Markus 16
16
Ummaaki Yeesu Daga Mayde
(Maatiyu 28.1‑8; Luka 24.1‑12; Yahaya 20.1‑10)
1Nde Nyalnde Siwtaare ƴaɓɓii, Maryaama ƴiwoyɗo Magadala, e Maryaama maduujo Yaakubu, e Saloomi ɓe coodi nebbam uroojam mbelɗam ngam ɓe njaha ɓe moytana ɓandu Yeesu. 2Nyalnde Alal subaka gaɗa naange fuɗii, e ɓe dow laawol yaaki to yenaande nden, 3e ɓe mbi'a hakkunde maɓɓe, “Moye tallitanta'en kaaƴa manga nga ɗum maɓɓiri dammugal yenaande nden?” 4Ammaa nde ɓe ndaari ɓe ngi'i ɗum yaadake ɗum tallitii kaaƴa ngan. 5Nde ɓe natti yenaande nden, ɓe ngi'i goɗɗo kayeejo e jooɗii wuttudu nyaamo. E mo ɓornii kolte daneeje tar, sey ɓe kultori.
6Kayeejo on wi'iɓe, “To' on kulu. On ɗaɓɓita Yeesu Najarankeejo baraaɗo dow gaafaangal. Ɗum umminiimo daga mayde! O walaa ɗo'o. Raa to ɗum fukkinnoomo. 7Ammaa njahee mbi'on tokkuɓemo, haa e Biiturus, o artay'on yaaki leydi Galiili. Ton ngi'otonmo non no o wi'unoo'on.”#Maat 26.32; Mar 14.28.
8Kulol nangiɓe e ɓe ndiwna ɓe mburtii daga nder yenaande nden ɓe ndoggi. Ɓe mbi'aayi goɗɗo koo ɗume ngam e ɓe kula.
Yeesu Wanganii Maryaama Ƴiwoyɗo Magadala
(Maatiyu 28.9,10; Yahaya 20.11‑18)
9[Subaka Nyalnde Alal Yeesu ummii daga mayde. Gaɗa o ummake o arti wanganki Maryaama ƴiwoyɗo Magadala mo o wurtinani ginni joweeɗiɗi. 10Sey Maryaama on yahi wi'ika ɓen ɗon gondunooɓe e maako, o tawiɓe nder wannaare e ɓe mboya. 11Ammaa nde ɓe nani Yeesu e woodi yonki, ɗonmaa Maryaama on yi'iimo, ɓe njaɓaayika.
Yeesu Wanganii Tokkuɓemo Ɗiɗo
(Luka 24.13‑35)
12Gaɗa maajum woɓɓe tokkuɓemo ɗiɗo e ɓe dow laawol nder ladde yaaki wongel gariyel, sey Yeesu wanganiɓe nder nandi feere. 13Sey ɓe co''ii ɓe mbi'ika horiiɓe, ammaa ɓe njaɓaayi ko ɓe mbi'i kamɓe maa.
Kuugal Ngal Yeesu Hokki Tokkuɓemo
(Maatiyu 28.16‑20; Luka 24.36‑49; Yahaya 20.19‑23; Kuuɗe Lilaaɓe 1.6‑8)
14Daga gaɗa Yeesu wangani tokkuɓemo sappo e go'o e carel ngel e ɓe nyaama nyamndu. Sey o haɓaniɓe ngam ciya hoolaare maɓɓe e ɓerɗe caatuɗe ɗe ɓe ngoodi, ngam ɓe njaɓaayi ko giiɓemo gaɗa o ummake mbi'iɓe. 15Nden o wi'iɓe, “Njahee koo toye nder duuniyaaru nga'ajinanon koo moye Habaru Belɗum.#KL 1.8. 16Koo moye kooliiɗoyam waɗanaa baptisma o hisay, ammaa fuu mo hoolaakiyam ɗum taƴanaymo kiita. 17Fuu kooliiɓeyam ɓe ngaɗay kuuɗe kollayɗe e ɓe ngoodi bawɗe Allah. Nder inde am ɓe mburtinay ginni, ɓe ngaɗay do'aare nder ɗemɗe ɗe ɓe andaa. 18Ɓe nangay boole e juuɗe maɓɓe, nden to ɓe njarii tooke, ɗe ngaɗantaaɓe goɗɗum. Ɓe boo njowanay nyawɓe juuɗe, nyawɓe ɓen njamɗita.”
Yeesu Hoccaama Dow
(Luka 24.50‑53; Kuuɗe Lilaaɓe 1.9‑11)
19Gaɗa Yeesu Joomiraawo metaniiɓe, o hoccaa yaaki dow, o jooɗii jungo nyaamo ngo Allah.#KL 1.9‑11. 20Sey tokkuɓemo ɓen ndilli ɓe nga'ajinoyi Habaru Belɗum koo toye. Joomiraawo walliɓe, o hokkiɓe bawɗe waɗuki kuuɗe kayɗiniiɗe ngam tabbitinki ko ɓe mbi'ata to maako ɗum ƴiwoyi.]#16.9‑20: Ɗe'e aayaaje ɗe ngalaa nder goɗɗi bindi arandeeji.
Currently Selected:
Markus 16: fuv
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2010, Bible League. All rights reserved.