Wïlöölö 4
4
Luum Keen Ki Eebel
1Køøre Adam aci baŋ cïïe ma Iip, ni jït yie ki dhaanhø ni nywøl Keen, ni kö Iipi, ni «Aana jïtö ki nyilaal ma dïcwøø ki baŋ Wuuö Jwøk.» 2Ni cäŋ coki ma Eebel nywøllø. Ni ö Eebelli ni tïme na dïkwääc dïëk. 'Ba Keen atïmö na ŋat puur. 3Kar kanyøgø Keen akännö ki caammi moa ciek na puure ni cïp gø na muuce jï Wuuö Jwøk. 4Ni ö Eebelli ni känne ki kure røk rïŋ moa beyø mo kaai mo dïëk moe. Ni ö Wuuö Jwøki ni jïëc mar Eebel ko olämme moe. 5'Ba mar Keen ki muuce moe käre jïëö. Køøre Keen agootø døc ni tïm täärnyïme ni cøl.
6'Ba Wuuö Jwøk aköö jï Keen, «?Aperŋø ni gootï en? ?Aperŋø na tïm täärnyïmï ni cøl? 7?Aŋø, ni näk mo marï beer, täärnyïmï ba doo bëëdö ni leer? 'Ba ni näk mo marï ba beer, raay bëëdö no omøør piny dhi øtø marï; ni manynya ïïni. 'Ba gïna diï tïïö beeye ki man böötï gø.»
8Køøre Keen acäänö ki coki ma Eebel nee cige yi pwödhö. 'Ba kanya enge yi pwödhö, Keen aö maal ni 'näk coki ma Eebel.
9Køøre Wuuö Jwøk aköö jï Keen, «?Coku ma Eebel en kaa ŋø?»
Ni kö Keenni, «?Aŋø, ŋääa? ?Aŋø, beeye aani na dïkuri mar coka?»
10Ni kö Wuuö Jwøki, na «?Agïnaŋø na tïïyï enø? Dwør rem coku ajwöŋ baŋa ki tiet ŋøøm piny. 11Ennø ïïna cien bäät ŋøøm, ni beeye ŋøøpa øc rem coku piny yie mana kønynyï piny ki cerï. 12Kany wäro puurï ŋøøm, bäŋ gïn mo ciek yie jïrï na bäre. Ïïno tïmö na ŋat mo thääyö mo wïïrö jaak bäät piny.»
13Ni kö Keenni jï Wuuö Jwøk, na «Ajäla manøgø kee dwøŋ døc kiree kipera. 14Neenï, ennø dïcäŋi en aana riemï wøk yïth ŋøøm; ni bëëda naa ba en buutï këët. Ni tïma ni aana dhaanhø maa thääyö jaak mo wïïrö bäät piny; ni kanymør ŋato wäro joot aani jaak a di nääö.»
15'Ba Wuuö Jwøk aköö jïgø, ni «Ŋato köö jaak ni Keen nääe nääö, kwör di coolø dëëre kwöre abïriiø.» Ni ö Wuuö Jwøki ni muuny dëër Keen ki nyuudhi, kiper nee ŋato wäro joot gø nee ba nääe.
16Køøre Keen aay nyïm Wuuö Jwøk ni ci kun bëëde yi ŋööm Nøt na en løø Ëden jï løø kur tuul-cäŋ. 17Kanyøgø Keen aci baŋ cïïe, ni jït yie ki dhaanhø ni nywøl Inøk. Ni ö Keenni ni gëëde ki pääny, ni caa nyeŋ gø ri nyeŋ wääde ma Inøk. 18'Ba Inøk Irat anywøle, ni ö Irati ni nywøl Mëjël, ni ö Mëjëlli ni nywøl Matucaël, ni ö Matucaëlli ni nywøl Lamek.
19Ni ö Lameki ni nyöömme ki mään ariiø, ni nyeŋ dhaagø maya cwøl ni Ada, ni nyeŋ maya cwøl ni Dhëla. 20Ni ö Ada ni nywøl Jabal. Ni ö Jaballi ni tïme na kwar jø wø bëëdö yïth oduŋkaare na näk jïge da dhäk ki dïëk. 21Ni nyeŋ coki cwøl ni Jubal. Jubal beeye kwar jø wø pöödö ki thøme ni wø kudhö ko opele. 22'Ba Dhëla Tubalkeen anywøle, ni ö Tubalkeenni ni tïme na ŋat thäth ki jap jwëëlli ki jap nywïëny bëët. 'Ba coki mana näk dhaagø nyeŋŋe cwøl ni Nayma.
23Køøre Lamek aköö ki määre,
«Nya, Ada ki Dhëla,
beerra man leŋŋu dwøra.
U na määra,
beerra man cegu ïthu ki luup 'moa.
Aana nägö ki dhaanhø kiper mana këël aani,
ni 'näga ki nyilaal kiper mana gøøc aani.
24Ni näk mo kwör Keen di coolø ki kwöre abïriiø,
aani na näk Lamek kwöra tïmö ni cool ki kwöre ma pïërabïriiø ka abïriiø.»
25Køøre Adam acäŋ ci baŋ cïïe ni nyööt cïïe ki nyilaal ma dïcwøø, ni cak nyeŋ gø ni Cëth; ni kö Iipi, ni «Jwøk acäŋ cïpö ki dhaanhø mør jïra na kar Eebel na 'näk Keenni.» 26Ni ö Cëthi ni nyööte ki nyilaal ma dïcwøø ni cak nyeŋ gø ni Ënöc. Køør manøgø nø, jiy aput tägö ki man lamge nyeŋ Wuuö Jwøk.
Currently Selected:
Wïlöölö 4: AnyuB
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© The Bible Society of Ethiopia