Amós 1
1
1Di'llnin bzene Diozen Amózen kan gak ke Israelen, ye chop izre kan ze wxize yell-li'on, Amós ni nake'e be'nn llap xhir, na zoe'e yellen nzi Tecoa, na ke lla ki llnebia be'nnen nzi Ozías, na llnebie'e gan nzi Judá, na Jeroboam nake'e xhi'nn Joás be'nnen llnebia Israel.
2Keten llaklla Xanllon, na llne'e zillj kwis
raw ya' Sión na, dan zu gan nzi Jerusalén,
na llkoad yix ka' sjade raw yell-li'on,
na llayech raw rum ke Carmelon.
Kan gak ke be'nn ka' sjalla latj yell-liw wrill ka'
3Kin ne Xanllon:
Be'nn Damascos ka' ba ben ake' dazan kwis daxhinj,
na bi wdegunan kaze deksde wsakzia le ake',
le bxhoxjtin ake' be'nn Galaad ka', kan llun dan llxhoxj rakw.
4Kelen'na wzeya kone yi' llalnin yo' raw ke Hazaelen,
na lekse ka' wzeya yo' raw ke be'nn wnebian nzi Ben-Hadad.
5Wxhoxjga dan nsej reij ke Damascon,
na wlleyia be'nnen llnebia Bicat-avén,
rente be'nnen llnebia gan nzi Bet-edén,
na be'nn Sirios ka' wachach ake' le ake', nench'na wache ake' le ake' gan nzi Quir.
Xanllon ba bnee ka'.
6Kin ne Xanllon:
Be'nn Gaza ka' ba ben ake' dazan kwis daxhinj,
na bi wdegunan kaze deksde wsakzia le ake',
le bchach ake' du kenak be'nn yell ka',
na be'et ake' le ake' nench'na ben ake' xchin Edomen.
7Kelen'na wzeya ze'e ka' nkoej Gazan,
na yi' llalninen wlleyin yo' raw ke ake' ka'.
8Wlleyia be'nnen llnebia gan nzi Asdod,
na be'nnen llnebia gan nzi Ascalón.
Konen doxhente yelwak kian wlleyia Ecrón'na,
na wlleyi'rentia yoyte be'nn filisteos ka'.
Xanllon ba bnee ka'.
9Kin ne Xanllon:
Be'nn Tiro ka' ba ben ake' dazan kwis daxhinj,
na bi wdegunan kaze, deksde wsakzia le ake',
le bex ake' yoyte be'nn yell, nench'na be'et ake' le ake' raw Edomen,
bi bdap ake' baran ke di'llen be'e ake' konen be'nn bich ake' ka'.
10Kelen'na wzeya konen yi' llalnin ze'e ka' nkoej Tiron,
na lekse yi' llalnin'na wlleyin yo' raw ke ake' ka'.
11Kin ne Xanllon:
Be'nn Edom ka' ba ben ake' dazan kwis daxhinj,
na bi wdegunan kaze deksde wsakzia le ake',
le konen spad ke ake' ka', bi bayachrall ake',
na bnawllo'a ake' be'nn bich ake' ka', be'nn Israelitas ka'.
Dokenak yel llruk ke aken bsan ake',
na yel llaklla ke aken, nike no gukze wzay len,
na bioralltes biorall ake' le ake'.
12Kelen'na wzeya konen yi' llalninen Temán'na,
na konen yi' llalnin nakse wlleyia yo' raw ke Bosrán.
13Kin ne Xanllon:
Be'nn Amón ka', ba ben ake' dazan kwis daxhinj,
na bi wdegunan kaze, deksde wsakzia le ake',
le dan bzerall ake' waslliw ake' yell-liw ke aken,
na bsarj ake' le nor ka' noa bdaw, na ben ake' le ake' choplare, latjen nzi Galaad.
14Kelen'na wzeya konen yi' llalninen ze ka' nkoej Rabán,
na konen yi' llalnin nakse wlleyia yo' raw ke ake' ka',
keten gak wdilen, to gak llakia gusia ake',
ke to lla ga llde yejw bebdon zban.
15Na kwej ake' be'nnen llnebia raw yellen,
rente be'nn braw ke'e ka'.
Kan ba bnee Xanllon.
Currently Selected:
Amós 1: ZPUPAT
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo