Maakɨ 16
16
Jizaazai baryai ayɨna dɨkaava'.
(Matɨyui 28:1-8; Lukɨ 24:1-12; Jonɨ 20:1-10)
1Kwazaakegaa' mi'na kwavɨlava' Maarɨyaa' Maahɨthaala mwaalyasɨ Maarɨyaa' Jemɨzarɨ ganaangesɨ Saalomiyasɨ sa “Nemɨ Jizaazare kɨlaakejɨkɨ puraana!” deva marazɨnanya wabatɨrɨnnake' mubɨna. 2Mena mubɨna kye' Saadehaa' mwanyavɨ yɨrɨke' gaai pu'daa'nyɨyagaa' simaangevɨne a'mwe kaanna wɨna. 3Kaanna kuna wɨna yesa dɨnyɨna “Sɨlaangei kavi'nɨmaangevɨ warɨkerɨ nemɨnyɨna aai baasadelaka?” 4Sara dɨneva maranganna yadɨvɨ' dara wanganesa' “Ai, sɨlyai mena davaasɨnɨka!” Sare' dare'nesɨ. Sɨla sai wapemɨnnakei warakelyɨ. 5Mi'na deva simaangevɨ wɨlaawɨna yeva kumɨnyɨ aangasɨmagɨ mɨgɨnyai kwaabɨhannya yaaka nawɨ'nya' yɨra'nakerɨ tɨnna wanganna. Tɨnna wanganna yeva lɨka yɨna yeva atɨka maru'na'na. 6Atɨka maru'na'na yadaapi mɨgɨnyai wɨdɨna “Lɨka mipɨnera! Jizaazai Naazaretɨ mwaalyarɨ yɨsavɨri nilɨya wɨramwa'daasarɨna bɨ'manɨgava. Sara yawɨ'mwa. Kyɨdɨkaa'mwa' dava mamwaalyɨka. Yɨthaanyi! Wakɨwa'daasaba danganyɨla! 7Sare kɨrɨ' wawopɨri gamɨrerajɨ Pitalyɨ saraavɨ duthaawila! ‘Sɨnnawɨ Kwaaka Galɨli kwaana'mujɨ sarɨmɨ nyɨmɨdɨnaabyidera! Mi'na yɨhɨthevaaibɨ' saba dɨnyanganyideinyɨra,’ sahwai sara nyɨdɨwa'.” 8Sara wɨdɨna kya' simaangeyabadaa'nya kaanyave'na walyaweva lɨkaanya wɨna. Sare' dare'nesɨ. Bɨ'bɨta yadɨvɨ' lɨka yeva sɨmunya nayaa myawɨri. Lɨkaanya wɨna yeva aane pwarɨ kwarɨ aane pɨrɨvɨ kɨrɨvɨ mujɨ ye'. Sare' dare'nesɨ. Lɨka naanga wiake'na sahɨnɨ kunna marinaawɨna yesangɨ.
Maarɨyaa' Maahɨthaala mwaalya' Jizaazarɨ wangana'.
(Jonɨ 20:11-18)
9Saadehaa' yɨrɨkunyagaa' Jizaazai dɨkaavaka sɨnnawɨ Maarɨyaa' Maahɨthaala mwaalyavɨdaasɨ yɨmaka ati ata purɨdaa'nyɨ pwaraalyaraavɨ marasɨ'nakevɨ gamɨnyɨna wɨjɨwaaina'.
10Wɨjɨwaainakegaa' a'mwe sa' wawaka gamɨjɨyara yɨkwaraamaya dadaapiyaraavɨ buthɨna “Jizaazai kwaihwaainakei mwaaidɨ'nyɨ wangamwerɨnera.” 11Sara kadɨka wɨ'neva “Kwaasɨ yagaala nedɨwaka,” dɨnyɨna yeva sa'na malɨmwagi ye'.
Gamɨreraai Jizaazarɨ wanganagi.
(Lukɨ 24:13-35)
12Sara yɨna yesagaa'daasɨ a'mweraai wawɨnyanneba kaanya kyamaryagi sahwai mudɨkeibɨsai wɨlaabaka pɨgasaai wɨjɨwaaina'. 13“Jizaazalyɨ,” sara yawɨragɨla ayɨna wawagɨla gamɨre pwaraavɨ wɨdɨna kyagi sahwaraare yagaalya'na “Kwaasɨya',” dɨnyɨna yeva sa'na malɨmwagi ye'.
Jizaazai gamɨreraavɨ wɨjɨwaaina'.
(Matɨyui 28:16-20; Lukɨ 24:36-49; Jonɨ 20:19-23)
14Dɨvidaa'nyɨ angevɨ gamɨrera atɨraai yaka sɨvɨlyɨrɨdaasɨ pwaina sarera wapaaya tɨka nadaapi sahwai wɨlaabaka gamɨ mena dɨkaavakerɨ pwara tɨnna wanganeva gamɨre pwaraavɨ wɨdesa' malɨmwagyesa'najɨ sɨmunya myawɨryesa'najɨ maanga wɨdɨna. 15Maanga mi'na wɨdaka wɨdɨna “Yuyabanna Kwaaka yuyavakɨna wawopɨjɨ yagaala tewaanya' Gotɨyai wakyaaka yuyaraavɨ duzɨwaakyideihɨlyɨra. 16Savɨne'na pwai kanyɨlɨmwagarojɨ aalyavɨ bavɨtaazɨya kyapi Gotɨyai kayaa'nanya marasɨ'nada padaihasamaaradelyɨ. A'mwe pwai manyɨlɨmwagaryojɨ gannya kayaa'nanya yɨnahu waragothengɨra. Sahwarɨ jɨdavadelyɨ. 17A'mwera kanyɨlɨmwagarapi wɨjɨwaainya dara yɨma'nade. Nɨmɨre dɨragɨnya' maarapɨjɨ nɨmɨnyɨne yayavɨ yɨmakeraavɨ a'mweraavɨre munyɨkaavɨdaasɨ wɨdaasɨpɨ'de. Nabaai Maaveraavɨre yagaala wɨdɨpɨ'de. 18Naawɨnaanyarɨ maarapɨjɨ aalya nabaidɨvɨsa' napɨjɨ mabalyɨ yɨpɨ'de. Arɨkawɨnyɨra. Nabalɨnakengɨre mɨnyagɨnyangɨ ata kadathɨwagapɨjɨ nabalɨnake tewaanya mwaaibɨ'de. Sara yɨma'nɨpɨ'dengɨra,” wɨdɨna ya'.
Jizaazai Gotɨyarebannei Sɨgunyavɨna yɨlaawa'.
(Lukɨ 24:50-53; Apozelɨyara 1:9-11)
19Sarevɨdaa'nyɨ mi'na wɨdɨna yakegaa' Gotɨyai Naanga Jizaazarɨ makɨlaawɨna. Sara makɨlaawɨna kya' Gotɨyareba Sɨgunyavɨna Jizaazai yɨlaawaka Gotɨyare aangasɨmagɨ walamwaaina. 20Mi'na walamwaaina kya' gamɨrera waweva yuyaba wɨjɨwakadaapɨjɨ Naangei wɨgaimwaga'. Kugaimwaga' gamɨjɨ nawɨ'nya kye' a'mwera tɨnna wanganya'nera dara wɨja'na “Yagaala sa' Gotɨyaresɨra,” sahwai wɨjɨwaainya ya'.
© 2013, Wycliffe Bible Translators, Inc. All rights reserved.
