Maatteeo 4
4
Ĩttĩman ꞌThĩttaanĩ Yeesu
(Tigiil Maarko 1:12-13; ꞌLuuka 4:1-13)
1Ma baa urutaa cĩnnĩ, ũũhĩ Lorii ꞌcĩ Ẽllẽẽmĩth Yeesu horrwaa ꞌcĩ õdõhõhĩĩ kak, hũũk hĩttĩman habuui cĩ loriẽẽt ꞌcĩg abathĩ.#4:1 Habu cĩ loriẽẽt ꞌcĩg abathĩ: Ĩĩn ciee habu cĩ loriẽẽt ꞌcĩg abathĩ ꞌcĩ haĩ ꞌthaar cĩgĩnnĩg ꞌThĩttaan. Baa ĩĩn habuui cĩ loriẽẽt ꞌcĩg abathĩ ho, aajĩlõ hẽẽtahujjieen ꞌcĩ baa aĩnanaak aajĩlẽẽt ũgĩ hũtũbũrĩt Nyekuc, nĩngĩtĩ iiggiaĩ Nyekuci ĩhõõggõ hẽẽtahujjieen. Tigiil ꞌBuuk cĩ Terethiitto 12:7-9. 2Baa ẽdẽta#4:2 Ẽdẽta eeta eleeti ꞌgẽẽna: Baa gõõng ẽdẽta eeta cĩg ꞌJudeei eleeti ꞌgẽẽna waathinnioohĩ ũgẽẽgĩ, hatĩ alaiini eleeti cĩggĩĩng hĩ Nyekuc. nẽẽ ẽlẽ ꞌgẽẽna waathinniook hẽẽn ꞌwec hĩ baalinniook hẽẽn ꞌwec nẽ ikia adak magĩthĩ ĩnõõnnõ gẽrrẽẽt. 3Nĩngĩtĩ aku attĩmanĩ ꞌThĩttaanĩ ĩnõõnnõ annẽẽkĩ, “Má ĩĩnĩ nii Ngeertĩ Nyekuci dĩdĩ, duhaak biyyiẽẽn iccig hutuhuyyi hĩĩtõ ũbũnẽẽta.”
4Ẽdẽcĩ Yeesu anneek, “Eheeddi ꞌBuuhaa cĩ Nyekuci aĩ, ‘Aitiõõ ẽẽtĩ hõllõngaa arũgĩ ꞌgẽẽna diooni. Arũgĩ nẽẽ hĩnĩngĩtĩ thooꞌthiok vẽlẽk ꞌcĩg aduha Nyekuci.’ ”#Tigiil ꞌBuuk cĩ Ditoronomi 8:3
5Ma ho, õtõdĩ habuui cĩ loriẽẽt ꞌcĩg abathĩ Yeesu ꞌCieeth cĩ Nyekuci#4:5 ꞌCieeth cĩ Nyekuci: Baa ĩĩn ꞌCieeth cĩ Nyekuci hõdẽẽthõng dioo ꞌJeruꞌthalẽma, aꞌnyak ꞌcieeth ciee nĩngĩtĩ hõdẽẽthõng ꞌcĩ ĩbbõõrĩkĩ paadĩrꞌnya Nyekuc ꞌgaarrieenit. Baa aaĩ Nyekuci bulẽẽtta ꞌCieethaa cĩnnĩ Ngaatĩ Aꞌngirannii nẽ Ẽllẽẽmĩth Gẽrrẽẽt ko. Paadĩr cobbi dioo ꞌcĩ aduhun Nĩngĩtĩ Aꞌngirannii ho, õkõõĩ biyyi cĩg ꞌgaarrieettak, hátĩ hũũk hũtũngeek Nyekuci ꞌthẽccanẽẽt cĩg eetuk. Tigiil thõõth icci ꞌBuuhaa cĩ Levitiko 16 hĩ ꞌBuuk cĩ Ebereei 9. ꞌJeruꞌthalẽma nẽ aaꞌnyĩk hĩbĩl ngaatĩ ĩĩn ꞌthilo. 6Ma nĩngaata, ĩttĩman ĩnõõnnõ ĩĩnnĩk, “Má ĩĩnĩ nii Ngeertĩ Nyekuci dĩdĩ, dhuhi da ngaati, hĩnĩngĩtĩ eheeddi ꞌBuuhaa cĩ Nyekuci aĩ,
“ ‘Aduhaak hatĩ Nyekuci aajĩlẽẽt cĩgĩnnĩg
halaamtaii athĩnĩĩ cĩggĩĩng,
hátĩ hiittiõõ hõllõngaa aduulli bẽẽ ꞌthoo.’ ”#Tigiil ꞌBuuk cĩ Tegellwaanu 91:11-12
7Ẽdẽcĩ Yeesu anneek, “Eheeddi ꞌBuuhaa cĩ Nyekuci buúk aĩ, ‘Ma hattĩmani Nyekuc Makayyioohit cunni!’ ”#Tigiil ꞌBuuk cĩ Ditoronomi 6:16
8Ma tarĩ ho, ũũhĩ habuui cĩ loriẽẽt ꞌcĩg abathĩ ĩnõõnnõ muuraa ꞌcĩ uuni kĩdak nẽ eteretheek ĩnõõnnõ habuccieeꞌnya cĩg lootu hĩ makaaꞌthĩt cĩnĩĩng vẽlẽk. 9Nẽ uduhaak ĩĩnnĩk, “Occa haaꞌnyii naa nganiit loonyin iccig vẽlẽk, hatĩ akanneekaa huruꞌnyia nẽ ubuluthaanĩ.”
