Máakúsʉ 12
12
Saghʼ-ləghaa lə́ ŋuu yi a lə cóghʼ pəghaŋə-faʼ tə́poŋ nkâʼ zʉ́
(Mat 21.33-46; Lks 20.9-19)
1Yěso lâʼ yə́rə́, ə́ njǐ lə̂ ndághʼ saghʼ-ləghaa* ńdáʼ lə́ páp ngô: «Cǒ ŋuu lə ghwo nkâʼ yé, ə́ ngwǒ cər wó, ə́ mbǐ mətʉ̌ mi pə́ kêi məntǎa měi ńdághʼ ńtsúŋu məluʼ, ə́ nkə́r nkâʼ ńdaghʼ ńzə́mə́ nkâʼ yé wêi. Ə́ ntúŋ ghəm cər wó, ə́ ndaghʼ ngʉ́ ləkěi məluʼ, ə́ mbóu lətə̌ʉ ŋuu yi a pə́ pâp nkâʼ, ə́ ŋáʼa ngwó tʉ́, ə́ ngʉ̌ yə́rə́ tə ə́ kuʼ, a jwôghʼ nkâʼ mbó pəlwoŋə, ə́ ndər yé lə̂ ləkâr. 2Ə mpfu ghʉ̂ nkûʼ, a tə̂u tâʼ ngaŋə-faʼ ye lə́ pəlwoŋə ńgó a wó mpfû yé zə̂u yi ə́ kwǎr nkâʼ ndaghʼ ńtó ńŋə́ lə́ zʉ́. 3Lə́ a kə̂u wó, gháp ghou yé, ə́ nsə́u yé, ə́ nzǔŋ yé, a pə̂ʉ mbô fe. 4Ngaŋə nkâʼ tə̂u mbâatə pwô lə́ páp. A kə̂u wó, gháp sə̂u tû yé, ə́ nzoutə́ yé. 5A tə̂u mbâatə tárə́ lə́ páp, gháp jwî wêi wə̂. Ngaŋə nkâʼ kə̂ ncí ntə̂u pəcó tə gháp záa, gháp kə̂ ngʉ́ pə́ yə́rə́ lə́ páp, ə́ sə̂u pəcó, ə́ njwítə́ pəcó. 6Ndaʼ ŋuu yi a lə cʉ́ʼ mbyér mbó ngaŋə nkâʼ lə pə́ môu ye yi a kǒŋ yé gháʼate. A kə̂ ncí mbyé yé ńtə́u lə́ páp, ə́ mə́ nkwâŋ yé pə́ ńgó gháp wo jwó yé, ə́ ŋə́ məkuʼ mé. 7Lə́ pəlwoŋə pêi lâʼ təcər páp ngô: “Yo ŋuu yi a táa pə́ nzʉ̂-ndə̂ ye, paghʼə jwí yé, ə nkâʼ láʼ ncʉ́ʼ mbə́ pə̂ wághʼə.” 8Ə́ ndǎʼ yə́rə́, ə́ ngôu yé ńjwí, ə́ ndǎghʼ pfu yé fú nkâʼ ńkwǎr ńgwó měʼ.»
9Yěso cʉ̂ʼ ntúŋú ngô: «Pei jwô zéi ńgó ngaŋə nkâʼ wo ghʉ̌ gháʼá lə́ páp? A ghʉ̌ tó ghʉ̌ pə jwítə́ pwo pəlwoŋə pêi, a nyér nkâʼ lə́ pye mə́ndeʼe. 10Pei laa kə́ fúŋ yʉʼ ŋwaʼa yo cər ŋwaʼa Sê mo? Ə́ yi laʼ ngô:
“Ləghǒ yi pəpóu-ndə̂ lə měʼ
lə pou ncʉ́ʼ ləghǒ ləlí ndə̂.
11Ə̂ faʼ Nde.
Ə́ mbə́ nkəʼə-no mənyôghʼ paghʼə#12.11 Mzc 118.22-23!”»
12Pəsǎʼ-lâʼ pəyúda pə̂ ndôu məsʉ̂ lə̂ ngôu Yěso, ńté no gháp lə jí ńgó a laghʼ wo saghʼ-ləghaa ńdâʼ no gháʼá lə́ páp. Lə́ mə́ mbôghʼ lâʼ, ə́ ncʉ́ʼ nyér yé yʉʼ wó ńdə̂r gháp.
No lə̂ máʼ ntsəp ŋə́ lə́ fou pəlóma
(Mat 22.15-22; Lks 20.20-26)
13Gháp ghʉ ntə́u pəcó pəfalísia*, gháp pə pəcó pye Elôdə* ńgó gháp wó ndǒu məsʉ̂ ghíʼ mboʼ gháp fû lə̂ tsâr Yěso, ə́ ngǒu yé. 14Gháp tô ndáʼ lə́ zʉ́ ngô: «Cícye, paghʼ pə̌ njî ńgó o laʼ pə̂ no lə́nə́ʉ, ə́ mbou ndâʼ pə́ tə pǒghʼ ŋuu, káa ghǐ lâʼ no nâŋ sʉ̂ ŋuu, ə́ ndeʼtə no lə́nə́ʉ pə́ ghíʼ Sê pə̌ ntúŋu ńgó pə ghʉ̂. Lǎʼ wághʼ, ə́ ghíʼi ləpə̌ʉ* lâʼ zághʼə pə́i ńgó paghʼə mâʼ ntsəp ŋə́ lə́ fou Pəlóma* kəʉ ngə́?» 15Lə́ Yěso jwô ghíʼ gháp pə́ pə̂ pəghaŋə nkoŋə mənyôghʼ, ə́ mbwǒr lə́ páp ngô: «Pei kwaʼtə́ ghâa ńté hó? Pei lághʼ paghʼə nkâp ntó ńnyárə́ ghâa.» 16Gháp laghʼ ńtó, Yěso túŋu gháp ngô: «Yo sʉ̂ wó gháp pə ləjôghʼ wó yǐ pə́ mə́u?» Gháp pwor lə́ zʉ́ ngô: «Ə̂ mi fou pəlóma.» 17Yěso lâʼ lə́ páp ngô: «Ə́ lə̌i ḿbə́ yə́rə́, pei ŋə́ zə̂u fou pəlóma lə́ fou pəlóma, ə́ ŋə́ yi Sê lə̂ Sê.» Gháp zûʼ mbə̂u yi a lǎghʼ ḿbwǒr, ə́ fû nkəʼə́ gháp gháʼate.
No lə̂ ləzʉ̌ʉ lə̂ ləwʉ̂
(Mat 22.23-33; Lks 20.27-40)
18Pəcó Pəsadúsia* cʉ́ŋə mbáatə́ Yěso. Pəsadúsia* ə̂ pye pi káa gháp pə́ mbə̂i gháp ńgó pəpfû táa zʉ́ʉ lə̂ ləwʉ̂. Ghíʼ ə́ pə́ yə́rə́ lêi, gháp túŋu Yěso ngô: 19«Cícye, Mə̌usə̂i lə ŋwáʼa cər ləpə̌ʉ* zághʼə ngô: Ŋuu lə̌i nzóʼ məngyě, ə́ nkwʉ́ tə́ měʼ zə̂u, fə̌r ye ghwo lə̂ sóghʼ mpfǒghʼ yé, ə́ njitə́ ghəpə́ ndaghʼ ńnúŋú ngər yi fə̌r ye wêi. 20Pəcó pəfə̌r pi mbiŋə lə pə́ wó saambwô, nduŋ-mbi zôʼ, ə́ nkwʉ́ tə́ měʼ zə̂u. 21Mbâatə sôghʼ mpfǒghʼ ye, ə́ nkə́ ncí nkwʉ̂ yé pə́ tə měʼ zə̂u. Mbâatə tárə́ kə̂ ncí sôghʼ yé mpfǒghʼ, ə́ nkwʉ̂ yé pə́ tə měʼ zə̂u. 22Gháp pei saambwô lə zóʼ məngyě wêi, ə́ nkə́ ndáʼ nkwʉ́tə gháp pə́ tə měʼ zə̂u. Ə́ ghi lyəghʼtə́ məngyě kə̂ nkwʉ̂ yé lə́wó. 23Ghíʼ gháp saambwô lə zóʼ məngyě wêi lo, pə́ táa nzʉ́ʉ lə̂ ləwʉ̂* a cʉ́ʼ mbə́ ngwě wǒ lə́ páp? Ńté no gháp pêi saambwô lə zóʼ yé ghíʼ ngwě gháp!»
24Yěso pwôr lə́ páp ngô: «Pei pə̌ futə mbəʉ zéi, ə́ njí ńgó káa pei pə́ njî zə̂u yi ə́ pə́ cər ŋwaʼa Sê? Ə́ mbou káa pə́ jî wéi ghíʼ mətəʉ Sê pə̂? 25Pei jí ńgó pə́ táa zʉ́ʉ lə̂ ləwʉ̂, mbiŋə gháp pə pəngyě kə́ nzôʼ gháp po. Gháp cʉ́ʼ ḿbə́ pə́ ghíʼ pəcwôʼ Sê*, ə́ tʉ̌-lə́pû. 26Ə́ wo lə́ pəpfû pi ə́ zʉ̂ʉ lə̂ ləwʉ̂, pei laa kə́ fú nfúŋ zə̂u yi Mə̌usə̂i lə ŋwaʼá, ə́ ndaghʼ ńdeʼtə́ zə̂u yi Sê lə lǎʼ lə́ zʉ́, ə́ yʉʼ yi có cuʼú ləghěi lə pə́ wó, mǒghʼ pə̂ mə́u péh? Sê lə laʼ lə́ zʉ́ ngô: “Mə̂ŋ, Sê Ábələhâm, ə́ mbə́ Sê Ísaghʼ, ə́ mbə́ Sê Yokôp.” 27Yěso kə̂ ncí ndáʼ ngô: “Ə Sê kâa pə̂ yé Sê pəpfû, a pə̌ pə̂ Sê pətəʉ. Pei lə̌i mə́ nkwâŋ pə́ ghíʼ pei kwaŋ lə̂, mə́i pei fǔ ngə̌ʉ gháʼate.”»
Ə ntǎghʼ yi ə́ lěi məcó
(Mat 22.34-40; Lks 10.25-28)
28Yěso gháp pə pêi pye pə̂ nzóŋə yə́rə́, cǒ nkeʼtə-ləpə̌ʉ Mə̌usə̂i* zûʼ ghíʼ Yěso pwǒr pə̂ shʉʼʉ lə́ ŋuu sadúsia*, ə́ ncʉ́ŋə́ mbáatə́ yé, ə́ ntúŋú yé ngô: «Ntǎghʼ* yi ə́ fú mbə́ yi jwǐ lə̂ məntǎghʼ Sê mə́tsəm, ə̂ warə́?» 29Yěso pwôr ngô: «Ntǎghʼ* yi ə́ fú mbə́ yi jwǐ ə̂ wo: “Pye Ísə́lahêl, pei zúʼ, Nde Tə́ wághʼə Sê zə́ghʼə́-zʉ́ lə̂ pə̌ Tsəpye. 30Kǒŋ Nde Sê zô lə̂ ntə̂ʉ ghô tsəm, lə̂ Zəghʼə zô tsəm, lə̂ kwaŋtə zô tsəm mbaa lə̂ mətəʉ mô mə́tsəm”. 31Ntǎghʼ* mbâatə pwô pə̂ ngô: “Ə́ pə́ ntúŋu ńgó o kôŋ fə̌r gho ŋuu-məsoŋ ghíʼ o koŋ tû-mbəʉ zô”, kâa có ntǎghʼ póu mbə̂ yé wó tə ndêi mwo mə́mbwô.»
32Nkeʼtə-ləpə̌ʉ Mə̌usə̂i* wêi lâʼ lə́ Yěso ngô: «Ə́ poŋ Cícye, ə̂ no lə́nə́ʉ ńgó Sê pə́ zə́ghʼə́-zʉ́, kâa cǒ Sê póu nkə́ mbə̂ yé wó. 33Ə́ poŋ ńgó wǒwó kôŋ yé lə̂ ntə̂ʉ yé tsəm, lə̂ jîno mbaa lə̂ mətəʉ mé mə́tsəm, ə́ mbou nkôŋ fə̌r ye ŋuu-məsoŋ ghíʼ a koŋ tû-mbəʉ yé. Ŋuu lə̌i ngʉ́ yə́rə́, ə́ fû mbôŋ ə́ nděi məzə̂u mə́tsəm mi a ŋə̂ lə̂ Sê, mbaa mənye mi a jwi ndághʼ ńgʉ poʼ Sê.» 34Yěso jwô ghíʼ a lǎghʼ jîno mbwôr, ə́ ncʉ́ʼ ndâʼ lə́ zʉ́ ngô: «Ə zô nkə́u cər Ləfou Sê kâa pyér sâghʼ yé.» Lə̂ fú mpfu wêi, káa ŋuu kə́ fə̂iʼ yé lə̂ ntúŋú Yěso có no.
No Nzaʼ-nkʉ gháp fou Ndavîd
(Mat 22.41-46; Lks 20.41-44)
35Yěso pə̂ ndə̂ Sê* mə́ njyêʼ pye zə̂u, ə́ ntúŋú ngô: «Ə́ lei gháʼá pəkeʼtə́-lə́pə́ʉ Mə̌usə̂i* laʼ ngô: Nzaʼ-nkʉ yi Sê lə ghʉ̌ ndaʼá mə́u lə̂ ngʉ́ ŋə́* â ŋuu ngər fou Ndavîd?» 36Məŋ mə̌ njî ngô: Ə Zəghʼə ndêi-lěi lə cʉ́ŋə́ fou Ndavîd, a lâʼ pə́ zʉ́* ngô:
Ə Nde Sê laʼ lə́ Nde ghaa ngô:
Tó ńnyáŋ lə̂ ndyəghʼə́ pô ghâa yi təʉ,
tə ndáʼ nkə́u mpfu yi məŋ nuŋú pəghaŋə mbəu pô sê,
o tághʼtə́ məku mô ndəu páp.
37Tû-mbəʉ fou Ndavîd lə fúŋ Nzaʼ-nkʉ yi Sê lə ghʉ̌ ndaʼá mə́u lə̂ ngʉ́ ŋə́* ńgó Nde ye. Mboʼ a fûŋ yé ńgó Nde ye, a pou mbə́ môu ye gháʼa gháʼá? Pye pi gháp yǎa mbə́ yʉʼ wó zûʼ no yi Yěso lǎʼ, ə́ fû mboŋə́ gháp gháʼate.
38Yěso kə̂ ncí njyéʼ gháp ngô: «Pei páa pəkeʼtə́-lə́pə́ʉ Mə̌usə̂i* shʉʼʉ. Gháp koŋ mâʼ pətəsə məndǐ ə́ ndǎghʼ ŋáa ńŋə̂i, ə́ nkôŋ ńgó pə tsêʼtə́ gháp lə̂ məkuʼ ndəu məzǎa, 39ə́ nkə́u məyʉʼ lətsei, ə́ nkôŋ lə̂ nyáŋ pə́ lə̂ yʉʼ pye jwǐ, ə́ nkə́u məndə̂ cûʼtə*, ə́ nkâŋ zâp yʉʼ pə́ mbi, 40ə́ ŋə́i ndâghʼ jîno ḿpfû məzə̂u pəpfǒghʼ-pəngyě, ə́ ncʉ́ʼ lə̂ sʉ́ʉtə́ Sê, ə́ ndaghʼ ləzâa tsâr, ə́ nfûtə nyôghʼ pye, Sê wo láʼ ŋə̂ zap ngwôʼ ə̂ tə̂i gháʼate!»
Ə zə̂u yi mpfǒghʼ-məngyě ŋə̌ mbó Sê
(Lks 21.1-4)
41Yěso pou shíʼ ńnyáŋ sê mbəʉ məshoŋə mi pə́ ŋə̂ məzə̂u laghʼ ńgúʼtə́ Sê cər wó, ə́ mə́ nâŋ ghíʼ pə́ côghʼ nkâp cər wó, pəghaŋə-zə̂u tə nzáa pə̂ ntó ńcôghʼ nkâp nzǎa cər wó. 42Cǒ mpfǒghʼ-məngyě kə̂ tô yé, ə́ mbə́ mbûŋ, ə́ ncóghʼ nkâp paghʼ pwô, ə́ yi kâa pə́i nkûʼ yé có zə̂u. 43Yěso jwô, ə́ fúŋ ngaŋə-jyêʼ-no* yé, ə́ ndǎʼ lə́ páp ngô: «Məŋ ndaʼ wéi, kwaʼ lə́nə́ʉ, mpfǒghʼ-məngyě wo, yi a mbûŋ lo côghʼ nkâp yʉʼ wó, ə́ nděi pye pə́tsəm. 44pəcó pye tə́i ntô záp ńcóghʼ pə̂ məzapə́ nkâp máp, lə́ ngwǒ lə̂ mpfǒghʼ-məngyě wo, a pə̌ tə mbə́ pə̂ mbûŋ, lə́ ə́ ncôghʼ yé zə̂u tsəm yi a tə̌i ngwǒ, ə́ yi mboʼ a təi ndághʼ ncí mbî.»
Currently Selected:
Máakúsʉ 12: NLA
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo