Jẹnẹsis 8
8
Oba re Oghwe na
1Ẹkẹvuọvo Ọghẹnẹ da rhe karohọ Noa vẹ eranvwe rẹ aghwa na ejobi kugbe uchuru ejobi re vẹ ọye gba ro evun rẹ okọ na Ọghẹnẹ da vwẹ odju rhe nẹ o gbe dju enu rẹ akpọ na, ame na de rhi rhirẹn, 2ogbugbu rẹ ame na da tangbe, evakpo rẹ obo odjuvwu na ejobi de rhurhu, osio rọ rhọ nẹ enu cha da daji, 3ame na de si reyọ kọke kọke. Vwẹ oba rẹ ẹdẹ ujori gbẹ ujuvẹ gbẹ ihwe re, ame na da rhe kpọ; 4vwẹ emeranvwe rẹ ighwrẹ, vwẹ ẹdẹ rẹ ihwe gbẹ ighwrẹ rẹ emeranvwe na, okọ na da rhe kpọ muotọ vwẹ enu rẹ ugbenu ri Ararat. 5Ame na kẹ ẹkpọ ẹkpọ bẹsiẹ ro rhi vwo te emeranvwe rẹ ihwe vwẹ ẹdẹ rẹ ẹsosuọ rẹ emeranvwe na, enu rẹ igbenu na ejobi da rhe kpọ phia.
6Vwẹ ẹdẹ ujuvẹ vwọ wan nu Noa de rhie evakpo rẹ okọ na rọ kare na, 7o de siobọ nẹ okpemu, o da rha kpenẹ kpenẹ bẹsiẹ rẹ ame na rhe vwọ kpọ nẹ akpọ na. 8Ọ da rhoma siobọ nẹ inekuku ro re ni sẹ ame na kpọ nẹ otọ na re; 9ẹkẹvuọvo inekuku na mrẹ asan rọ rhan mu-u, ọ da rhoma rhan bro rhe vwẹ evun rẹ okọ na, kidie yẹ ame na ji phoro enu rẹ otọ na ejobi. Etiyin ọ da riẹn obọ rọye vwọ reyọ phihọ evun rẹ okọ na. 10Ọ da rha hẹrhẹ ẹdẹ ighwrẹ efa, ọ ke rhoma siobọ nẹ inekuku na nẹ evun rẹ okọ na; 11inekuku na da rha bro rhe vwẹ ovwọnvwọn, e vwo no, o mu ọbe rẹ olive ọkpokpọ vwọ hwunu, Noa ke rhe riẹn nẹ ame na kpọ nẹ akpọ na re. 12Ọ ke je rhoma hẹrhẹ ẹdẹ ighwrẹ efa, ọ da rhoma siobọ nẹ inekuku na, ọ gbe rhoma rhan bro rhe ọfa-a.
13Vwẹ evun rẹ ikpe uri erha gbẹ ọvo, vwẹ emeranvwe rẹ ẹsosuọ, ẹdẹ rẹ ẹsosuọ rẹ emeranvwe na, ame na da kpọ nẹ otọ na kakare; Noa da fan uwevwi rẹ okọ na nu, o vwo ni, nighe, enu rẹ otọ na ejobi kpọre. 14Vwẹ emeranvwe rivẹ, vwẹ ẹdẹ ujuvẹ gbẹ ighwrẹ rẹ emeranvwe na, otọ na da kpọre. 15Ọghẹnẹ da ta ki Noa, 16Gba yan phia nẹ evun rẹ okọ na, wẹ te aye wẹn, vẹ emọ wẹn te eya rẹ emọ wẹn 17Reyọ kemu kemu ejobi ro vwo arhọ re vẹ owẹ gba herọ vwẹ evun rẹ okọ na ejobi– ephra kugbe eranvwe kugbe emu kemu ri kpono vwẹ enu rẹ otọ na rere ayen mrẹ asan vwiẹ buebu vwẹ enu rẹ akpọ na, re ayen mo re ayen bu phihọ vwẹ enu rẹ akpọ na. 18Kọye Noa da yan phia, ọ vẹ emọ rọye te aye rọye te eya rẹ emọ rọye 19Keranvwe keranvwe, kemu kemu ro kpono, kọphra kọphra, kemu kemu ro yan vwẹ akpọ na, e da yan otuotu nẹ evun rẹ okọ na rhe.
20Noa da so agbada kẹ Ọrovwohwo, ọ da reyọ eranvwe keranvwe ro tete oma, kugbe kọphra kọphra ro tete oma, o de ze izobo rẹ ẹtorhẹ vwẹ enu rẹ agbada na. 21Ọke rẹ Ọrovwohwo vwo nyo ọnrhe ghwoghwo rẹ izobo na, Ọrovwohwo da ta vwẹ udu rọye, Me gbe harhe otọ na ọfa vwi fiki rẹ ohwo-o, kidie iroro rẹ evun rọye nẹ ọke-emọ rhe pha brabra, eyẹ Me gbe ghwọrọ emu kemu ro vwo arhọ re Me mare ọfa-a. 22Ọke rẹ akpọ na dia krite na, ọke ekankọn kugbe ọke orhọ ekpae kugbe oheri, ọkeuvo kugbe ohwahwa, uvo kugbe ason se re bẹdẹ-ẹ.
Currently Selected:
Jẹnẹsis 8: UBV77
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Bible in Urhobo © United Bible Societies, 1977.