Jenesesi 35
35
Jako ohowelela Beteli
1Jagaireyile enne Mulugu ohomuwandela Jako eraga: <<Venya udowe wakalege Beteli,#35:1 Beteli tapulela vande va Mulugu. wasakanyede ibuwa ya mukuto wa Mulugu wenno autwanyuwele tempu wamutawa we mbalawo Ezawu.>> 2Evale Jako ohawandelaga ahiyanaye na ahimaye vamohi na atu atene kafwanyeya na liye vande vaye, liye ira: <<Mudowe mwaatatile amilugu a atu a unde anno munna nyo.#35:2 Mudowe mwaatatile amilugu a atu a unde anno munna nyo. Malambo a mundulri, Rakeli ohokana vikwamutu josema jambenle liye babaye. Ira Jako akokomeze jotatila amilugu kanna atu, tapulela ira kaali Rakeli ve bahi anna vikwamutu josema. Ku wonga Jako malambo a mundulri ohoiziwa ira atwaye kohokana amilugu ewa, so mbwenye liye kawongileve yengo. Mbwenye nnga yohofiya tempu yoira aatukule atwaye atene, karome musakanyela mukuto Mulugu wa ibaribari, Jako ohowanda awandela ira: <<Peno mbwenye amilugu mwanna nyo malambo a mundulri inafwanela mwaatatile, mwasiwa kavili jowandeya muhara Mulugu vamohi na amilugu amohiwa.>> Muvitchenihe, muware nguwo dimohi diwa dapama. 3Nivenyemo mwilamboni muno, nidowe Beteli. Tchoira miyo nnafuna dasakanyede ibuwa ya mukuto wa Mulugu wenno udikamihedile tempu yasimela miyo eto unafwanyeyave na miyo movira mwaga mwatene.>>
4Evale aliwa kohonvaheda Jako amilugu atene a atu a unde kanna atu vamohi na birinku dawarile atu baruni wewa. Kaganvahedile, Jako ohotukulaga jatene ejile, liye dowa timbela vati va mutengo wa karvaliyo afwanyeya wandamelana Sikemu.
5Evale aliwa kohovenyihanaga, aliwa dowaga. Eto Mulugu ohosakanya ira sidadi dowandamana a ilambo yenne kaaovege. Mwa enne kalivo aaharile akuda Jako. 6Evale Jako vamohi na atwaye atene kohofiyaga sidadi ya Luji yenno yanna nzina nimohi niwa na Beteli muwari mwa ilambo ya Kana. 7Agafiyile wewule, ohosakanyaga ibuwa ya mukuto, liye vaha nimburo nenne nzina na Mulugu wa Beteli. Tchoira Mulugu amutwanyuwele Jako nimburo nenne tempu yamutawa liye mbalaye. 8Eto ali wewo wakwile Debora wenno ali makayaya wa Rebeka, liye koyiwa wandamelana Beteli mutchindo mwa mutengo wa karvaliyo. Evale vamutengoni vale kohovaha nzina na Aloni-Bakute, [ku wonga Mutengo Onla Kuto].
Mulugu ohomutchindja Jako nzina
9Jako agakumile ilambo ya Padani-Arani, Mulugu ohomutwanyuwela akoka, liye mureliha eraga: 10<<Weyo nzina nawo unaitaniwa Jako. Mbwenye kuma peno dowa sogolro kunaitaniwegeve na nzina na Jako. Nzina nawo unaitaniwege Izarayeli.>>#35:9-10 Jako… Izarayeli: Izarayeli ti nzina neno Jako avahiwe liye na Mulugu. Tapulela Ana Izarayeli ba atu anne kabaliwe muzizani mwa Jako. Mwa enne Mulugu ohonvaha nzina na Izarayeli. 11Noira eno, Mulugu ohomuwandelaga, liye ira: <<Miyo dili Mulugu wa Kopolo Datene. Weyo na ahimawo mubalihane, muindjivihane. Mwa weyo munoza mukume nlogo nimohi vamohi na malogo madjindji eto amwene anaza kakumelege mwa weyo. 12Ilambo yenno danvahile miyo Abarahamu na Izaki, nnouvaha weyo eto nnoza daavahe ahimawo a musogolro.>>#35:12 Ilambo yenno danvahile miyo Abarahamu na Izaki, nnouvaha weyo: Mulugu kanvahile ilambo ya Kana mulombwana Jomayili nne anapongwe amohiwa Abarahamu aabanle liye muhiyanaye Sara agakwile. Mulugu eto kanvahile Ezawu ilambo ya Kana. Mulugu anvahile Izarayeli na ahimaye. Nona pa evale vazile ilambo ya Kana itaniwa na nzina na Izarayeli fiyeda peno.
13Mwa enne Mulugu ohovenyagavo vevale vawongaga liye na Jako vale. 14Agavenyilevo, mulombwana Jako ohoimelihagavo nibwe nnga nimbozo ira nikale ionihedo zela nimburo neno Mulugu amuwongilena liye, liye kutulelavo yovelela ya jong'wa na makura. 15Mwa enne nimburo nawonga Mulugu vamohi na liye nne, Jako ohovaha nzina na Beteli.
Baliwa wa Benjami
16Evale aliwa kohovenyawo Beteli, aliwa dowaga sidadi ya Efarata. Mwa enne aliwa kagali mundila, kakwivelaga Efarata ule, tempu yenne Rakeli johomutatamuwa jopa jobala. Ira abale jali jorutcha jene. 17Evale namabaliha agaonne katamiheya wa Rakeli, ohomuwandelaga, liye ira: <<Kuove! Tchineneva unombala mwana mmohiwa wa mulombwana.>> 18Muwari mwa goyi yobala ile Rakeli ohofiyeda kwa. Mbwenye ahanamariheye, avumelaga vati vati, ohonvaha mwanaye ule nzina na Benoni, [ku wonga mwana wa goyi daga]. Mbwenye babaye ohonvaha nzina nimohi niwa na Benjami, [ku wonga mwana wa muwononi odjana].
Koyiwa wa Rakeli
19Mwa enne Rakeli ohokwa, liye koyiwa wandamelana ndila inadowa Efarata, wewo unaitaniwa na nzina na Beleme malambwala. 20Nimburo nenne vakoyiwe Rakeli, Jako ohoimelihavo nibwe nnga nimbozo ira nikale ionihedo. Fiyeda ante peno eni, nimbozo nne nnafwanyeya evale, nitonyihedaga masiye akoyiwe Rakeli.
21Noira enne, mulombwana Izarayeli ohokwaranyagavo, liye dowa manga misasa daye sogolro wa nyumba yolapa ya gwarda yafwanyeya Ederi. 22Mwa enne Izarayeli akalaga ilambo yenne, mwanaye Rubeni ohodowa mugonana Bila, babaye muhiyanaye wang'ono. Evale babaye ohovwa jejo jairile Rubeni.
Ahima a mulombwana Jako
Jako ahimaye atene a alombwana kali kumi na ambinli. 23Ahima aabanle liye na Leya ba ala: Rubeni wenno ali mwanaye oroma, Simeyawu, Levi, Juda, Isakari, na Zebuloni. 24Ahima aabanle liye na Rakeli ba ala: Joze na Benjami. 25Ahima aabanle liye na Bila namalaba wa Rakeli, ba ala: Dani na Nafitali. 26Ahima aabanle liye na Zilpa namalaba wa Leya, ba ala: Gadi na Azeri. Ahima atene anna, aabanle agali ilambo ya Padani-Arani.
27Nomala enne, Jako ohovenyihanaga, liye dowa kala wa babaye Izaki ilambo ya Mamere, ku wonga ilambo ya Kiriyati-Araba wandamelana Eboroni, wewo wakala Abarahamu na Izaki nnga atu oza. 28Mulombwana Izaki kalawo waye watene amanle yaka 180. 29Mwa enne Izaki ohokwa mwa murendele, agamanle ulula. Liye dowa gumana na makolo aye anno kakwile. Evale ahimaye Ezawu na Jako kohodowa mukoya.
Currently Selected:
Jenesesi 35: iLolo
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2018 Visão Integral