Máakúsʉ 9
9
1Yěso kə̂ ncí ndáʼ lə́ páp ngô: «Məŋ ndâʼ wéi kwaʼ lə́nə́ʉ, ngô: Pəcó pye pi gháp pə́ yaʼa mpfu wo ghʉ̌ kwʉ̂tə gháp tə́ ghó gháp jwô Ləfou Sê* ghíʼ ə́ tô lə̂ mətəʉ Sê po.»
Kwâŋ sʉ̂ Yěso kə́pə
(Mat 17.1-9; Lks 9.28-36)
2Ə́ lei leʼé ntóghʼó, Yěso tsôʼ Pyêh ə́ ngʉ̌ Jâghʼ gháp Jâŋ, ə́ ndǎghʼ gháp ndə́r ńgwo ńkóʼ ndəu có ləkôr jwǐ, gháp pə pǎp pə̂ yʉʼ wó páp lə́ páp, gháp jwô kwâŋ sʉ̂ ye kə́pə mbi páp. 3Məndǐ mé ncʉ́ʼ ŋwáŋə ŋwaŋə́, ə́ fú fóghʼ tə có zə̂u yi mboʼ ŋuu lâghʼ sóghʼ ndǐ ndəu ndesé yaʼa ə́ fôghʼ yə́rə́ kâa pə́ yé wó. 4Ngaŋə-jyêʼ-no* zêi tárə́ ghi woghʼə́, ə́ njwó Elyê gháp Mə̌usə̂i kwar ńtə́ʉ, gháp pə Yěso pə̂ ntsár. 5Pyêh cʉ̂ʼ ndáʼ lə́ Yěso ngô: «Cícye, ə́ pôŋ ńgó paghʼə cʉ́ʼ nyáŋ pə́ yaʼa. Pə́i ńgó paghʼ jə̂ghʼ məjûŋ mə́ntárə́*, tâʼ pə̂ zô, tâʼ pə́ yi Mə̌usə̂i, cǒ pə́ yi Elyê*.» 6A lə lâʼ yé yə́rə́ ńté no káa a lə jî yé có no yi mboʼ a lə kə̂ ndáʼ, ńté ńgó ə́ lə ghi pə́ mə́i cwôʼ ghou mə́ gháp. 7Gháp ghi jwó məlâm shîʼ, ńkə́ptə́ gháp. Njî ŋuu fû cər wó ə́ ndǎʼ ngô: «Yo Môu ghâa yi n nkǒŋ yé gháʼate. Pei zûʼ ntsʉ yé!» 8Pə̂ mpfu wêi mpfu wêi, ngaŋə-jyêʼ-no* Yěso shərə ńnáŋtə́ yʉʼ, káa kə́ jwô gháp pye pêi, gháp pə Yěso lə́ cʉ̂ʼ mbə́.
9Gháp pə pǎp pə̂ fû ndəu ləkôr shíʼ, a cwôtə gháp ńgó koo gháp kʉ́ʉ tə ndáʼ ŋuu zə̂u yi gháp yǎa njwó tə ndáʼ ŋə́ ghíʼ Môu Ŋuu* wo zʉ́ʉ lə̂ ləwʉ̂. 10Gháp pə̂i ghíʼ a lǎʼ yə́rə́, ə́ cʉ́ʼ mə́ ntúŋu təcər páp ngô: «A lâʼ ńgó nzʉ́ʉ lə̂ ləwʉ̂, ə́ nzʉ́ʉ lə̂ ləwʉ̂ lâghʼ ndâʼ ńgó hó?»
11Ə́ ncʉ́ʼ ntúŋú Yěso ngô: «Pəkeʼtə́-lə́pə́ʉ Mə̌usə̂i* lâʼ ńgó Elyê* táa tsə̌mbi tó ghíʼi ńté hó?» 12A pwôr lə́ páp ngô: «Ə̂ no, ntsətə-nkəʉ Sê* Elyê* yǎa tsə̌mbi tó tʉ́ŋtə́ zə̂u tsəm, Lə́ tə ńté hó pə lə pôu ŋwáʼá cər ŋwaʼa Sê ńgó Môu Ŋuu* ghʉ̌ jwó ngwôʼ gháʼate, ə́ pə póu ntyê yé? 13Lə́, m mbə̌ tə ndâʼ wéi gháʼa, mə́i Elyê* wêi kə tó mə́, pye-mə́soŋ ghʉ lə́ zʉ́ ghíʼ gháp kǒŋ, ə́ ndʉŋ-ndʉŋ yə́rə́ ghíʼ ŋwaʼa Sê lə lǎʼ ńté yé.»
Yěso zûŋ zəghʼə tə́poŋ lə̂ cǒ môu
(Mat 17.14-21; Lks 9.34-37)
14Yěso ghi pə̌ʉ nzəm lə̂ yʉʼ yi ngaŋə-jyêʼ-no* yé pə́ wó, ə́ njwó lâʼ naa nzə́mə́ gháp ńŋə́ soŋ, ngaŋə-jyêʼ-no* yé gháp pə pəkeʼtə́-lə́pə́ʉ Mə̌usə̂i* pə̂ yʉʼ wó mə́ nzóŋə có no. 15Lâʼ lei tə njwó Yěso ə́ kəʼə gháp gháʼate, gháp khʉtə ńtó ntsêʼtə́ yé. 16A pôu ntúŋú ngaŋə-jyêʼ-no* yé ngô: «Pei pə pǎp zoŋə hó?» 17Cǒ ŋuu kwâr nou lâʼ, ə́ mbwǒr lə́ zʉ́ ngô: «Cícye*, n ntə̌i ndǎghʼ môu ghâa ńtó lə̂ njwó ghô: a ghwo zəghʼə cípúʼ. 18Maa yʉʼ tsəm yi zěi jǐ lə̂ mbə́u yé wó, ə́ cwôʼ yé ntə́m sê, a tə̂i, ə́ fə̂uʼ mətê, ə́ mpfár məsoŋ. N ndaʼ lə̂ ngaŋə-jyêʼ-no* zô ńgó gháp zúŋ zəghʼə tə́poŋ* zêi, káa gháp kûʼ gháp mə́u.» 19Yěso lâʼ lə́ páp ngô: «Ngər pətəpə̌i-no Sê, ə́ gháʼa paghʼə láʼ nyáŋ tə kə́u pə́ shʉ́ŋə́ pei poŋə́ cóghʼ ntə̂ʉ wéi lə̂ Sê? Məŋ ngʉ̌ ŋǎghʼ məno méi tə kə́u pə́ shʉ́ŋə́? Pei lághʼ môu wei ntó.» 20Pə́ laghʼ yé ńtó ńŋə́ lə́ zʉ́, ə zəghʼə tə́poŋ zêi lei tə njwó Yěso, ə́ nkhwǒr môu wei ńtə́m sê, a pə̂ nkarə́, ə́ mə́ fə̂uʼ mətê. 21Yěso túŋu tə́ môu ngô: «Yo ghou gháʼa ḿbə́ lə́ môu wo tə fú shʉ́ŋə́?» A lâʼ ngô: «Tə fú ghíʼ a lə pyér pə́ môu. 22zəghʼə tə́poŋ* zêi nyáŋ tə ngôu yé, ə́ ndou pə́ máʼ yé mǒghʼ káa pə́ cər nci, ə́ ndou pə́ lə̂ njwí yé. Ə́ lə̌i mbə́ yi mboʼ o ghʉ̂ có zə̂u, o tsâa məjʉ̂ŋ mághʼ, ə́ mpfútə́ wághʼ.» 23Yěso pwôr lə́ zʉ́ ngô: «O pou ndâʼ ńgó ghíʼ o lə̌i nkûʼ gháʼa ə́ ndaghʼ ndâʼ ńgó hó? Káa có no pə́ ntsə̂ yé ŋuu yi a ghwǒ pə̂i-ntə̂ʉ.» 24Tə́ pə môu wei kə̂ ntóghʼ ndáʼ ngô: «Məŋ mbə̂i, pfútə́ ghâa, pə̂i-ntə̂ʉ zâa khwôghʼ.»
25Yěso jwô, ə lâʼ pə̂ kôʼ ńfárə gháp, a sâʼ zəghʼə tə́poŋ* zêi, ə́ ndǎʼ lə́ zěi ngô: «Zəghʼə tə́poŋ* yi ə́ kʉ̂ʉ tû ŋuu, ə́ mbou ndaghʼ yé ńgʉ̂ cípúʼ; m mə̌ ndâʼ lə́ gho ngô: Fú lə́ môu wo ńkwár tə kôo lâʼ nkə́ mbə̂ʉ lə́ zʉ́!» 26Ə zəghʼə tə́poŋ* zêi ghi pə́ kwǎr, ə́ mə́ mâʼ wâr, ə́ mə́ ncʉ̂ʼ môu wêi lə̂ təʉ; ə́ fú lə́ zʉ́ nkwǎr. Môu wei nûŋ sê ńnǎʼ, tə lələʉ pye cʉ̂ʼ ndáʼ pə̂ ngô: «A fǔ nkwʉ́.» 27Lə́, Yěso ghwô pô yé, ə́ ngʉ̌ a lêsê ńtə́ʉ tə́ʉ.
