Matayo 16
16
Avafalisayo visaka ikilagilo
(Maliko 8:11-13; Luka 12:54-56)
1Nawo Avafalisayo na Avasadukayo vaasile sambi vamugele Yesu vamusukite apige ikilagilo ikihuma kuchanya. 2Ndawe avapitulige, “Pekive kimihye mwitigilaga: ‘Tuvatwina wotelo wunofu pakuva uwulanga wudung'u!’ 3Neke pekwiva milawu mwitigilaga kuva kwina ng'ala, pakuva kwilanga kwiva kudung'u kangi kwina mafufu; mulusele we mwamwiganula isa kuwulanga ino mwilemwa ndawuli ukuganula ifilagilo ifya imisika. 4Imbegalo inyanzanangifu na uwugoni yisaka ikilagilo kugaya ikilagilo; chesakilagilwa pesi icha Yona.” Swe akuvaleka baho swe ibitaga.
Uwuhahu uwa avafalisayo na Avasadukayo
(Maliko 8:14-21)
5Avanyigendo vala pevafisile kumwambu, kumbi vevasemilwe ukutegula nambi umukate. 6Ndawe Yesu avalongelige, “Mwikomalilage na uwuhahu uwa Avafalisayo na Avasadukayo.” 7Ndawe valonganige vitigila, “Ilonga isi pakuva hwehwe tukasemilwe ukutegula imikate.” 8Neke Yesu alukagule lwe valonganige ndawe avatigilige, “Nye! Nyevanu avanyalufuuwo lukefu! Mbi ndawuli mukwilonganza ukutigila mwivagaya mikate? 9Simulalukagula ulu? Mbi simukwiwuka ulwa imikate igihanu kuvanu imbilima sihanu? Mbi mwamemise fitangula filinga uwuwuluwulu? Na kangi ulwa imikate igimufung'ati ku vanu mbilima sitayi, na fitangula filinga fyemwakong'ise uwuwuluwulu? 10Lino luhwana ndawuli mulemwe ukulukagula ulwa nene sindongigi ulwa imikate? 11Mwikomalilage na uwuhahu wa Avafalisayo na Avasadukayo!” 12Ipo pevalukagwe ukuta siavalongeligi ulwa vikomalilage na uwuhahu uwa imikate, pesi ukuta vikomalilage na inzigiso isa Avafalisayo na Avasadukayo.
Petulo akumwidikila Yesu ukutigila ye Mesiya
(Maliko 8:27-30; Luka 9:19-21)
13Ino Yesu peasile kuboma ya ku Kaisaliya Filipi, ndawe avawusige avanyigendo vakwe ukutigila, “Avanu vavitigila Umwana va Umunu ye nani?” 14Ndawe vamutigilige, “Avangi vavitigila ye Yohane umubatisi, avangi ye Eliya, neke avangi ye Yelemiya apangi uyumwi va avavisi.” 15Ndawe avatigilige, “Neke nyenye mwitigilaga ndinani?” 16Simoni Petulo ndawe apitulige, “Veve ye Kilisito, vemwana va Nguluvi umumi.” 17Ndawe Yesu amupitulige, “Wimufunyilile Simoni ve mwana va Yona, pakuva uluhala lwa uwunu silukulaji ulukani ulu pesi Dada va nene hela yealikuchanya. 18Veve wi Petulo na mwitalawe ili nzenga likanisa lyangu, na uludali lwa kuvafwe sisalulidwesa. 19Nene ngupela veve ikidindulilo icha uwutwa uwa kuchanya, na chechekivesaga cheukidindula mung'i na kuchanya kiva kidindile na chechekivesaga cheukidindulila mung'i na kuchanya kiva kidindulile.” 20Ndawe avakanilige hilo avanyigendo vakwe valalongela munu ulwa umwene ye Kilisito.
Yesu ilonga ulwa uluteseko na ifwa yakwe
(Maliko 8:31—9:1; Luka 9:22-27)
21Na uluhuma baho Yesu avanzile ukuvalongela wima hela avanyigendo vakwe akuvatigila, “Nene lwinoga mbita ku Yelusalemu na ukuteseka mu nzolofu ukuhuma ku vavaha, na avatambisi avavina, na avigisi va indagilo na ukuwulagwa, pakimunyi icha wudatu nzilibulwa.” 22Neke Petulo amutegule palubali, neke avange ukumukenyela Yesu itigila: “Be Mutwa lulava ndahihyo! Ulukani ulu silupigika ndahihyo nda.” 23Ndawe Yesu amupitulige Petulo, “Piluke kumbele wi Setani! Kangi veve wi kikuvaso kwa nene; pakuva si ulilubali lwa Nguluvi, ulilubali ulwa avanu.”
24Ndawe Yesu avalongelige avanyigendo vakwe akuvatigila, “Wone pwali munu yeaninila nene, lekage ivipile tandi yumwene neke peitwike umusalaba gwakwe aninile nene. 25Pakuva yeyeavesaga munu yeisaka ukuwupoka uwumi wakwe uyo awuyasa, kangi ye akuwuyasa uwumi wakwe ivalwa nene uyo saawuwona. 26Pakuva mbi ambulila kiki umunu, wone akwave ing'i mbeyili neke awuyase uwumi wakwe? Apangi kiki che umunu atawula ukwimila uwumi wakwe? 27Pakuva Umwana va Umunu akusa pamwi na vanyivaha vakwe mundolo sa udade. Na ipo pesaamuhomba yeyeavesaga ukuling'ana na ifipigo fyakwe. 28Nachene nguvalongela, povali avimile ipa vesisavafwa wesivalamuwona Umwana va Umunu peakusa ku wutwa wakwe.”
Currently Selected:
Matayo 16: HeNT2004
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Kihehe New Testament © Bible Society of Tanzania, 2004.