Jọn 4
4
ẠJizos rꞌạnir ọlo aSameria
1AFarisi phọ ụnaghan ni mọ ạJizos mạmoogh ạḅile raburogh mụum bụmatuan kapuemi Jọn. 2Ọkar ọghaaph igey, ọbo ạbumatuan phọ ạJizos kụ uwurogh ghan bọ mụum mọ, kạ́Jizos rꞌaloor ọdi. 3Mem dị ạJizos ạnaghan ịpe bịdi rọkaaph ghan bọ, ọdi ạḍua ni eelhe phọ aJudia ạḅile aḅula ẹpe eelhe aGalili. 4Ọdi akiton eten aSameria phọ eḍighi bọ osoph osoor phọ.
5 #
Emi 33.19; Jos 24.32 Kụ ọdi aru asi ẹmha aSameria dị oghol mọ ạSaikar, etuman ekulha ade dị ạJekob ạngaani Jọsef, ọony phọ ọdi. 6Kụ aghuḍia ạJekob odi sịphe phọ. Ogbo ootaany ạJizos ạghi ni ạrol ude ọgbal aghuḍia phọ, ịdi eḍighi bọ aloor ọdi mẹkporokporo loor erelhe phọ.
7Oniin ạnir ọlo aSameria aru ni ọkpa ạmuum, kụ ạJizos ạḅeni mọ, “Ụngaani mụum mị ụpughol.” 8(Mem mọ ọphon phọ ạbumatuan phọ ọdi mọghi ogho eḍien ẹpe ẹmha phọ.)
9 #
Ẹzra 4.1-5; Nehe 4.1, 2 Kụ ạnir phọ apuru Jịzos mọ, “Iḍighi ika kụ nạ rụlom bọ ịmi mụum ọphughol phọ? Nạ phọ ọnyo aJu, kụ mị ọlo aSameria.” (Kụ ạri ạbuo aJu rꞌạbuo aSameria rótiom ghan eniin ẹkpa.)
10Kụ ạJizos ạphagharanaan nyọdi mọ, “Mụghumo nạ ulegheri ni inmo dị Ẹnaan rẹngo ghan, ḅịle rꞌoye phọ rạlhom bọ nyịna mụum ọphughol phọ, nạ mụlom ghụn mụum dị kạngo ghuḍum kụ ọdi mụngo nyịna.”
11Kụ ạnir phọ ạḅeni nyọdi mọ, “Oye phọ, aghuḍia phọ ạkel li, kụ nạ ọ́moogh kẹn ịyaar ọkpaam ạmuum mọ. Nạ kạki ẹghen kụ ạmoogh bọ mụum mọ kạngo bọ ghuḍum mọ? 12Nạ kụ upu Jẹkob, ogbogh ọde phọ ayira, ọpo rꞌạnmuny phọ rꞌịnam mọ ọdi ọphughol ghan bọ mụum aghuḍia phọ ọphon yoor molhe bọ erua phọ ḍụghum?”
13Kụ ạJizos mọ, “Tọrobo oye lọ ạphughol mụen phọ, ạmuum kạḅile ni ạpu nyọdi. 14Kụ oye lọ ạphughol mụphe phọ mị kạngo bọ nyọdi kạ́moogh mun ẹephua ạmuum kꞌagee-pọ. Ạmuum mọ mị kạngo bọ kaḍighi ọonu adir loor oye phọ, kụ akil ghan ạngo ghuḍum kꞌagee-pọ.”
15Kụ ạnir phọ ạḅeni nyọdi mọ, “Oye phọ, ụngaani ịmi mụum mọ ạmuen phọ, ọbo ạmuum kụphu ghan bọ kẹn ịmi, bịn mị ạwile ooghiraan eten phọ ẹphen oru ghan ọkpa ạmuum.”
16Kụ ạJizos ạḅeni nyọdi mọ, “Kịa ạmagh olhom mọ ạna kụ aru.”
17Kụ ạnir phọ mọ, “Mị olhom ụ́moogh.”
Kụ ạJizos mọ, “Ịduon nạ ạḅem bọ mọ ‘mị olhom ụ́moogh’ phọ, nạ ạkaaph ni igey. 18Nạ mạal ghan bọ oogh ilom, kụ ọpo rꞌạna edianaan bọ nyịidipho kólom ạna. Ịphen nạ rạkaaph bọ igey phọ ni.”
19Kụ ạnir phọ mọ, “Oye phọ, mị ragbi mọ nạ oyil Ẹnaan ni. 20Ạburude ạburude phọ ayoor uuseeny ghan Ẹnaan sịen eegum mọ ẹphen, kụ nyina ạbuo aJu phọ ẹḅem mọ aJeruselem kụ esi dị ẹkpe ooseeny ghan Ẹnaan.”
21Kụ ạJizos mọ, “Nịr phọ, umeeraam ịmi. Amem retu ni, dị nyina kẹ́tol ghan mun sịen eegum mọ ẹphen, ḅịle mọ ẹpe Jeruselem bịn kụ eeseeny ghan Ọde phọ. 22Nyina ạbuo aSameria reeseeny ghan rạraar dị nyina ílegheri. Yoor ạbuo aJu phọ rooseeny ghan rạraar dị yoor olegheri, ịdi eḍighi bọ ạpeleeny kạḍua esi ạbuo aJu kụ atu. 23Amem retu ni, kụ mẹkar ri ẹteeny, dị bụphe ọmaar bọ ooseeny ghan kọsighe uwaloor rꞌigey kụ ọkuami ooseenyom Ọde phọ. Ọdo phọ awe phọ ạbuen kụ ẹdi Ọde phọ rạwa ghan bọ mọ ooseeny ghan nyịno. 24Ẹnaan phọ uwaloor, kụ bụphe rooseeny ghan bọ nyọdi ọkuami ooseenyom ghan nyọdi uwaloor rꞌigey phọ.”
25Kụ ạnir phọ ạḅeni nyọdi mọ, “Mị alegheri ni mọ aMesaya phọ ratu ni, ọpo oghol bọ mọ aKraist phọ. Mem dị ọdi aru asi, kagananami ni oomo ạraraar uḍeenaan iyira.”
26Kụ ạJizos mọ, “Mị phọ rꞌạna rẹkaaphan bọ kụ ọdi phọ ni.”
27Mụen kụ amem dị ạbumatuan phọ ọdi origheel, kụ iḍigh ni iikia esi ạbidi mọ ạnir-ephoph rꞌọdi kụ rọkaaphan ghan ọghaaph, kụ ọlo rꞌoniin ọnyo ạbidi ópuru ạnir phọ mọ, “Nạ rạwa ghan eeghe ịyaar?” ọḅile kẹn ópuru Jịzos mọ, “Iḍighi bọ ika kụ nạ rꞌọdi rẹkaaphan bọ?”
28Kụ ạnir phọ ạwile oko ạmuum mọ ọdi, kụ aḅula ẹpe ẹmha phọ ạḅeni ghan we phọ mọ, 29“Itu ẹmiin aani oye dị mụḅeni ịmi oomo phọ ịpe mị maḍighi ghan bọ. Oye phọ ọphon kụ káMesaya phọ ḍụghum?” 30Kụ bịdi oḅerenu ẹpe ẹmha phọ oru ọteeny ạJizos.
31Mem mọ ạmuen phọ, ạbumatuan phọ ụuḅereghian ghan Jịzos mọ, “Ọtughemia, le ịyaar.”
32Kụ ọdi ạḅeni bịdi mọ, “Mị ạmoogh ni eḍien olhe dị nyina ílegheri.” 33Kụ oniin apuru ghan nyoniin mọ, “Oye mạsighe eḍien atuomaan nyọdi ḍụghum?”
34Kụ ạJizos ạḅeni bịdi mọ, “Eḍien ạmi, oḍighi ghan oḍighi ọpo urom bọ ịmi rꞌọmadan oḍighi phọ ọdi. 35Nyina ḍịen kụ rẹḅem ghan bọ mọ, ‘Ibugha phọ esugha inya ụnwanyu.’ Mị rịḅeni ghan inyina mọ ịmaar ephogh iizo phọ. Eḍien phọ mesoor, kụ amem ibugha phọ mẹteeny. 36Obughaam ibugha phọ roonmo ghan ni ruunmo. Ọdi raakpomoghi ghan iimuma dị kẹmoogh ghuḍum kꞌagee-pọ, pịdi ọpo aḅeph bọ rꞌọpo abugha bọ ọḅophoghan oboh iboh. 37Ịdipho ọḅem bọ agey ni mọ, ‘Oniin raḅeph, ọphori phọ rabugha.’ 38Mị mirom inyina ọghi ibugha ozo phọ nyina íḍighi aani bọ. Ạbunon awe kụ uḍighi, kụ nyina rẹmooghom sụo iiḍighi phọ ạbidi.”
39Ịbadi awe ẹmha aSameria umeeraam ni Jịzos loor ịpe ạnir phọ ạghaaph bọ mọ, “Ọdi mụḅeni ịmi oomo phọ ịpe mị maḍighi ghan bọ.” 40Loor ịphen phọ mem dị ạbuo aSameria phọ oru bọ ọteeny Jịzos, bịdi ụuḅereghian ni nyọdi mọ ạrolan rꞌạbuno. Kụ ọdi ạrol ẹpe ịyal aḍughul-otu.
41Ịbadi ạbunon awe umeeraam ni loor esi ọghaaph phọ ọdi, 42kụ ọḅeni ạnir phọ mọ, “Nyịidipho yoor ụ́tuan ịpe nạ ạghaaph bọ bịn kụ omeeraam bọ. Yoor rꞌaloor ayoor mọnaghanan nyọdi, kụ yoor olegheri ni mọ ọkar igey ni ọdi kụ Ọpelia aḅirini phọ.”
ẠJizos aakonom mọony oye adom ạgomet
43Ịyal aḍughul-otu reten, kụ ạJizos ạḍua ạghi Galili, 44#Mat 13.57; Mạk 6.4; Luk 4.24ịdi eḍighi bọ ọdi rꞌaloor ọdi mạḅem ni mọ, “Oyil ẹmha rákuan ghan.” 45#Jọn 2.23Mem dị ọdi asi bọ Galili, aweye phọ ụloghoma ni nyọdi, ịdi eḍighi bọ bịdi rꞌaloor ạbidi ụghi aani ni ẹpe Jeruselem olhe ẹyaal ọphel otene phọ kụ ọrol ẹpe ọmiin oomo phọ ịpe ọdi aḍighi yogh bọ mem mọ ẹyaal phọ.
46 #
Jọn 2.1-11
Kụ ạJizos ạḅile aḅula Kena, ẹpe eelhe phọ aGalili, ẹpe ọdi ạrol bọ kụ akiton bọ mụum mọ aḍighi miim. Ẹpe phọ oniin oye adom ạgomet ạrol li, dị ọony ọdi dị odi Kạpaniom ạrol emoon. 47Mem dị ọdi ạnaghan bọ mọ ạJizos mạḍua Judia atu Galili, ọdi ạghi ni ạteeny nyọdi kụ ạaḅereghian mọ ọdi ạghi aakonom mọony dị ropogh ẹpughol ạmuum. 48Kụ ạJizos ạḅeni nyọdi mọ, “Rꞌoniin ọnyo anyina kámeeraam, emuton lọ ọdi mạmiin ịiḍaany rꞌareḍeenaan.”
49Kụ oye phọ ạḅeni nyọdi mọ, “Oye phọ, seseeny, nụun aru kụ egbi osophaan ọony phọ ạmi.”
50Kụ ạJizos ạḅeni nyọdi mọ, “Kịa. Ọony phọ ạna maḍum.” Oye phọ ameeraam ni ikpo ọnhu phọ ạJizos ạḅeni bọ nyọdi kụ ạghi. 51Ịdipho ọdi ạḍua bọ rạki, abutelhedom ọdi ozuan nyọdi eten kụ ọḅeni mọ ọony phọ ọdi maḍum.
52Kụ ọdi apuru bịdi mem mọ aloor ọony phọ emiigh bọ ophoorom mọ. Kụ bịdi ọḅeni nyọdi mọ, “Oniin asuo ootaany iḍue phọ ạḍiphe eten bọ kụ ẹdi osipheeny phọ ạḍua bọ.” 53Kụ ọde phọ alegheri mọ emeelom ni egina phọ amem mọ ạJizos ạḅeni bọ nyịno mọ, “Ọony phọ ạna maḍum.” Kụ ọdi rꞌoomo ọto ọdi omeeraam.
54Ịphen kụ ịiḍaany dị ạJizos aḍighi amuneniom ịyal, mem mọ ọpo ọdi ạḍua bọ ẹpe Judia aru Galili.
Currently Selected:
Jọn 4: ẠḌI
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS