Texte de la Bible: Gabri-Tobanga © Société Biblique du Tchad, 1978 Enregistrement du Nouveau Testament Gabri-Tobanga ℗ Hosanna 2019

Gabri-Tobanga - 1978 TCH (NT) Drama

Gabri-Tobanga - 1978 TCH (NT) Non Drama

Kiddin ga Jésu ba ka gelé lé na, ddi yé anjama gai wa: Keng sol ca wolé ji sua ca lo soré go kederé cindi, ka bu Kema Kurondi kuaba kalang ca kandia bbubulai ca sia go adegelé.
Kardené gemdong ga tibé Kumu kang gemdong ga Juib kagé, ké yau ta Kaip, ddia ga tibé Kumu gumu gogé. Ké nyan kualang gusugé ca ka ’yomé Jésu dang wasuai ca deddei. Ama ké yé wa: Na nia ’yomi duro wolé go soré na, kalang da sai dang gendei.


Kiddin ga Jésu wa a Bétani, ta Simon do kaja dé na, tama do pena ’yé gusi dang kumbulu goang suang go ddo tuna go kelei combu kuaba. Kiddin ga Jésu dang jomé kebu do dé na, to bé suang lé cai. Kiddin ga ga anjama ba sol kain na, kederégé homdégé, ké yé wa: To toin suang lé main kainya cawa ga? Suang go ddo tuna go kelei combu lé kua, bbal ca kelé cong ca bogé kalang ga nyagé laré lé ’eno ga? Kiddin ga Jésu ba jé ké wa yo kual lé main kain na, ddi ’engergé wa: Keng kuai tama la kainya cawa ga? To la gié go ddari cang. Kalang ga nyagé wo kenang nageng waindo waindo, ama ’enung go jomang nageng waindo waindo ’eno. To beng suang lé gusunga main kain ca to nyana gusung ca ’embang. ’Enung wa yogenga cindi waldong wang: A kiddin gani gani ga ké dor nó do ddari duro delinya mam na, ka yé kual go tama lé kua ca ’eremang na.


Anjama go ké ba tei Judas Iskariot, ddia go a duro ké ga moac ca sua ’yé gusu gemdong ga tibé Kumu. Ddi yégé wa: ’Enung nia bugeng Jésu na, kenga bunga wa ga? Ké ddugin laré go doarna to subu, ké bi. A kiddin lé na Judas osum daré kual go ca ddia sai wai kiddin ga aié Jésu gangeldi bogé.


Wolé go tumu go soré go wo basé subugu na, ga anjama ’yé gusu Jésu, ké ’engeri wa: Ji dar ca ni lein do go kederé cindia andi ga? Kardené Jésu yégé wa: ’Erageng duro gulong go gumu ta kandi, keng yei wa: Bagulong yé waldong wang: Kiddin gang jia ’yoab, niang anjama gang ca do wo go kederé cindia tain. Ga anjama ’yé lo main Jésu ba yégang kain. Ké nyan do go kederé cindi lé.
Kiddin ga teba ba ka na, Jésu jom kebu do kang anjama gai ga moac ca sua. Kiddin ga ké wa do na, Jésu yégé wa: ’Enung wa yogenga cindi waldong wang, go pena wo a duroigeng ddain da ai gangeldeng. Ga anjama kederégé homdégé bbani ’eno, ké osum ’energi pena pena mam wa: Bagulong na ’enung laba? Jésu jogu yégé wa: Kema go so kobi duro dalin dang nang na, na ddi go aié gangeldeng lé. Kema Kurondi da ma main cidab do Kumu toi ba yang kual goi kain, ddi go ai Kema Kurondi gangeldi na, bagen doi, ké nia wai ’eno kau, na golgo. Go aié gangeldi lé, ’engeri wa: Bagulong, na ’enung laba? Jésu jogu yei wa: Jia yo.


Kiddin ga ké wa do dé na, Jésu ai wo, kardené ddi lei Kumu désé, ddi bbodelé dugo, ddi bigé anjama gai, ddi yégé wa: Ga ’yageng, keng di, kua na gusung. Kardené ddi ai ddarin doang sur kangndo, ddi lei Kumu désé, ddi bigé, ddi yégé wa: Keng mam ga sageng. Cawa kua na kebardeng, kebar go jamé kebu go doré go Kumu koi. Ddi go da bé dugo ca kalang combu ca burogé isinwa dogé. ’Enung yegenga waldong wang: ’Engung go so sur kangndo ddang ’eno, bera wolé go ’enung da si herua dang nageng a duro Leu do Bang toi. Ké dé kera go debainyé Kumu, kardené ké sai andong ca kubung goang taber


Kardené Jésu yégé anjama gai wa: A duro soindo lé na, keng mam da ddeng, cawa ké ddogin duro cidab do Kumu toia main kain. ’Enunga deddu go magé gamgé, gamgé ga geri da ddasindé pena pena. Ama kiddin ga ’enunga belé a duro ga maré dang cindeng na, ’enung da ’yé tumoigeng a Galali. Piér jogu yei wa: Ké mam nia ddain kau na, ’enung go ddoin ’eno bering. Jésu jogu yei wa: ’Enung wa yoinya cindi waldong wang: Duro soindo lé kua na, jia main jia selang ’eno cain subu jua ma, kudda sai al dé. Piér yei wa: Ca ’enunga selain ’eno na, ’enung go mainyé main kain ’eno bering, ni wia maré kau, ’enunga ma nang nain. Ga anjama kané mam yé main kain bu’.


Kardené Jésu ’yé kang anjama gai a kiddin ga ké tégé Jéséméné. Ddi yégé wa: Ga jimageng ba, ’enung oré kua ca olé. Kardené ddi gol Piér dang Sébedé karndi ca’ bu’ kang ga nagé. Gusi osum melai ddeng ddeng bua, kederei homi bua, ddi sol kegero bu’. Kardené ddi yégé wa: Kedereng wa homeng nain, main ’enung mara kain, jimageng ba, keng jom ’yoal ’yoal dang nang. Ddi ’yé tumu suguddong lam, ddi kembé cindi dugo, ddi ol, ddi yé wa: Bang, nia bbal na, ddarin doang gelé go cin lé kua, aia a cang cong cigad, ama lo main ’enung ba darang kain ’eno, ama la mainya ji ba darang kain.
Kardené ddi ’yé gusu anjama gai ga subu lé, ddi waigang kung. Ddi yei Piér wa: Keng bbala jomé ’yoal ’yoal dang nang sam ’eno ga? Ga jimageng ’yoal ’yoal dang olé ca ddo keng aserang duro lamé ’eno, kema habei dar ca lo henga ga ddari, ama gusia todero. Ddi jogu cai do sua, ddi ’yé tumu suguddong lam, ddi ol main kain com, ddi yé wa: Bang, nia ané go ji ai ddarin lé kua cang cong ’eno na, dda ’enung sa, la main ji ba darang kain. Ddi jogu gusu anjama gai, ddi waigang kung com, ké bbala jomang cindegé, ’eno. Ddi ddégé ddang com, ddi jogu ’yé suguddong lam ca olé cai do subu, ddi ya kual go wasé lé com. Kardené ddi ’yé gusu anjama gai, ddi yégé wa: Keng woia kung com laba, keng ba gelalé ga? Selageng kiddin jia ’yoab ca ké aié Kema Kurondi gangeldi boi kuaba ga isindong. Sageng dang, na oregeng, selageng, ddi go aiung gangeldeng woi kua.


Kiddin ga Jésu wa yo kual dé na, Judas caga, ddia anjama go a duro ké ga moac ca sua. Ddi ’ergang kalang combu gang gesengar bua, dang cilaiyong bu’. Gemdong ga tibé Kumu dang gemdong ga Juib kaga giégang. Judas go aié Jésu gangeldi gel kalang lé henga ga gelé ca kondi lé, ddi yégé wa: Ddi go ’enung da ’uindei na, na ddi go keng wa darei lé, ga ’imai mudag. Kobipadda Judas ’yé gusu Jésu, ddi yei wa: Bagulong, ’enung lein waigi, kardené ddi ’uindei. Jésu yei wa: Bajandung, henga ga ji ba ’erga ca logé na, ji lagé. Kardené kalang gané ’erga gusi, ké si kobegé ’yom Jésu. Go pena go kang Jésu dor gesengar goi, ddi cobu gumu go tibé Kumu marnei semai cong bbad. Kardené Jésu yei wa: Jiga si gesengar goin duro gulondi, cawa ké mam ga nyimé gesengar na, ka ma temai do gesengar bu’. Ji sela ca ’enung bbal ca togé Bang, kobipadda ddia gigeng kangiyong beram moac ca sua ca jégeneng ’eno ga? Ama ’enung nia lé main kain na, cidab do Kumu toi da ser toina mena ga? Cawa to yé waldong wang, na gad henga lé da lé main ké wa logang kua kain.
Kardené Jésu yégé kalang ga yaué combu wa: Keng ’ergang gesengar dang cilaiyong ca ’yomang main ’enunga kema go golé giyong kainya cawa ga? ’Enung wa gelé kalang duro kulu go yaué go Kumu koi waindo waindo, ama keng ’imang ’eno. Ama henga lé mam la ca ser to kual go ga cogelé kebu go Kumu koi kogé go ké ba pasi duro cidab do Kumu toi. Kardené anjama gai mam ddei, ké geré.


