Matai 11
11
1Avwene UJesu vwu amalile ukuvalagila avakongi va mwene kitsigo navavili, pwu akahuma baho akabiha mwoni mbutsenge vwa vene, mwu akatsita nukuvavula inongwa akatsita nukusimilitsa.
2Umwene UJohani vwu ali nńumba jya vańololo, vwu apulike itsu avombaga UKilisiti, pwa akavasuṅa avakongi va mwene vavili kumwene 3akata: Mbihage nkambutse nkatetsage: Veve vi vatetsaga ikwitsa, pange tumpulikilage ujyunge kwale? 4Umwene UJesu akanda akata: Mbihage nkambule UJohani nitsu mupulika nitsu mwilola. 5Mańa avabosu vilola, avańavulema vwu vigenda vuvule, avańabuba vwu vannonu, navatsivye vwu vipulika, avaswe vwu vitsuka, avagatsu vwu vikutsimańa inongwa innonu. 6Vi iva va ndugataluko uvi nikutsivona itsinge itsa kumwambutsa mwane. 7Vwu avwene vivuka pwu akatengula baho UJesu akantsova UJohani kuvanu avalundamine baho isipuga akata: Mwabihaga kwilola kiki ndukungu? Mwabihaga kwilola ulugugu uludepanika kumepo? 8Mwabihaga kwilola kiki? Mwabihaga kwilola umunu uvi aswalile imisabwa imińogotasu? Lola aviswala imisabwa imińogotasu vwu viva nńumba tsa vakuludeva. 9Mwabihaga kwilola kiki? Mwabihaga kwilola uńamalago? Ena jilweli ndikuvavula ndita: Umwene mbaha vuvule kuvańamalago. 10Ulwakuva vi uvi avigilwe pamwene ilita: Lola ndikunsuṅa unsuṅwa vango uva kulongola mbulongolo kwave, vi alagahaga inzila jya kugendamwo uve. 11Jilweli-lweli ndikuvavula ndita: Mu voni avaholilwe kuvadala navoniki nujyunge umbaha kwa Johani umwotsi. Lweli undebe kuvoni ava ndudeva lwa kukyańa vi andutile uvuvaha. 12Ukuhuma mmwaka gwa Johani umwotsi ukutsisika kulino kunu uludeva lwa kukyańa vikuluńilila namaka, navańamaka vwu vikuluńaga jilweli. 13Ulwakuva itsu valagaga voni avańamalago nitsu tsatsovaga isimilitso tsitsisike pa-Johani, 14Natsene ngave mukwidika ukutsupilila, pwu ndikuvavula ndita: Umwene vi vi Elija, uvi vatetsaga iva pakwitsa. 15Uvi ali nimbulukutu vi apulikage. 16Ndikuvahwanihitsaga ndikiki avanu va lino ava? Vali ndavana avatamile paluvanza vikwilangana vita: 17Ulukelema tuvakuvye, uńe lola namunemili, ikililo tuvapalye, uńe lola namwandili. 18Mańa itsile UJohani, akabela nukulya vuvule syoni, akabela nukuńwa vuvule amasilu, pwu vita: Ali nimepo imbivi. 19Itsile Uńamunu, ilya vuvule syoni, ińwa vuvule amasilu, pwu vita: E, mudege umunu uva kusyota uju, uva kińwelo kya masilu uju, unjyavo navasangutsi navatulanongwa! Ulwene uluhala lwa Nguluve lweli lwu luvonekela mumbombo tsa lwene ukuva lugolosu vuvule.
20Pwu akatengula baho UJesu akavuduka vwoni uvutsenge umwu alutilye ukupela syongosu isipelwa sya mwene, akavuduka ulwakuva navakilivwiki avenenavwo 21akata: Uli viki vi Kolasini, uli viki vi Betisaita! Mańa singave isipelwa isipelilwe mwane umwu singave syapelilwe namu-Tili namu-Sitoni, pwu ndili vakilivwike kakatale, pwu ndili vaswalile nimikutula, pwu ndili vatamile namundyela. 22Lweli ndikuvavula ndita: Ilitsuva lilya lya kuhigila, pwu nitsa mu-Tili nitsa mu-Sitoni tsilava ńebepe vuvule kutsińo. 23Nuve vi Kapelinaumu! Nda nusiki nakukyańa ukwimikivwa? Lola vutsisikaga nambutsuka ukwisivwa. Mańa isipelwa isipelilwe mwave umu, singave syapelilwe mu-Sotomu pwu ndili pwukile nalino ikilunga kikyo. 24Lola ndikuvavula ndita: Ilitsuva lilya lya kuhigila itsa nkilunga kya mu-Sotomu tsilava nebepe vuvule ku tsako.
25Palitsuva lilyo pwu UJesu akatsova nalyene ilya kuta: Ndikukuginya vi dada vi nkuludeva nakukyańa napasi ulwakuva usihile tsitsitsi nakuvańaluhala nakuvaluti, uvadindulye va vadebe. 26Ena vi dada, tsu ukata tsu nnonu tsitsitsi kumiho kwave. 27Syoni amye uńe udada. Numwana ujyunge nammańili, mwene udadaje vi ammańile, nudadaje ujyunge nammańili, mwene ju mwana vi ammańile nuvi angave umwana atye ndimbule. 28Mwitsage kwane ńi voni ńi mukuvilwa ńi muvegye isitsito ndivupile uńe. 29Ntolage ulwango uluvegalilo lwa kuvegalila isya kupimba, ndumańilage mwane, mańa ndili mugu une, ndijisitse munumbula jyango, pwu ninumbula tsińo tsikavilage ulugataluko. 30Ulwakuva ulwango uluvegalilo ulu nasyene isya kugega isyango syebepe.
Currently Selected:
Matai 11: Kinga
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
New Testament in Kikinga © British and Foreign Bible Society, 1961.