Génesis 37
37
1Papänin täranqan Canaánllachömi Jacob täkurqan.
José sueñunqankuna
2Kaychömi qellqashqa kaykan Jacobpä y tsurinkunapäpis. Chunka qanchis watayuq José kaykarmi papäninpa üshanta y cabranta mitsirqan Bilhapa y Zilpapa wamran kaq wawqinkunawan. Bilhawan Zilpaqa papäninpa sirviq warminkunam kayarqan. Joséqa papänintam imaypis willaq wawqinkuna mana allikunata rurayanqanta.
3Rukuyayninchö tsurin José yurishqa kaptinmi Israelqa#37.3 Israelqa Jacobpa jukaq jutinmi karqan. wakin tsurinkunapitapis payta mas kuyarqan. Tsaymi kuyayllapä allinnin tünicata ruraparqan. 4Joséta papänin mas kuyaptinmi wawqinkuna pasaypa chikirnin rabyashqalla parlapäyaqpis.
5Juk kutichömi wawqinkunata sueñunqanta José willarqan. Tsaymi wawqinkuna masrä chikiyarqan. 6Willarmi nirqan: <<Sueñunqäta willayäshayki. 7Sueñuynïchömi chakrachö trïguta liyakuykarquntsik. Liyakuykanqä tersum kikillan ichikurkushqa. Qamkunapa tersuykikunam ichiraykaq tersüman tumaypa witiykur imayka adoraqnö umpuraykäyashqa>>.
8Tsaynö sueñunqanta willaptinmi wawqinkuna masrä chikir niyarqan: <<Tsaynö nirqa ¿mandayämaq rey kaytaku yarpaykanki? ¿Podernikichö tsaräyämänaykipä kanqantaku yarpaykanki?>>
9Tsaypita yapay sueñunqanta wawqinkunata willarmi José nirqan: <<Sueñuynïchömi rikarqü rupaypis, killapis y chunka juk qoyllurkunapis noqaman umpuraykäyämuqta>>.
10Tsay sueñunqanta papäninta y wawqinkunata willaptinmi Joséta papänin ollqutupar nirqan: <<¿Imata yarpartä tsaynö willayämanki? ¿Noqapis mamaykipis wawqikikunapis qamman qonqurikayämunäpä kanqantaku yarpanki?>>
11Tsaynö willaptinmi wawqinkunaqa masrä chikiyarqan.#Hech. 7.9. Papäninnam yarpachakur nirqan: <<¿Imapärä tsurï tsaynö sueñuykushqa?>>
Joséta wawqinkuna rantikuyanqan
12Juk kutim Josépa wawqinkuna Siquem partiman aywayarqan papäninpa üshankunata y cabrankunata mitsiyänanpä. 13Tsaymi Joséta papänin Israel nirqan: <<Siquemchömi wawqikikuna üshantsikta mitsiykäyämun. Imanö kaykäyanqantapis musyanäpä aywar watukaramuy>>.
Tsaynö niptinmi José nirqan: <<Aywä, papä>>.
14Tsaymi papänin nirqan: <<Wawqikikuna y ashmantsikkuna imanö kaykäyanqantapis shumaq rikapakaskamur ras kutimunki willamänaykipä>>.
Tsaynö nirmi Hebrón pampapita Israelqa Joséta mandarqan Siquem jirkakunaman. 15Tsaymi Siquem partiman chaykur wawqinkunata ashir pantakashqa purirqan. Tsaynö puriykarmi juk runawan tinkuskirqan. Tsaymi Joséta tapurqan: <<¿Imatatä ashiykanki?>>
16Tsaynö tapuptinmi José nirqan: <<Wawqïkunatam ashiykä. ¿Manaku rikallarquyki üshakunata maychö mitsiykäyanqantapis?>>
17Tsaymi nirqan: <<Paykunaqa kaypita aywakuyashqanam. <Dotán lädupa aywakushun> nir willanakuykaqtam wiyarqü>>.
Tsaypita José aywarmi wawqinkunata Dotánchö tarirqan.
18Joséta karuman rikaskirmi wanutsiyänanpä wawqinkuna willanakuyarqan. 19Tsaymi juknin jukninpis niyarqan: <<¡Taqä sueñupäkuq chölu shamuykan! 20Juklla wanuskatsir ayanta pipis mana tarinanpä pözuman jitarpushun. Papänintsiktam nishun: <Josétaqa chucaru ashmakunam mikuyashqa>. Tsaynö ruraskishqa mä sueñunqannökush kanqa>>.
21Tsaynö willanakuyanqanta wiyaykurmi wawqin Rubénqa imanöpapis salvayta munar nirqan: <<Ama wanutsishuntsu. 22Wawqintsikpa yawarninta jichanantsikpa rantinqa kay desiertuchö kaykaq pözuman jitarpushun. Ama kikintsikqa wanutsishuntsu>>.
Rubénqa tsaynö nirqan Joséta imaykanöpapis kawaykaqta papäninman kutitsiyta munarmi.
23Wawqinkuna kaqman José chaykuptinnam kuyayllapä tünicanta lloqtiskatsir 24tsaki pözuman jitarpuyarqan. 25Tsaypitanam mikuyänanpä jamaskiyarqan. Mikuykäyanqanchönam rikaskiyarqan atskaq ismaelita runakuna shamuykäyaqta. Paykunam Egiptuchö rantikuyänanpä camëllunkunawan Galaadpita apaykäyarqan perfümikunata, balsamuta y mïrrata.
26Tsaymi wawqinkunata Judá nirqan: <<Wawqintsikta wanuskatsir mana musyaq tukunqantsikwan ¿imatatä jipishun? 27Wanutsinantsikpa rantinqa taqay ismaelita negociantikunata rantikurishun. Jinachöpis payqa wawqintsik karmi yawarnintsik kaykan>>.
Judá tsaynö niptinmi wawqinkuna <<allim kanman>> niyarqan.
28Madiánpita ismaelita negociantikuna päsaqkunatam pözupita Joséta jipiskamur ishkay chunka (20) siclo#37.28 Juk siclo qellayqa juk killa arur gänanqannömi karqan. qellaychö rantikuyarqan.#Hech. 7.9. Tsaynöpam Josétaqa Egiptuman apayarqan.
29Pözuman Rubén kutir Joséta mana tarirmi pasaypa llakikurnin röpantapis rachirqanrä. 30Tsaypitanam wawqinkuna kaqman aywaykur nirqan: <<¡Pözuman wiñanqantsik chölu manam kannatsu! Kanan ¿imatatä rurashä?>>
31Tsaymi cabrata pishtaskir Josépa tünicanta yawarwan pichurkur 32papäninman apatsiyarqan. Apaqtam yätsiyarqan willananpä: <<Tsunyaq jirkachömi kay tünicata tariyarqü. Papä, tsurikipa tünican kanqanta o mana kanqantapis shumaq reqiy>>.
33Chaykur rikatsiptinmi tsurinpa tünicanta reqiskir Jacob nirqan: <<¡Kayqa tsurïpa tünicanmi! ¡Jirkachö chucaru ashmakunachi Josétaqa mikuyashqa!>>
34Tsaymi llakikurnin röpanta rachir lütu röpatana jatikurqan. Tsurin wanunqanta mana qonqarmi alläpa waqar purirqan. 35Tsurinkuna warmipis ollqupis shoqayaptinmi masrä waqar nirqan: <<Wanur paywan tinkunqäyaqmi tsurïtaqa lütushä>>.
36Madianita negociantikuna Egiptuman Joséta chaykatsirmi Faraónpa wardiankunapa capitannin Potifarman rantikuyarqan.
Currently Selected:
Génesis 37: qxo
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2002, 2008, Wycliffe Bible Translators, Inc. All rights reserved.