If you would like a copy of this version please contact info@davaraudiobibles.org

Dotyali New Testament, CC-BY-SA-4.0, The Love Fellowship. Dotyali New Testament Audio Bible, CC-BY-SA-4.0, Davar Partners International, The Love Fellowship, 2022.

Dotyali New Testament

Dotyali (डोटेली) New Testament, by The Love Fellowship is licensed under Creative Commons Attribution-ShareAlike 4.0 License.

तइ पछा येशूले इसो भणि राख्यो, “होस अर्या कि तमन मान्सलाइ धेकाउनाइ निका काम जन अर। नतित स्वर्गमि हुन्या तमरा पिता बठेइ तमनले केइलगइ इनाम पाउन्या होनु। तसेरि जब तमन दान दिन्छौ, तब धेकाउनाइलाइ बिगुल जन बजा, जसो कपटिले यहुदि सभाघरमी रे सडकमि मान्स बठेइ प्रसंसा पाउनाइ अद्दाहन। साँच्चि, म तमनलाइ भण्नउ, तिननले मान्सन बठेइ महिमा पाइ सक्या छन। तर जब तमन गरिब मान्सनलाइ दान दिन्छौ, त्यो और मान्सनलाइ था जन हौ। तबइकिलाइ तमरो दान गोप्यमी दिय, रे गोप्यमी धेक्द्या तमरा पिताले तमलाइ इनाम दिन्या हुन।”


“जब तु प्रार्थना अरन्छइ तब कपटि मान्स जसो जन होइ, क्याकि तिनन यहुदि सभाघरमी रे सडकका कुना-कुनामि मान्सनले धेकुन रे तिननलाइ महिमा अरुन भणि कलिबर प्रार्थना अद्दया मन अद्दाहन। साँच्चि म तमनलाइ भण्नउ, तिननले आफ्नो पुरा इनाम पाइ सक्या छन, त्यो भण्या मान्सनको प्रसंसा हो। तर तमन जइ बेला प्रार्थना अरन्छौ, आफना भितरा कोठामी पस, रे ढोका लाइबर तइ गोप्य ठाउँमि हुन्या तमरा पितालाइ प्रार्थना अर, रे गोप्य ठाउँमि अर्या सब कुरणी धेक्द्या तमरा पिताले तमनलाइ इनाम दिन्या हुन। जब तमन प्रार्थना अरन्छौ गैर-यहुदि मान्सनकि जसेरि उनइ सब्द बेर-बेरि जनदोहर्या। क्याकि उनइ सब्द बेर-बेरि दोहर्याबर तिनरो सुणाइ हुन्छ भण्न्या तिनन बिचार अद्दाहान। तबइकिलाइ तिनन जसा जन हौ। क्याकि तमनले पितासित माग्दा हइ पइल्ली तमनलाइ कि-कि चिजको खाँचो छ, त्यो उन जाण्नाहान।” तमन इसेरि प्रार्थना अर:
“हामरा पिता, तम जो स्वर्गमि छौ,
तमरो नाउँ पबित्र होस।
तमरो राज्य आइजाउ।
तमरो इच्छा स्वर्गमि जसो छ,
तसोइ यइ धर्तीमि पुरा होस।
हामलाइ हामरो दिन-दिनकि निउती चाइन्या खानाइ दिय।
हामरा पाप क्षमा अरिदिय,
जसेरि हामले हामरा बिरुद्दमि पाप अद्द्या मान्सनलाइ क्षमा अर्या छौ।
हामलाइ परीक्षामि पड्ड जन दिय,
तर सैतान बठेइ छुटाइ दिय,
क्याकि राज्य, पराक्रम रे महिमा सदाइ तमराइ हुन,
आमिन।”
“रे यदि तमनले मान्सनका पाप क्षमा अर्या भण्या स्वर्गमि हुन्या तमरा पिताले लगइ तमनलाइ क्षमा अद्द्या हुन। तर यदि तमनले मान्सनका पाप क्षमा अर्यानु भण्या तमरा पिताले लगइ तमरा पाप क्षमा अद्द्या होइन।”

“जब तम बर्त बसन्छौ, तब कपटि अनार जन धेका। क्याकि मान्सनलाइ बर्त बस्या धेकाउनाइलाइ तिनन आफना मुख अनारा बनाउनाहान। साँच्चि म तमनलाइ भण्नउ, तिननले मान्सन बठेइ प्रसंसा पाइ सक्या छ। तर जब तम बर्त बसन्छौ तब आफना मुन्टामि तेल ला, रे आफ्नो मुख धो, रे तमरो बर्त बस्या मान्सनले होइन, तर तमनले गोप्यमी अद्द्या काम जाणन्या तमरा पिताले धेकुन, रे सब गोप्य कुरणी जाणन्या तमरा पिताले तमलाइ इनाम दिन्या हुन।”


