu̶ mu̶u̶d mmu̶doogu̶xyu̶ñ. 17Janch tu̶y'ajtu̶ñ du'un nnu̶maaygyu̶xy ko may je̱'e̱ Dios y'ayuuknajtzkapxu̶u̶ybyu̶du̶jk y je̱'e̱ oyjya'aydyu̶jk adaa ja'a'ixaañ ajku̶xy mu̶dyiibu̶ yam miich m'ijxku̶xypyu̶ñ, y ka'p ijxy ajku̶xy; jya'amu̶dowaan adaa ajku̶xy mu̶dyiibu̶ yam miich mmu̶doogu̶xypyu̶ñ, y ka'p mu̶dooy ajku̶xy.
Jesús kapxtu̶y je̱'e̱ niipu̶ ijxpe̱jt
(Mc 4.13-20; Lc 8.11-15)
18“Ok'amdo'ijtku̶x neby je̱'e̱ niipu̶ ijxpe̱jt wyimbu̶dzu̶myu̶ñ. 19Pu̶njaty je̱'e̱ Dios y'ayuuk mu̶doogu̶xpu̶ñ neby je̱'e̱ Dios y'ane'emyu̶ñ y ka'p winju̶wu̶u̶ygyu̶xy, du'un je̱'e̱ ajku̶xy neby je̱'e̱ tu̶u̶md mu̶dyiibu̶ tu'ugujk ka'awu̶ñ, chi je̱'e̱ ka'a'óybyu̶ ñimiinu̶gu̶xyu̶ y yajpu̶dzu̶u̶mdaayu̶xu̶ je̱'e̱ Dios y'ayuuk mu̶dyiibu̶ naty tu̶ yajni'iby ma je̱'e̱ jyoot wyinma'añ ajku̶xyu̶ñ. 20Je̱'e̱ tu̶u̶md mu̶dyiibu̶ tzaa'agujk ka'awu̶ñ, je̱' je̱'e̱ ajku̶xy mu̶dyiibu̶ mu̶doogu̶xpu̶ñ je̱'e̱ Dios y'ayuuk y chi ku'ubu̶jkku̶xy agujk jootkujk, 21peru̶ je̱' ko ka'p je̱'e̱ may tyiktztu̶gu̶'u̶yñu̶ ajku̶xy, ka'p je̱'e̱ oy tu'ug'aa tu'ugjoot mu̶bu̶jkku̶xy; chi je̱'e̱ Dios y'ayuuk u̶xmajtzku̶xnu̶ ko je̱'e̱ win'u̶u̶mbu̶ agapxu̶u̶byu̶ paatku̶xy o ko yaj'u̶xwu̶dijt yajpawu̶dijtku̶xy mu̶u̶d je̱'e̱ Dios y'ayuuk kyu̶xpu̶. 22Je̱'e̱ tu̶u̶md mu̶dyiibu̶ eptyjyooty wu̶dzatzjooty ka'awu̶ñ, je̱' je̱'e̱ ajku̶xy mu̶dyiibu̶ mu̶doogu̶xpu̶ñ je̱'e̱ Dios y'ayuuk, peru̶ je̱'e̱ ajuy adogu̶u̶ je̱'e̱ je'eyu̶ y'aa'ajtypy jyoot'ajtypy ajku̶xy mu̶dyiibu̶ ya yajpaatp ma adayaaba naaxwiiñu̶ñ y je̱'e̱ kumeeñ'adu̶u̶ je̱'e̱ janch jootmé̱tzu̶gu̶xp. Y ku̶xyu̶ adaa du'umbu̶ je̱'e̱ Dios y'ayuuk yajtu̶gooygyu̶xp ma je̱'e̱ ja'ay ajku̶xyu̶ñ, ka'p je̱'e̱ Dios y'ayuuk yajmayu̶'u̶y. 23Peru̶ je̱'e̱ tu̶u̶md mu̶dyiibu̶ ka'awu̶ñ ma je̱'e̱ oyñaaxu̶ñ winja'atzkujk, je̱' je̱'e̱ ajku̶xy mu̶dyiibu̶ je̱'e̱ Dios y'ayuuk mu̶doogu̶xpu̶ñ y winju̶wu̶u̶ygyu̶xy y mayu̶u̶by je̱'e̱ Dios y'ayuuk du'un ma je̱'e̱ jyoot wyinma'añ ajku̶xyu̶ñ. Du'un je̱'e̱ nije̱' ajku̶xy neby je̱'e̱ tu'ukpu̶ tu̶u̶md mu̶dyiibu̶ mu̶go'px ijtu̶ñ, nije̱' du'un neby je̱'e̱ mu̶dyiibu̶ tu̶gu̶'px ijtu̶ñ, y nije̱' du'un neby je̱'e̱ mu̶dyiibu̶ ipxmajk ijtu̶ñ.”
Je̱'e̱ ju̶bu̶k ujtz ijxpe̱jt ma je̱'e̱ trigo kamu̶ñ
24Chi je̱'e̱ Jesús adayaaba ijxpe̱jt ayuuk ja'adu'ook yajmu̶dmu̶dyaaku̶ ajku̶xy: “Je̱'e̱ Dios y'ane̱'e̱mu̶ñ du'un je̱' neby je̱'e̱ ja'ay tu'ug niipyu̶ñ je̱'e̱ oydyu̶u̶md ma je̱'e̱ kyamu̶ñ; 25y ko najty nigu̶xyu̶ myaagu̶xnu̶, chi je̱'e̱ myu̶dzip jya'ty oy je̱'e̱ ju̶bu̶k ujtz ni'iby trigojooty y chi ñu̶kxnu̶. 26Ko je̱'e̱ trigo yoondaaktaay, chi xyijty, nan yoondaak je̱'e̱ ju̶bu̶k ujtz nandu'un. 27Mu̶'it je̱'e̱ tuumbu̶du̶jk je̱'e̱ kugam oy nu̶maaygyu̶xy: ‘Windzú̶n, ¿nej ka'p je̱'e̱ tu̶u̶md najty y'oydyu̶u̶mdu̶ch mu̶dyiibu̶ miich mniipu̶ñ ma je̱'e̱ mgamu̶ñ? ¿Y ma je̱'e̱ ju̶bu̶k ujtz du'un tu̶ chooñ?’ 28Chi je̱'e̱ kugam ñu̶maayu̶ ajku̶xy: ‘Je̱'e̱ nmu̶dzípu̶ch da'a du'un tu̶ y'adu̶'u̶ch.’ Chi je̱'e̱ tuumbu̶du̶jk je̱'e̱ kugam yajtu̶u̶gu̶xy: ‘¿Nej mdzojkypy miich ko u̶u̶ch je̱'e̱ ju̶bu̶k ujtz nu̶kxy nwijxu̶'ktaaygyu̶xyu̶?’ 29Chi je̱'e̱ kugam ñu̶maayu̶ ajku̶xy: ‘Ka'p, je̱' ko je̱'e̱ trigo nu̶kxy nandu'un mwijxku̶xy ko naty je̱'e̱ ju̶bu̶k ujtz mwijxku̶xy. 30Wan ity, wan kipxy ye̱jkku̶xy u̶xtu̶ koonu̶ je̱'e̱ tiempo paadu̶ch mu̶naa pyu̶du̶'u̶gu̶chu̶ñ, mu̶'it u̶u̶ch je̱'e̱ nduumbu̶du̶jk ngue̱xa'añ ko je̱'e̱ ju̶bu̶k ujtz wan jayu̶jp yajpu̶du̶'kku̶xy; pu̶daakku̶xu̶ch abu̶kyjyaty y axojtzku̶xu̶ch tu'kmachjáty, chiiju̶tz no'kku̶xu̶ch, y mu̶'íttu̶tz je̱'e̱ trigo ni'imajtzku̶xu̶ch y chi pu̶daakku̶xu̶ch ma u̶u̶ch je̱'e̱ ndze̱'e̱xu̶ñ.’ ”
Je̱'e̱ mostazu̶ pajk ijxpe̱jt
(Mc 4.30-32; Lc 13.18-19)
31Chi je̱'e̱ Jesús adayaaba ijxpe̱jt ayuuk nandu'un yajmu̶dmu̶dyaaku̶ ajku̶xy: “Je̱'e̱ Dios y'ane̱'e̱mu̶ñ du'un je̱' neby je̱'e̱ mostazu̶ pajk mu̶dyiibu̶ je̱'e̱ ja'ay tu'ug ñiipy ma je̱'e̱ kyamu̶ñ. 32Je̱'e̱ mostazu̶ pajk janch mutzk je̱' ka'p du'un ni mu̶dyiibu̶ ujtzpajku̶ñu̶ba; peru̶ ko yeegy chi myu̶jju̶'u̶y ka'p du'un ni mu̶dyiibu̶ ujtzu̶ñu̶ba, y yeegy janch mu̶j neby je̱'e̱ mu̶jképyu̶ñ, y chi je̱'e̱ joon muuxy jim pye̱'e̱ngu̶xy y'amaagu̶xy ma je̱'e̱ y'aakxu̶ñ.”
