Hechos 5
5
Safirawan Ananías lulakuyashqan
1Saychömi juk runa karqan Ananías jutiyuq. Paymi warmin Safirawan chakranta rantikuyarqan. 2Ishkan yachasinakuskirmi chakranta rantikuyashqan qellayta rakikuskir wakilantana apostolkunaman Ananías aparqan.
3Saymi Pedro nirqan: <<Ananías, ¿imanirtaq Satanásta chaskipar Espíritu Santuta lulapaykanki? ¿Imanirtaq wakin qellayta rakikurir: <Kaylami chakräpa chanin qellay> nikanki? 4Rantikuyashqayki chakrapis y say qellaypis ¿manaku kikikikunapa kash? Sayno kaykaptinqa ¿imanirtaq lulakushkanki? Manami runakunatasu lulapashkanki, sinöqa Tayta Diostami>>.
5Pedro sayno nishqanta wiyarmi Ananías jinan höra wanuskirqan. Sayno wanushqanta musyaykurmi runakuna seqaypa mansakäyarqan. 6Saypitanami maqtakuna Ananíaspa ayanta piturkur apar pampayarqan.
7Saypita kimsa höratanömi Ananíaspa warmin Safira charqan. Pay manami musyarqansu runan wanushqanta. 8Chaykuptinmi Pedro tapurqan: <<¿Rasunpaypaku runayki apamushqan qellaylacho chakraykita rantikuyashkanki?>> nir.
Saymi Safira nirqan: <<Aw, saylachömi rantikuyashkä>>.
9Niptinmi Pedro nirqan: <<Señorninsipa Espïritun musyaykaptin ¿imanirtaq lulakuyänaykipaq yachasinakuyashkanki? ¡Rikay! Punkuchönami kaykäyan runaykipa ayanta pampaq maqtakuna. Kanan qamtanami apayäshunki>>.
10Sayno niptinmi Pedrupa nawpancho Safirapis wanuskirqan. Sayman maqtakuna yaykurmi wanushna jitaraykaqta tariyarqan. Saymi paytapis apaykur runanpa nawpanman pampayarqan. 11Ananíaswan Safira wanuyashqanta musyaykurmi Jesúsman yärakuqkunapis y mana yärakuqkunapis fiyupa mansakäyarqan.
Qeshyaqkunata apostolkuna aliyäsiyashqan
12Runakuna rikaykäyaptinmi apostolkuna aska milagrukunata rurayaq. Saynöpis Jesúsman lapan yärakuqkunami templuman aywar Salomónpa Alarnin niyashqanman shuntakäyaq. 13Wakin runakunaqa Jesúsman yärakuqkunata ali rikarpis paykunawan talukayta mansariyarqanmi. 14Sayno kaptinpis Jesúsman yärakuqkuna warmipis olqupis masmi askayäyarqan.
15Runakunanami qeshyaqkunata cämantinta cälliman jorqayämuq kayno yarpäyashpan: <<Pedro päsaptin lantuylanpis jananman chaptinqa aliyanqami>>.
16Cercan markakunapitapis runakuna Jerusalénman shayämuq qeshyaykaqkunata y supay nakasishqankunatapis apakurkurmi. Say apayashqan qeshyaykaqkunata lapantami apostolkuna aliyäsiyarqan.
Apostolkunata autoridäkuna prësu sariyashqan
17Saymi mas mandaq cüra y saduceo runakunapis apostolkunata chikiyashpan 18prësu sariykasir carcilman wichqasiyarqan. 19Wichqaraykäyaptinmi say sakay Tayta Dios kachamushqan ángel chaykur cárcel punkukunata kicharqan. Pedrutawan Juanta waqtaman jorqurirmi nirqan: 20<<Templu patiuman aywar runakuna salvakuyänanpaq ali wilakuyta wilakuyay>>.#Juan 11.25; 14.6; Rom. 6.4.
21Saymi waraynin tuta templupa patiunman apostolkuna yaykur runakunata wilapäyarqan.
Sayyaqmi yanapaqninkunawan mas mandaq cüra Sanedrín juezkunata y Israel runakunapa lapan autoridäninkunata qayasimurqan sesionta rurayänanpaq. Wilanakurkurmi wardiakunata kachayarqan carcilpita apostolkunata jorqayämunanpaq. 22Wardiakuna carcilman chaykuyashpannami apostolkunata tariyarqannasu. Saymi kutiykur niyarqan: 23<<Cárcel punku shumaq wichqaraykaqtami tariyashkä. Prësu täpaqkunatapis punkukunacho ichiraykäyaqtami tariyashkä. Ruriman yaykurmi isanqa mayqan prësutapis tariyashkäsu>>.
24Sayta wiyaykurmi [mas mandaq cüra,] templucho wardiakunapa capitannin y wakin mandaq cürakunapis yarpachakuyarqan: <<¿Imanöparaq qeshpiskiyash? ¿Imaraq päsash?>> niyashpan.
25Sayno yarpachakuykäyaptinmi juk runa chaykur nirqan: <<¡Carcilman wichqayashqayki runakuna templu patiuchömi yachaykäsiyan!>>
26Sayno niptinmi wardiakunata pushakurkur capitán aywarqan apostolkunata prësu sariyänanpaq. Chaykurmi runakuna samqayänanta mansakuyashpan mana maqaylapa prësu apayarqan. 27Sanedrín juezkuna shuntaraykäyashqanman chaykasiyaptinmi mas mandaq cüra apostolkunata nirqan: 28<<¿Manaku qamkunata niyashkä Jesúspa jutincho manana yachasiyänaykipaq? Sayno nikäyaptïpis Jesúspita yachasirmi intëru Jerusaléncho puriykäyanki. Saynöpis jitapaykäyämanki noqakuna Jesústa wanusiyashqäta>>.#Mat. 27.25.
29Sayno niptinmi Pedro y paywan kaykaq apostolkuna niyarqan: <<Runakunata cäsukuyänäpa trukanqa Tayta Diostami cäsukuyäshaq. 30Qamkuna Jesústa crucificaypa wanusish kayaptikipis unay ayllunsikuna yärakuyashqan Tayta Diosmi kawarisimush. 31Paymi mandamaqninsi y salvamaqninsi kaykan. Jusalikuyta wanakur perdonash kanansipaqmi aluq kaq nawpanman jamasish. 32Saytami noqakunapis musyasiyä y Espíritu Santupis runakunata musyasin. Payta wiyakuqkunamanmi Espíritu Santuta Tayta Dios kachamush>>.
33Sayno niyashqanta wiyaykurmi autoridäkuna fiyupa rabyakuyashpan wanusiyta munayarqan. 34Saymi lapan runakuna respitayashqan juk fariseo runa sharkushpan apostolkunata waqtaman rätula jorquskiyänanpaq wardiakunata nirqan. Say fariseo runapa jutinmi karqan Gamaliel. Payqa Tayta Diospa leyninkunata alimi yachasiq. 35Sayno jorqurkasirmi nirqan: <<Israel runakuna, kay runakunapa contran imatapis manaraq rurar shumaq yarpachakuyay. 36¿Yarpäyankiku nawpata Teudas jutiyuq runa <mandaqmi kä> nir purishqanta? Payta qatiräyarqan chusku pachak (400) runakunami. Sayno puriykaqta wanuskasiyaptin qatiraqninkuna wakpa kaypami mashtakäkuyarqan. 37Saypita censakuy kashqan wisan Galileapita shamuq Judas yurimuptinpis askaqmi qatiräyarqan. Paytapis wanuskasiyaptin qatiraqninkuna mashtakarmi ushakäkuyarqan. 38Saymi noqa yäsï kay runakunata mana cäsupänansipaq. Kikinkunapa yarpaylanpita wilakuyaptinqa nikashlanchömi ushakäkunqa. 39Wilakuyänanpaq Tayta Dios churash kaptinqa manami imanöpapis elaqäsiyankisu. Elaqäsiyta munar cuidätaq Diospa contran ruraykäyankiman>>.
40Saymi Gamaliel nishqanta cäsukuyashpan apostolkunata manana wanusiyarqannasu. Saypa trukanqa qayaykasir astasiyarqan. Nirkurmi Jesúspa jutincho manana wilakuyänanpaq juraparkur kachaskiyarqan. 41Kachaskiyaptinmi apostolkuna Tayta Diosta kushish alabar niyarqan: <<Kuyamashpaykimi kamakäsishkanki qampa jutikicho wilakuyashqäpita nakayänäpaq>>.
42Paykunaqa waran waranmi templu patiucho y wayikunachöpis runakunata yachasir Jesús salvamaqninsi Cristo kashqanta wilakuyaq.
© 2003, Wycliffe Bible Translators, Inc. All rights reserved.
