Mateo 10
10
Sa Mga Apustulis Ha Sinugù Hi Jesus
(Mateo 10:1-4; Marcos 3:13-19; Lucas 6:12-16)
1Inamul-amul hi Jesus su sampulù daw daruwa ha tinun-an din, dayun pinagaheman din sidan ta daw mabugaw dan sa mga busaw ha tuminagù duun hu mga etaw daw maulian dan daan sa bisan inu ha dalu.
2Iyan haini ngaran taena ha sampulù daw daruwa ha apustulis ha sinugù hi Jesus, si Simon ha tagngaranan daan ki Pedro daw si Andres sa suled din, si Santiago daw si Juan sa mga batà hi Zebedeo, 3si Felipe daw si Bartolome, si Tomas daw si Mateo sa manunukut hu buhis, si Santiago sa batà hi Alfeo daw si Tadeo, 4si Simon sa sakup hu Cananiyo daw si Judas Iscariote ha iyan miglimbung ki Jesus.
Sa Mga Panugun Hi Jesus Duun Hu Mga Apustulis
(Mateo 10:5-15; Marcos 6:7-13; Lucas 9:1-6)
5Saena ha sampulù daw daruwa sinugù hi Jesus daw tinugun sidan hu kagi din, “Harì kaw dumuun hu kenà mga Judio daw hu bisan hindu ha banuwa diyà ta Samaria, 6ba duun kaw dà payanaen hu mga kaliwatan hi Israel ta nailing en sidan hu mga karniru ha nangalaag. 7Ku tagdiyà kaw en itultul nuy kandan ha madani en sa pagharì hu Dios. 8Maulian nuy sa agkangadaluwan daw banhawen nuy sa minatay en. Maulian nuy daan sa mga sanglahen daw bugawen nuy sa mga busaw ha tuminagù duun hu mga etaw. Harì kaw manayù hu bayad duun hu mga etaw ha pigbuligan nuy ta sa gahem ha in-ila ku inyu hurà din bayad. 9Harì kaw daan mag-uwit hu salapì, 10lutù, ilisan, sapatus daw sugkud nuy ta sa tagtrabahu angayan ha ilahan gayed hu mga kinahanglanen din.
11“Bisan hindu ha banuwa ha mauma nuy, pangitaha sa etaw ha agdawat inyu daw diyà kaw en magtimà hangtud ha umawà kaw duun taena. 12Ku agseled kaw en duun hu balay ikagiyan nuy sidan, ‘Magmalinawen kaw gayed alan.’ 13Saena ha dumawat inyu malinawen gayed sa pagtimà dan. Ba ku harì kaw kandan dawaten hurà pulus ku umikagi kaw ha magmalinawen gayed sidan. 14Ku makauma kaw duun hu banuwa ba hurà en dumawat inyu daw harì daan sidan magpaliliman hu tigtultul nuy, awai haena ha balay daw ku banuwa. Ba pugpuga nuy sa aliyabuk diyan ta paa nuy ta iyan haena timaan ha silutan gayed sidan hu Dios. 15Laus gayed sa ag-ikagiyen ku inyu ha asem ku Aldaw hu Paghukum mahagkap dà sa isilut hu Dios taena ha mga etaw diyà ta Sodoma daw ta Gomora dì hu mga etaw duun taena ha banuwa.
Sa Pakauma Ha Pasipala
(Mateo 10:16-25; Marcos 13:9-13; Lucas 21:12-17)
16“Agkailing kaw hu mga karniru daw agsuguen ku inyu duun hu mga etaw ha agkailing hu asu ha agpamangagat. Aman mag-andam kaw ba kinahanglan daan ha harì nuy mapasipalahan sa bisan sin-u. 17Magbantay kaw ta itugyan kaw asem duun hu maghukum inyu daw lagkutan kaw pa gayed kandan duun hu mga simbahan. 18Ipaatubang kaw daan kandan duun hu mga gubirnadur daw mga harì tumenged hu pagtuu nuy kanak, ba iyan haena paagi ha matultul a inyu diyà ta kandan daw duun hu kenà mga Judio. 19Ku dakepen kaw kandan harì kaw agkasamuk ku inu sa ipanubag nuy. Duun taena ha panahun sa Dios iyan magtudlù inyu 20ta sa ag-ikagiyen nuy kenà inyu ha lalang ba kandin en hu Balaan ha Ispiritu ha sinugù hu Dios ha Amay nuy.
21“Duun taena ha panahun itugyan hu etaw sa suled din ta daw mapatay daw itugyan daan hu amay sa batà din. Sa mga batà sumukul hu mga laas dan daw pahimatayan dan daan. 22Kuntrahen kaw hu kaet-etawan tumenged kanak, ba sa harì umendà hu pagtuu hangtud hu katapusan mailahan hu kinabuhì ha hurà din katapusan. 23Ku pasipalahan kaw kandan duun hu sabuwa ha banuwa pulaguy kaw duun hu lain. Laus gayed sa ag-ikagiyen ku inyu ha harì nuy pa makalekep sa Maayad ha Tultulanen diyà ta Israel lumikù ad en siak sa Batà hu Etaw.
24“Sa tagpatudlù kenà labaw dì hu tagtudlù kandin daw sa suluguen kenà labaw dì hu agalen din. 25Ikalipay gayed hu tinudluan ku mailing daan hu tagtudlù kandin, daw ikalipay daan hu suluguen ku mailing hu agalen din. Ku pigngaranan a hu mga etaw ha Yawà ayuwà pa madaet sa ingaran dan inyu sinyu sa mga sakup ku.
Sa Angayan Ha Mahaldekan Hu Etaw
(Mateo 10:26-31; Lucas 12:2-7)
26“Harì kaw gayed mahaldek taena ha mga etaw. Sa alan ha inlilung iman makahiwal dà asem ku malugay, daw sa harì iman tag-ikagiyen mapaliman dà asem ku malugay. 27Sa mga lalang ku ha iyan kaw dà nakapaliman duun ipanunultul nuy gayed duun hu mga etaw. 28Harì nuy agkahaldeki sa iyan din dà agkapatay sa lawa, ba harì din mapatay sa gimukud nuy. Ba iyan nuy kahaldeki sa Dios ha makapaagbul hu lawa daw hu gimukud nuy diyà ta Impirnu. 29Henhenaa nuy ha bisan sa mga atiyuay ha tagbis harì agpatay ku harì igtugut hu Dios. 30-31Aman harì kaw agkasamuk ta palanggà kaw pa dì hu mga tagbis, ta bisan sa buhuk nuy naiyap en hu Dios.
Sa Ag-angkenen Hi Jesus
(Mateo 10:32-33; Lucas 12:8-9)
32“Bisan sin-u haena sa ag-angken kanak duun hu mga etaw angkenen ku daan duun hu Amay ku diyà ta langit. 33Ba sa tag-ikagi duun hu mga etaw ha harì a kandin agkakilala harì ku daan haena kilalahen duun hu Amay ku diyà ta langit.
Sa Kagubut
(Mateo 10:34-36; Lucas 12:49-53)
34“Harì nuy aghenhenaa ha sa pagdini ku ta kalibutan makaila inyu hu maayad ha pagdapità. Hurà a dini ta daw magmalinawen kaw ba sa pagdini ku makaila inyu hu kagubut. 35Tumenged kanak sabaen hu batà ha maama sa amay din. Sabaen daan hu batà ha bahi sa inay din daw sabaen hu lagambay sa ugang din. 36Ta sa kuntra hu etaw duun dà agkapuun hu pamilya din.
Sa Laus Ha Sumusunud Hi Jesus
(Mateo 10:37-39; Lucas 14:26-27)
37“Bisan sin-u sa tungkay din palanggà sa mga laas din daw sa mga batà din dì kanak kenà angayan ha sumusunud ku. 38Bisan sin-u haena sa harì agkabayà tag-antus hu alan ha mga malegen bisan duun hu kamatayen saena kenà angayan ha sumusunud ku. 39Bisan sin-u sa agkanugun hu kinabuhì din matay dà gihapun, ba saena ha tagsunud kanak bisan duun hu kamatayen mailahan hu kinabuhì ha hurà din katapusan.
40“Bisan sin-u sa agdawat inyu agdawat daan kanak, daw saena ha agdawat kanak agdawat daan hu Dios ha migsugù kanak. 41Bisan sin-u sa dumawat hu etaw ha tagsaysay hu igpaikagi hu Dios daw hu matareng ha etaw saena mailahan hu bales iling hu madawat taena ha dinawat din. 42Daw bisan sin-u sa makapainum hu bisan nangkatasa dà ha wahig duun hu pinakaminus en ha sumusunud ku, balesan gayed haena hu Dios.”
Currently Selected:
Mateo 10: bkd
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2015, Wycliffe Bible Translators, Inc. All rights reserved.