Je̱'e̱ levaduru̶ ijxpe̱jt
(Lc 13.20-21)
33Nan yajmu̶dmu̶dyaaku̶ adayaaba ijxpe̱jt ayuuk ajku̶xy: “Je̱'e̱ Dios y'ane̱'e̱mu̶ñ du'un je̱' neby je̱'e̱ levaduru̶ mu̶dyiibu̶ je̱'e̱ to'oxyu̶jk tu'ug tyijwu̶dijtypyu̶ñ mu̶u̶d tu̶gu̶u̶g kipxu̶'u̶ñ je̱'e̱ hariina, ko naty je̱'e̱ hariina oy yajpu̶du̶'u̶ga'añ.”
Neby je̱'e̱ Jesús najty yekyu̶ñ je̱'e̱ ijxpe̱jt ayuuk
(Mc 4.33-34)
34Du'un je̱'e̱ Jesús je̱'e̱ mayjya'ay yaj'u̶xpu̶jky mu̶u̶d je̱'e̱ ijxpe̱jt ayuuk, y ka'p najty du'uñyu̶ yaj'u̶xpú̶ky ajku̶xy, agu̶ ijxpe̱jt ayuuk najty yaj'u̶xpu̶jkku̶xypy. 35Adaa paady adaa du'un tyuunu̶ jyajtu̶ wan du'un yajkuydyúnu̶ch neby je̱'e̱ Dios y'ayuuknajtzkapxu̶u̶ybyu̶ myu̶naañu̶ñ:
“Kapxaambu̶ch y agu̶ ijxpe̱jt ayuuk u̶u̶ch nyajtúnu̶py;
nigapxe̱e̱mbyu̶ch tijaty mu̶dyiibu̶ yu'uch tu̶ y'ityu̶ñ
maabu̶ je̱'e̱ Dios naaxwiiñ yajkojyu̶ñ.”
Jesús kapxtu̶y je̱'e̱ ju̶bu̶k ujtz ijxpe̱jt ma je̱'e̱ trigo kamu̶ñ
36Mu̶'it je̱'e̱ Jesús je̱'e̱ mayjya'ay u̶xke̱jxnu̶ y chi tyu̶jktu̶gu̶u̶y. Chi je̱'e̱ dyiscípulotu̶jk ñimiinu̶ ajku̶xy y ñu̶maayu̶gu̶xy ko wan kapxtu̶u̶wu̶xyu̶ ajku̶xy je̱'e̱ ju̶bu̶k ujtz ijxpe̱jt ma je̱'e̱ kamu̶ñ. 37Chi je̱'e̱ Jesús y'adzoowu̶ ajku̶xy: “Je̱'e̱ mu̶dyiibu̶ je̱'e̱ oydyu̶u̶md niip, u̶u̶ch je̱' je̱'e̱ ja'ay mu̶dyiibu̶ tzon tzajpjooty, 38y je̱'e̱ kam je̱' je̱'e̱ naaxwiiñ. Je̱'e̱ oydyu̶u̶md je̱' je̱'e̱ ajku̶xy mu̶dyiibu̶ je̱'e̱ Dios y'ane̱'e̱mu̶ñ ku'ubu̶jkku̶xpu̶ñ y je̱'e̱ ju̶bu̶k ujtz je̱' je̱'e̱ ajku̶xy mu̶dyiibu̶ je̱'e̱ ka'a'óybyu̶ y'ane̱'e̱mu̶ñ ku'ubu̶jkku̶xpu̶ñ, 39y je̱'e̱ mu̶dzip mu̶dyiibu̶ je̱'e̱ ju̶bu̶k ujtz niipu̶ñ, je̱'e̱ mu̶jku'u je̱'. Y mu̶naa je̱'e̱ pu̶da'aky pyu̶du̶'knu̶chu̶ñ, je̱'e̱ tiempo je̱' mu̶naa je̱'e̱ naaxwiimbu̶ kyu̶x tyu̶goyaanu̶ju̶ñ, y je̱'e̱ mu̶dyiibu̶ je̱'e̱ pu̶da'aky yajpu̶du̶'kku̶xpu̶ñ, je̱'e̱ ángelestu̶jk je̱'e̱ ajku̶xy. 40Du'un neby je̱'e̱ ju̶bu̶k ujtz yajwíxyu̶ñ y yajpu̶da'agy ju̶u̶njooty wan tyóyu̶ch, nandu'un tyuna'añyii jyada'añyii mu̶naa je̱'e̱ naaxwiimbu̶ kyu̶xaan tyu̶goyaanu̶ju̶ñ. 41Mu̶'it u̶u̶ch, u̶u̶ch je̱' je̱'e̱ ja'ay mu̶dyiibu̶ tzon tzajpjooty, je̱'e̱ n'ángelestu̶jk ngué̱xu̶chu̶ch ma u̶u̶ch n'ane'emyu̶ñ wan je̱'e̱ ja'ay ku̶xyu̶ yajmujkta'awu̶ch mu̶dyiijáty je̱'e̱ wiingpu̶ myu̶gu'ugtu̶jk yajtuundu̶gooygyu̶xpu̶ñ, y je̱'e̱ mu̶dyiibu̶ je̱'e̱ ju̶bu̶kpu̶ tuungu̶xpu̶ñ. 42Chi jiiby mu̶jju̶u̶njooty pu̶daakku̶xu̶ch, y jiiby jyu̶u̶ygyu̶xu̶ch yaaxku̶xu̶ch y tyu̶u̶tzké̱tku̶xu̶ch. 43Mu̶'it je̱'e̱ mu̶dyiibu̶ du'un kuydyuungu̶xpu̶ñ neby je̱'e̱ Dios tzokyu̶ñ, je̱'e̱ oy'ajtu̶ñ jiiby paatku̶xu̶ch ma je̱'e̱ Dios Teedy y'ane̱'e̱mu̶ñ mu̶u̶du̶chu̶ñ, du'un neby je̱'e̱ xu̶u̶ y'adu̶kxy y'a''áñu̶ñ. Pu̶njaty adaa ayuuk winju̶wu̶'u̶waamb, wan winju̶wu̶'u̶y.
Je̱'e̱ yu'uchpyu̶ meeñ ijxpe̱jt
44“Je̱'e̱ Dios y'ane̱'e̱mu̶ñ du'un je̱' neby je̱'e̱ meeñ mu̶dyiibu̶ yu'uch ijtp taju̶'u̶y ma tu'ug kamu̶ñ. Chi je̱'e̱ ja'ay tu'ug paady je̱'e̱ meeñ taju̶'u̶byu̶, y chi jimyu̶ yu'tznu̶ba; chi xyoñ y'ity y ñu̶kxy; nu̶kxy ku̶xyu̶ tijaty tokta'ay tijaty myu̶dajtypyu̶ñ, y chi je̱'e̱ kam juy ma je̱'e̱ meeñ taju̶'u̶y tu̶ paadyu̶ñ.
Je̱'e̱ tzoowu̶ba perla tzaa ijxpe̱jt
45“Je̱'e̱ Dios y'ane̱'e̱mu̶ñ du'un je̱' nandu'un neby je̱'e̱ ja'ay ajuubyu̶ adókpu̶ju̶ñ mu̶dyiibu̶ je̱'e̱ janch'oybyu̶ perla tzaa u̶xtaaybyu̶ñ, 46y ko tu'ug paady mu̶dyiibu̶ janch tzoowu̶ju̶ñ chi ñu̶kxy ku̶xyu̶ tijaty tokta'ay tijaty myu̶dajtypyu̶ñ, y chi je̱'e̱ janch'oybyu̶ perla tzaa juy.
Je̱'e̱ ku'uju̶bijptzaay ijxpe̱jt
47“Je̱'e̱ Dios y'ane̱'e̱mu̶ñ du'un je̱' nandu'un neby je̱'e̱ ku'uju̶bijptzaay mu̶dyiibu̶ mejyjyooty yajpu̶daakpu̶ñ, chi je̱'e̱ keeby akx jiiby mayñax kyu'u'adúky. 48Y ko je̱'e̱ ku'uju̶bijptzaay y'uch, chi je̱'e̱ ku'uju̶bijpu̶du̶jk je̱'e̱ ku'uju̶bijptzaay mejypya'a yajnú̶kxku̶xy, mu̶naaxwé̱tzku̶xy jim; cham je̱'e̱ akx winbiigu̶xy y pu̶daakku̶xy je̱'e̱ oyjyatypyu̶ keeby akx kachjooty y u̶xxijtku̶xy je̱'e̱ ka'pu̶ y'oyjyátyu̶ch. 49Timydyu'un nandu'un tyuna'añyii jyada'añyii mu̶naa je̱'e̱ naaxwiimbu̶ kyu̶xaan tyu̶goyaanu̶ju̶ñ: pu̶dzu̶u̶mgu̶xu̶p je̱'e̱ ángelestu̶jk ko naty je̱'e̱ ju̶bu̶kja'aydyu̶jk abu̶ky pu̶da'agaangu̶xy y ko naty je̱'e̱ oyjya'aydyu̶jk abu̶ky pu̶da'agaangu̶xy, 50y chi je̱'e̱ ju̶bu̶kja'aydyu̶jk jiiby mu̶jju̶u̶njooty pu̶daakku̶xu̶ch, y jiiby jyu̶u̶ygyu̶xu̶ch yaaxku̶xu̶ch y tyu̶u̶tzké̱tku̶xu̶ch.”
Je̱'e̱ ja'ay mu̶dyiibu̶ jajtp neby je̱'e̱ jembyu̶ y je̱'e̱ tukpu̶ yajpu̶dzú̶mu̶chu̶ñ
51Mu̶'it je̱'e̱ Jesús yajtu̶u̶wu̶ ajku̶xy:
—¿Mwinju̶wu̶u̶ygyu̶xypy adayaaba ku̶xyu̶ ajku̶xyu̶?
—Chi je̱' y'adzoogu̶xy: —du'un Windzú̶n.
52Mu̶'it je̱'e̱ Jesús ñu̶maayu̶ ajku̶xy:
—Ko je̱'e̱ Dios y'ane̱'e̱mu̶ñ windzú̶n tu'ug ni'u̶xpu̶gu̶'u̶y neby je̱'e̱ Dios y'ane'emyu̶ñ, tu'knaxu̶u̶by je̱'e̱ du'un neby je̱'e̱ kudu̶jk tu'ugu̶ñ, ko ku̶xyu̶ tijaty pu̶gu̶'u̶gy myu̶dajtypyu̶ñ, jyajtypy je̱' neby je̱'e̱ jembyu̶ y je̱'e̱ tukpu̶ yajpu̶dzú̶mu̶chu̶ñ.
Jesús yajpaady jim Nazaret
(Mc 6.1-6; Lc 4.16-30)
53Ko je̱'e̱ Jesús adayaaba ijxpe̱jt ayuuk yaj'u̶xpu̶jktaay, chi jim choñ, 54oy jya'ady ma je̱'e̱ kyu̶'u̶mgajptu̶ñ. Chi jim yaj'u̶xpu̶jktu̶gu̶u̶y ma je̱'e̱ judío ja'ay ñaymyujktaakt ajku̶xyu̶ñ mu̶dyiibu̶ najty jimu̶ñ. Je̱'e̱ ja'ay yajnú̶kx yajju̶wu̶u̶ygyu̶xypy je̱'e̱ najty, cham myu̶naangu̶xy:
—¿Ma adayaaba ja'ay du'un tu̶ ni'u̶xpu̶gu̶'u̶y ku̶xyu̶ mu̶dyiijáty jyajtypyu̶ñ? ¿Neby du'un jaty neby je̱'e̱ mu̶jwinma'añ túnu̶chu̶ñ? 55¿Nej ka'p adaa jye̱'e̱ju̶ch je̱'e̱ tze̱jtzpu̶ y'ung y je̱'e̱ mu̶dyiibu̶ je̱'e̱ María taj'ajtpu̶ñ? ¿Nej ka'p je̱'e̱ Santiago pyuya'ay, je̱'e̱ José pyuya'ay, je̱'e̱ Simón pyuya'ay y je̱'e̱ Judas pyuya'ay, 56y nej ka'p yu̶'u̶ pyudo'oxy yaa nandu'un tzu̶naaygyu̶xp ma yaa u̶u̶ch ajtu̶m ajku̶xyu̶ñ? ¿Ma adaa du'un ku̶xyu̶ tu̶ yajtzooñ?
57Paady je̱'e̱ Jesús ka'p kweentu̶tuuñ ajku̶xy. Peru̶ chi je̱'e̱ Jesús ñu̶maayu̶ ajku̶xy:
—Wan ma'eembyu̶ch yajmu̶j'ajtu̶p je̱'e̱ Dios y'ayuuknajtzkapxu̶u̶ybyu̶, peru̶ ma je̱'e̱ kyu̶'u̶mnaax kyu̶'u̶mgajptu̶ñ y ma je̱'e̱ kyu̶'u̶mju̶u̶n kyu̶'u̶mdu̶jku̶ñ ka'p je̱'e̱ pu̶n yajmu̶j'adyii.
58Y ka'p je̱'e̱ Jesús je̱'e̱ mu̶jwinma'añ jim may tuuñ, je̱' ko je̱'e̱ jimbu̶ ja'ay y'ayuuk najty ka'p myu̶bu̶jkku̶xyu̶.
Currently Selected:
San Mateo 13: MIXE
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005