If you have would like a copy of this version please contact info@davaraudiobibles.org

Limbu Old Testament

यहवे दाङ्‌बा निङ्‌वाॽफुमाङ्‌ङिल्‍ले़ चोगुसिबा ताम्‍भुङ् थक्‍साहाॽओ असेःक्‍के़न् के़रे़क्‍नुःल्‍ले़ कुॽइगे़भे़म्‍बा चोगे़॥ खे़ल्‍ले़ मे़न्‍छुमान् मे़त्तु, “निङ्‌वाॽफुमाङ्‌ङिल्‍ले़ सिङ्‌सेॽइक्‍कोबा सिङ्‌बुङ्‌हाॽओ के़धोःक्‍पा आत्तिन् सिङ्‌सेन् मे़जे़से़न्‍ने़ॽ फाॽआङ् के़मे़त्ते़छिआङ् वाॽबि?”
मे़न्‍छुमाःल्‍ले़ असेःक्‍के़न् मे़त्तु, “सिङ्‌सेॽइक्‍कोबा सिङ्‌बुङ्‌हाॽओबा सिङ्‌सेन् आन्‍छिगे चामा सुक्‍सुगे़, कर सिङ्‌सेॽइक्‍के़ल्‍ले़ कुलुम्‍मो के़युङ्‌बा सिङ्‌बुङ्‌ङिल्‍ले़ कुजाॽइल्‍ले़ कुयाःम्‍बेओ, ‘खे़न् मे़जे़से़न्‍ने़ॽ, मे़सुसे़छे़न्‍ने़ॽ, मेःन्‍ने़फाग्र खे़न्‍छिॽ के़सिसिॽ’ फाॽआङ् यहवे दाङ्‌बाल्‍ले़ मे़त्ते़छिगे़आङ् वाॽ॥”
अस्‍सेःक्‍के़ल्‍ले़ मे़न्‍छुमान् मे़त्तु, “खे़न्‍छिॽ के़न्‍छिसिन्॥ थेआङ्‌भे़ल्‍ले़ आभे़ल्‍ले़ खे़न्‍छिॽ के़जासुॽ खे़न् ये़न्‍नो खे़न्‍छिॽ मिक् हन्, हे़क्‍क्‍याङ् नुबा नु ताप्‍फे़ःम्‍बा सिक्‍कुम् निङ्‌वाॽ के़घोसुआङ् खे़न्‍छिॽ निङ्‌वाॽफुमाङ् हे़क्‍तङ्‌बा के़बोङ्‌सिॽ के़लॽबान् निङ्‌वाॽफुमाङ्‌ङिल्‍ले़ निसुॽरो॥”
मे़न्‍छुमाःल्‍ले़ खे़न् सिङ्‌बुङ्‌ङिल्‍ले़ कुजाॽइन् चामाल्‍ले़ नुबा के़बोङ्‌बा नु ओमे़प्‍मे़ल्‍ले़ नुबा निगे़धाःप्‍पा हे़क्‍क्‍याङ् सिक्‍कुम् निङ्‌वाॽ खोमारे़ लागि खे़न् सिङ्‌बुङ्‌ङिल्‍ले़ कुजाॽइन् चामा के़बोङ्‌बा निसु, हे़क्‍क्‍याङ् खे़न् सिङ्‌बुङ्‌ङिल्‍ले़ कुजाॽइन् तुबुआङ् च, खे़ब्‍याङ् खुने़ॽनु सोरिक् के़वाॽबा कुये़ःम्‍बाःन्‍नाङ् पिरु, हे़क्‍क्‍याङ् खे़ल्‍ले़ च॥ खे़ब्‍याङ् ने़प्‍मजाङ्‌ले़ खुन्‍छिॽ मिक् हरे़, हे़क्‍क्‍याङ् आन्‍छिॽग ले़क्‍चाॽबुधुक् नि आवाॽसिरे़छ के़लॽबा निङ्‌वाॽ खोसे़त्‍छु॥ हे़क्‍क्‍याङ् पःत्‍छेल्‍ले़ कुभे़क्‌वाहाॽ थत्ते़छुआङ् खुन्‍छिॽ लागि चाङ् चोगे़त्‍छु॥
हे़क्‍क्‍याङ् युःन्‍छिक् युःन्‍छिक् यहवे दाङ्‌बा निङ्‌वाॽफुमाङ्‌ङिन् सिङ्‌सेॽइक्‍को ताक्‍कन्‍दे़र वये़ःल्‍ले़बा इक्‍लान् खे़ङ्‌हाॽरे़ खे़प्‍से़त्‍छु हे़क्‍क्‍याङ् मे़न्‍छाम् याप्‍मिन् नु कुमेःत्तिन् यहवे दाङ्‌बे़ल्‍ले़ कुनिमोलाम् सिङ्‌सेॽइक्‍कोबा सिङ्‌बुङ्‌हाॽओ चिङ्‌ने़त्‍छि॥ कर यहवे दाङ्‌बा निङ्‌वाॽफुमाङ्‌ङिल्‍ले़ मे़न्‍छाम् याप्‍मिन् उःत्तु, “खे़ने़ॽ आत्तो के़वाॽ?”
खे़ल्‍ले़ मे़त्तु, “खे़ने़ॽ के़इक्‍लान् सिङ्‌सेॽइक्‍को खे़प्‍सुङ्‌ङाङ् आङ्‌गाॽ किसाङ्, थेआङ्‌भे़ल्‍ले़ आङ्‌गाॽ ले़क्‍चाॽबुधुक् वयाङ् खे़ल्‍ले़चोगुल्‍ले़ आङ्‌गाॽ चिङ्‌सिङाङ्॥”
खुने़ॽ मे़त्तु, “खे़ने़ॽ ले़क्‍चाॽबुधुक् के़वाॽ फाॽआङ् हाःत्‍ले़ के़मे़त्ते़? मे़जे़न्‍ने़ॽ फाॽआङ् इङ्‌जाङ् पिने़बा सिङ्‌बुङ्‌ङिल्‍ले़ कुजाॽइन् के़जबि?”
मे़न्‍छाम् याप्‍मिःल्‍ले़ मे़त्तु, “आङ्‌गाॽनु वाॽसे़ के़बिराङ्‌मा मे़न्‍छुमाःल्‍ले़ खे़न् सिङ्‌बुङ्‌ङिल्‍ले़ कुजाॽइन् पिराङ् हे़क्‍क्‍याङ् आङ्‌गाॽ चाङ्॥”
खे़ब्‍याङ् यहवे दाङ्‌बा निङ्‌वाॽफुमाङ्‌ङिल्‍ले़ मे़न्‍छुमान् मे़त्तु, “खे़ने़ॽ थेआङ् अक्‍खे के़जोगुबाबे?”
मे़न्‍छुमाःल्‍ले़ मे़त्तु, “असेःक्‍के़ल्‍ले़नि इङ्‌ले़क्‍ताङ् हे़क्‍क्‍याङ् आङ्‌गाॽ खे़न् चाङ्॥”

खे़ब्‍याङ् यहवे दाङ्‌बा निङ्‌वाॽफुमाङ्‌ङिल्‍ले़ असेःक्‍के़न् मे़त्तु,
“खे़ने़ॽ अक्‍खे के़जोगुबाल्‍ले़ चोगुल्‍ले़
के़रे़क् हिम्‍थक्‍सा नु के़रे़क् ताम्‍भुङ् थक्‍साहाॽनुःल्‍ले़
यरिक् माङ्‌दे साक्‍मुरा के़घोबा के़बोङ्‌लो॥
खे़ने़ॽ के़साप्‍पोःक्‍किल्‍ले़ लाङ्‌गे़घेःक्‍लो
हे़क्‍क्‍याङ् के़हिङ्‌हिङ् खाम्‍मिन् के़जरो॥
खे़ने़ॽ नु मे़न्‍छुमाःल्‍ले़ कुलुम्‍मो,
हे़क्‍क्‍याङ् खे़ने़ॽ के़मुॽइदाङ्‌सा नु
मे़न्‍छुमाःल्‍ले़ कुमुॽइदाङ्‌सा लुम्‍मो
निङ्‌मि पान् केःत्तुङ् पिने़सिङ्‌लो॥
खे़ल्‍ले़ के़धेगेःक्‍किन् यःप्‍सु के़बिरो
हे़क्‍क्‍याङ् खे़ने़ॽ खे़ल्‍ले़ कुलाङ्‌गाक्‍थिःम्‍बे़न् के़अगु के़बिरुॽ॥”
खे़ब्‍याङ् मे़न्‍छुमान् मे़त्तु,
“खे़ने़ॽ के़सागप्‍मा तुङ्‌ङिन्
आङ्‌गाॽ चाॽरिक् फोसुङ् पिने़रो,
पसाक् साक्‍ल अङे़ःक्‌वा सागे़वाःन्‍दुॽ॥
खे़ने़ॽ के़निङ्‌वाःन् के़ये़म्‍बा ले़प्‍माङ् पत्‍लो,
हे़क्‍क्‍याङ् खे़ल्‍ले़ युक्‍को खे़ने़ॽ के़गत्‍लो॥”
खे़न् एगाङ् आदम्‍मे़न् खुने़ॽ मे़त्तु, “खे़ने़ॽ मे़ल्‍लिङ्‌गे़न् के़मेःत्तिल्‍ले़ कुबाःन्‍निन् के़घे़प्‍सुआङ् मे़न्‍जाओ फाॽआङ् इङ्‌जाङ् पिने़बा सिङ्‌बुङ्‌ङिल्‍ले़ कुजाॽइन् के़जबाल्‍ले़ चोगुल्‍ले़,
“खे़ने़ॽ के़जोगुल्‍ले़ खाम्‍बेःक्‍मो साङ्‌ग्रा माङ्‌दे थ्‍ये़आङ् वाॽरो॥
खे़ने़ॽ के़हिङ्‌हिङ् तुक्‍खे के़जोगुआङ्
खे़ल्‍ले़ फत्‍छुबा कुजान् के़जरो॥
खे़ल्‍ले़ खे़ने़ॽ के़लागि तिङ्‌ग्रेक् नु सेर्दाःक्‍मा तिङ्‌हाॽ लिङ्‌ल याःन्‍दु के़बिरो,
हे़क्‍क्‍याङ् खे़ने़ॽ प्‍याङ्‌सिगे़न् इक्‍ताप्‍पोबा नुधि साक्‍चिॽहाॽ के़जरो॥
खाम्‍मो मे़न्‍नुःङ् मे़म्‍बेःक्‍के थारिक्
के़द्‌वाबो के़होःम्‍ब्रिक्‌वा से़र
याःम्‍बक् के़जोगुआङ् कुजा के़जरो॥
थेआङ्‌भे़ल्‍ले़ खे़ने़ॽ खाम्‍मोलाम् लःप्‍मनाआङ् के़वये़,
खे़ने़ॽ खाम्‍ने़रो,
हे़क्‍क्‍याङ् खे़ने़ॽ खाम्‍मोए के़नुःङ् के़बेःक्‍लो॥”
आदम्‍मिल्‍ले़ कुमे़ल्‍लिङ्‌गे़न् कुमेःत्तिन् हवा मिङ् वाःत्तु, थेआङ्‌भे़ल्‍ले़ के़रे़क् कुहिङ्‌वे़त्‍हाॽरे़ खुन्‍छिॽ मा खुने़ॽएरो॥
यहवे दाङ्‌बा निङ्‌वाॽफुमाङ्‌ङिल्‍ले़ सिहोॽबा तेत् आदम्‍मिन् नु कुमेःत्तिल्‍ले़ लागि तयु हे़क्‍क्‍याङ् खे़न्‍हाॽ चाक्‍तुसि॥

हे़क्‍क्‍याङ् यहवे दाङ्‌बा निङ्‌वाॽफुमाङ्‌ङिल्‍ले़ पाःत्तु, “मे़न्‍छाम् याप्‍मिन् आनिॽ हे़क्‍के नुबा नु ताप्‍फे़ःम्‍बा कुसिङ् के़निःप्‍पा पोःक्‍खे़आङ् वाॽ॥ आल्‍ल खे़ल्‍ले़ हिङ्‌मन्‍ले़ सिङ्‌बुङ्‌ङिल्‍ले़ कुजाॽइन् तुप्‍माआङ् चामा मे़घोसुल्‍ल, मेःन्‍ने़फग्र खे़ल्‍ले़ तुबु चआङ् सदादिङ् कुहिङ्‌वे़त् पोङ्॥” खे़ल्‍ले़चोगुल्‍ले़ यहवे दाङ्‌बा निङ्‌वाॽफुमाङ्‌ङिल्‍ले़ खे़न् चोगुआङ् वये़बा खाम्‍बेःक्‍मो याःम्‍बक् चोक् चार फाॽआङ् अदन सिङ्‌सेॽइक्‍कोलाम् खे़न् लःत्तुदेसु॥ खुने़ॽ मे़न्‍छाम् याप्‍मिन् लःत्तुदेसुआङ् हिङ्‌मन् के़बिबा सिङ्‌बुङ्‌ङिन् कोमारे़ लागि अदन सिङ्‌सेॽइक्‍के़ल्‍ले़ नाम्‍गे़न् पिसाङ् माङ्‌लाइङ्‌बाहाॽ नु के़रे़क् पिसाङ् के़इबाआङ् के़वाॽबा मिधुङ् मिराःक्‍ले़न् ताभे ये़प्‍सु॥

Yoka तोलिङ्‌सोमु 3