10Ẽdẽcĩ Yeesu anneek, “Maꞌnyanĩ ngaatĩ haayyi naana ꞌThĩttaan!#4:10 ꞌThĩttaan: Ĩĩn ꞌThĩttaanĩ habu cĩ aajĩlẽẽt baag abũrĩ Nyekuc nẽ itiggia Nyekuci ĩhõõggõ hẽẽtahujjieen. Tigiil ꞌBuuk cĩ Terethiitto 12:9. Eheeddi ꞌBuuhaa cĩ Nyekuci aĩ, ‘Buluth Nyekuc Makayyioohit cunni nẽ idticanoothihuu ĩnõõnnõ diooni.’ ”#Tigiil ꞌBuuk cĩ Ditoronomi 6:13
11Nĩngĩtĩ ũũnnĩkĩ habuui cĩ loriẽẽt ꞌcĩg abathĩ ho, Yeesu nẽ iita eelito aajĩlẽẽta ĩnõõnnõ haanytĩk ꞌgii ꞌcĩ adiim nẽẽnĩ.
Iꞌthianaaĩ Yeesu dtiic cĩnnĩ
(Tigiil Maarko 1:14-15; ꞌLuuka 4:14-15)
12Ma baa ĩthĩk Yeesu ngaatĩ aarĩhõõthĩhĩ Yõaannẽ Batitta baabuuth, ikia ũũk nẽẽ ĩĩcĩ ꞌGalileea. 13Ma baa ũtũngeek nẽẽ Naaꞌtharẽt, ũũk aau Kapernauma ngaatĩ abakꞌthõõ hĩ bũlũc looccaa cĩ ꞌThebuluni hĩ Navtali. 14Nĩngĩtĩ aku ĩĩnnĩ thõõth cĩ Nyekuci baa aduha põrõvẽtaacĩ Iꞌthaia dĩdĩ baa aĩ,
15“Niig loonyini cĩg ꞌThebuluni hĩ Navtali,
niig loonyini ꞌcĩg aattĩg ꞌgõõlaa ꞌcĩ õkõ ĩĩcĩ bũlũc cĩ hidioo cĩ ꞌJõrdanĩ!
Thĩhõõ nii ꞌGalileea, lõõcĩ cĩ eet ꞌcĩg hõllõngaa ĩĩn ꞌJudeei!
16Tananga aattĩg eeta cugunnig muguratõõ,
acĩn hatĩ nẽẽg lanyit ꞌcĩ õõppẽr.
Tananga aattĩg nẽẽg muguraa cĩ daahĩthõõ,
attũlla hatĩ lanyit ĩhõõggõ.”#Tigiil ꞌBuuk cĩ Iꞌthaia 9:1-2
17Ngaanĩngĩtĩ kõr niccia, iꞌthianaaĩ Yeesu ngaatĩ irrioonĩkĩ eet annẽẽkĩ, “Ũtũngteek ꞌthẽccanẽẽt cugguung, hĩnĩngĩtĩ aau habuccieet cĩ hẽẽtkujjieen ojoonu.”
Ũtũvvũ Yeesu nuyyiook ꞌcĩg oou
(Tigiil Maarko 1:16-20; ꞌLuuka 5:1-11)
18Kõr umwa, baa õvvõ Yeesu dẽmẽtaa cĩ Bũlũc cĩ ꞌGalileea. Ma ho, ĩcĩn ꞌgõtõn ꞌramma ꞌcĩg adhuheek nyelelewwa bũlũcatõõ, hĩnĩngĩtĩ baa ĩĩn nẽẽg eet ꞌcĩg aggam ulugo. Baa haĩ umwa ꞌThimõõnẽ nẽ hĩĩtõ umwa Andrea. Haĩ ꞌThimõõnẽ ꞌthaar ũgĩ Pẽẽtũrũ. 19Nĩngĩtĩ annẽẽkĩ Yeesu ĩhõõggõ, “Unuyyiaangu nganĩĩta nẽ hatĩ haaꞌnyuung ĩĩtõ eet ꞌcĩg alũtaannu eeta.” 20Ma hĩdĩĩkoothong, ũtũngteek nẽẽg nyelelewwaꞌnya cĩggĩĩng nẽ ũnnẽẽcõ ĩnõõnnõ.
21Ma baa nga õvvõ Yeesu nĩngaata, ikia ĩcĩn ꞌgõtõn ꞌramma tarĩ, ꞌJeemith hĩ Yõaannẽ ꞌcĩg baag akũmaneek nyelelewwaꞌnya cĩggĩĩng haahũlatõõ, hĩ maaꞌnyĩ cĩnĩĩng ꞌThebedeeo. Nĩngĩtĩ avvaanĩ Yeesu ĩhõõggõ buúk. 22Ma hĩdĩĩkoothong, ũtũngteek nẽẽg haahũl hĩ maaꞌnyĩ nẽ ũnnẽẽcõ Yeesu.
Anũ lothippiꞌnya Yeesu
(Tigiil ꞌLuuka 6:17-19)
23Baa õvvõõĩ Yeesu looc cĩ ꞌGalileea vẽlẽk alliman eet ꞌCieethinii cĩg Laiittak#4:23 ꞌCieeth cĩ Laiitto: Baa gõõng aꞌnyak eeta cĩg ꞌJudeei ꞌCieethi ꞌcĩg mẽẽlĩg cĩg Laiittak ꞌtaaũnnioohĩĩ cĩggĩĩng. Baa gõõng aluttiaak nẽẽg ꞌCieeth cĩ Laiitto Kõrraa cĩ ꞌYiommaanõ halaacõ Nyekuc nẽ itigiilito Thõõth cĩnnĩ. nẽ irrioon nyeemuut ꞌcĩ abũnnaa#4:23 Nyeemuut ꞌcĩ abũnnaa: Õthõõth Nyeemuut ciee Yeesu Krĩstõ baa aku ũũny ꞌthẽccanẽẽt cĩggaac daahĩthaa cĩnnĩ hurucceea nẽ aaꞌnyeet rũgẽt ꞌcĩ aalla ooo. cĩ habuccieet cĩ Nyekuci nẽ tarĩ aaꞌnyĩk eet ꞌcĩg õmmõõrĩ mooriꞌthiook cũũmõ cũũmõ hũbũttaathõ. 24Nĩngĩtĩ aku allũnganĩ nyeemuut cĩnnĩ looc cĩ Thiiria vẽlẽk nẽ aꞌnyaktaak eeta ĩnõõnnõ moorriak ꞌcĩg õmmõõrĩ mooriꞌthiook cũũmõ cũũmõ. Baa aꞌnyakiaa eeta ꞌcĩg aꞌnyak mooriꞌthiook ꞌcĩg mẽẽlĩg, hĩ ꞌcĩg aꞌnyak loriẽẽt ꞌcĩg abathĩ#4:24 Loriẽẽt ꞌcĩg abathĩ: Baa ĩĩn cieeg aajĩlẽẽt ꞌcĩg baag arũmĩ hĩ Nyekuc hẽẽtahujjieen nẽ iita ũtũbũrĩt nẽẽg Nyekuc, nĩngĩtĩ iiggia Nyekuci ĩhõõggõ hẽẽtahujjieen. Nẽ ꞌyioko iita accananit loriẽẽta cieeg eet loota nĩnga. Tigiil ꞌBuuk cĩ Terethiitto 12:7-9. hĩ ꞌcĩg õhõda namakarĩ hĩ ꞌcĩg alalliaa ꞌthoona, nĩngĩtĩ ẽẽlanĩ Yeesu ĩhõõggõ vẽlẽk hũbũttaathõ.
25Baa anũ ĩnõõnnõ lothippiꞌnya ꞌcĩg mẽẽlĩg gẽrrẽẽt. Baa au ũgẽẽgĩ looccaa cĩ ꞌGalileea nẽ iita ũgẽẽgĩ ĩĩcĩ ꞌJeruꞌthalẽmĩ hĩ ũbũtẽẽt cĩg ꞌJudeea. Nẽ baa au ũgẽẽgĩ buúk ꞌtaaũnnioohĩĩ ꞌcĩg ĩĩn õmmõtõ, ĩcĩg agayyi haĩ Dekapoli nẽ abaakta ũgẽẽgĩ dhoortaa cĩ hidioo cĩ ꞌJõrdanĩ.
Currently Selected:
Maatteeo 4: did
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2017, Wycliffe Bible Translators, Inc., All rights reserved.