Baverset oyo Eyebani Mpenza ewuti na Matìyò 5

Share

Chəyi wə̀d we che anam nɔ̀ŋɔ̀ yaʼ aton akwighe. Wì ya che anam nɔ̀ŋɔ̀ igun asiŋi ne mbe nɔ̀ŋɔ̀ anam igun. Wì biri nɔ̀ŋì ane ni gha anam ya zùʼə abə wə̀d ijìm ne yaʼi inga nəb. Ane, mbə̰ bə ghì gha ìwən ìzḛzḛ ya zùʼə bəd məjìm ya bàrà. Bəd biri se bàrà ìmbən inug chɔm se nàʼà ighumni abə ìwən Mbaʼ we ne yaʼi ikaŋ àbɔ̀ŋɔ.”

Mbə̰ ya ìzḛzḛ abə bəd ne yaʼi inga isəg. Chəyi tì wə̀d nəm aben ne mbi kɔri ikaŋ iwum.

Ŋwiye zì àbɔrɔ̀bɔd igun bəd mbe ne ìtɔb fìŋ zḛ, imbə̀ʼ icheg ne mbɔb biri bàd aməd.

Ŋwiye zì àbɔrɔ̀bɔd igun bəd mbe ne zi atog ni ghì inug ne təmi kòʼ, imbə̀ʼ icheg ne məd biri nàʼ aghi ne mbɔb mbe kə̀bə̀ inɔb.

Anug ne mə ghà inən amad anìŋ ya gha, mbə̀ kɔŋɔ ìmbən bəd ìpàb bə̀ chàʼra Ŋwiye abə bəd mbe ne chɔ̀ʼɔ ìmbən ibɔʼì ighog.

“Ŋwiye zì àbɔrɔ̀bɔd igun bəd mbe ne saŋi ìmbɔb inug ijìm ibo ikye abo, imbə̀ʼ icheg ne mbɔb biri jəg anug ìfɔ̀n ikaŋ.

Ŋwiye zì àbɔrɔ̀bɔd igun bəd mbe ne ghìyə̀ gha bəd chughi ane àbɔrɔ̀bɔd, imbə̀ʼ icheg ne Ŋwiye biri kàrì awɔb ane ìmbi bɔn.

Ŋwiye zì àbɔrɔ̀bɔd igun bəd mbe ne sɔ̀mnɔ̀, imbə̀ʼ icheg ne məd biri nəri awɔb kwàʼ zìye zìye.

Ŋwiye zì àbɔrɔ̀bɔd igun bəd mbe ne bəd mbe chɔ̀ʼɔ ìmbɔb ibɔʼì ighog anjìm icheg ne mbɔb mbe ghìyə̀ inug ne təmi kòʼ, imbə̀ʼ icheg ne mbɔb biri jəg anug ìfɔ̀n ikaŋ.

Ŋwiye zì àbɔrɔ̀bɔd igun bəd mbe ne dìgrè igun mə̀mbin, imbə̀ʼ icheg ne məd biri dìgrì igun inɔb.

Ŋwiye zì àbɔrɔ̀bɔd igun inən, anyumə̀ ne bəd mbe chàpà awən, chɔ̀ʼɔ ìmbən ibɔʼì ighog, bə̀ ghà tiku inug izəg ijìm ne ya inug ako igun inən imbə̀ʼ amə. Mbə̀ taŋ gyèndi imbə̀ʼ icheg ne Ŋwiye biri nàʼ ineʼi kyen inən ikaŋ àbɔ̀ŋɔ. À ya bə̀ icheg ne bəd ya bə chɔʼ ibɔʼì ighog abə bədkə̀n Ŋwiye mbe ne ya bi yaʼ bɔŋ awən.”

Ŋwiye zì àbɔrɔ̀bɔd igun bəd mbe ne swi ìwɔb nyɔd aseg, imbə̀ʼ icheg ne mbɔb biri jəg ighi igun isəg.

Yeso ya chè imbìghè gha, “Mbə̰ ya icheg fìngwaŋ abə bəd ne yaʼi igun isəg. Si ya gha, fìngwaŋ kə mə̀ fə tu, mbi kə ywìri ghənə ni ghì gha fe ywirì nə̀m? Chəyi aghi ne tì mbi ywìrì ghì tì fìngwaŋ fe chèyi ni tù aseg, bəd se chè tə̀ʼə̀ yḛ̀ igun.

Ane, mbə̰ bèrì ni bɔ̀ŋ mànì kwàʼ icheg ne ìwən Mbaʼ ikaŋ àbɔ̀ŋɔ bə bɔ̀ŋ mànì.”

Mbə̀ gha məyi gha, ‹E› kə̀ ‹Indèʼ› Anug ndəŋ ne wə̀d ywirì si ghà à ya se àze ne nɔʼi abə Wə̀d Tibɔ̀ŋ.”

Yeso ya chè imbìghè gha, “Mbə̰ ya fə zug gha, ‹Wə̀d mə tòʼ ìwe ighə, mbi bə tòʼ ìwi məd tì ighə; bə̀ ywìrì zug gha, wə̀d mə chɔʼ isɔŋ ichug abə wə̀d, mbi bə chɔʼ isɔŋ ibo ichug.› Anug ne mə ghà inən amad anìŋ ya gha, imbə̀ʼ mbə̰ ywite awən àpɔ̀n abə wə̀d ne ghi anug tibɔ̀ŋ. Wə̀d mə twi ìze ndə̀ʼ aba abo jəghi, bə̀ŋə ìzin tì ndə̀ʼ chwi ibo wì bə twi.

Ìwe ighə aba abo jəghi mə̀ ya ghìyə̀ gha àghò ya gùghə̀ inug, chìye ighə we waʼ. Ze bɔ̀ŋ ine ni gha àze asiŋi nyɔd amɔʼ ze nim, chè icheg ne Ŋwiye biri màʼ ìze nyàmnyɔd ijìm inga asiŋi ichə. Àze aba abo jəghi mə̀ ya ghìyə gha àghò ya gùghə̀ inug, sɔb waʼ. Ze bɔ̀ŋ ine ni gha àze asiŋi nyɔd amɔʼ ze nim, chè icheg ne Ŋwiye biri màʼ ìze nyàmnyɔd ijìm inga asiŋi ichə.”