Ké ga ’yomé Jésu lé, ké ’yang nai ta Kaip, ddia ga tibé Kumu gumu gogé. Na kiddin ga kalang ga gelé so go Kumu koi dang ga gemdong yauda kené. Piér ji kara Jésu suguddong lam, wa koboi bera kebu geru go ta gemdong ga tibé Kumu gogé, ddi andong duro geru lé, ddi jom dugo kang ga asengeriyong ca solé kual lé karé goi.
Gemdong ga tibé Kumu dang kalang ga bedang mam, ké dar kual, nia kual go poi kau, ka soi cai ca deddei. Kalang combu ’yé soi kual go poi cai kau, ama ké waia kual pena cai ’eno. Kardené kalang sua ’yé gusugé, ké yé wa: Kema lé kua yé waldong wang: ’Enung bbal ca dosé kulu go yaué go Kumu koi dugo, ’enunga gaddi dang duro wolé subu.
Ga tibé Kumu gumu gogé lé sai dang ’enger Jésu wa: Ji go debegé kual cainé pena ’eno ga? Ji ja kual go kalang lé wa soinyang nai cain kua ’eno ga? Ama Jésu sugoi kibi kurad. Kardené ga tibé Kumu gumu gogé lé yei wa: ’Enung wa ’engerein dang gusong go Kumu go jomang cindi koi, ji yani kual go cindi, jia Krist go Kumu kurondi ga? Jésu jogu yei wa: Jia yo main kain, ama ’enung yegenga waldong wang: Ji tumu kua na, keng ddain da sol Kema Kurondi dang jomé ca Kumu kobi go barua go dono bua, keng da soliang orang a ca meddaliyong ga dang bu’. Kardené ga tibé Kumu gumu gogé lé sagu badigé gai cong, ddi yé wa: Ddi yé kual go bbojo ca Kumu, na dargenga hendé do dang com ga? Keng gang jé kual go bbojo go ddi ba yei ca Kumu ’enda. Keng ’erema mena ga? Ké jogu yei wa: Ddi bbala deddé.
Kardené ké tibé kalu cindi, ké kibi togé. Ga pena sombiei bu’. Ké yei wa: Jia Krist, jia go solé kual go mendem ma, yani dé, na wanga sombein ga?


Kiddin ga Piér dang jomé duro gulong dong, ga tibé Kumu gumu gogé tembali doi do gié ’yé gusi yei wa: Ji kau, jia goang Jésu go Galali lé bu’. Ama ddi main tumu kalang mam, ddi yé wa: ’Enung sela kual go mé wa daré ca yoi lé toi ’eno. Kardené ddi sai ’yé kebu geru dong, tembali do gié do ddang soli, to yégé kalang ga a kiddin lé. Kema lé kua na ddi go kenang Jésu go Nasarat. Piér main ddang com, ddi yé waldong wang, ’enung sela kema lé kua ’eno bering. Kardené sam, kalang ga a kiddin lé ’yé gusu Piér, ké yei wa: Na cindi ji wo duroigé, kual goin go yo bé toin dong. Kardené Piér osum bbesé gusi, ddi yé wa: ’Enung sela kema lé ’eno, ’enung nia ya cindi ’eno na, dda Kumu ddi kaidé kual cang. A kiddin lé gang padda kudda al. Piér ’erem ca kual go Jésu kené ba yei: Jia main jia selang ’eno cain subu jua ma, kudda sai al dé, ddi andong dong, ddi ’elang tubu go cindi.

Yoka Matié 26