Genesis 8
8
Anaa-gugu anggaar-wagaagina aḏaba.
1Na-God nu-yangani-wugij niga na-Noah marri wubani-yung a-ngurudhu-yinyung marri a-bulugi marri wubani wu-ngarra-ngu-burri-yinyung amubama-rruj ama-barrawu-rruj. Na-God niwu-lharrgang wudhanguyn, wu-waabuyaani. Anubani anaa-gugu waar-wagaagini aḏaba. 2Anubani anaa-gugu wu-muḏaḏbiyn, waari aḏaba anggaaḻ-lhanga-lhangaḏbangi anaaban-gala. Wugurraayung ana-wumala-wala anubani wu-gara-wawalhangi-yinyung, waarwarrini-yinyung anuwagala anaa-gugu, anubani aḏaba wu-dhidiyn. Marri ngarraaṉbana ngi-warraajiyn. 3Anaa-gugu waar-wagaagini aḏaba wurrugurrig aaban-guy. Anubani-yumbaa 150 ngarraaḻirr, anubani anaaban aḏaba waaban-bulbul-maa.
4Ḻabama marang-aynjaabugij marri ni-wulawaa aḏaba, ngigaayung ngarraaḻirr 17. Manaama-yung mana-barrawu ma-rijbini, amubama-yung ma-ḻandhirrngindi-wuy ama-ṉuga, maalamalhangayn arrwa-garrwar. Wu-mayini anubani-yung ana-lhal, Ararat. 5Anaa-gugu waar-wagaagini-wugij. Wurrugu, naagi-na-ḻabama marang-aynjaabugij marri marang-aynjaabugij, ngarrubagi-yung ana-wulhu-wulhurr ngarraagi-yung ngarraaḻirr, anubani-yinyung anuwaagu-yinyung anaarrwar-garrwar-yinyung mana-ṉuga manubama-rruj, anuguni wirrima-nani manubama-yung mana-ṉuga ma-ṉuga-raba-rabalangi aḏaba.
6Ngijang ngarraaynbaj 40 mana-miyn.nganga, naagi na-Noah niwu-gara-wawalhijgayn anubani-yung ana-window. Niwu-maṉdhangi-yinyung anubani-yunggaj anaani-yung. 7Ni-miyn wuwag marri ni-lharrgang. Ni-wilbilangi. Ni-wura-wuramini-wugij, nga waari aniwu-lhangarrmaa ana-lhal. Wurrugu marri, waar-wagaagiyn waar-ngu-jadugini-wuy.
8Anubanila ni-lharrgang-gala na-Noah, naagi-yung ni-waḻamin-jamijgini wubani aaban yungguyung anggaaban-bulbul-maa. Ngijang ngu-miyn ḻabarrg, ngijang ngu-lharrgang. 9Ngarra-ḻabarrg ngarraagi-yung waari anubuguni angiwu-lhangarrmaa anubani anaaban angi-ralhangi-yinyung. Ngiigiyn-gaj-bugij amubama ama-barrawu-wuy. Anaani anaa-gugu wurrugu waar-murrgulhi-wugij. Bagila ni-marang-dhangayangayn na-Noah marri ngi-wayamangi-wugij, ngi-ralhiyn a-marang-duj, ngu-burriyn lhirribala-wuy.
10Anubanila-wala, ngijang ni-burri wurrugu, niimbu-narrini, marang-aynjaabugij marri muulawaa mana-miyn.nganga. Ngijang bagi-yung-bugij ḻabarrg-bugij, ngu-lharrgang. 11Wurrugu, waamulugugurrangi, ngarraagi-yung ngarra-ḻabarrg ngijang ngiigiyn. Ngarraagi-yung ngiwu-manjarr-lhabangaa, aynjaabugij wu-manjarr-yililig. Anaani wu-mayini ana-manjarr, olive ana-rangag. Anubani-yung na-Noah aḏaba ni-marrbuy-mayn, anaani-yung anaa-gugu aḏaba waar-wagaagiyn-bindiyung.
12Anubanila-wala, ngijang niimbu-narrini, marang-aynjaabugij marri muulawaa mana-miyn.nganga. Ngijang ni-malgaagijgiyn-bugij, ngu-lharrgang ngaadagi-yung ngarra-ḻabarrg. Aḏaba waari angiigini, ngarraagi aḏaba ngi-balanu ngi-yanggi.
13Anubani-yumbaa naagi-yung na-Noah ni-burri 601 anaagalhal-aḻirr, naagi-yung ni-malanga-jiwanggu-dhini. Na-ḻabama naagi aynjaabugij aḏaba, ngarrubagi ana-wulhu-wulhurr ngarraaḻirr, anaa-gugu aḏaba waar-ngu-jadugiiyn. Na-Noah niwu-gara-wawalhijgayn anubani anu-dhawang, nga anubani ni-warranggayn. Anubani anaaban waaban-bulbul-maa lhaalhag.
14Anubanila-wala, ngijang niimbu-narrini, na-wulawaa na-ḻabama. Nubagi-yung naaynbaj-duj na-ḻabama, ngarraagi-yung ngarraaḻirr 27, bani-yung marri anaaban aḏaba waaban-bubul-mayn-bindiyung.
15Anubani-yung niga na-God nu-magayn na-Noah, 16“Numburru-rabalang, numburru-yaarri aḏaba, nagang marri nugawi nga-rangarrinaaj marri nugawi-nyinyung warra-miniwiyaay marri wugurri-nyinyung warra-miḏangarrina-yung. 17Numbuu-yarrijgina, numbuu-rabalina aadanu aḏaba wu-ngarra-biri-yinyung. Aadanu ana-bulugi marri ana-ngurudhu aadanu wu-ngarra-jalgarrwina-yinyung. Wurrugu marri waṉagana arrawindi ana-wurrayung. Arrawindi aḏaba anggu-burraa. Anaani ambamadhang anggu-ngarra-ḏajaarrang ana-lhal-waj aḏaba.” Dani-yung ni-yamayn na-God.
18Na-Noah marri nigawi-nyinyung nga-rangarrina-yung marri warra-miniwiyayung marri wugurri-nyinyung warruburru-yung warra-miḏangarrina-yung, wurraanggarra-rabalangi aḏaba. 19Ana-bulugi marri anubani wu-yalgarrwini-yinyung marri ana-ngurudhu marri anaaynba-gaynbaj-jinyung wugurraayunggaj, anubani wu-ngarra-ḏabalangi, wulu-wulawaa-wugij, anubani-yung wu-yamaa wu-rabalangi.
20Na-Noah anubanila, nima-muṉḏugaa mana-ṉuga. Ni-wini anubani-yung mulung-arrgi bulugi marri ngurudhu, wurru-nguni-yinyung. Anubani bagu ni-nangaa ama-ṉuga-rruj, na-God yungguyung. 21Na-Yawei na-God anubani-yung ni-warrawuj-jarrang arrawuj-mamaaḻang, waarrawuj-baynji. Ni-yamijgini anubuguni ana-lhirribala, “Nga-marrbuy warruburru-yung warra-wurru-wurruj-duj, wurru-wijangayii aladi ana-lhirribala, anubanila-wala wurraambuḻwina, wurraandha-wuguuguni anubani anaaladi, wurru-wijangayii-yinyung. Yagu wiiya aadanu. Yagi ngawu-marrgi anaaban nga-malgaagijgi ngijang. Yagi nga-wu ngijang wu-ngarra-biri-yinyung, aadanu yagi nga-malgaagijgi aḏaba. 22Anaanila-wala anaani-rruj-jinyung ana-lhal anubani anggu-ngarra-ngu-burraa-maynji, anubani-yung anu-ḏal amburraanuynjungana amburraandha-wuguuguni. Marri amburru-mani anu-ngugulmung. Anaagalhal-mariga marri anaagalhal-aḻirr marri anaagalhal-aṉbana, anaarrarra marri ana-miyn.ngu, anggiijamana-wugij aadanu, anggiij-buguuguni.” Dani-yung ni-yamaa na-God.
Currently Selected:
Genesis 8: nuyNTPO
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2007, Wycliffe Bible Translators, Inc. All rights reserved.