28Yěso* pôu mbə̂ʉ lə̂ ndə̂, ngaŋə-jyêʼ-no yé túŋu yé lə̂ záp pə pǎp yʉʼ ngô: «Ə́ ńté hó káa paghʼ yáa kûʼ wághʼ lə̂ nzúŋ Zəghʼə* zêi?» 29Yěso pwôr lə́ páp ngô: «Mboʼ pə́ laghʼ pə̂ ndaʼ sʉ̂ʉtə ńzúŋ mbə̂u zəghʼə tə́poŋ* zêi.»
Yěso kə̌ ncí ndáʼ ńgó a ghʉ̌ kwʉ́ pǒu zʉ́ʉ
(Mat 17.22-23; Lks 9.43-45)
30Gháp fû wó ńdə́r, ə́ mə́ ndêi Galilêi, lə́ káa a pə́ nkôŋ yé ńgó pə jí; 31ńté no a lə pə́ njyêʼ ngaŋə-jyêʼ-no* yé zə̂u, ə́ mə́ ndâʼ ngô: «Pə́ wo féi Môu Ŋuu* ńŋə́ lə́ pye-mə́soŋ gháp jwí yé. Ə̂ pə́ mbâatə leʼé tárə́, a zʉ́ʉ lə̂ ləwʉ̂.» 32A lâʼ yə́rə́, ngaŋə-jyêʼ-no* yé kâa zûʼ gháp no yi a laghʼ ńdáʼ, lə́ mbou mə́ mbôghʼ lə̂ ntúŋú yé.
Ŋuu njwǐ wǒ?
(Mat 18.1-5; Lks 9.46-48)
33Gháp tô ńkə́u Kapérnawûm, ə́ pə̂ mpfu yi gháp kə́u mə́ ndə̂, Yěso túŋu gháp ngô: «Pei yǎa ŋə̌i nzóŋə no hó laŋə́-ndə̂u?» 34Lə́ káa gháp tsáp, ńté no gháp kə ŋə̂i laŋə́ ə́ mə́ nzóŋə́ no lə̂ njí ŋuu yi a pə̌ təcər páp ḿbə́ ŋuu njwǐ. 35Ə́ pə̂ yə́rə́, Yěso cʉ̂ʼ nyâŋ sê ńfúŋ ngaŋə-jyêʼ-no* yé ntsap pwô lə̂ ləghə̂m, ə́ ndǎʼ lə́ páp ngô: «Ŋuu lə̌i mə́ ndôu lə̂ ntə́ʉ tû-mbi, mə́i a wo pə́i məmbeʼ, ə́ fǎʼ mbó ŋuu ntsəm.» 36Ə́ ndǎʼ yə́rə́, ə́ nkhwór mə́ceʼé môu ńtághʼ təcər páp, ə́ mbáʼá yé, ə́ ndǎʼ ngô: 37«Ŋuu lə̌i mpfú cǒ mə́ceʼé môu wo lə̂ ləjôghʼ zâa, mə́i a pfû gháʼá pə́ ghâa. Ŋuu póu mpfú ghâa, mə́i káa a pfû yé gháʼá ghâa, a pfû gháʼá ŋuu yi a lə tə́u ghâa.»
Ŋuu yi a tôutə no Yěso, â ye ŋuu
(Lks 9.49-50)
38Jâŋ lâʼ lə́ Yěso ngô: «Cícye, paghʼ tə̌i njwó cǒ ŋuu pə̂ ndâghʼ ləjôghʼ zô nzuŋ məzəghʼə tə́poŋ* lə́ pye, paghʼ pə̂ ndôu lə̂ ntôʼ yé, ńté no káa a pə̂ yé nzəm paghʼə.» 39Yěso pwôr ngô: «Koo pei tôʼ wéi yé, mboʼ ŋuu ghʉ̂ yé nkəʼə-no lə̂ ləjôghʼ zâa, ə́ mbou nkʉ́ʉ ghâa tə́poŋ po. 40Ŋuu yi kâa pə́ mbâa wághʼə, â waghʼə ŋuu. 41Məŋ ndâʼ wéi kwaʼ lə́nə́ʉ, ŋuu lə̌i ŋə́ tə́tóʼ nci lə́ pei, ńté ńgó pêi pye Kəlísto, mə́i ntsoʼó-faʼ ye láʼ cwî yé po.»
Ə zə̂u yi mboʼ ə́ ghʉ ŋuu gháp Sê sêi
(Mat 18.6-11; Lks 17.1-2)
42Ŋuu lə̌i ncʉ́ŋə́ cǒ tâʼ lə̂ pəmə́ceʼé ghəpə́ pwo pi gháp tsə́ʉ nzəm məŋ lo tə a fâa no, mə́i ngwôʼ ngaŋ ghʉ̌ fú záa, tə mboŋə pə́ ghíʼ mboʼ pə́ lə kâp tə́koʼ ləghǒ lóŋ zʉ́, ə́ mǎʼ yé cər mə̂i-nci. 43Pô zô lə̌i mbə́ zə̂u yi ə́ cʉ́ŋə ghô o fâa no, o zâʼ zěi ḿméʼ, mboŋə́ ghíʼ mboʼ o pə̂ kəm-pô, lə́ ndáʼ nkə́u cər ləcwôr; ə́ nděi ghíʼ mboʼ o ghwô mbô mə́mbwô, lə́ mbǒu ndáʼ nkə́u cər mǒghʼ tə́ láʼ ncwí. 44[Ə́ pə́ yʉʼ wó, ə ntor yi pfâr məpfû pye kâa pə́ nkwʉ̂ yé; mǒghʼ pou káa pə́ cwí yé.] 45Ku zô lə̌i mbə́ zə̂u yi ə́ cʉ́ŋə ghô o fâa no, o zâʼ zěi, mboŋə́ ghíʼ mboʼ o pə̂ kəm-ku, lə́ ə́ ndáʼ nkə́u cər ləcwôr; ə́ nděi ghíʼ mboʼ o ghwô məku mə́mbwô, lə́ mbou nkə́u cər mǒghʼ tə́ láʼ ncwí. 46[Ə́ pə́ wó, ə ntor yi pfâr məpfû pye kâa pə́ nkwʉ̂ yé; mǒghʼ kâa kə́ mbóu mə́ cwí yé.] 47Kəʉ ləjôghʼ zô lə́ pə́ zə̂u yi ə́ cʉ́ŋə ghô o fâa no, o kwárə zěi, mboŋə́ ghíʼ mboʼ o pə̂ cwi-lə́jôghʼ, lə́ ndáʼ nkə́u cər Ləfou Sê; ə́ nděi ghíʼ mboʼ o ghwô mənyôghʼ mə́mbwô, lə́ mbou nkə́u cər mǒghʼ tə́ láʼ ncwí. 48[Ə́ pə́ yʉʼ wó, ə ntor yi pfâr məpfû pye kâa pə́ nkwʉ̂ yé; mǒghʼ pou káa pə́ cwî yé#9.48 Esa 66.24.]
49Ńté no pə́ ghʉ̌ lǎghʼ mǒghʼ ńtsúŋtə́ wǒwó ndʉŋ-ndʉŋ ghíʼ pə́ laghʼ ngwâŋ ntsuŋu məzʉ̂#9.49 Mənkwaʼtə mi ghəpə́ Sê ghôu měi gháp pə ngwôʼ yi gháp jwô zěi gháʼá ntó lə̂ ntsúŋtə́ gháp, ə́ nkwárə́ məlǒʼ lə́ páp, ə́ ngʉ́ gháp lêi kwaʼ ghíʼ ngwâŋ tsúŋu məzʉ̂, pə́ zʉ̂ ńzúʼ ə́ poŋ.. 50Ə ngwâŋ zə̂u shʉʼʉ, lə́ ə́ lə̌i ndêi tə ndə́iʼ kə́ pyér pə́ lə̂ʉ yé po, pə́ pou ndághʼ hó ńgʉ̌ ə́ poŋə́ kə́ cí lə̌ʉ? Ə́ poŋ ńgó ngwâŋ pə́ lə́ pei, pêi póu nyáŋ təcər pei lə̂ mbwórə.
Currently Selected:
Máakúsʉ 9: NLA
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo