Markus 12
12
Mony pung taek tahz sraakz seu pit
(Matthe 21:33-46, Lukas 20:9-19)
1Yesuhz leh mony pung taek lao keuh nahz, “Maang ihz hawkz peuk seumz sraakz seu pit, lawm mok khaehz sraakz, kawngz lu ti teur niat plaehz seu pit, cih tang khrengz pao, samz khaatz aez ihz nahz lan prih ihz. 2Meuz kraao plaehz a wa sinz ne, hnhz plawiz kuanz leng daehz hawkz, cao lan seutz langz khaatz sraakz, tawz ihz khaatz sraakz ne. 3Ihz khaatz sraakz keui, mat tiz kuanz leng hnhz plawiz weng toz maat. 4Waaiz an diz, hnhz plawiz lan kuanz leng thaengz hawkz kaw ihz khaatz sraakz keui tiz kingz hnhz cih aez hnhz keu sehz, plawiz weng. 5Tahz sraakz kaw plawiz lan kuanz leng thaengz hawkz ne keuh piamz thengz hnhz. Plawiz lan kuanz leng heungz baaiz kaw teur ka keuh tiz, teur ka keuh piamz thengz. 6Tahz sraakz an diz maang kuanz hawkz an daehz yaw. Hnhz daz, ‘keuh te nap suamz boh kuanz ohz,’ daz ceun ni rae plawiz kuanz daehz lan thaz puatz ihz. 7Keuiz daz, ihz khaatz sraakz keui daz, ‘Hnhz an ni naeh ihz ngaz bawnz caam a moi, teur aacz daehz truz raez, piamz thengz hnhz. Beuk cih ceun diz, a moi an hnhz trohz bawnz ne penz khangz ehz.’ 8Keuh kaw piamz thengz hnhz mok thaz nawk khaehz sraakz.”
9Yesuhz maanyz keuh, “Beuk naeh ceun diz, tahz sraakz ne ngaz cih seu naez? Hnhz truz piamz thengz ihz khaatz sraakz keui rae ngaz khaatz aez ihz nahz sraakz ne boh. 10Pehz maat ti bawnz rawz tuhz kyaamz lik haz?
Reu aangz an ihz mok thengz meuz cih kaang ne
mial sapz tawz seu dukz thaz cawkz boh.
11An ni naeh lawng Phraz Cen Cen cih,
naeh lawng rak seum sangz aacz ngaai ehz.”#Ngawk 118:22-23
12Ihz peur aacz Yio keui kaw kyaam mat Hnhz, kawp daz Hnhz krai mony pung taek an ni ne sunz phaat sapz keuh. Keuiz daz, keuh mok thengz Yesuhz, kawp daz keuh doz wungz ihz keu diz.
Lawng thaamz khawn
(Matthe 22:15-22, Lukas 20:20-26)
13Ihz peur aacz Yio keui cao Pharise teur ka boh ihz Herot teur ka plawiz lan cu Yesuhz, aez daehz caang dakz khahz reung dengz kawi kaai mony reu ma Hnhz. 14Keuh lan cu Hnhz daz, “Tahz Sra, ehz mas boh Mih naeh ihz seu taehz seu wa, nam doz yaeh, nam thawk taw yaeh, sawnz aez reung dengz Phraz Pen Caoh an anz keui. An ehz thaamz khawn ne anz tawiz traz Yio haz?
15Khawn khunz longz Caesar prih Rom ne anz ehz bawnz thaamz haz, nam haz?” Yesuhz mas keuh caam yawt Daehz rae daz keuh nahz, “Cih naehz pehz sunz ceu dakz mony reu ma Ohz a? Plaez Ohz nahz ron denarius seu khlaepz luz, aez Ohz yawt.”
16Keuh leh truz aez hawkz rae Hnhz kaw maanyz, “Kaai paekz an ni naeh raang yaeh, mus yaeh?”
Keuh tawpz daz, “Naeh khunz Caesar.”
17Yesuhz kaw daz, “Khangz khunz kaw aez mial khunz, khangz Phraz kaw aez mial Phraz.” Keuh kaw teur aacz daehz sangz Yesuhz.
Lawng meu rae imz
(Matthe 22:23-33, Lukas 20:27-40)
18Saduse, an naeh ihz an nam yum lawng meu rae imz keui truz cu Tahz Yesuh daz, 19“Tahz Sra, Moses taemz mok aez ehz nahz, ‘Ihz leh yah nam maang kuanz yam lan ne, seum bohz keur meh hnhz samz bawnz leh mial mawm daehz, aez maang kuanz, yak aez ceu kheuz mai daehz dutz,’ da. 20Maang kuanz mai keur meh pulz. Mai mawh keuh leh yah maat maang kuanz, samz a wa yam. 21Seum bohz kapz hnhz leh mial mawm daehz, maat maang kuanz kaw yam thaengz. Seum bohz kapz hnhz samz siupz leh thaengz kaw yam boh leun. 22Hawkz yam hawkz siupz leh kaw keuh kuanz mai teu pulz ne yam hacz aamz. Keuiz daz nam maang an nae maang kuanz. Thaz puatz dutz, keun nyah an diz kaw yam. 23Kraao meu rae imz ne keun nyah an diz samz penz yah yaeh? Keuh kuanz mai teu pulz ne a wa penz hacz tahz hnhz.”
24Yesuhz tawpz keuh nahz, “Pehz a wa pleung kawp daz pehz nam mas kyaamz lik tang taanz khoz Phraz Pen Caoh. 25Meuz meu rae imz ne nam maang yaeh leh tahz leh yah leui, naeh ceun teu maan kaang raaoz boh. 26Pehz nam ti bawnz rawz tuhz kyaamz Moses haz? Lawng yam meu rae imz ne, Phraz Pen Caoh lao Moses kaai yum khaehz kat ne daz, ‘Ohz naeh Phraz Abraham, Phraz Isaac boh Phraz Yakop,’ 27Hnhz naeh Phraz ihz imz, nam anz Phraz ihz yam. Kawp ceun ni rae pehz a wa pleung heungz baaiz.”
Yesuhz sawnz aez sinz an myaat lak ihz
(Matthe 22:34-40, Lukas 10:25-28)
28Maang ihz mawz kyaamz hawkz, hnhz ngarz meuz Yesuhz boh Saduse keui teur thiangz daehz. Hnhz mas Yesuhz mawz lao baaiz, sitz kut cu maanyz Hnhz, “Tuhz sinz ne an nae myaat lak ihz?”
29Yesuhz kaw daz, “Teuk ngarz raez, kheuz Israel keui. Tahz ehz an naeh Phraz Cen Cen ne, naeh Phraz Pen Caoh taw seu su pan. 30Mih leh kingz keu nuasz hacz aamz, khuanz hacz aamz, phawmz hacz aamz, keum rang hacz aamz rak Phraz Cen Cen daehz.#Deuteronomi 6:4-5 31Sinz kaai keu aarz samz, rak ihz an naeh rim daehz ceun mih rak toz daehz.#Levitikus 19:18 Mawh lak sinz kaar ni nam maang sinz naehz leui.”
32Ihz mawz kyaamz kaw daz, “A wa tawz baaiz Tahz Sra, Mih a wa lao an trohz keui, Phraz Pen Caoh naeh taw hawkz pan. Neuz lak Hnhz nam maang thaengz phraz leui. 33Mih leh kingz keu nuasz hacz aamz, nyaan hacz aamz, khuanz hacz aamz, keum rang hacz aamz rae rak Phraz Pen Caoh daehz. Rak ihz an naeh rim daehz ceun mih rak toz daehz. Sinz aarz senz an ni, myaat lak toz pukz caw an tucz klawhz meoz da.”
34Yesuhz mas hnhz mawz tawpz baaiz, mial daz hnhz nahz, “Mih nam yaan prih Phraz Pen Caoh leui.”
Waaiz an diz, nam maang yaeh yaak maanyz thaengz Hnhz.
Tahz Khris mawh lak khunz Dawit
(Matthe 22:41-46, Lukas 20:41-44)
35Meuz Yesuhz sawnz aez boh tuhz wat ne, Hnhz maanyz, “Kawp naehz, ihz mawz kyaamz keui lao mok Tahz Khris naeh kuanz khunz Dawit a? 36Kawp peu Khuanz Seu Ngamz Phraz lao khunz Dawit rae hnhz daz,
‘Phraz Cen Cen lao Tahz ehz nahz,
keu dez thaz takz kaaiz Ohz raez,
thonz taw Ohz leh ihz an kawi Mih keui tam mok ti tam cawng Mih.’#Ngawk 110:1
37Toz khunz Dawit raak Tahz Khris naeh Tahz daehz kaw Tahz Khris cih seu naez penz kuanz Dawit hoh?”
Yesuhz cao ihz wiar ihz mawz kyaamz
(Matthe 23:1-36, Lukas 20:45-47)
Wungz ihz heungz keui seuz phawmz teuk ngarz mony reu ma Hnhz. 38Yesuhz siupz sawnz lan thaengz, “Seu tih ihz mawz kyaamz keui raez. Keuh song seu kaeng hanz, khahz lan aarz diz, dawhz ihz tak daehz, seumz daehz, aez ihz ro se daehz tawiz teur laas. 39Dawhz ti keu dez trawng tawiz pawiz, tawiz crawp keui. 40Keuh rimz leh kreung kaang yah keu maaiz, suz tawngz aez ihz nahz hanz hanz seuk cih daehz naeh ceun ihz rak. Kawp ceun diz, keuh ngaz talz taam keu can lak ihz.”
Yesuhz lupz an yah keu maaiz lu
(Lukas 21:1-4)
41Meuz Yesuhz keu dez aacz ngaai teuk paekz lu tuhz wat ne, Hnhz yawt ihz sapz paekz lu. Ihz maang keui sapz heungz baaiz. 42Keuiz daz yah keu maaiz an phaanz samz sapz paekz tawng aarz khlaepz taan seu metz paez ne. 43Hnhz raak leh teu paez Daehz daz, “Ohz daz mawn pehz nahz, yah keu maaiz an phaanz ne sapz heungz lak ihz. 44Kawp daz ihz maang keui leh sapz taw teur nyaenz pan kaai daehz maang. Keuiz daz yah keu maaiz samz sapz hacz aamz seu hnhz maang an lo damz toz daehz.”
Currently Selected:
Markus 12: ril
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2022, Wycliffe Bible Translators, Inc. All rights reserved.