Baverset oyo Eyebani Mpenza ewuti na लुका 8

Kabola

अरु मान्‍तालम्‌खेइ परमेस्‍वर्‌कोः कुरा सायःती पेओ ल्‍हुङ्‌हाङः सेती ङ्‌हाम्आक्‌तीको ओउःकोः काम् गुह्र्माःत ब्‍याव्‌तीलेः जाङ्‌ह्‌नानी। इ मान्‍तालम्‌पाय् ओउः पेओ साःहाङः दीह्ओ बीया चोयालो लेखा मुलेःनै” त दाय्‍ह्‌ती येसुइ छ्यानःआथास।

ओहाङःसैको अरु मान्‍तालम्‌खेइ परमेस्‍वर्‌कोः कुरा सायःती ओउःकोः काम् जाङ्‌ह्आक्‌नीतो लोने लयः झाक्ओ काम्‌कायः रुःओ ल्‍हुङ् वाङ्‌नाः पैसा क्‍युसा बोङःओ ल्‍हुङ् वाङ्‌नाः लीङ्‌हायःओ ल्‍हुङ् वाङ्‌नाः त खेःयाकायः परमेस्‍वर्‌कोः काम् जाङ्‌ह्‌सा लोने ग्‍याइली। इ मान्‍तालम्‌पाय् यार्‌ती वाय्ओ सायःसा खाय्‌मालो चुःकुस् दुङ्ओ बीयालो लेखा मुलेःनै।

ओहाङःसैको अरु मान्‍तालम्‌खेइ परमेस्‍वर्‌कोः कुरा म्रोतीलेः ल्‍हुङ्‌हाङः ग्‍याइतो लोने लीह्‌सीःओ बेला वाङ्‌नाः त खेःया ओउः कुरा फेनानी। इ मान्‍तालम्‌पाय् रुत् ज्‍युम्‍ह्‌तो आलःमालो बाङ् ह्र्युङ्‌हाङः दीह्ओ बीया चोयालो लेखा मुलेःनै।

दुम्‌हान्‌पाय् जुगाङ् एवेङ्‌त स्‍याव्आक्‌तीको “दोह् हायःतीतेः ङाकायः ङ्‌हाम्‌तेःनाङ्‌सल” त दाय्‍ह्‌ती येसुइ दोङ्‌गाहाङः मुओलम्‌कायः तोआथास ओउःमयः ग्‍याङ्‌ह्‌ती रैती मुइतो “लौ इजा गत खेःओ मान्‍तालो ती। दोङ्‌सीलेः ओउःइ गानाक्‌ती तोओ कुरालेः मारुःलम्‌कायःमा तीःलम्‌कायःमा ग्‍याताक्‌नौ बा” त दाय्‍ह्‌ती येसुकुस् वाह्ओमयः नोःकाय्आकाय्।

ओउः बीया चोया त तोओखे परमेस्‍वर्‌इ बयःओ पेओ कुरालो लेखा लेःआः। ओहाङःसैको कोय् मान्‍तालम्‌खे परमेस्‍वर्‌कोः कुरा सायःनानी सायःआक्‌तीको सैतान् त तोओ वाङ्‌ती ओउः सायःओलम्‌कोः ल्‍हुङ्‌तुक्‌सै ओउः पेओ कुरा सेक्‌ती आलःनौ। ओउःत झ्‍यान्‍ते ओउः मान्‍तालम्इ पेतो ङ्‌हाम्‌माःत रौ जीङः दोःइली। इ मान्‍तालम्‌पाय् ल्‍याम्‌कोः साःहाङः दीह्ओ बीया चोयालो लेखालेः मुनै।

दोह् दोह्‌लो तेन्‌छ्याङ् छ्यान्‍ह्आक्‌मालो मुनाः ओउःलेः लोनेः छ्यानःतो स्‍याव्‌नाः। दोह् दोह् कुरालो मान्‍तालम्‌कायः तेन्‌छ्याङ् नुस्‌तीलेः मुनाः ओउःमा लोनेः सबैकायः छ्यानःतोलेः स्‍याव्‌नाः।

ओउःत दाय्‍ह्आक्‌तीको “ङाकायः तय्‍ह्आताङः” दाय्‍ह्‌ती म्‍हर्‌ती ओउः मोमःचोःपाय् रैती रीङ्‌ह्‌ती येसुकःताङ् बाःती स्‍यवलाङ् वाङ्आ। वाङ्आक्‌तीको सबैकोः मीक्‌हाङःलेः ओउःकोः पीर्‌कोः कुरामा स्‍याक्‌ताक्ओ कुरामा घोती छ्यान्‍ह्आथै। ओउः मोमःचोःइ सबै घोती छ्यान्‍ह्आक्‌तीको “लौ उया हौद्याङ् ङाकायःतेः पेतोलेः ङ्‌हाम्‌तेःआची रैस ओउःत झ्‍यान्‍ते नाङ् सेलःलेः स्‍याव्‌तेःनाः। ल्‍हुङ् धोमाय्‌तोलेः पाय्‍ह्अ” त दाय्‍ह्‌ती येसुइ तोआथै।

दोङ्‌गाकायःपाय् तीः पोक्‌ती ज्‍युप्‌खेःओ बेलाहाङः येसुकुस् वाह्ओमयः आन रैती ओउःकायः म्‍हाङ्‌ती “अ गुरुय ङीजा दोङ्‌गा ज्‍युप्‌ती सीखेःनाःतय्‍ही बा” त दाय्‍ह्‌ती तोथातो ती येसु म्र्याती च्‍योक्‌ती मारुःकायःमा ल्‍यङःकर्‌ओ तीःकायःमा जान्‌तीलेः तोआकान्। तोआक्‌तीको मारुःमा दीःजेःआ दुम्‌हान्‌मा एवेङ्‌त स्‍याव्आ।