Ge’ez - 2021 - BSE (NT) Non Drama

Ge’ez - 2021 - BSE (NT) Drama

ቀዳሚሁ ቃል ውእቱ ወውእቱ ቃል ኀበ እግዚአብሔር ውእቱ ወእግዚአብሔር ውእቱ ቃል። ወከማሁ ቀዳሚሁ እምቀዲሙ ኀበ እግዚአብሔር ውእቱ። ወኵሉ ቦቱ ኮነ ወዘእንበሌሁሰ አልቦ ዘኮነ ወኢምንትኒ እምዘኮነ። ወዘሂ ኮነ በእንቲኣሁ ቦቱ ሕይወት ውእቱ ወሕይወትሰ ብርሃኑ ለዕጓለ እመሕያው ውእቱ። ወብርሃንሰ ዘውስተ ጽልመት ያበርህ ወያርኢ ወጽልመትኒ ኢይረክቦ ወኢይቀርቦ።

ወሀሎ አሐዱ ብእሲ ዘተፈነወ እምኀበ እግዚአብሔር ዘስሙ ዮሐንስ። ወውእቱ መጽአ ለስምዕ ከመ ይኩን ሰማዕተ በእንተ ብርሃን ከመ ኵሉ ይእመን ቦቱ። ወለሊሁሰ ኢኮነ ብርሃነ ዳእሙ ሰማዕተ ይኩን በእንተ ብርሃን። ወብርሃነ ጽድቅሰ ዘያበርህ ለኵሉ ሰብእ ዘመጽአ ውስተ ዓለም። ወውስተ ዓለም ሀሎ ወዓለምኒ ቦቱ ኮነ ወዓለምሰ ኢያእመሮ። ውስተ ዚኣሁ መጽአ ወእሊኣሁሰ ኢተወክፍዎ። ወለእለሰ ተወክፍዎ ወሀቦሙ ሥልጣነ ውሉደ እግዚአብሔር ይኩኑ ለእለ አምኑ በስሙ። እለ ኢኮኑ እምነ ዘሥጋ ወደም ወኢእምሥምረተ ብእሲ ወብእሲት አላ እም እግዚአብሔር ተወልዱ። ወውእቱ ቃል ሥጋ ኮነ ወኀደረ ላዕሌነ ወርኢነ ስብሐቲሁ ከመ ስብሐተ አሐዱ ዋሕድ ለአቡሁ ዘምሉእ ጸጋ ወጽድቀ ወሞገሰ። ዮሐንስ ሰማዕቱ በእንቲኣሁ ከልሐ ወይቤ ዝውእቱ ዘእቤለክሙ አነ በእንቲኣሁ ይመጽእ እምድኅሬየ ብእሲ ዘሀሎ እምቅድሜየ እስመ ውእቱ ቀደመኒ። እስመ እምተረፈ ዚኣሁ ነሣእነ ንሕነ ኵልነ ጸጋ በዲበ ጸጋ። እስመ ኦሪት በሙሴ ተውህበት ለነ ጸጋሰ ወጽድቅ በኢየሱስ ክርስቶስ ኮነ ለነ። ለእግዚአብሔርሰ አልቦ ዘርእዮ ግሙራ አላ ወልድ ዋሕድ ዘሀሎ ውስተ ሕፅነ አቡሁ ውእቱ ነገረነ። ወዝንቱ ውእቱ ስምዑ ለዮሐንስ አመ ለአኩ ኀቤሁ አይሁድ እምኢየሩሳሌም ካህናተ ወሌዋውያነ ከመ ይሰአልዎ ወይበልዎ መኑ አንተ። ወአምነ ወኢክሕደ ከመ ኢኮነ ውእቱ ክርስቶስሃ። ወይቤልዎ መኑ አንተ ኤልያስኑ አንተ ወይቤ ኢኮንኩ ወይቤልዎ ነቢይኑ አንተ ወይቤ አልቦ። ወይቤልዎ መኑመ አንተ እንከ ከመ ናይድዖሙ ወናጠይቆሙ ለእለ ለአኩነ ወፈነዉነ ወመነ ትብል ርእሰከ። ወይቤ አንሰ ቃለ ዐዋዲ ዘይሰብክ በገዳም ወይብል ጺሑአ ፍኖቶ ለእግዚአብሔር በከመ ይቤ ኢሳይያስ ነቢይ። ወእለሰ ተፈነዉ እምፈሪሳውያን እሙንቱ። ወተስእልዎ ወይቤልዎ በእፎ እንከ ታጠምቅ ለእመ ኢኮንከ ክርስቶስሃ ወኢኤልያስሃ ወኢነቢየ። ወአውሥአ ዮሐንስ ወይቤሎሙ አንሰ አጠምቀክሙ በማይ ወማእከሌክሙ ሀሎ ይቀውም ዘኢተአምርዎ አንትሙ። ዘይመጽእ እምድኅሬየ ውእቱ ዘሀሎ እምቅድሜየ ዘኢይደልወኒ እፍታሕ ቶታነ አሣእኒሁ እምእገሪሁ ወውእቱ ያጠምቀክሙ በመንፈስ ቅዱስ ወበእሳት። ወከመዝ ኮነ በቢታንያ በቤተ ራባ፥ በማዕዶተ ዮርዳኖስ በኀበ ሀሎ ዮሐንስ ያጠምቅ። ወአመ ሳኒታ ርእዮ ዮሐንስ ለእግዚእ ኢየሱስ እንዘ ይመጽእ ኀቤሁ ወይቤ ነዋ በግዑ ለእግዚአብሔር ዘያአትት ወያሴስል ኀጢአተ ዓለም። ዝንቱ ውእቱ ዘእቤለክሙ አነ በእንቲኣሁ ይመጽእ እምድኅሬየ ብእሲ ዘሀሎ እምቅድሜየ እስመ እምቅድሜየ ውእቱ ኮነ። ወአንሰ ኢየአምሮ ዳእሙ ከመ ያእምርዎ እስራኤል በእንተዝ መጻእኩ አነ ከመ አጥምቅ በማይ። ወነገረ ስምዖ ዮሐንስ ወይቤ ርኢኩ መንፈስ ቅዱስ እንዘ ይወርድ እምሰማይ ከመ እንተ ርግብ ወይነብር ዲቤሁ። ወአንሰ ኢየአምሮ ወባሕቱ ዘፈነወኒ ከመ አጥምቅ በማይ ውእቱ ይቤለኒ ዲበ ዘርኢከ ይወርድ መንፈስ ቅዱስ ወይነብር ዲቤሁ ውእቱኬ ዘያጠምቅ በመንፈስ ቅዱስ። ወለልየ ርኢኩ ወአነ ሰማዕቱ ከመ ዝንቱ ውእቱ ወልዱ ለእግዚአብሔር።

ወበሳኒታ ካዕበ እንዘ ይቀውም ዮሐንስ ወክልኤቱ እምአርዳኢሁ። ርእዮ ለእግዚእ ኢየሱስ እንዘ የሐውር ወይቤ ነዋ በግዑ ለእግዚአብሔር ዘያአትት ወያሴስል ኀጢአተ ዓለም። ወሰምዕዎ ክልኤሆሙ አርዳኢሁ እንዘ ይብል ከመዝ ወተለውዎ ለእግዚእ ኢየሱስ። ወተመዪጦ እግዚእ ኢየሱስ ርእዮሙ እንዘ ይተልውዎ ወይቤሎሙ ምንተ ተኀሥሡ። ወይቤልዎ ረቢ ዘበትርጓሜሁ ሊቅ ብሂል አይቴ ተኀድር። ወይቤሎሙ ንዑ ትርአዩ ኀበ አኀድር ወሖሩ ወርእዩ ኀበ የኀድር ወወዐሉ ኀቤሁ ይእተ ዕለተ እስከ ዐሥሩ ሰዓት። ወአሐዱ ውእቱ እንድርያስ እኍሁ ለስምዖን ጴጥሮስ እምክልኤቱ እለ ሰምዑ በኀበ ዮሐንስ ወተለውዎ ለእግዚእ ኢየሱስ። ወለሊሁ አቅደመ ረኪበ እኅዋሁ ስምዖንሃ ወይቤሎ ረከብናሁ ለማስያስ ዘበትርጓሜሁ ይብልዎ ክርስቶስ። ወውእቱ ወሰዶ ኀበ እግዚእ ኢየሱስ ወሶበ ርእዮ እግዚእ ኢየሱስ ይቤሎ አንተኑ ስምዖን ወልደ ዮና አንተኬ ትሰመይ ኬፋ ዘበትርጓሜሁ ጴጥሮስ። ወበሳኒታ ፈቀደ ይሑር ገሊላ ወረከቦ እግዚእ ኢየሱስ ለፊልጶስ ወይቤሎ ትልወኒ። ወውእቱሰ ፊልጶስ ዘቤተ ሳይዳ እምሀገረ እንድርያስ ወጴጥሮስ። ወረከቦ ፊልጶስ ለናትናኤል ወይቤሎ ረከብናሁ ለኢየሱስ ወልደ ዮሴፍ ዘእምናዝሬት ዘጸሐፈ ሙሴ ውስተ ኦሪት ወነቢያትኒ ተነበዩ በእንቲአሁ። ወይቤሎ ናትናኤል ቦኑ ይትከሀል እምናዝሬት ከመ ይፃእ ብእሲ ኄር ወይቤሎ ፊልጶስ ነዓ ትርአይ። ወሶበ ርእዮ እግዚእ ኢየሱስ ለናትናኤል እንዘ ይመጽእ ኀቤሁ ይቤ በእንቲኣሁ ነዋ ዘበአማን እስራኤላዊ ዘአልቦ ጽልሑት ውስተ ልቡ። ወይቤሎ ናትናኤል በአይቴ ተአምረኒ ወአውሥአ እግዚእ ኢየሱስ ወይቤሎ እምቅድመ ይጸውዕከ ፊልጶስ ርኢኩከ በታሕተ ዕፀ በለስ። ወአውሥአ ናትናኤል ወይቤሎ ረቢ አማን አንተ ውእቱ ወልደ እግዚአብሔር ወንጉሠ እስራኤል አንተ። ወአውሥአ እግዚእ ኢየሱስ ወይቤሎ እስመ እመ እቤለከሁ ርኢኩከ በታሕተ ዕፀ በለስ ተአምንሁ እምይእዜሰ ዘየዐቢ እምዝ ትሬኢ። ወይቤሎሙ አማን አማን እብለክሙ እምይእዜሰ ትሬእዩ እንዘ ይትረኀዋ ሰማያት ወመላእክተ እግዚአብሔር እንዘ የዐርጉ ወይወርዱ ኀበ ወልደ ዕጓለ እመሕያው።

Yoka ወንጌል ዘዮሐንስ 1