If you have would like a copy of this version please contact info@davaraudiobibles.org

Cebaara Sénoufo Old Testament

Kolocɔlɔɔ Syɛ́ɛnri © Bible Society of Côte d'Ivoire, 2008.

A Zyakɔbi si Laban nànbiigèle syɛ́ɛnrɛ lóʔo, a pe i gi nyuu níì jo: «Lɔ́ree myɛ di pye lè wolo tóow ma, Zyakɔbi n ti myɛ láa. Toro bárigaw ni wi lɔnɛʔɛri bee myɛ taa.» A Zyakɔbi gi kɔ̀rɔsíi n gi nyaa Laban yɛ́ɛgi ga níì pye ki kanlɛɛmi na woro kàbangi na í. A Yawe gi joo Zyakɔbi ma níì wi pye: «Lúru maa syée mɔ tóobèle tára ma, mɔ kpaʔa wóbèle ma, mii a pye ní mɔ ní.»
A Zyakɔbi tun a be sáà Arasyɛli ní Leya yeri yaà ségi ma, beè wi yaweeyiligèle da pye lè, a be pan wi ma. A wi baa be pye: «Mii n yele tóow yɛ́ʔɛ kɔ̀rɔsíi n gi nyaa ki ní o nyɛ gi kanlɛɛmi na mii kàbangi na í. Kàjáa Kolocɔlɔɔ wi lè mii tóow wóo, woro wi da pye ní mii ní. Yele si n gi cán mii n tɔ̀nɔ n báara yele tóow ma ní mii bárigaw myɛ ní. Yele tóow si n mii jànváa níì mii sàraw kàriga tɔlɔyɔ kɛɛ. Kàjáa Kolocɔlɔɔ ga fɔ̀lɔ n gi yaʔa wi kapeʔe pye mii na í. Wi ga jo: ‹Wonyɔngɔgèle ke a pye mɔ saraw,› yaweeri myɛ n ni wonyɔngɔ-nyɔngɔgèle sii. Wi ga jo: ‹Tɛɛwɔɔyi wòʔolo ke a pye mɔ saraw,› yaweeri myɛ n ni tɛɛwɔɔyi wòʔolo sii. Kánmi bee na Kolocɔlɔɔ yele tóow yaweere syɔɔ wi ma n kaan mii ma. Lǎli ni yaweeri ga ni lúru tiyɛɛ na lè, mii i gáà wéle n gi nyaa ŋúnɔgɔ na sikepɔbèle be lúru di na lè, pe n pye wonyɔngɔ-nyɔngɔbèlē, ní kàgbaa wòolo, ní tɛɛwɔɔyɔ wòolo. Kolocɔlɔɔ nyɛ̀ʔɛni tunduɔn n si mii yeri ŋúnɔgi na si jo: ‹Zyakɔbi.› Mii n wi pye: ‹Cooì.› Wi n mii pye: ‹Ki n yɛlɛ mi mɔ yɛ́ɛgi yìrige maa gi wéle, yaweeri bɔ̀ɔlɔ myɛ be lúru yaweeri na lè, pe i nyɛ wonyɔngɔ-nyɔngɔbèlē, ní kàgbaa wòolo, ní tɛɛwɔɔyɔ wòolo. Koro n kpéʔele níì cán gee myɛ Laban kpéʔele mɔ na lè, mii i ki myɛ nyaagi. Mii wi nyɛ Kolocɔlɔɔ, wee wi wiyɛɛ dɛ̀ɛn mɔ na lè Betɛli ni. Tɛ́ɛgi ni mɔ sǐnmi wo lè kàdɛnɛgi gàánna na, ní beè mɔ nyɔ́ɔgi fàli mii ma lè, ki n yɛlɛ mi yìri lǎli naa ni mi yiri tári naa ni mi lúru mi kári mɔ táseeri ma.› »
A Arasyɛli ní Leya wi yari: «A lɛɛlɛ ní kɔrigɔ níì kòro lé wolo ma wolo tóow kpaʔa ni? Wi ga wolo córo àmɛɛ táraa nikwɔɔ syɛ̀ɛnnɛ nyɛ lè ì? Ncan wi n wolo pára, níì wolo wáliw lìi. Lɔ́ree Kolocɔlɔɔ yirige wolo tóow kɔ́yɔ ni lè, ti i nyɛ wolo ní wolo pìíbèle wóro. Koro na gee myɛ Kolocɔlɔɔ joo mɔ ma lè, ki n yɛlɛ mi gi kpéʔele.»
Lǎli bee ni a Zyakɔbi yìri n wi pìíbèle ní wi cébèle lúrugo fàlibaayi na. A wi wi yaweeri myɛ kɔ́ri n fàra wi kɔlɔ̀ yáriri myɛ na, dee wi taa lè, gee bee n jo yaweeree myɛ wi da taa Padan-Arami ni lè. A wi yìri ni syée wi tóow Izaaki tɛ́ʔɛ ma Kanaan tári ma. Laban maa kári sa wi yaweeyiligèle síire cɛnɛ, a Arasyɛli wi tóow Laban màdebiigèle yùu. A Zyakɔbi Laban jànváa wi lè Arameyɛnw, níì fàn n yiri wi ga joo ní wi ní í. A wi fàn ní yáriri myɛ ní, dee di pye wi ma lè. Wi n yìri n cábigi jeli níì yɛ́ɛgi le ni syée Galaadi nyanbeleyi kàbaan na.
Ki candaanri wógi na, a wàa baa Zyakɔbi fǎnni wóʔo joo Laban ma. A Laban wi senyɛnbèle kɔ́ri, a be taʔa Zyakɔbi na n tánʔa canya kɔrɔsiin, ní sáà wi nɛnɛ n cò Galaadi nyanbeleyi na. Kàjáa Kolocɔlɔɔ maa wiyɛɛ dɛ̀ɛn Laban na yébiligi ni ŋúnɔgɔ na, wi lè Arameyɛnw, níì wi pye: «Ki n yɛlɛ maa miyɛɛ kɔ̀rɔsíi. Mɔ a kɔ́ yarigaa faala joo Zyakɔbi ma àmɛɛ gi mɔ dɛ́nɛ lè í.»
A Laban sáà nan Zyakɔbi na. Zyakɔbi si maa wi fànikpaagi kóri nyanbelegaa na, á Laban wi wógi kóri ní wi senyɛnbèle ní Galaadi nyanbelegi na. A Laban Zyakɔbi pye: «Nyàʔá na mɔ gee naa kpéʔele? Nyàʔá na mɔ mii jànváa níì mii pìíbèle kɔ́ri n yiri n be pye àmɛɛ kapɛɛnnɛ kàsolebéle nyɛ lè? Nyàʔá na mɔ yiri n fàn làrama ni, n mii jànváa? Mɔ ga maa mii sàmi, mii mǎà dée mɔ tórigo ní fundaanra ŋúnuyo ní n fàra tàmábèle, ní kɔ̀ríw na. Mɔ ga caà mii yaʔa mii í mii pìíbèle ní mii pìinyanbiiyi syɔɔnri syɔɔnri í. Yákirifunmɔ kéele mɔ kpéʔele lee dɛ. Fànʔa i nyɛ mii ma bi gbǎn kapeʔe kpéʔele yele na. Kàjáa mɔ tóow Kolocɔlɔɔ wi gi joo mii ma cànʔaniw níì jo: ‹Ki n yɛlɛ maa miyɛɛ kɔ̀rɔsíi. Mɔ a kɔ́ yarigaa faala joo Zyakɔbi ma àmɛɛ gi mɔ dɛ́nɛ lè í.› Awá tɔ́ɔliw ni, kapye mɔ si n baa gi nyaa ki n yɛlɛ mɔ í kári, níì cán mɔ tóow kpaʔa kéele i nyɛ mɔ fúngi ni, nyàʔá na si mɔ mii kolocɔlɔbèle yùu?»
A Zyakɔbi Laban yari: «Mii maa ni fɛ̀ɛgí n jo dɔ̀ʔɔ́ mɔ a kɔ́ mɔ piibèle syɔɔ mii ma. Mɔ ga mɔ kolocɔlɔbèle nyaa wee ma lè, wee bee a ní kòro beè sìi na í. Mii yáriri myɛ waragi wo senyɛnbèle myɛ nyɛ́nɛ na, gee mɔ ga nyaa lè mɔ wóʔo, mí gi láa.» Zyakɔbi si da gi cán ncan Arasyɛli wi be yùu í.
A Laban jée Zyakɔbi fànikpaagi ni, n jée Leya wógi ni, ní falipyecebèle siin wóʔo ni, wi ga wi kolocɔlɔbèle nyaa í. Wi yiri lè Leya fànikpaagi ni, a wi jée Arasyɛli wógi ni. Kàjáa Arasyɛli wi da màdebiigèle bee láa. A wi si ge le fàlibaa-kǒli láara ni níì tɛ́ɛn ge na. A Laban fànikpaagi tɛ́ɛyɛ myɛ fuguri. Wi ga yafyɛn nyaa í. A wi gi joo wi tóow ma níì jo: «Abaa, àmɛɛ gi nyɛ lè mii ga yìri í, ki ga yɛlɛ gee bee í kɔ́ mɔ fúngi tanʔa mii kurugo í. Lòweligi gi nyɛ mii na, koro na mii a gbǎn yìri mɔ nyɛ́nɛ na í.»
A Laban fànikpaagi tɛ́ɛyɛ myɛ waragi. Wi ga wi màdebiigèle nyaa í. A Zyakɔbi fúngi tɔ̀nɔ n tanʔa, a wi kàsii cò ní Laban ní. A wi gi joo níì jo: «Keelìí ni mii kolo? Kapeelìí mii kpéʔele, á mɔ mii kɔ́ri n láa ní fundanʔari naa félege ní? Mɔ mii kɔ́lɔ yáriri myɛ waragi lè, mɔ kpáagi yárira myɛ ni, ki gìí mɔ nyaa di ni? Ki n yɛlɛ mi gi yirige mi tɛ́ʔɛ nɛɛ mii senyɛnbèle ní mɔ senyɛnbèle nyɛ́nɛ na, koro ga pye poro i kútiiw ceri wo siinw nínge ni. Wéle, yɛ̀ʔɛlɛ toko mii kwɔ́ɔ ní mɔ ní, mɔ banɔɔwaa wàlá mɔ sikenɔɔwaa ga téè see n fɔ̀n í. Mii ga wɔ́ɔ̀ mɔ batogi bàpɔɔlɔ káa í. Mii ga wɔ́ɔ̀ pan ní mɔ yaweegèle sìnbirigi yaweere wogáa-gòrolaa ní cangaa mɔ ma í. Mii n bɔ̀nɔw bee yaʔa a wi pye mii tiimaa wóo. Pe ga yaweelaa yùu cángi ni wàlá yébiligi ni, mɔ n mii kɔ́ri mii í li caa. A mii pye kánmi naa na ki ga pye cángi làla ni, káfugi n wári mii na, ki ga pye yébiligi ni, wéeri n wári mii na. A mii kòro kánmi bee na, mii a ŋúnɔmɔ taa í. Mii yɛ́ɛgèle toko wi wee mɔ tɛ́ɛgi ni. Mii n yɛ̀ʔɛlɛ kɛɛ ní sicɛrɛ báara mɔ ma mɔ piibèle siin kéele na, níì yɛ̀ʔɛlɛ kɔrɔni báara mɔ ma mɔ yaweegèle na. Kàjáa mɔ n mii sàraw fàli n taa tɔlɔyɔ kɛɛ. Mii tóolɛɛgi Abirahami Kolocɔlɔw, woro wee na mii tóow Izaaki da ni fɛ̀ɛgí lè, kapye wi da pye ní mii ní í, mɔ mǎà dée mii tórigo ní kɔwaayi ní. Kolocɔlɔɔ si n mii wɔʔɔgi ní mii faligbanw nyaa, koro na wi fúlo mɔ na yébiligi ni mii kéeli na.»
A Laban Zyakɔbi yari: «Calipiigèle naa i nyɛ mii pìibēle, a nànbiigèle naa i nyɛ mii pìibēle, a yaweeri naa i nyɛ mii wóro. Yariga o yariga mɔ nyaa lè nɛɛ naa, mii wóʔo gii. Koro na níjanʔa, nyàʔá mii a ní gbǎn pye mii pìíbèle, ní pìíbèle bele kéele na be see lè? Koro na tɔ́ɔliw ni, ki n yɛlɛ wo joogaanna kpéʔele loro í pye séera wo níngi ni.»
A Zyakɔbi kàdɛnɛgɛ láa n yérige n gi pye gàánna. Koro kàdoʔo ma a Zyakɔbi gi joo wi senyɛnbèle ma níì jo: «Ki n yɛlɛ ye kàdɛnɛrɛ jóo.» A be kàdɛnɛri jóo n kpoʔolo gboolo níì lìi nɛɛ bee kàdɛnɛgbooli na. A Laban tɛ́ɛgi bee mɛ́ʔɛ le ni gi yiri Yegari-Sahaduta. A Zyakɔbi si gi mɛ́ɛgi le ni gi yiri Galedi. A Laban jo: «Kàdɛnɛgbooli naa i nyɛ séera níjanʔa mii ní mɔ níngi ni.»
Koro na be tɛ́ɛgi bee mɛ́ʔɛ le ni gi yiri Galedi. Ní wɔ́ɔ i gi yiri Misipa. Níì cán Laban maa níì jo: «Ki n yɛlɛ Yawe í pye kɔ̀rɔsiifɔlɔ mii ní mɔ níngi ni lǎli ni wolo ga wàli n láʔa woyɛɛ na lè. Mɔ ga wɔʔɔlɔ taʔa mii pìíbèle na, wàlá mɔ ga ní sáà cébèle pèle nikwɔɔlɔ láa n fàra mii pìíbèle na, ki n yɛlɛ mi kɔ̀rɔsíi, ncan syɔɔn ban wi naa ní wo ní í, kàjáa Kolocɔlɔɔ tiimaa wi nyɛ ki séeraw.»
Koro kàdoʔo ma a Laban Zyakɔbi yari: «Kàdɛnɛgbooli naa wéle, lee mii kpoʔolo mii ní mɔ níngi ni lè, n fàra kàdɛnɛgi gàánna na. Kàdɛnɛgbooli naa, ní kàdɛnɛgɛ gàánni naa i nyɛ séera n gi tɛ̀ɛn ncan mii a sɔ̀lɔ kàdɛnɛgbooli naa na bi kári mɔ kurugo kapeʔe kánma na í. Mɔ si a wɔ́ɔ sɔ̀lɔ kàdɛnɛgbooli naa, ní kàdɛnɛgɛ gàánni naa na bi kári mii kurugo kapeʔe kánma na í. Ki n yɛlɛ Abirahami Kolocɔlɔw, ní Nahɔri Kolocɔlɔw, ní be tóow Kolocɔlɔɔ í pye kútiijoow wo níngi ni.»
A Zyakɔbi kàli Kolocɔlɔɔ na, woro wee na wi tóow Izaaki da ni fɛ̀ɛgí lè. Koro kàdoʔo ma a Zyakɔbi sáriga wòlo nyanbelegi na, níì wi senyɛnbèle yeri pe ba lìi. A pe baa lìi níì syɔ́ɔn nyanbelegi na.

Yoka Sélimɛ 31