1Mos. 9
9
Palelengan Taikamanua pasamba si Noak
1Taikamanua masisukatnake si Noak samba tatogania samba kuanangan, “Pupunuteteu simaigi, bule reddenannu masikudduiji sangliot polak. 2Sangamberi uma' samba iba, samba leu tarimeu bagei maloto te geti katum. Sangamberitra ai kabagat kupkumennu. 3Sangamberinia nenda momoi ibailiu komennu, kele leuet se'se simalimun; sangamberinia nenda Kuake katubum addeat ibailiu komennu. 4#3Mos. 7:26-27, 17:10-14, 19:26; 5Mos. 12:16, 23, 15:23 Sarat sara le ta'momoi nukom iate akkula aipeile logaunia, aipoi enga nenda ai kabagat logau. 5Senen sirimanua samba tarimeu simateiake sirimanua Kuukum matei geti. 6#1Mos. 1:26; 2Mos. 20:13 Sirimanua tugalai kele Aku; aipoi nenda, kasei simateiake sirimanua, imamateiake leuetnia sirimanua. 7Oo, buita mupunuteteu le ekeu simigi, bule sapunuteteunu masikudduiji sangaliot polak.”
8Kuanangan Taikamanua kai Noak samba ka tatogania, 9“Kineigei Kugalai le palelenganKu pasamba ekeu samba sapunuteteunu, 10samba sangamberi sipungongoingoi, iate uma' samba sangamberi tarimeu kapolak, sangamberinia sibebela ka kinapat nenda pasamba ekeu. 11Nene te palelenganKu pasamba ekeu. Mupalelengan le Aku, sangamberi sipungongoingoi taan isusubuake geti eba minca. Taan babara geti minca eba sisubuake polak nene. 12Sibailiu toggaiat palelengan sitaimasususu', sigalaiKu pasamba ekeu samba sangamberi sipungongoingoi, 13Kugalakngake le linungKu ka manua sibailiu toggaiat palelenganKu pasamba polak. 14Senen-senen, ke'Kupetpet manua pasamba tanai rusa, iageti makoinongnangan linu nenda, 15Kurepdep le geti palelenganKu katubum samba katubut sangamberi sipungongoingoi, iate eba taan masisusubuake geti minca sangamberi sipuririmanua. 16Ke'bai matoila linu nenda ka manua, Kuitco te geti nia samba Kurepdep le palelengan sitaimasususu' nenda katalagat Aku samba sangamberi sipungongoingoi ka polak. 17Nenda te toggaiat palelenganKu siakeKu katubut sangamberi sipungongoingoi ka polak.”
Si Noak samba tatogania
18Tatogat Noak sibebela ka kinapat iate si Sem, Jafet samba Ham; (si Ham iate ukkui Kanaan.) 19Katelu togat Noak nenda iate taikebbukatda sangamberi sirimanua ka polak.
20Si Noak sara sipumomone, samba nia te sipuboiki amasigalai monen anggur. 21Lepat ai lo anggurnia, roronangannia. Goloknangan sangamberi bibiletnia lepa perepnia sibulutut kabagat sapounia. 22Kele ai itconia si Ham ukkui Kanaan, ukkuinia mubulutut, belania samba paagainangan pagalaiat nenda katubut karua sasarainania. 23Lepa alanangan si Sem samba si Jafet sara juba samba nganangakenangannia ka ta'ta'ra. Puenungrangan sisoksok masiguruki sapou nenda samba tabborangan ukkuira pasaba juba nenda. Pisikngakerangan matatra bule ta'raitco ukkuira simabulutut nenda. 24Lepat aiagainia si Noak barania ka roronia samba aiagai apa sigalaiakenen togania sisule katubunia, 25kuanangan,
“Tutelei le si Kanaan!
Ibailiu le nia geti pakoinien loloijet ka sasarainania.
26Umun le si Tuhan, Taikamanuan Sem!
Si Kanaan ibailiu le geti pakoinien Sem.
27Bule Taikamanua masituppai panukanan kai Jafet pasamba masipalio pukudduatnia.
Bule punuteteunia mukuddu pasamba punuteteu Sem.
Kanaan ibailiu le geti pakoinien Jafet.”
28Lepat eba nenda si Noak murimanua peilenia minca telungotu lima pulu ngarura. 29Aitata' si Noak kateteret ainia sibangotu lima pulu ngarura.
Currently Selected:
1Mos. 9: MWV
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo