Лука 1
1
1О бут лилэпэс тэ яздиен одолэстар, со сас машкарэ амэндэ, 2со пхукавдило амэнги э манушэнца, савэ май ангал дикхлэ пумарэ якхенца, тай сас о иргатя э Збораки. 3Ли мэ лилём тэ галяв алаи лачес, со сас ангал, тай тэ пхукавав туки, намлысана Феофил, алаи пал екх аврэстэ, 4кай ту тэ галёс, со шунлян, си о чячипэ.
О миляики пхэнэл э Захариески, кай кан аракхлёл о Иоанн
5О вахыти, кана о Ирод сас патишаи э Иудеяко, сас попази, саво бучёлас Захария, андар Авияско попазенго джемэяти, тай э ромни лэски андар порода ки Ааронески, кай бучёлас Елизавета. 6Он ли о дуй сас чяче ангал Дэл, тай керэнас лачес алаи о пхэнлиматэс тай о тхэдиматэс э Сагбуски. 7Лэндэ на сас пуя, э Елизавета сас бипуенги, ли о дуй он э сас пхурэ.
8Екхвар э попазенги джемэятески э Захариескерэски ало вахыти тэ керэн хэзмэти ангал Дэл. 9Сар екхараи керэнас, о попазя читэ жреби, тай э Захариески пэло тэ джял андэ храми ки Сагбуско, тэ тхарэл чяря, савэ кхандэн. 10О вахыти, кана тхарэлас о чяря, савэ кхандэн, андэ бар бут мануша пхэнэнас э Дэвлэски. 11Бирдэн о Захария дикхляс э миляикес э Сагбускерэс, саво сас тэрдо катар прави риг ки алтарески, катэ тхарэнас о чяря, савэ кхандэн. 12Кана о Захария дикхляс лэс, ов шашты тай трашанило. 13О миляики пхэнляс лэски:
— Ма траша, Захария, О Дэл шунляс то мангипэ. Тэ ромнятэ ки Елизавета кан овэл чяво, тай ту кан тхэс лэс Иоанн. 14То ило кан пхэрдёл бахт тай лош, тай о бут кан лошазэн, кай ов аракхлило, 15вай ов кан овэл баро ангал Сагбус. Ов на кан пиел винас тай нисавэ матимаски пииматэс. Дага ангал отхэ, сар ов кан аракхлёл, ов кан овэл пхэрдо Шужэ Духоса. 16Бутэ израильтянен ов кан анэл палэ ко Сагбус, лэнги Дэвлэстэ. 17Ов кан авэл ангал Сагбус андэ духос тай андэ зор ки Илияски, тэ болдэл о илэ э дадэнги ко пуя, ай савэ на тхэн кан — ко годявэрипэ ки чяче манушэнго, тай кан гортярэл э дюняс ангал отхэ, кай кан авэл о Сагбус.
18О Захария пхучляс э миляикес:
— Сар мэ тэ галяв, кай адава кан овэл? Вай мэ сом пхуро, тай э ромни минри барэ брэшэнги.
19О миляики пхэнляс:
— Мэ — о Гавриил, кай тэрдо ангал Дэл, тай мэ бичялдо тэ зборизав туса, тай тэ пхэнав туки адава лошано габэри. 20Ай анкха андар одолэстэ, кай ту на пакянилян мэ зборэнги, савэ кан овэн пумаро вахыти, ту сакави кан овэс тай нащи кан зборизэс джи одолэ вахытески, бискай адава на кан овэл.
21Ай адава вахыти о мануша ишандиенас э Захариес тай шаштиенас, соски ов аякха бут вахыти на никлёл андар храми. 22Кана о Захария никлисто, ов нащи зборизэлас. Алаи галилэ, кай андэ храми лэски со-то сикавдило. Ов камэлас тэ зборизэл лэнца вастэнца, тай ачёлас сакави.
23Кана о деса бытылар лэски попазески бутяко, о Захария ало кхерэ. 24Андар набут вахытестар лэски ромни э Елизавета насвалили пуёстэ тай пандж чён на никлёлас андар кхер. 25Ой пхэнляс:
— Аки со кердяс манги о Сагбус, кана мангляс тэ лэл опрал мандэ о ладжяво ангал мануша!
О габэри, кай кан аракхлёл о Исус
26Кана э Елизавета сас шовто чён насвали пуёстэ, о Дэл бичялдяс миляикес э Гавриилес андэ галилейски диз, кай бучёл Назарет, 27ки чяй, кай бучёлас Мария. Э Мария сас манглярди э Иосифеса, андар порода ки Давидески. 28О миляики ало латэ тай пхэнляс:
— Сэлями туки, дини мила! Туса о Сагбус!
29Э МариЯ адала зборэс бут шаштэрдылар, тай ой тюшундиелас, со адава сас асавко сэлями. 30О миляики пхэнэлас:
— Ма траша, Мариё, вай о Дэл кердяс туки мила! 31Ту кан насвалёс пуёстэ тай кан аракхлёл тутэ Чяво, тай кан тхэс Лэс Исус. 32Ов кан овэл баро, тай Лэски кан пхэнэн о Чяво э Уче Дэвлэско. О Сагбус Дэл кан дэл Лэс о трони э Давидеско, саво андар Лэски папудэндэ, 33тай Ов кан овэл Патишаи опэр кхер ки Яковеско алаи о вахытя, тай Лэско Патишайлыки на кан бытиел.
34— Сар адава кан овэл? — пхучляс э Мария ко миляики. — Вай мэ дага на сомас муршэса.
35Ай о миляики пхэнляс лаки:
— О Шужо Духос кан авэл опэр тутэ, тай тут кан учярэл э зор э Уче Дэвлэски. Оничин о Пуёс о Шужо, Саво кан аракхлёл тутэ, кан бучёл о Чяво э Дэвлэско. 36Аки ли ти тухумиса э Елизавета, ли латэ кан аракхлёл чяво опэр пхуримастэ. Латар пхэнэнас, кай ой си бипуенги, ами ой си шовто чён насвали пуёстэ. 37Э Дэвлэски нанай ништо, со нащи керэл.
38— Мэ иргатинка э Сагбуски, — пхэнляс э Мария, — мэ овэл алаи манца аякха, сар ту пхэнлян.
Тай о миляики мукляс ла.
Э Мария авэл ки Елизавета
39Пал адалэстэ э Мария кидиняспэс тай сигярдяс андэ диз, кай сас андэ горадэс ки Иудеяки. 40Ой диняс андэ кхер ки Захариеско тай диняс сэлями э Елизаветаса. 41Кана э Елизавета шунляс о сэлями э Марияко, о пуёс андэ латэ читяспэс; э Елизавета пхэрдяс Шужо Духос, 42тай ой бэбэряса пхэнляс:
— Махтадимэ ту машкарэ ко джювля, тай махтадимэ о Пуёс, Савэс ту пхеравэс! 43Катар манги асавко, кай мандэ али э дай мэ Сагбуски? 44Кана мэ шунлём то сэлями, о пуёс андэ мандэ читяспэс катар лош. 45Бахтали э джювли, сави пакянили, кай кан овэл одова, со пхэнляс о Сагбус!
46Э Мария пхэнляс:
— Мо ило махтадиел э Сагбус,
47тай о ило минро лошазэл катар Дэл,
о Кутардимари минро,
48вай Ов дикхляс,
кай ивашы Лэски иргатинка.
Акана алаи о породэс кан пхэнэн манги бахтали,
49андар одолэстэ, кай о Зорало Дэл кердяс асавки бари дила манги!
Лэско нав шужо!
50Катар порода ки порода Ов керэл мила одолэнги,
кон трашал Лэстар!
51Лэски вастэса кердэ барэ дилэс:
Ов кердяс каипи э фалаки илэнгерэн,
52читяс э зоралэн лэнги тронестар
тай ваздиняс э ивашэн!
53Ов чялярдяс лачимаса э бокхалэн,
ай э барвалэн бичялдяс чючен.
54Ов кердяс ярдыми Пэ иргатески э Израилески,
тай на бристэрдяс Пи збора,
кай диняс амарэ дадэн, —
55тэ овэл миласа ко Авраам
тай кон аракхлило лэстар алаи о вахытя.
56Э Мария сас ки Елизавета паш ко трин чён тай дэчи али палэ кхерэ.
Аракхлило о Иоанн Болдимари
57Кана ало о вахыти, ки Елизавета аракхлило чяво. 58Лаки комшудэс тай о тухумя шунлэ одолэстар, кай о Сагбус кердяс лаки бари мила, тай лошазэнас екхетханэ ласа. 59Ко охтото дес алэ, тэ керэн э пуёски абрезания, тай манглэ тэ тхэн лэс, сар э дадэс, Захария. 60Ай э дай пхэнляс:
— На! Ов кан бучёл Иоанн.
61Лаки лилэ тэ пхэнэн:
— Та вай машкарэ тумарэ тухумендэ нанай никхон асавке навэса!
62Он лилэ вастэнца тэ пхучен ко дад, сар би ов мангелас тэ тхэл пэ чявэс. 63О Захария мангляс пхалёри тэ яздиел, тай э шаштимаски алаенгерэски, язды: «Лэско нав Иоанн».
64Одова жэ сагати ов генэ лиляс тэ зборизэл, махтадиелас э Дэвлэс. 65Алаи э комшудэн лиляс траш, тай о габэри адалэстар, со уло, накхло алаи о горадэс э Иудеяки. 66Алаи, кон шунляс адалэстар, тюшундиенас андэ пумарэ илэндэ:
— Кон кан овэл адава пуёс? — вай о васт э Сагбуско сас лэса.
О Захария пхэнэл збора катар Дэл
67О Шужо Духос пхэрдяс э Захариес, э дадэс э Иоаннескерэс, тай ов лиляс тэ пхэнэл, сар прароки:
68— Махтадимэ о Сагбус, о Дэл э Израилеско,
Саво ало Пэ дюнястэ, покиндяс тай кутарды лэс!
69Ов ваздиняс амэнги Кутардимарес
андар кхер Пэ иргатестар ко Давид,
70сар Ов чёктан динясас збора
андар Пэ шужэ прарокендэ,
71кай Ов кан кутардиел амэн катар душманя
тай катар васт одолэнгерэндар, кон на дэхэл амэн.
72Аякха Ов кердяс мила амарэ папудэнги
тай на бристэрдяс По шужо завети,
73совля, савэ Ов халяс амарэ дадэски э Авраамески:
74кан кутардиел амэн катар васта амарэ душманенги,
тай амэ битрашако тэ керас иргатлыки Лэски,
75тэ бэшас ангал Лэстэ андэ шужымастэ тай андэ чячимастэ
алаи о деса амарэ бэшымаски!
76Ай ту, пуёс, кан бучёс прароки э Уче Дэвлэско
тай кан джяс ангал Сагбус, тэ гортярэс Лэски дром,
77тэ пхукавэс Лэски дюняски,
кай о кутардипэ авэл, кана о бэзя муклён.
78Амаро Дэл милако,
Ов кан бичялэл амэнги опрал, Сабахтутно Ярэки
79тай кан дэл ярэки одолэн,
савэ бэшэн андэ тэмина тай андэ траш ангал мэрипэ,
тай кан болдэл амарэ пинрэ ко дром ки лачимаско!
80О Пуёс барёлас тай зоралёлас духоса. Ов бэшэлас ки ливади джи одолэ вахытески, сар на сикавдяспэс ангал мануша ки Израилески.
Currently Selected:
Лука 1: КРБ
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2021 Bible Translators of Ukraine
© 2021 Pioneer Bible Translators
This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/