Masese 30:24-33

Ezali na banyama mike minei na mokili, oyo, nzokande, ezalaka na bwanya mingi : Bafurmi : ezali bikelamu oyo ezanga makasi, kasi ebongisaka bilei na yango na tango ya elanga ; bampanya ya zamba : ezali bikelamu oyo ezanga nguya, kasi etongaka bandako na yango kati na mabanga ; mabanki : ezalaka na mokonzi te, kasi nyonso etambolaka nzela moko na molongo ; moselekete : loboko ekoki kokanga yango, kasi ezalaka kati na bandako ya bakonzi. Ezali na banyama misato oyo etambolaka malamu, ata kutu minei oyo edendaka soki ezali kotambola : Nkosi : nyama ya makasi kati na banyama, ezongaka sima te ata liboso ya nani ; soso ya mobali, ntaba mobali, mpe mokonzi oyo azali kotambola liboso ya mampinga na ye. Soki osali bozoba mpo na komikumisa, mpe soki ozali na makanisi mabe, tia loboko na monoko na yo, pamba te kobeta-beta mabele ebimisaka manteka, kobeta zolo ebimisaka makila, mpe kotumbola kanda eyeisaka koswana.