“आफना निउति धर्तीमि धन-सम्पत्ति जम्मा जन अर, जाँ किडा रे खयाले नास पाणन्छ रे जाँ चोर घर भितर पस्साहान रे सामान चोद्दाहान। तर निका काम अरिबर आफना निउति स्वर्गमि इनाम जम्मा अर, जाँ किडा रे खयाले नास पाड्डैन, रे जाँ चोर घर भितर पस्साइन रे चोरी अद्दाइन। जाँ तमरो धन हुन्छ, ताँइ सदाइ तमरो मन हुन्छ। तमरा आँखा शरीरका निउति बत्ति जसा हुन। तबइकिलाइ यदि तमरा आँखा ठीक छन भण्या तमरो पुराइ शरीर उजालो हुन्छ। तर यदि तमरा आँखा ठीक आथिन भण्या तमरो पुराइ शरीर अनारो हुन्छ। पइ यदि तम गलत उइले सोचन्छौ कि तमरो दिमाक ठीक छ, तर साँच्चि त्यो अनारो हुन्छ, पइ तमरा भितर भया अनारो त घोर अनारो हुन्छ! कसइले एकै समयमि दुइ मालिकको सेवा अद्द सक्दैन, क्याकि तइले एकलाइ घृणा अरन्छ रे अर्खालाइ प्रेम अरन्छ। अथवा त्यो एकसित इमानदार हुन्छ रे अर्खालाइ तुच्छ माणन्छ। तमनले परमेश्वर रे धनको सेवा अद्द सक्दानु।”


“तबइकिलाइ म तमनलाइ भण्नउ, दिन-दिनका शारीरिक जीवनका बारेमि फिक्री जन अर। कि खाउलो, कि पिउलो रे कि लाउलो भणि आफना शरीरकी निउति फिक्री जन अर। पक्‍का लगइ तमरो जीवन खानाइ भण्ना भौत महत्वपूर्ण छ! रे तमरो शरीर तमनले लाउन्या लत्ता भण्ना भौत महत्वपूर्ण छ! अग्गासका उड्या चडाचुडिलाइ हेर। तिनले न त बुनाहान, न काट्टाहान, न भकारीनि बटुल्लाहान, तर तमरा स्वर्गमि हुन्या पिताले तिनलाइ ख्वाउनाहान। रे तमन त चडाचुडि भण्ना बड्ता महत्वपूर्ण छौ!”


“तमनमि हइ कइले जीवनको चिन्ता अरिबर आफना आयुमि एक घडीसम्म लगइ थप्द सकन्छ? लत्ताकि निउति तमन क्याकि चिन्ता अरन्छौ? मैदानमी भया लिली फुलका बारेमि सोच। तिन कसेरी ठुला हुनाहान, तिनले न काम अद्दाहन, न लत्ता बनाउनाहान। रे म तमनलाइ भण्नउ, सोलोमन राजा लगइ आफना सब बैभवमि तिनमि हइ एक फुल जति सुन्दर रुपमि शिङारिया थेइन्न। यदि परमेश्वरले आज हुन्या रे भोल आगाइनी खितिन्या घाँसलाइ परमेश्वरले यिसेरी शिङाद्दाहान भण्या, परमेश्वरले पक्‍का तमनलाइ हेरचाह अद्दाहान। तमरो बिश्वास इति कम क्याकि छ?”
“तबइकिलाइ तमनले चिन्ता अरिबर जन भण कि खाउलो, कि पिउलो, कि लाउलो? क्याकि गैर-यहुदि मान्सन जइले परमेश्वरको आज्ञापालन अद्दाइन तिननले यिन सब चिज खोज्जाहन, रे तमरा स्वर्गमि हुन्या पिताले तमनलाइ यिन सब चिजको खाँचो छ भणि जाण्नाहान, तबइकिलाइ चिन्ता जन अर। तर पइल्ली परमेश्वरको राज्यलाइ महत्व दिय रे धार्मि जीवन जीअ रे यिन सब चिज तमरा निउति दिइन्याहुन। तबइकिलाइ भोलका दिनकि निउति चिन्ता जन अर, क्याकि भोलका दिनले आफ्नो चिन्ता आफइ ल्याउछ। आजको दु:ख आजकि निउति भौत छ।”

Yoka मत्ती 6